Истражување: Младите многу малку внимателно читаат и размислуваат


Скопје, 11 март, 2019 - 14:26 (META) 

Поголем дел од младите имаат релативно добри познавања и вложуваат соодветни напори да откријат дали некоја вест или друга медиумска содржина содржи дезинформација, но испитувањето на нивната способност за логичко размислување и внимателно читање покажуваат дека само 1 од 100 ги исполнува критериумите за такво нешто.

Тоа го покажа новото истражување спроведено преку проектот „Со критичко мислење до граѓани со медиумска умешност – КриТинк“, на Фондацијата за интернет и општество „Метаморфозис“ и „Евротинк“ – Центар за европски стратегии, поддржано од Европската Унија.

Со анкета на 301 студенти на возраст од 18,5 до 23 години, во која речиси подеднакво биле опфатени лица од машки и од женски пол, се добиени интересни резултати во однос на тоа како младите се информираат, какви медиуми следат, но најинтересно од сè дали може да ги препознаат дезинформации и да утврдат дали некоја работа е вистинита или не. Одговор бил побаран од студенти од Правниот факултет при УКИМ, од Факултетот за безбедност при битолскиот универзитет и од студенти на правни, политички и технички науки при Универзитетот на Југоисточна Европа.

Како што објасни Александар Стојановски, постар истражувач во „Евротинк“ – Центар за европски стратегии, испитаниците, во кои главно се најзастапени бруцошите, одговарајќи на прашања дале интересна слика за тоа колку младите реално се согледуваат себеси, односно иако генерално кажуваат дека ги исполнува интелектуалниот напор и генерално проверуваат дали некои информации што ги добиваат од социјалните мрежи и медиумите се точни или не, само 1 од 100 одговориле точно на четирите логички прашања чија цел била да се провери колку размислуваат.

– Само тројца од 301 одговориле точно на сите четири логички прашања, кои не се сврзани ниту со познавање на јазикот ниту со некакви посебни познавања, туку само за тоа колку размислуваат. Од едно од прашањата се гледа и дека воопшто не се посветиле ниту убаво да го прочитаат прашање, туку само почнале да го читаат. Ако човек го прочита целосно прашањето, ќе сфати веднаш кој е точниот одговор. Тоа зборува и колку всушност младите читаат – рече Стојановски.

Истражувањето покажало дека поголем дел од младите рекле дека сакаат да ги проверат работите што ги читаат, но најчесто тоа го прават недоволно. Кога станува збор за местата каде тие доѓаат до информациите, предничат социјалните мрежи и веб-страниците, а потоа се телевизите. Но кога станува збор за тоа, младите претпочитаат странски содржини наспроти домашните, а речиси и не гледаат контакти емисии, односно само еден испитаник одговорил дека го прави тоа. Потоа на листата на популарност кај адолесцентите се печатените медиуми, а радиото е последното, иако бројката на студенти што ги следат овие два типа медиумите се бројат на прстите на едната рака.

Кога станува збор за популарноста на социјалните мрежи, 92,4% отсто од испитаниците се определиле за Инстаграм, а 91,7 отсто за Фејсбук, а потоа за другите социјални мрежи – Снепчет, Твитер и Линкдин.


Опомени и казни за студентите кои ќе фрлаат ѓубре во „Пелагонија“


Скопје, 12 февруари, 2019 - 15:30 (META) 

Екипите на „Комунална хигиена“ денеска и утре ќе го чистат дворот на Студентскиот дом „Пелагонија“, откако на социјалните мрежи се појавија фотографии од дворот на студентскиот дом полн со ѓубре.

Директорот на домот, Бујар Муртезани, најави дека во иднина студентите кои ќе фрлат отпад во дворот ќе се соочат прво со опомена, потоа со парична казна, а доколку не го поправат своето однесување им се заканува и бркање од домот.

– Јас и службите сме во редовна комуникација со студентите. Грдата слика ги нарушува имиџот на домот. Ќе биде поставен видео надзор и ќе има санкции. Сите студенти посовесно да се однесуваат – изјави Муртезани.

На денешната акција за чистење присуствуваа и градоначалникот Петре Шилегов, градоначалникот на Општина Кисела Вода, Филип Темелковски и директорот на ЈП „Комунална хигиена“, Абдусамед Шабани.

– Ако сакаме чист и уреден град, сите треба да внимаваме каде го фрламе своето ѓубре. Овој пат, грдата слика за Скопје е оваа дива депонија создадена во дворот на студентскиот дом „Пелагонија“. Иако за чистење на овој двор не се надлежни ниту Градот Скопје, ниту ЈП „Комунална хигиена“, денеска покажуваме добра волја и спроведуваме акција за расчистување на оваа дива депонија. Нашата цел е да испратиме силна порака до граѓаните, до куќните совети, до институциите и до фирмите да си го исчистат ѓубрето. Сите заедно да покажеме одговорност кон средината во која живееме, за да си обезбедиме поздрав и поквалитетен живот. Сите заедно да застанеме на патот на создавањето диви депонии. На тој начин стоиме на патот на загадувањето на воздухот, на почвата и на водите – рече Шилегов.


Културата на заплашување во Македонија ги потисна студентските протести


Тетово, 25 декември, 2018 - 16:52 (META) 

Тивко помина т.н. “ултиматум” што студентите од Тетово му го поставија на Тетовскиот универзитет на минатонеделниот протест. Ниту првите ниту вториот не прифаќаат да се изјаснат со цел јавноста да дознае за тоа што се случи со студентските барања, дали некој воопшто ги сослушал, прашува „Порталб.мк“.

Иако не зборуваат јавно за имиња, но организаторите на протестите и некои од демонстранти, потврдуваат за „Порталб.мк“ дека се соочуваат со разни притисоци па до “поздрави” до семејствата на оние кои протестираат, за да не продолжат со барањето на нивните права.

Оваа култура на садење страв во нив ги принуди студентите да замолчат и тивко да го прифатат нивниот пораз против системот кој што го осудија дека е корумпиран и штетен за нивната иднина.

Интересен е дури и фактот што, наместо кон одговорните, студентите критиките ги насочија кон медиумите. Поради тоа и уследи последното објавување на информацијата на последната страница каде што се најавуваа  протестите, кои до пред една недела беа гласни, па дури даваа впечаток дека можеби ќе ја следат масовноста и сериозноста како протестите во Албанија.

“Студентското движење нема документ наречен Ултиматум, туку има барања упатени до универзитетите, Министерството и Владата. Насловите кои се појавуваат во медиумите може да се протолкуваат само како акти на поединци кои ги палат нашите барања, како и држење далеку на политичките партии од оваа КАУЗА!” е чудното соопштение од 23 декември, кој веројатно доаѓа од нивната хаотична организација.

Од друга страна, освен соопштението на Тетовскиот универзитет дека ќе се направи онлајн платформа за студентите, преку која, како велат, ќе “може да се артикулираат сите потреби, барања и нивните проблеми, кои ќе се разгледаат со најголема сериозност од органите на академските единици и на Универзитетот” од оваа институција , но не се кажа ниту еден збор за барањата на студентите.

На континуираните прашања на „Порталб“, за тоа што одлучило раководството, за која ни кажаа дека имале собир и дискутирале, портпаролот ни го даваше истиот одговор “ќе има соопштение”.

И соопштението беше следново, а од него може да се види колку е сериозен Универзитетот и дека “загриженоста на секој студент е нивна грижа”.

“Затоа сите расположливи механизми и средства ги имаме ставено, а ќе продолжиме и понатаму да ги ставаме на располагање во корист на студентската младина, која претставува главен столб на целото општество. Во духот на транспарентност и добро на студентската заедница на Универзитетот во Тетово, во наредните денови ќе подигнеме  онлајн платформа за студентите, преку која ќе може да се артикулираат сите потреби, барања и проблеми, кои ќе се третираат со најголема сериозност од телата на академските единици и на Универзитетот. Универзитет во Тетово ве уверува дека ќе размисли за секое академско и студентско прашање, со цел да се создаде стабилна платформа за иднината на целото општество.”

И со тоа завршува соопштението.


Протест на студентите Албанци денеска во Тетово


Тетово, 18 декември, 2018 - 11:32 (META) 

Денеска во 12.30 часот во центарот „Илирија“ во Тетово ќе се одржи протест на албанските студенти под мотото #MeStudentët (#СоСтудентите).

Тие со ова им се придружуваат на студентските протести во Албанија и ќе истакнат 13 барања, пишува „Порталб.мк“.

Меѓу нив најглавни се барањата за укинување или субвенционирање на цената од 50 евра за двомесечната пракса, укинување на сумата од 100 евра за отпишување, како и објавување на Статутот на Универзитетот во Тетово и извештајот за евалуација на учениците која ја прават професорите на веб-страницата на универзитетот.


Студентската потрошувачка кошничка изнесува 22.435 денари месечно


Скопје, 11 декември, 2018 - 13:35 (META) 

Студентските месечни трошоци или „студентската кошничка“ изнесува 21.410 денари за студенти кои студираат со партиципација и 22.435 денари за студенти кои студираат со кофинансирање, односно кои плаќаат школарина.

Таа вклучува трошоци како партиципација, односно школарина, трошоци поврзани со факултетот, трошоци за секојдневен живот, трошоци за превоз, домување но и режиски трошоци.

Ова го покажуваат податоците од истражувањето „Колку и на што троши еден македонски студент?“ од страна на тим на Здружението на млади аналитичари и истражувачи (ЗМАИ) и Младинскиот образовен форум (МОФ) со поддршка на Фондација Отворено општество – Македонија (ФООМ).

„Студентскиот стандард е доста низок и финансиска состојба на студентите е навистина тешка. Најголемиот дел од нив живеат со родителите или старателите, кои се и најзначаен извор на финансии за студентите. На месечно ниво, за секојдневни трошоци, студентите располагаат просечно со 8.894 денари, износ кој за споредба, претставува 36,3 проценти од просечната месечна нето-плата од мај 2018, или 74,1 проценти од минималната месечна нето-плата во државата. Од овие средства, тие најмногу трошат на храна, алкохол и цигари, како и на хигиена и медицински производи. Најмалку трошат на културно-забавни настани, книги, списанија, весници или пак интернет-претплати“, се вели во истражувањето.

Студентите велат дека една од најдобрите опции за подобрување на нивниот стандард е можноста за платена студентска работа, која во моментов, системски, во државните институции не е препознаена, ниту пак се стимулира соработка со приватниот сектор. Воедно, како поволности кои би го олесниле студентскиот живот, студентите ги препознаваат и бесплатниот јавен превоз, но и картичките за субвенционирани цени за исхрана и билети за културни настани.

„Студентите детектирале повеќе фактори кои влијаат на висината на трошоците на студирање, како што се животните и културните навики на студентите, понатаму ефикасноста на студирањето, т.е. рокот во кој студентите ги завршуваат студиите, но и финансиската моќ на родителите односно економската состојба на семејствата. Дополнително, фактор кој влијае врз висината на трошоците е немањето критериум за финансирање во високото образование, особено поради фактот што различни универзитети имаат различен ценовник за административни трошоци“, се додава во истражувањето.

Истражувањето беше спроведено во периодот февруари – март 2018 година и истото опфати 945 студенти од пет државни универзитети.


Практичната работа на студентите на Филозофски факултет ќе се унапреди


Скопје, 11 декември, 2018 - 11:23 (META) 

Министерството за труд и социјална политика денеска потпиша Меморандум за соработка со Филозофскиот факултет при Универзитетот „Св. Кирил и Метoдиј“ во Скопје, со кој ќе се унапредува практичната работа на студентите.

„Практичната работа е неопходен дел од секој квалитетен образовен процес. Образовниот систем, во соработка со сите државни институции, приватниот и граѓанскиот сектор, треба целосно да ги подготви студентите за тоа што ги чека во реалноста. Ова е периодот кога треба да им помогнеме да созреат, да работат на својот личен и професионален развој. Само на овој начин можеме да очекуваме вистински квалитетен кадар, подготвен за сите предизвици надвор од академската клупа“, изјави министерката за труд и социјална политика, Мила Царовска.

Двете институции ќе соработуваат во повеќе области на социјалната политика, детската и семејна заштита, работните односи, образовна вклученост, специјална едукација и родова еднаквост, како и во однос на активности против дискриминација, овозможување еднакви можности и помагање на процесот на европска интеграција.

Ќе се спроведат повеќе активности, меѓу кои заеднички научни истражувања, организирање и спроведување на обуки, тркалезни маси, дебати, конференции и слично.

Во рамки на оваа соработка Министерството за труд и социјална политика ќе обезбеди практична работа на студентите од Филозофскиот факултет, стручно менторство за време на практичната работа и пристап до податоците потребни за научно-истражувачката дејност на Филозофскиот факултет при Универзитет „Св. Кирил и Метoдиј“ Скопје.


Студенти протестираат неколку дена пред истекот на рокот за соросовиот Универзитет да си замине од Унгарија


Будимпешта, 27 ноември, 2018 - 9:40 (META) 

Оваа седмица е последниот рок по кој ќе се види дали Централно-европскиот универзитет (ЦЕУ), приватниот универзитет основан во 1991 од страна на финансиерот и филантроп Џорџ Сорос, ќе остане во Унгарија, пишува „Глобал војсес“. Оваа институција, со седиште во Будимпешта од 1993, е во правна неизвесност уште од април 2017, кога унгарската влада ја усвои контроверзната измена на постоечките закони за високо образование во земјата.

Студентите се собраа да протестираат во саботата на 24 ноември и го окупираа главниот плоштад пред зградата на Парламентот во Будимпешта за да ја одбранат академската слобода во земјата.

Кон крајот на октомври, претседателот и ректор на ЦЕУ Мајкл Игнатиеф, изјави дека институцијата нема да ја чека владата до 1 јануари 2019 да го потпише документот со кој ќе се обезбеди местото на универзитетот како унгарско-американска академска институција во Унгарија. Наместо тоа, Централно-европскиот универзитет даде рок на унгарската влада до 1 декември 2018 и започна со воспоставување кампус во главниот град на соседна Австрија, Виена, каде што студентите од прва година би се префрлиле во академската 2019 година.

Универзитетот се подготвува да се исели во друга држава. „Универзитетот“ во случајов ги опфаќа сите засегнати од преселбата, вклучително и студентите, студентите на докторски студии, истражувачите, професорите и вработените од службата, од кои дел работат во ЦЕУ во Будимпешта повеќе од една деценија.

Разговорите кои се водат изминатиов период во унгарските академски кругови се во знакот на темата за академската слобода. Корвиновиот универзитет во Будимпешта се соочува со реформа со која би се организирале активностите на универзитетот според структура за правење профит, со што драстично би се намалил бројот на студенти стипендирани од државата. Истовремено, Катедрата за општествени науки при универзитетот ЕЛТЕ започна со штрајк и ја разгоре дискусијата за родови студии како резултат на затворањето на програмата. Покрај ова, унгарската Академија на науките се бори против намалувањата во буџетот кои се најавени од страна на унгарската влада.

Голем број студенти, истражувачи, професори и нивни поддржувачи излегоа на протест во саботата за да го свртат вниманието кон борбата за академската слобода во Унгарија. Според некои медиуми на протестот излегле илјадници луѓе а говорници биле претставници од ЕЛТЕ, Корвиновиот универзитет, ЦЕУ и унгарската Академија на Науките.

Говорниците го адресираа прашањето за академската слобода и законот од април 2017 кој го присилува ЦЕУ на егзил и повикаа на солидарност со работниците поради минатонеделната најава за нов закон кој ги изложува работните на експлоатација преку прекувремено работење. Се чини дека на списокот на проблематични регулативи во Унгарија му нема крај, а говорниците, од кои голем дел се општествени научници, ја критикуваа измената во Уставот со која се криминализира бездомништвото во земјата.

Говорниците и протестирачите ја искористија оваа можност да го искритикуваат унгарскиот премиер Виктор Орбан заради доделувањето азил на поранешниот македонски премиер Никола Груевски, бегалец од законот кој беше осуден во неговата земја на двегодишна казна затвор поради корупција.

Под мотото „Слободен универзитет“, студентското движење „Студентите за ЦЕУ“ (Students4CEU) го окупираше плоштадот Кошут пред Парламентот при крајот на саботниот протест. Студентите ја слават академската слобода со отворени предавања и проекции преку седмицата.

Окупацијата на плоштадот Кошут ќе заврши на 1 декември. Тогаш е и крајот на можноста за Централно-европскиот универзитет целосно да остане во Будимпешта.


Младите лекари и студенти предупредуваат: Нѐ демотивираат непотизмот и ниските плати


Скопје, 12 ноември, 2018 - 13:19 (META) 

Лекарите бегаат од земјава не само поради ниските плати, туку и поради демотивирачките услови со кои се соочуваме уште во текот на студиите, велат студентите на Медицинскиот факултет, кои од денеска се дел од Неделата на студенти по медицина, што ја организира Клубот на млади лекари.

– Проблемот е во тоа што не секогаш најдобриот студент ја добива највисоката оценка, а дополнително демотивира тоа што полесно си поминуваат децата на професори, има и партиски врски. Нема простор за нас, колку и да се трудиме – вели Соња Граждани, студентка во шеста година.

Nikola Brzanov hirurg - negovaД-р Никола Брзанов, претседател на Клубот на млади лекари, на отворањето на Неделата на студенти по медицина рече оти загрижува податокот дека 1.200 лекари ја напуштиле државата во период од седум години.

– Клубот на млади лекари ги вклучува младите во креирањето нови здравствено политики. Поентата ни е да сме конструктивен партнер во промените. Се бориме против непотизмот и за праведно општество – рече Брзанов.

Живко Мукаетов, генералниот директор на „Алкалоид“, кој ја поддржа Неделата на студенти по медицина, им порача на студентите дека и во Македонија може да се развиваат.

– Поддржувањето на вакви идеи и настани секогаш е од заеднички интерес. Ние работиме во насока на поддршка, со тоа што  стипендираме студенти на медицина преку фондацијата „Трајче Мукаетов”, како и преку други различни активности. Голем број млади лекари ја напуштаат државата, а за да де спречи тоа, секој треба да придонесе во својот домен. Вие сте новата генерација идни лекари и ние сметаме на вас во секој поглед – рече Мукаетов.

Клубот на млади лекари со поддршка на „Алкалоид“ од денеска до петок организира Недела на студентите по медицина. Нејзината цел е студентите да се запознаат со искуствата на веќе дипломираните лекари.

Сите студенти кои беа на отворањето на настанот во Медицинскиот факултет, денеска добија бесплатни бели мантили.

Како дел од настаните поврзани со проектот, предвидено е утре да има разговори со специјалисти и специјализанти, а задутре ќе има мотивациски говори на успешни лекари.


Медицинските струки се виза за работа во странство за младите од Источниот регион


Штип, 4 септември, 2018 - 16:59 (META) 

На последниот ден од уписите на универзитетот „Гоце Делчев“ од Штип, се повтори сликата од уписите во средните училишта. Пополнети се речиси сите места на факултетите со медицинските струки. Според последните бројки до 15 часот се пријавиле 389 завршени ученици.

– Се очекува и во вториот уписен рок да има голем интерес за Факултетот за медицински науки, од студенти од Медицинскиот факултет од Скопје, кои ќе конкурираат на некои од слободните места од студиските програми – изјави Кире Барбареев, проректор за настава.

На првиот уписен рок се пријавиле 1.600 завршени средношколци. Од нив 120 се студенти од Турција, Бугарија и Србија. Покрај за медицинските науки, интерес има и за Информатика, Економскиот, Филолошкиот и Правниот факултет.

Идентична слика е и во средните училишта во Штип. Целосно пополнети се паралелките во прва година на Средното медицинско училиште „Јане Сандански“, каде се запишани 238 ученици од Штип и регионот.

Остантите три средни училишта побараа дозвола од Општина Штип да формираат паралелки со помал број од законски дозволениот минимум од 25 ученици, поради помалиот број на запишани во прва година.

Интересот за медицинските струки не е случаен. Отворена е можноста за работа во странство, особено на завршените лекари со лиценца и медицинските сестри. Германија е најчесто земјата каде заминуваат, за што покрај основното познавање на германскиот јазик, се заминува и со бугарски пасош. Во источниот дел на Македонија активни се агенции кои се специјализирани при посредувањето во наоѓање работа по германските болници.

Последиците од масовното заминување на медицински кадар од Истокот, најдобро се рефлектира во Клиничката болница во Штип, која има потреба од најмалку 100 нови работувања од средношколски кадар.


Професори од Оксфорд, Сорбона, Колумбија… со поддршка за Преспанската спогодба


Скопје, 23 јули, 2018 - 15:04 (META) 

Повеќе од 40 универзитетски професори, интелектуалци, филозофи и студенти ја изразија својата поддршка за Преспанската спогодба на Македонија и Грција за решавање на спорот за името, оценувајќи го како пробој и најдобро решение за решавање на 27-годишниот спор на двете земји.

Во писмо до британскиот весник „Гардијан“, потписниците кои се од некои од највидните светски универзитети, како Оксфорд, Сорбона, Лондон, Болоња, Колумбија, Рим, Варшава, Кембриџ, Берлин, порачуваат дека Договорот ги дефинира политичките, историските и културните граници меѓу класичната Грчка Македонија и, како што велат, Северна Македонија, појаснувајќи дека македонскиот идентитет може да биде споделен меѓу народи кои ќе му придадат разични значења.

„Тој го почитува достоинството и правото на самоопределување на два народа и ја потврдува желбата на двете земји за мирно коегзистирање“, стои во  писмото.

Потписниците посочуваат дека двете страни морале да се потрудат околу причините за загриженоста на другата страна и да направат отстапки и таа да има придобивка.

„За Грција, тоа е географската одредница во сложеното ново име (Северна Македонија), нејзината примена дома и во меѓународни рамки, како и барањето Уставот на ПЈРМ да биде сменет за да соодветствува. За Северна Македонија, тоа е прифаќањето на постоење македонски јазик како дел од словенското семејство на јазици (факт што долго време го прифаќаат ОН и Грција), определувањето на националноста како „Македонско/граѓани на Северна Македонија“ и, најбитно, ветувањето за почеток на пристапни преговори со НАТО и ЕУ. Кога ќе биде финиширан, овој правно обврзувачки меѓународен договор ќе ги разреши прашањата на оспорениот политички идентитет, што е распространет во мултикултирните општества, и ќе понуди модел за решавање на други долготрајни спорови во иднина“, се вели во писмото до Гардијан.

Потписниците, коишто ги наведуваме подолу, велат дека Договорот сè уште се соочува со многу пречки во двете земји, „каде острите противници и екстремистите се мобилизираат против него“.„Во овие критични времиња, кога Европа е соочена со порастот на екстремно десничарскиот национализам и расизам, а на Балканот и во Европа повторно се појавува опасниот ревизионизам кој ги дели луѓето на „предавници“ и „патриоти“, сега повеќе од кога било претходно е да се поддржат оние што презедоа ризици за да донесат помирување. Го поддржуваме овој праведен договор и ги повикуваме сите страни да го исполнат својот дел од спогодбата“, се вели во писмото потпишано од повеќе од 40 професори, интелектуалци, европратеници, филозофи, студенти.

Писмото е потпишано од:
Kalypso Nicolaïdes University of Oxford
Etiennne Balibar Université deParis-Ouste
Toni Negri, филозоф, Paris
Mary Kaldor University of London
Costas Douzinas Birkbeck, University of London
Judith Butler University of California, Berkeley
Jean Luc Nancy, филозоф, Strasbourg
Barbara Spinelli, пратеник во Европскиот парламент
Wendy Brown University of California, Berkeley
Joanna Bourke Birkbeck, University of London
Luciana Castellina, Rome
Frieder Otto Wolf, Freie Universität Berlin
Catherine Malabou, Kingston University
Claude Calame, EHESS, Paris
Bo Stråth, University of Helsinki
Susan Buck-Morss, City University of New York
Sandro Mezzadra, University of Bologna
Patrice Maniglier, Université Paris Nanterre
Elsa Stamatopoulou, Columbia University
Niccolo Milanese, European Alternatives
Giacomo Marramao, Roma Tre University in Rome
Edouard Delruelle, Université de Liège
Peter Schöttler, Freie Universität Berlin
Ulrike Guérot, Danube University Krems, Austria
Ahmet Insel, Université Paris 1 Panthéon-Sorbonne
Philippe Büttgen, Université Paris 1 Panthéon-Sorbonne
Yves Sintomer, Université Paris 8 Vincennes Saint-Denis, CSU-Cresppa
Emily Apter, New York University
Oscar Guardiola-Rivera, Birkbeck, University of London
Albena Azmanova, University of Kent
Louis Wolcher, University of Washington
Jean-Numa Ducange, University of Rouen
Michal Kozlowski, University of Warsaw
José Luis Villacañas, Universidad Complutense de Madrid
Gilles Manceron, историчар, Paris
Diogo Sardinia, Paris University
Bertrand Ogilvie, Université Paris 8 Vincennes Saint-Denis
Yves Sintomer, Université Paris 8 Vincennes Saint-Denis
Franck Fischbach, Univesite de Strasbourg
Teresa Pullano, University of Basel
Matthieu de Nanteuil, University of Louvain
Pietro de Matteis, University of Cambridge
Guillaume Sibertin-Blanc, Université Paris 8 Saint-Denis
Stefan Jonsson, Linköping University
Manuela Bojadzijev, University of Berlin
Rada Ivekovic, College International de Philosophie, Paris