Прибе очекува промена во однесувањето на судските институции


Скопје, 7 декември, 2018 - 14:45 (META) 

Рајнхард Прибе и групата високи експерти по владеење на правото кои ја оценуваа состојбата со владеењето на правото во 2015 и 2017 година од 5 до 7 декември биле во посета на Скопје за да направат увид во спроведувањето на препораките кои ги даде групата во однос на судските реформи, информираат од Делегацијата на ЕУ во Скопје.

Прибе имал средби со чинители во сферата на правосудството и владини претставници за да го оцени постигнатиот напредок и да ги посоветува властите како да остварат видливи резултати.

Тој потсетил на потребата следниот пакет измени на Законот за судови и на Законот за судски совет целосно да ги содржат веќе издадените и претстојните препораки од Венецијанската комисија и експертите од ЕУ.

„Прибе уште еднаш ја нагласи потребата да се обнови довербата во судските институции, особено преку конкретни мерки за зголемување на транспарентноста и за промена во однесувањето. Воедно, инспекциите на Системот за електронско распределување на судските предмети (АКМИС) треба да дадат конкретни резултати преку истраги од страна на Јавното обвинителство и проверка од страна на Судскиот совет. Судскиот совет и Советот на јавни обвинители треба да работат на препораките од групата високи експерти по владеење на право, особено оние кои се однесуваат на штитење на независноста на судството и на осигурување на неговата отчетност. Прибе ја нагласи и потребата да се спроведат препораките од оценската мисија за обуките во Академијата за судии и јавни обвинители“, се вели во соопштението од Делегацијата на ЕУ.

Од таму додаваат дека посетата на Прибе е дополнување на помошта што ЕУ ја обезбедува за тековните реформи во Судскиот совет и Советот на јавни обвинители, заедно со експерти од ЕУ што им помагаат на овие тела.

Прибе ќе ја извести Европската комисија во контекст на подготовките на следниот редовен извештај за земјата, кој ќе биде објавен во пролетта 2019 година.


Поранешниот шеф на УБК, Владимир Атанасовски, доби 30 дневен притвор


Скопје, 5 декември, 2018 - 9:41 (META) 

Судија на претходна постапка му одреди 30 дневен притвор на поранешниот директор на Управата за безбедност и контраразузнавање (УБК), Владимир Атанасовски по вечерашниот распит во Кривичниот суд.

Атанасовски беше уапсен синоќа, пред зграда спроти МВР.

Тој се товари за кривично дело „здружување заради непријателска дејност“, откако на минатите рочишта за случајот за упадот во Собранието на 27 април минатата година, од дел обвинети беше директно посочуван како главен организатор на насилниот упад во Собранието минатата година.

Атанасовски беше спроведен во Кривичниот суд на распит, а обвинителството побара притвор по сите три основи.

– Побарав мерка притвор по 3 основи, опасност од бегство, влијание врз сведоци за што е способен со оглед на функцијата што ја извршувал и опасност од повторување на кривичното дело – изјави шефицата на Обвинителството за организиран криминал и корупција, Вилма Русковска.

Атанасовски беше на чело на УБК, откако Сашо Мијалков даде оставка во септември 2016 година, до јуни 2017, а сега е советник за безбедност на претседателот на ВМРО-ДПМНЕ, Христијан Мицкоски.


Собранието му го одзеде пратеничкиот имунитет на Груевски


Скопје, 28 ноември, 2018 - 9:46 (META) 

Собранието без расправа, со 62 гласа „за“, на пленарна седница ја прифати препораката на Комисијата за деловнички и мандатно-имунитетни прашања за одземање на имунитетот на Никола Груевски, на барање на судот поради одредување мерка притвор за предмети што ги води Специјалното јавно обвинителство.

Судот бара притвор за Груевски за изборни измами во случај „Титаник“, за нерегуларности при изградба на автопати – случај „Траекторија“, за уривање на „Космос“ – „ТНТ“, за незаконско финансирање на партијата – случај „Талир“, како и за случајот „Шамари во Општина Центар“.

На седницата не присуствуваа пратениците од  опозициската ВМРО-ДПМНЕ, чиј почесен претседател е Груевски. Тие не присуствува и на седницата на Комисијата за деловнички и мандатно-имунитетни прашања, која со пет гласа „за” ги усвои шесте барања од судот за одземање на имунитетот на Груевски, кој избега од Македонија и доби политички азил во Унгарија.

На седницата на Комисијата, претседателот Павле Богоевски изрази разочарување што, како што кажа, нашиот систем не го обезбеди Груевски за издржување на двегодишната казна за случајот „Тенк“. Побара одговорност и завршување на истрагата за бегството на Груевски.


Апелација ги одби жалбите на Јанакиески и Божиновски за укинување на притворот


Скопје, 27 ноември, 2018 - 16:23 (META) 

Кривичниот совет на Апелациониот суд Скопје, по вчерашните јавни седници, денеска одлучи да ги одбие жалбите на обвинетите Миле Јанакиески и Кирил Божиновски на мерките притвор во траење од по 30 дена за предметот на СЈО „Титаник“.

„Кривичниот совет на Апелациониот суд Скопје, по одржаните јавни седници, донесе одлуки со кои жалбите на обвинетите Миле Јанакиески од Скопје и Кирил Божиновски од Скопје, изјавени преку нивните бранители ги одби како неосновани и ги потврди решенијата на Основниот суд Скопје I Скопје, со кои на обвинетите им е определена мерка притвор“, соопштуваат од Апелацискиот суд Скопје.

Обвинителката од СЈО Лиле Стефанова вчера рече дека на 13 ноември 2018 година, Јанакиески се спремал да бега од Македонија, а истото Управата за безбедност и контраразузнавање го констатирала и за Кирил Божиновски.

Двајцата беа притворени на 14 ноември по бегството на поранешниот премиер Никола Груевски во Унгарија.


Заев е загрижен за парламентарното мнозинство за уставни измени


Скопје, 16 ноември, 2018 - 15:03 (META) 

Премиерот Зоран Заев денеска рече дека бегството на Никола Груевски не е поврзано со гласањето во Парламентот за почеток на промените на Уставот кој произлегува од Договорот од Преспа, но истовреме, додаде дека е загрижен за парламентарното мнозинство.

– За мене прв приоритет е политичкиот процес во Парламентот, зошто, заради тоа што обезбедуваме иднина во НАТО и ЕУ. Не дека сето друго не е важно, но тоа е условено од успешноста на ова. Верувам во парламентарниот капацитет на пратениците. Се надевам дека бројките ќе растат, но споделувам дека сум и исплашен за бројките, затоа што не можеме да ја спречиме правдата во државата, постапките на правосудните системи, како постапуваат тие има рефлексија врз случаите. Пратениците имаат историска одлука која ќе се потврдува во процесот, се до усвојување на уставните амандамни – одговори Заев на новинарска констатација дека медиумите пишувале за можноста за бегство од страна на Груевски, ако Парламентот изгласа почеток на уставни промени.

Но додаде дека, бегството на Никола Груевски не е поврзано со гласањето во Парламентот и најважниот политички процес кој се одвива во моментот.

– Зошто нема врска? Затоа што Груевски лично ќе гласаше и немаше да ги стави на осуденичка клупа колегите пратеници. Втората работа е, што има влијание постфестум затоа што не знам дали парламентарното мнозинство во вакви околности ќе се одржи. Затоа што веројатно тој ги предаде и своите поранешни другари, соработници. Тоа го направи на најнечовечки начин и последиците уште ги чувствуваат – рече Заев.


Судот привремено го замрзна имотот на обвинетите во „Империја“


Скопје, 12 ноември, 2018 - 16:07 (META) 

Специјалното јавно обвинителство побарало привремено одземање на имотот заради обезбедување, а судот определил привремени мерки и забрани за отуѓување и располагање со уделите на фирмите за кои постои основано сомнение дека била прибавена имотна корист со кривичните дела за кои се води постапката за случајот „Империја“.

„Воедно судија на претходна постапка, постапувајќи и по два предлога на надлежното обвинителство за привремено запирање на извршување на финансиски трансакции на правните лица за кои постои основано сомнение дека со кривичните дела, лицата опфатени во конкретниот предмет, прибавиле имотна корист, судијата ги прифати предлозите и со решенија наложи на повеќе банки да го запрат одливот на парични средства од сметките на предметните правни лица“, соопштуваат од судот.

Од судот информираат дека одбраната на обвинетите доставила жалби за решенијата на судијата на претходна постапка за определување мерки за обезбедување присуство и дека Кривичниот совет дополнително ќе одлучува по нив.


Јанушев: Партиското СЈО и клиентелистичкиот суд незаконски го замрзнуваат имотот на ВМРО-ДПМНЕ


Скопје, 1 ноември, 2018 - 14:56 (META) 

Заев одлучи да го направи и последниот чекор и да го впрегне неговиот последен адут, партиското специјално јавно обвинителство и клиентелистички расположениот суд и да го замрзне имотот на ВМРО-ДПМНЕ, обвини на прес-конференција генералниот секретар на ВМРО-ДПМНЕ, Игор Јанушев, откако денеска по барање на Специјалното јавно обвинителство (СЈО), Основен суд Скопје 1 донесе решение со кое е изречена привремена мерка за обезбедување на имотот на најголемата опозициска партија.

– За прв пат во историјата на Република Македонија, но и за прв пат на европско тло се бара замрзнување на имот на политичка партија која што е во опозиција. Ова е демократијата и демократските принципи за кои што се залагаат Заев и СДСМ! Принципи со кои што однародената власт се обидува да го умртви секое поинакво размислување и да забрани секакво политичко делување кое се разликува и кое не се согласува со антидржавните политики на Заев и СДСМ. Барањето на СЈО и Одлуката на судиите Димишкова и Реџепагиќ се целосно неосновани и без никаква правна аргументација. Барањето на СЈО и одлуката на судиите се исклучиво, и исклучиво политички мотивирани. Повредени се и протоколите и праксата на Европската конвенција за човекови права и Европскиот суд за заштита на човекови права – рече Јанушев.

Тој нагласи дека замрзнувањето на имотот се направило иако партијата ВМРО-ДПМНЕ како правно лице воопшто не е осомничена во постапката. Тој потсети и дека на вакво барање Апелацискиот суд Скопје веќе еднаш решавал и го отфрлил барањето за замрзнување на партискиот имот.


Во Македонија „врие“ од говор на омраза, но случаите ретко имаат судска завршница


Скопје, 29 октомври, 2018 - 11:16 (META) 

Од стапувањето на сила на новите законски измени на Кривичниот законик за говор на омраза во февруари 2014 година, Кривичниот суд Скопје има осудено само две лица со парична глоба поради говор на омраза.

Бројот на казни е многу мал, споредено со пријавите на дигиталната платформа „Пријави и спротивстави се на говорот на омраза” каде за истиот период се евидентирани 341 случаи, додека полицијата има поднесено кривични пријави за 24 случаи, пишува „Порталб.мк“.

Полицијата го истражува говорот на омраза со бавно темпо, додека судството не го казнува, со оглед на големиот број пријави кои се поднесени во граѓанската дигитална платформа за пријавување на говор на омраза. Освен тоа, во Македонија, особено за време на владеењето на ВМРО-ДПМНЕ, според анализата на „Порталб.мк“, говорот на омраза бил многу нагласен, а имало и еклатантни случаи кога некои лица и групи јавно го користеле, но истовремено не бил санкциониран од органите за редот.

Според податоците кои ги обезбедил порталот, во текот на периодот 2014-2018, Кривичниот суд има осудено само две лица со парична глоба, и тоа во 2017 година.

За истиот период, Министерството за внатрешни работи има евидентирано уште 22 други случаи на говор на омраза, но ниту еден од нив нема судски епилог во Кривичниот суд.

Судот ги осудил двете лица според член 181 од Кривичниот законик, кој предвидува парична глоба или затвор до три години за лице кое се потсмева со странска држава или со нејзините највисоки државни претставници.

Дополнителни податоци за говор на омраза може да се најдат и преку интернет платформата „Пријави и спречи говор на омраза”. Граѓаните во оваа веб-платформа пријавиле десет пати повеќе случаи на користење на говор на омраза во споредба со кривичните пријави кои се покренати од страна на полицијата.

Според статистичките податоци кои се објавуваат преку оваа веб-платформа, од 2014 до 2018 година, граѓаните пријавиле 341 случаи на користење на говор на омраза, а во повеќето од нив ваков вид говор се користел врз основа на етничка, политичка и сексуална припадност.

Инаку, овој месец, МВР има поднесено кривични пријави против лица кои користеле говор на омраза и им се заканувале на пратениците кои гласаа за уставните измени, како и против новинарот Миленко Неделковски и актерот Тони Михајловски, и двајцата блиски со поранешната влада на ВМРО-ДПМНЕ. Неделковски е обвинет за „Загрозување на безбедноста” и „Дистрибуција на расистички и ксенофобични материјали”, додека Михајловски е обвинет заради упатена закана кон новинарот Бранко Тричковски.

Сите граѓани кои се изложени на говор на омраза, случаите може да ги пријават во полиција односно МВР, во Обвинителство, Комисијата за заштита од дискриминација, Агенцијата за аудио и аудиовизуелни медиумски услуги, Здружението на новинари на Македонија – Совет на Честа, во Советот за етика во медиумите во Македонија (KЕММ), но и во онлајн платформа “www.govornaomraza.mk”.


Пo Сашо Василевски и пратеникот Љубен Aрнаудов излегува од куќен притвор


Скопје, 16 октомври, 2018 - 17:00 (META) 

Апелацискиот суд Скопје го прифати барањето на пратеникот на ВМРО-ДПМНЕ, Љубен Aрнаудов, со гаранција да се брани од слобода, однoсно да му се укиине мерката притвор. Тој е еден од пратениците кои обвинителството ги товари за упадот и насилствата во Собранието на 27 април минатата година.

Утрово Кривичниот совет на Основен суд Скопје 1 ја прифати гаранцијата од 400.000 евра и му ја укина мерката домашен притвор на Сашо Василевски, исто така пратеник на ВМРО-ДПМНЕ.


Ивона Талевска ги вратила парите за затаен данок, судот ѝ го вратил пасошот


Скопје, 18 септември, 2018 - 15:59 (META) 

Новинарката на „Сител“ , Ивона Талевска, на државна сметка ја уплатила целата сума од пресудата која ѝ ја изрече судот во предметот за даночно затајување „Тифани“, потврдиле од кривичниот суд за „Макфакс“.

Талевска, според пресудата, како физичко лице вратила над 27 илјади евра за затаен данок од 6 години, уплатила 76 илјади денари за вештачењето на СЈО, 1.000 евра како споредна штета и 2.000 денари судски трошоци.

„Обвинетото физичко лице во предметот за кој се интересирате во целост ги има платено сите трошоци и утврдената сума во пресудата. Што се однесува до правното лице, извршувањето ќе се спроведе штом тоа ќе ја прими второстепената пресуда“, велат од судот.

На осудената Талевска, судот ѝ го вратил пасошот, кој ѝ беше одземен како дел од мерките за претпазливост кои ги побара специјалното јавно обвинителство.

Талевска беше условно осудена. Таа нема да помине две години во затвор доколку во наредните четири не стори ново кривично дело.