Бугарија го ратификуваше Протоколот за членство на Македонија во НАТО


Софија, 20 февруари, 2019 - 10:10 (META) 

Народното собрание на Република Бугарија утрово со 140 гласа „за“ и без воздржани и против го ратификуваше Протоколот за членство на Република Северна Македонија во НАТО.

На седницата присуствуваа претседателот на македонското собрание, Талат Џафери и вицепремиерката и министерка за надворешни работи на Бугарија Екатераина Захариева која рече дека политика на проширување на НАТО се смета за еден од најуспешните инструменти за просперитет.

– Бугарија е постојан поддржувач за влезот на Северна Македонија во НАТО. Бугарија го прифати ангажманот да работи на забрзување на процесот за евроатлантска интеграција на земјата, како и за внатрешни реформи, и за стабилизирање на регионот. Членството во НАТО одбележува нова етапа во односите меѓу двете држави – рече Захариева.

На седницата не присуствуваа пратениците на опозициксата Бугарска социјалистичка партија кои неколку дена го бојкотираат Парламентот поради измените на Изборниот законик.

Џафери пред пленарната седница се сретна со неговата бугарска колешка Цвета Карајанчева на која и изразил благодарност за напорите и поддршката која Софија ја укажува за европските и евроатланстите интеграции.

Протоколот за членство во НАТО прва го ратификуваше Грција, а досега тоа го направија и Словенија и Албанија.


Хајредини: ДУИ и осумтемина „одметнати“ ќе ги деактивираат и СЈО и бомбите


Владиниот коалициски партнер ДУИ е непремостива пречка за постоењето на Специјалното јавно обвинителство и понатамошното објавување на „бомбите“, смета аналитичарот и колумнист Џевдет Хајредини, кој додава дека судбината на СЈО ја запечатуваат и осумтемина пратеници „одметнати“ од ВМРО-ДПМНЕ.

Власта, нагласува Хајредини, ниту без едните, ниту без другите нема да може да спроведе ниедна реформа за која е потребно двотретинско мнозинство во Собранието.

– Потенцијална „бомба“ за реформите кои треба да се спроведат, за сите закони за чие носење е потребно двотретинско мнозинство, нема да се надмине отпорот на коалицискиот партнер ДУИ кон продолжувањето на работата на Специјалното јавно обвинителство – смета Хајредини.

Тој потсетува дека формирањето на СЈО било најтешката тема на преговорите за Пржинскиот договор, и оти ова обвинителство било формирано со обврска да престане понатамошното јавно објавување на „бомбите“, односно нелегално прислучуваните разговори.

Според Хајредини, запечатувањето на судбината на СЈО е услов за гласовите на ДУИ во реформите на администрацијата, правосудството, но и Изборниот законик.

– За такви реформи се потребни 80 пратеници, од ДУИ не ќе може воопшто да се очекува да се сложат „бомбите“ да се објават од било која страна, а се заканува опасност да се појават од разни страни – вели Хајредини.

Дополнителна пречка за понатамошното постоење на СЈО, смета Хајредини, се и осумтемина „одметнати“ пратеници од ВМРО-ДПМНЕ.

– Многу од овие работи им одговараат и на тие осум пратеници – вели тој.

Хајредини потсетува дека меѓународната заедница постојано ја нагласува важноста на работата на СЈО и потребата почнатите истраги да добијат ефективни затворски казни. Тоа го нагласи и државниот министер за европски прашања во МНР на Германија, Михаел Рот, кој порача дека мора да продолжат истрагите поврзани со прислушуваните разговори и Специјалното јавно обвинителство, поради неизвесноста неговиот мандат да се продолжи со двотретинско мнозинство, да се интегрира во редовните структури на Обвинителството.

На 30 јануари Врховниот суд на општа седница утврди начелно правно мислење дека СЈО не може да постапува по „трокот на траење“ од 18 месеци, предвиден со законот со кој е формирано. Судот расправал за СЈО по иницијатива на адвокатите Боро Тасевски и Еленко Миланов.

–  Јавното обвинителство за гонење на кривични дела поврзани и кои произлегуваат од содржината на незаконското следење на комуникациите може да покрене обвинение или да нареди запирање на истражната постапка во период не подолг од 18 месеци од денот на преземањето на предметите и материјалите од негова надлежност, како кумулативен услов, кој не може да биде пречекорен сметано од денот на прием на материјалите од неовластено следење на комуникации од член 2 од Законот за Јавното обвинителство за гонење на кривични дела поврзани и кои произлегуваат од содржината на незаконското следење на комуникациите, и по истекот на тој рок од 18 месеци, не е овластен тужител за преземање на јавнообвинителски работи на предистражни и истражни дејствија, предвидени со Законот за кривичната постапка – соопшти Врховниот суд.


„Транспаренси“ го честиташе транспарентниот избор на новите антикорупционери


Скопје, 8 февруари, 2019 - 16:33 (META) 

Транспаренси Интернешенел Македонија (ТИМ) му честита на Собранието „за ефикасното спроведување на постапката за избор на претседател и членови на Државната комисија за спречување на корупцијата“ и на претседателката Билјана Ивановска и на другите членови им посака  успешна работа во справувањето со корупцијата „како еден од најголемите проблеми кој го нагризува македонско општество“.

– Ја добивте довербата во една транспарентна и отворена постапка, во која беше спроведен и делумен ветинг за проверка на вашиот интегритет. Сега ја имате нашата поддршка вашето знаење, искуство и интегритет да ги ставите во функција на справување со големиот проблем на корупцијата. Нашата поддршка и соработка секогаш ќе ја имате на располагање  – рече претседателката на ТИМ и прв претседател на Државната комисија за спречување на корупцијата д-р Слаѓана Тасева.

Таа порача дека постапката за избор на членови била транспарентна и дека избраните кандидати имаат личен интегритет и компетенција вршење на за оваа многу важна функција во општеството.

– Транспарентната постапка за избор на членови на ДКСК, која обезбедува да се натпреваруваат личности кои навистина ги исполнуваат формалните услови, кои имаат компетенција  и кои манифестирале личен интегритет, за првпат е утврдена со Законот за спречување на корупцијата и судирот на интереси усвоен во јануари оваа година. Собранието на Република Македонија покажа подготвеност да го прифати предизвикот и да овозможи постапка за избор во која ќе учествиваат и претставници на институции и невладини организации, а во интервјуто да учествуваат и претставници од невладините организации и медиумите. Ова е првпат ваков модел на избор да се применува било каде во светот и затоа очекуваме истиот да биде прифатен како позитивен пример и добра практика – порача Тасева.


Новите членови на Антикорупциска комисија дадоа свечена изјава во Собранието


Скопје, 8 февруари, 2019 - 16:15 (META) 

Новоизбраните членови на Државната комисија за спречување на корупцијата попладнево во Собранието дадоа свечена изјава.

Тие беа избрани претходно на пленарна седница со 65 гласа „за“, 10 воздржани и ниту еден глас против.

Претседателка на Комисијата е Билјана Ивановска, а членови се Владимир Георгиев, Софка Пејовска Дојчиновска, Катица Николовска, Нури Бајрами, Горан Трпеноски и Салаи Шемши.

Новите антикорупционери имаат мандат од пет години, а согласно новите овластувања ќе го следат и претстојниот изборен процес во делот на финансирање на политичките партии.

Пратеникот Мухамед Зеќири смета дека е добиено „професионално, стручно, целосно независно и зајакнато тело за борба против корупцијата.“

„Изборот на кандидатите беше направен преку најтранспарентниот процес досега. Во процесот на селекција, покрај условите за стручност, искуство и апсолутно никаква поврзаност со политички партии, кандидатите беа избрани преку јавни интервјуа, во кои покрај Комисијата за селекција, учествуваа и експерти, новинари, претставници на невладиниот сектор.Новиот Закон за борба против корупцијата и судир на интереси предвидува проширени надлежности на Антикорупциската комисија, како и зајакнати механизми кои ќе им овозможат поефикасна работа“, изјави Зеќири.


Изборот на новите антикорупционери денеска на комисија, па на собраниска пленарка


Скопје, 8 февруари, 2019 - 10:40 (META) 

Во собраниската Комисија за прашања на изборите и именувањата денеска ќе се утврди предлог-листата за именување на претседател и членови на Државната  комисија за спречување на корупцијата, односно за новите антикорупционери.

Потоа таа листа ќе оди на гласање во Собранието.

Во Законодавно-правната комисија ќе се дискутира и за предлог на закон за изменување и дополнување на Законот за класифицирани информации, по скратена постапка, во второ читање, а во таа комисија  и во Комисијата за политички систем и односи меѓу заедниците, во второ читање, ќе биде Предлог на закон за изменување и дополнување на Законот за слободен пристап до информации од јавен карактер, по скратена постапка.

Се очекува и денеска претседателот на Собранието да ги распише претседателските избори.


Џафери се сретна со Гречен Биркл, новата директорка на канцеларијата на УСАИД во Скопје


Скопје, 4 февруари, 2019 - 17:24 (META) 

Претседателот на Собранието Талат Џафери и генералниот секретар Цветанка Иванова денеска се сретнаа со амбасадорот на САД во Република Македонија, Џес Бејли, на која присуствуваше и новата директорка на канцеларијата на УСАИД за Македонија, Гречен Биркл.

На средбата се дискутирало за досегашната соработка помеѓу Собранието и Американската организација за меѓународен развој (УСАИД), како што се проектите реализирани преку Националниот демократски институт (НДИ), кои ја поддржуваат работата на Собранието преку програми кои се финансирани од оваа организација – соопштија од службата за информирање.

Претседателот Џафери изразил задоволство и благодарност за досегашната соработка и поддршка и нагласил дека Собранието е отворено за понатамошна соработка со нашите стратешки партнери.

Соговорниците се согласиле дека има резултати од досегашната соработка и заклучиле дека постои взаемен интерес, волја и простор оваа соработка да се продолжи и унапредува и во иднина.


„Србија данас“ ги помеша лончињата со платата на Груевски


Скопје, 1 февруари, 2019 - 14:48 (META) 

Српската информативна веб-страница „Србија данас“ завчера вечерта на веста за укинувањето на пратеничката плата и другите бенефиции како пратеник на поранешниот македонски премиер Никола Груевски стави наслов што е клеветнички и не ги претставува фактите.

Имено, пишувајќи „ ЗАЕВ НАСИЛНО ГРАБА ПАРИ: Со овој потег Македонија ја вовлече раката во џебот на поранешниот премиер Груевски“, информативната страница ги обвини и премиерот Зоран Заев и Македонија воопшто дека украле пари што му припаѓаат на Груевски.

Но подолу во текстот на „Србија данас“ нема ниту едно образложение за ваквите клеветнички тврдења, туку суво се пренесува веста од МИА дека македонското Собрание изгласа закон со кој се укинува платата и сите други повластици на пратеници што се осудени на затворска казна подолга од шест месеци. Информативниот сајт пренесува и на каква затворска казна е осуден Груевски  – и толку!

Фактите се јасни  – македонскиот премиер Зоран Заев во ситуацијата воопшто не е вмешан, туку Собранието изгласа закон со кој се заштедуваат пари на граѓаните, одземајќи ја платата на пратеници кои се осудени на затворска казна од најмалку шест месеци, која пак се досудува не за ситни прекршоци, туку за посериозни форми на криминал. Затоа и потегот на Собранието е оправдан  – ја одзема можноста тие што се огрешиле од законот и понатаму да се офајдуваат од парите што им припаѓаат на граѓаните.

Значи, единственото точно од насловот е тоа дека Македонија, преку народните претставници – пратениците, ја укина платата на осуденик што избега од земјава за да не оди в затвор.


Џафери: Подготвен сум да бидам и претседател на државата доколку на изборите нема цензус


Скопје, 31 јануари, 2019 - 12:20 (META) 

Претседателските избори најверојатно ќе бидат распишани на 8 февруари, а ќе се одржат на 21 април првиот круг и на 5 мај вториот круг, рече претседателот на Собранието, Талат Џафери на денешниот брифинг за новинари.

– Собранието е подготвено за избори и ќе работи се до почетокот на кампањата за избори, за пратениците да не тераат кампања во законодавниот дом – вели собранискиот спикер.

Доколку на изборите не се постигне цензус од 40 отсто во вториот круг, за шест месеци изборите ќе треба да се повторат, а во меѓувреме Џафери ќе ја врши функцијата претседател на државата за што вели дека е подготвен.

– Според Уставот не може да има празнина во функцијата. Тоа што сум презел одговорност да бидам претседател на Собранието тоа значи дека сум ја презел цела одговорност, а една од тие одговорности е и таа – вели Џафери.

На прашањето дали можеби ќе биде кандидат за претседател на државата од редовите на ДУИ, тој кратко одговара дека тој е претседател на Собранието.

Џафери вели дека предвремени парламентарни избори не и се потребни на државата затоа што има процеси кои треба да се завршат. Во врска со барањето на ВМРО-ДПМНЕ за одржување на предвремени парламентарни избори заедно со претседателските, тој вели дека е поминат рокот од воведување на 100 дена техничка влада пред парламентарни избори согласно Договорот од Пржино.

На прашањето кога во Собранието ќе се воведат двојазични табли, собранискиот спикер вели дека има рок од шест месеци тоа да се реализира и дека нема потреба од брзање туку од квалитет. Џафери најави дека веќе од следната седница, расправите ќе ги води на албански јазик.

Седница за избор на членови на Антикорупциска комисија најверојатно ќе биде закажана на 8 февруари.

– Огласот се затвори, ќе се врши евалуација на кандидатите потоа ќе им се вршат интервјуа. Потоа Комисијата за избори и именувања треба да подготви листа на кандидати и ова се очекува да се заврши до 6 или 7 февруари за на 8 да има седница – додава претседателот на законодавниот дом.


Собранието му ја укина пратеничката плата на Груевски


Скопје, 30 јануари, 2019 - 14:40 (META) 

Со 53 гласа „за“ и 3 „воздржани“ се изгласа дополнувањето на Законот за пратеници со кој се предвидува пратениците кои ќе имаат казна затвор од 6 месеци, да го изгубат правото на пратеничка плата, надоместоци, патни трошоци, како и сите останати бенефиции.

Претседателот на Собранието, Талат Џафери, гласаше воздржано.

-Не сум убеден во решението на Законот и затоа сум воздржан, но должен сум да ги почитувам процедурите на Собранието – рече Џафери.

Подносители на предлогот беа Снежана Калеска Ванчева, Горан Мисовски, Мухамед Зеќири, Соња Мираковска, Реџеп Мемеди и Реџаил Исмаили.

Поранешниот премиер Никола Груевски, според новите законски измени, ќе ја загуби пратеничката плата, бидејќи е правосилно осуден на две години затвор за набавката на луксузниот блиндиран мерцедес во предметот на СЈО „Тенк“. Груевски веќе неколку месеци е во Унгарија, каде доби азил.


Собранието ја отфрли интерпелацијата за Димитров


Скопје, 30 јануари, 2019 - 10:00 (META) 

Собранието синоќа со 59 гласа „против“ и 20 гласа „за“ не ја прифати поднесената интерпелација од опозицијата за министерот за надворешни работи Никола Димитров.

Опозицијата го обвини Димитров дека ја извршува функцијата несовесно, нестручно и спротивно на македонските интереси и оти со потпишаните договори со Бугарија и Грција се загрозуваат македонските интереси.

Во завршното обраќање министерот Димитров ги повика пратениците заеднички да се фокусираат на приоритетите и да разговараат за работи што се вредни за расправање.

– Ние конечно се исправаме на нозе. Порано или подоцна со мудра политика, помалку навреди и повеќе заедништво, мислам дека ќе светлината ќе ја победи темнината. Да се расправаме за работи што се очигледно вредни за расправање – од даночна политика, состојбите во економијата. Дајте заедно да си се фокусираме, да си имаме приоритети и да не биде прашање на живот или смрт кој ќе победи, а кој нема да биде на власт. Мислам дека сега е времето тој чекор да го направиме – рече Димитров во Собранието.