Пејовска Дојчиновска: Видовте како не треба, направете успешна Антикорупциска


Скопје, 12 декември, 2018 - 16:31 (META) 

Успешна Антикорупциска комисија прават повеќе компоненти добра правна рамка, членови со висок интегритет, знаење и одважност, и стручна служба со ресурси. Сево ова може да го реши Собранието, ако го исклучи партискиот ракурс, порача Софка Пејовска Дојчиновска, поранешен генерален секретер на Секретаријатот на Државната комисија за спречување корупција, на конференцијата „Итни приоритетски реформи: Јакнење на институционалната рамка во борбата против корупцијата: Има ли напредок?“ во организација на Платформата на граѓански организации за борба против корупцијата, по повод Меѓународниот ден на борбата против корупцијата.

Пејовска Дојчиновска, која во ДКСК е од „некој ден пред првиот“ од основањето на институцијата во 2002 година, во улога на хроничар го опиша подемот и падот на Антикорупциската.

– Кога се создаваше ја доживувавме како ѕвезда на институционалното небо на нашата држава. Но, како што минуваше времето, како се случуваше тоа што се случуваше со државата, така ѕвездата  темнееше и се претвори во црна дупка. Таа направи самоуништување – рече првата генерална секретарка, прашувајќи се: „Каде патем ја изгубивме? Веројатно кај изгубената држава.“

По првите успешни години, раскажа Пејовска Дојчиновска, вработените во стручната служба се соочиле со антикорупционери назначени како награда за партиска лојалност.

– Гледајќи како дел од нив исполнуваат нарачки од менторите, а вршат мобинг врз вработените во Секретаријатот, заканувајќи се и со откази, како се затскриваат зад статистиките за анкетните листови, а немаат храброст да ги допрат вистинските случаи, што кулминираше со познатата изјава „Најљубезно ве замолувам ова прашање да го затвориме за век и векови – амин“, да затворат очи пред слоновите кои минуваат пред нив и да ги допираат мравките, да поминеш претседателски мандат без ниедна прес-конференција за тоа што си го сработил или да одиш до таму да направиш врата од задната страна за да ги одбегнеш новинарите кои те чекаат пред влезот, да се обидеш да ги класифицираш извештаите, за да ги сокриеш информациите – раскажуваше поранешната генерална секретарка.

Но, нагласи таа, од тоа научивме дека Kомисијата треба да ја сочинуваат лица со многу високо ниво на интегритет, знаење, посветени, одважни. Во неа не смее да влезат луѓе кои во извештаите на европската комисија ќе бидат окарактеризирани како „политички лојални“.

– Сакам да верувам во поговорката секое зло за добро. Сега се наоѓаме пред нов почеток. Се надевам дека ја научивме лекцијата, и дека ќе им биде водилка на пратениците при изборот на нови членови според многу повисоки критериуми. Направете избор на луѓе што ќе ја вратат комисијата на патеката што ја газеше првите години. Направете го тоа, господа пратеници, и бидете сигурни дека во куќата чека Секретаријат со посветени луѓе – порача Пејовска Дојчиновска.

Таа додаде дека и покрај тоа што Антикорупциската чека нов состав, стручната служба функционира во сите сегменти, освен што не може да донесува одлуки во име на комисијата.


Работната подгрупа за помирување денеска ќе продолжи со работа


Скопје, 12 декември, 2018 - 9:44 (META) 

Работната подгрупа за помирување на Интерпартиската парламентарна група за помирување, реформи и интеграција во Собранието на Република Македонија денеска во 10.30 часот ќе го продолжи вториот работен состанок.

Претходниот состанок кој се одржа во понеделникот, беше прекинат поради нови информации за кои се потребни дополнителни консултации во врска со законското решение за амнестија на дел од учесниците во настаните во Собранието на 27 април минатата година.

Работната подгрупа за помирување има задача да го подготви законското решение за помилувањата и националното помирување, додека останатите две групи формирани во рамките на Координативното тело за помирување, се за интеграција и реформи.

Минатата недела беше најавено дека до петок ќе има законско решение.


Затрупана со 500 жалби, Комисијата за слободен пристап до информации чека доекипирање


Скопје, 11 декември, 2018 - 17:05 (META) 

Комисијата за заштита на правото на слободен пристап до информации од јавен карактер не може да функционира и да донесува одлуки, бидејќи недостигаат два члена, а мора да има петмина за да се донесат одлуките.

Поради тоа сега на докомплетирање на составот на комисијата чекаат околу 500 жалби, велат од Стручната служба на Комисијата.

– Стручната служба на Комисијата, односно Секретаријатот, работи постојано по жалбите и изготвува предлози, но резултатите не се гледаат, бидејќи не може да се донесат одлуки. Во моментов имаме накај 500 жалби и се чека Собранието да избере нови членови за да почне Комисијата за работа – изјавија денеска за „Мета“ од Секретаријатот на оваа комисија.

Единствената новина од септември е што на 18 октомври Собранието го назначи Блерим Исени, дотогашниот заменик – претседател за нов претседател на Комисијата, но работата е далеку од завршена, бидејќи треба да се изберат и членови, а постапката е заглавена во парламентот.

Комисијата е во ваква состојба по оставката на дотогашниот претседател Ѓорѓи Сламков и на двајца членови на 3 мај годинава. Потоа се распишаа два огласи, од кои првиот беше поништен, а постапката за вториот не се знае кога ќе заврши.


Координативното тело за помирување ќе има состанок во среда


Скопје, 10 декември, 2018 - 14:14 (META) 

Интерпартиската парламентарна група за помирување, реформи и интеграција во Собранието на Република Македонија, следниот состанок ќе го одржи најверојатно в среда, најавија членови на групата.

Денешниот состанок на работната подгрупа за помирување беше прекинат поради нови информации за кои се потребни дополнителни консултации во врска со законското решение за амнестија на дел од учесниците во настаните во Собранието на 27 април минатата година.

Претседавачот со оваа подгрупа Зекир Рамчиловиќ рече дека дополнително ќе информира за продолжението на состанокот на кој требаше да се доуреди предлог законот за амнестија.

На денешниот состанок на подгрупата присуствуваше и заменик-министерот за правда Оливер Ристески.


Џафери: Уставните измени ќе се гласаат на 15 јануари


Скопје, 10 декември, 2018 - 12:40 (META) 

Во понеделник на 17 декември ќе почне комисиската расправа за предлог амандманите на Уставот, изјави денеска собранискиот спикер Талат Џафери по средбата со неговиот албански колега Грамоз Ручи.

Пленарната собраниска седница е закажана за 9 јануари која се очекува да заврши за една недела и потоа на 15 јануари да се гласа за измените на Уставот. За крајното гласање повторно е потребно двотретинско мнозинство од вкупниот број на пратеници.

Од 17 декември започнува да тече и рокот за партиите да поднесуваат амандмани на амандманите.

Последните две јавни дебати за уставните измени ќе се одржат денеска во Штип и во Тетово.


Работната подгрупа за помирување денеска ќе го одржи вториот состанок


Скопје, 10 декември, 2018 - 9:45 (META) 

Работната подгрупа за помирување на Интерпартиската парламентарна група за помирување, реформи и интеграција во Собранието на Република Македонија денеска во 10 часот ќе го одржи својот втор работен состанок.

Работната подгрупа за помирување има задача да го подготви законското решение за помилувањата и националното помирување, додека останатите две групи формирани во рамките на Координативното тело за помирување, се за интеграција и реформи.

Минатата недела беше најавено дека до петок ќе има законско решение.


Дебата: Рамниот данок им оди во прилог само на богатите


Скопје, 6 декември, 2018 - 15:08 (META) 

Рамниот данок не даде ниту еден од очекуваните ефекти, тој им оди во прилог само на најбогатите.

Ова беше истакнато на јавната дебата за даночната реформа во Собранието на која учествуваа министерот за финансии Драган Тевдовски, пратеници, поранешни министри, експертска јавност и претставници на бизнис-секторот.

Тевдовски на дебатата ја истакнал потребата од воведување на праведен систем на оданочување.

– Најдоховните еден процент граѓани имаат вкупна ефективна даночна стапка која е пониска од онаа на останатите. Затоа, прагот за прогресивното оданочување е поставен за да ја опфати токму оваа група граѓани. Рамниот данок им оди во прилог на богатите. Со воведување на рамниот данок само се зголемуваше учеството на богатите во вкупниот доход – рече Тевдовски.

Поддршка за даночната реформа дале и поранешните министри Никола Поповски, Петар Гошев и Абдулменаф Беџети.

– ЕУ вели дека даночниот товар е 40 проценти, а во еврозоната 42 проценти. Србија и Хрватска имаат од 46 до 47 проценти даночен товар. Ние имаме помал даночен товар. Ваквата поставеност креира дефицит. Преку тоа се креира јавен долг – рече Никола Поповски, универзитетски професор и поранешен министер за финансии.

Поранешниот министер за финансии, Петар Гошев рече дека рамниот данок не го забрза развојот.

– Во минатото стапката на раст беше 4,2 проценти, а по воведувањето на рамниот данок е 2,6 проценти. Рамниот данок не ни донесе раст, туку ни донесе огромен јавен долг – рече Гошев.

Академик и поранешен министер за развој, Абдулменаф Беџети рече дека инвестициите не се зголемија благодарение на рамниот данок, немаше раст на БДП како што беше очекувано.

– Не беа постигнати очекуваните ефекти во ниту еден сегмент. Ние имаме регресивен даночен систем. Најмногу буџетот се полни од сиромашните и од средната класа – рече Беџети.

Даночната реформа предвидува воведување на дополнителна стапка од 8 проценти за делот од доходот кој надминува 90.000 денари месечно. Ова значи дека за доходот до 90.000 денари месечно, данокот би останал 10 отсто како и до сега, додека само на делот на доходот кој надминува 90.000 денари, би се плаќале дополнителни 8 отсто. Со ова, за мнозинството граѓани даночната стапка ќе остане иста, 10 отсто.


Нинџа: Сè беше под контрола на УБК и паравоениот штаб на ВМРО-ДПМНЕ


Скопје, 6 декември, 2018 - 14:03 (META) 

Упадот во Собранието на 27 април беше командуван од паравоениот штаб на ВМРО-ДПМНЕ. „За заедничка Македонија“  беше формирана од ВМРО-ДПМНЕ и имаше фиктивни водачи. На протестите на „За заедничка Македонија“ 80 отсто беа од ВМРО-ДПМНЕ, која ги даваше сите реквизити што се користеа. Сите водачи на протестите ги имам гледано во штабот на ВМРО-ДПМНЕ кај Кирил Божиновски, рече обвинетиот Александар Василевски  – Нинџа во својот денешен исказ пред судот во врска со настаните во Собранието на 27 април минатата годинa.

Тој рече дека бил ангажиран во Управата за безбедност и контраразузнавање (УБК) од Горан Грујевски, а потоа му бил „очи и уши“ на Никола Бошкоски. Обајцата сега се избегани во Грција.

– Сите водачи на протестите ги имам гледано во штабот на ВМРО-ДПМНЕ кај Кирил Божиновски – рече обвинетиот Александар Василевски  – Нинџа.

Според него, оперативните податоци до кои што тој дошол велеле дека организаторите на протестите биле исплаќани од ВМРО-ДПМНЕ.

– Јас само ги видов во партијата со Кирил Божиновски, но не можев да ги видам нивните џепови – рече Нинџа.

Но малку подоцна, на вкрстено прашање, дали биле плаќани водачите на „За заедничка Македонија“ Игор Дурловски, Богдан Илиевски – Бетмен, Борис Дамовски и Владо Јовановски од ВМРО-ДПМНЕ, или протестите ги воделе од патриотски причини, Нинџа одговори:

– Јас не сум ги видел со свои очи што имаа во џебовите кога излегуваа откај Кирил Божиновски, но од оперативни сознанија на Петтата управа знам дека биле плаќани од ВМРО-ДПМНЕ. Впрочем и Никола Бошкоски ми кажа дека за тоа го информирал директорот на УБК, Владимир Атанасовски – рече тој.

Александар Василевски – Нинџа, исто така кажа дека по налог на поранешниот директор на УБК, Владимир Атанасовски, кога бил формиран „Фронтот за Македонија“ се сретнал со Ченто и Игор Југ. Задачата во однос на Југ била да процени дали е проруски ориентиран.

– Кон 15 април зовре состојбата и се скандираше против „тиранската платформа“. Во свест ни беше врежан патриотизмот. Никој од овие во судница не знаеше што може да се случи на 27 април. Тој ден околу 12:30 часот ми се јави директорот на УБК и ми кажа да бидам во Скопје, бидејќи има информации дека нешто ќе се случи – рече Нинџа.

Додаде дека околу 16 часот повторно му се јавил Атанасовски и му рекол дека има информации оти СДСМ ќе бира претседател на Собранието и оти тоа го знае и Ченто.

Нинџа пред судот истакна дека имал контакт и со Сашо Мијалков, кој го викнал да оди во „Мериот“ и штабот на ВМРО. Околу 18 часот бил во штабот на партијата, но Мијалков не бил таму. Таму, како што додаде, имало лица од парламентарниот командно-оперативен штаб на партијата – Бришковска-Бошковски, Божиновски, Јанакиески, Чавков.

Од тука, како што посочи Нинџа, се координирало што се случуваше на 27 април.

Бришковска-Бошковски кажала дека не поминало првото сценарио и пратениците не си ја завршиле работата и не предизвикале тепачка.

– Потоа му се јави на Трајко Вељаноски и му рече да се отворат вратите од Собранието, а во 19:15 му се јавил Атанасовски и му рекол да оди да известува од терен – додаде Нинџа.

Рече дека на една од клупите во „Жена парк“ го сретнал и Горан Грујоски, кој му рекол дека има седум до осум луѓе во Собрание од прикриени операции.

Одговарајќи на вкрстени прашања од обвинителството Александар Василевски-Нинџа рече дека УБК ги следело Зоран Заев, Зоран Верушевски и Оливер Спасовски, иако тогаш бил министер за внатрешни работи. Додаде дека бил следен и политичкиот аналитичар Алберт Муслиу кому му биле поставени камери кога не бил дома.


Расправата за предлог-буџетот за 2019 продолжува во матичната собраниска комисија


Скопје, 5 декември, 2018 - 9:49 (META) 

Комисиската расправа за предлог-буџетот продолжува во матичната Комисија за финансирање и буџет во Собранието.

Предлог-буџетот за 2019 година тежи 3,7 милијарди евра, вкупните приходи се проектирани на 210,8 милијарди денари, (3,4 милијарди евра), а порастот на економијата 3,2 проценти на домашниот бруто-производ (БДП).

Со буџетот за 2019 година се предвидува намалување на буџетскиот дефицит, кој за следната година е проектиран на 2,5 проценти од домашниот бруто-производ (БДП).Во предлoг-буџетот за 2019 година предвидена е реформа во Фондот за пензиско осигурување, односно намалување на вкупниот трансфер.

Нови 10 проценти повисоки плати се предвидени за лекарите специјалисти од јануари 2019 година, а нови пет проценти повисоки плати од септември 2019 година за сите вработени во јавното здравство. Пораст на платите од пет проценти се предвидени и за просветните работници, вработените во градинките и за јавната администрација.

За капиталните инвестици, кои секоја година се кратат со ребаланс, предвидени се 25,7 милијарди денари.

Согласно фискалната стратегија, јавниот долг за 2019 година ќе изнесува 54,2 проценти и ќе се финансира од домашниот и странскиот пазар на хартии од вредност, но не е планирано издавање на нова еврообврзница.

За пратениците на ВМРО-ДПМНЕ, буџетот е мегаломански, се собираат повеќе пари од граѓаните за власта да ги троши на луксуз, наместени тендери, криминални субвенции и иновации.


Поминаа 2/3 од патот за промени во Уставот


Скопје, 4 декември, 2018 - 13:22 (META) 

Владејачкото мнозинство до сега успеа да заврши две третини од фазите кои се потребни за да се постигне промената на Уставот со уставни амандмани согласно Договорот од Преспа помеѓу Македонија и Грција. Од вкупно 15 чекори, преостанаа уште 5. Во целокупниот процес, на предлагачот на измените, во овој случај на Владата, во два наврати и е потребно двотретинско мнозинство. Еднаш за да го отвори и еднаш за да го затвори Уставот, процедура која трае неколку месеци.

Пратениците на 19 октомври со двотретинско мнозинство од 80 пратеници донесоа одлука за пристапување кон измена на Уставот односно го отворија Уставот. Изминатите три дена Собранието со мнозинство гласови ги усвои нацрт-амандманите за измената на Уставот и од денеска тие се ставени на јавна дискусија која ја организира предлагчот – во случајов Владата.

Потоа ќе се поднесуваат амандмани на нацрт-амандманите за кои ќе се води претрес во две комисии – Законодавно правната и Комисијата за уставни прашања. Откако Собранието со апсолутно мнозинство од 61 пратеник ќе се изјасни за секој од амандманите на уставните амандмани, се закажува седница за измена на Уставот за која е потребно двотретинско мнозинство која е крајната фаза за изменет Устав.

Одлуката за измена на Уставот, односно за затворање на Уставот, треба да ја донесе Собранието со двотретинско мнозинство гласови од вкупниот број пратеници. Измената на Уставот ја прогласува Собранието. Ова се очекува да се случи до средината на јануари.