Облачно време со повремени врнежи и температура до 16 степени


Скопје, 27 март, 2018 - 9:07 (META) 

Времето денеска ќе биде променливо облачно со повремени локални врнежи од дожд, на планините со повремен снег. Ќе дува слаб до умерен северозападен ветер, особено долж Повардарието.

Утринската температура ќе се движи од нула до шест, а дневната температура од три до 16 Целзиусови степени.

Во Скопје слично време, утринската температура ќе достигне до четири, а дневната температура до 12 Целзиусови степени.

Од четврток ќе има позначителен пораст на дневната температура, што ќе предизвика забрзано топење на снежната покривка.


Денеска облачно со повремен дожд


Скопје, 26 март, 2018 - 9:07 (META) 

Времето денеска ќе биде променливо облачно со локални врнежи од дожд, а на планините од снег.

Ќе дува умерен јужен ветер. Дневните температури ќе се движат од 6 до 12 Целзиусови степени.

Во Скопје променливо облачно, со услови за слаб локален дожд и умерен југоисточен ветер и дневна температура од 8 Целзиусови степени.

Утре ќе се задржи променливо облачно време со локални врнежи од дожд, на планините од снег. Дневните температури ќе бидат во благ пораст. Потоа од среда следува период на стабилно и суво време, а од четврток со значителен пораст на дневната температура.


МЗШВ: Не се очекуваат позначителни штети од снегот и студот врз овошките


Скопје, 23 март, 2018 - 13:05 (META) 

Министерството за земјоделство, шумарство и водостопанство (МЗШВ) соопшти дека не се очекуваат значителни штети на родот на овошките од снегот и студот.

Од министерството велат дека во соработка со Управата за хидрометеоролошки работи (УХМР), состојбата се следи внимателно и дека според метеоролозите снежниот бран ги затекнал овошките во фаза на полно цветање, во која нивната издржливост кон ниски минимални температури е околу -2 до -3 Целзиусови степени.

„Бидејќи остварените температури беа во тие граници, не се очекуваат значителни оштетувања на родот“, се вели во соопштението од МЗШВ.

Сличните временски услови и облачноста во текот на викендот нема да дозволат драстично опаѓање на утринските температури, а најниските температури се очекуваат в недела наутро, кога ќе се спуштат до -4 степени. Но и тоа нема да предизвика позначителни штети.

„Бидејќи овие температури се блиску до границите на издржливост, може да предизвикаат само проретчување на родот, но не и негово оштетување“, стои во соопштението од министерството.

Според податоците од Подрачните единици на МЗШВ, досега земјоделците немаат пријавено штети од ниските температури и врнежите од снег, но состојбата на терен континуирано ќе се следи, со цел навреме да се преземаат доколку е потребно соодветни мерки.

На почетокот на наредната седмица се очекува променливо време со повремени врнежи од дожд, кои ќе одржуваат позитивни утрински температури, но и покачување на дневните температури до 15 степени. Во втората половина од следната седмица се очекува стабилизирање на времето и пораст на дневните температури и до 20 степени.


Сообраќајот се одвива отежнато, одрон на патниот правец Катланово – Велес


Скопје, 23 март, 2018 - 9:36 (META) 

На патниот правец Катланово – Велес кај манастирите, поради одрон сообраќајот се одвива по една коловозна лента во должина од пет метри, инфомираат од Авто-мото сојузот.

Екипите на „Македонија пат“ работат на расчистување на одронот и нормализирање на сообраќајот. Забрани за тешки товарни возила има патниот правец Маврово – Дебар, како и на планинските премини Стража и Пресека.

Сообраќајот на државните патишта се одвива по влажни коловози наместа со остатоци од кашест снег. Врнежи од снег со среден интензитет се бележат во Гостивар, Маврово, Дебар, Попова Шапка и на планинскиот превој Стража. Врнежи од снег со слаб интензитет се бележат на планинскиот превој Пресека и Струга. На планинскиот превој Буково врнежите се од дожд и снег.


Времето денеска со врнежи од дожд и снег


Скопје, 23 март, 2018 - 9:30 (META) 

Времето денеска ќе биде облачно со повремени врнежи со слаб до умерен интензитет, во јужната половина претежно од дожд, во северната од снег. Повеќе врнежи ќе има во попладневните и вечерните часови и тогаш повторно речиси насекаде ќе бидат од снег, освен на југоистокот.

Ќе дува слаб до умерен ветер претежно од северен правец.Температурата ќе достигне од 2 до 9 Целзиусови степени.

Во Скопје облачно, попладне со врнежи од снег. Температурата ќе достигне 3 Целзиусови степени.

За време на викендот ќе биде променливо облачно со сончеви периоди во претпладневните часови. Наутро на повеќето места температурите ќе бидат за 2 до 3 степени под нулата. Во сабота во западните делови ќе провејува слаб снег, а на југоистокот ќе има слаб дожд. Постепено затоплување со врнежи главно од дожд ќе има од недела попладне.

Најмногу снег и најстудено изутринава е во Маврово, каде што снежната покривка е 25 сантиметри и се измерени минус седум степени.


Времето денеска со повремен снег


Скопје, 22 март, 2018 - 9:41 (META) 

Времето денеска ќе биде облачно и студено со повремени врнежи од снег, а во јужните делови од земјава дожд и снег, додека во крајниот југоисточен дел од дожд. На повеќе места врнежите ќе бидат пообилни и ќе наврнат над 15 литри на квадратен метар. Снежната покривка на планините значително ќе се зголеми.

Ќе дува слаб до умерен, а во западните делови повремено засилен ветер од северен правец.Максималната температура ќе достигне од 1 до 6 Целзиусови степени.

Во Скопје времето ќе биде облачно со врнежи од снег и со слаб до умерен ветер од североисточен правец правец. Температурата ќе достигне до 2 Целзиусови степена.

Утре се уште ќе има повремени врнежи од дожд и снег, но кон крајот на денот ќе престануваат. В сабота ќе биде променливо облачно со провејување на слаб снег.


Во Скопје скратени градски линии, пречки во сообраќајот до Попова Шапка


Скопје, 22 март, 2018 - 9:35 (META) 

Поради големите врнежи на снег вчеравечер и во текот на ноќта, има скратување на линиите на јавниот автобуски превоз во Скопје, како и одредеи проблеми на патот до Попова Шапка.

Поради снегот денеска во Скопје не сообраќаат автобусите со број 69 и 69а.

Како што информира ЈСП Скопје, автобусот со број 25 место до Средно Водно сообраќа до комплексот „Соравиа“, а автобусот со број 28 место до „Македонско село“ сообраќа само до Козле.

Од приградските линии, автобусот со број 65 наместо до селото Раштак сообраќа до селото Црешево, а 81 наместо до Блаце сообраќа до Горњани, а автобусот на линијата 60 сообраќа само до магацините на АРМ.

Надвор од Скопје, забрана за движење на тешки товарни и за патнички возила без зимска опрема е воведена изутрина во 8:20 часот на патот до Попова Шапка, информира Автомотосојузот на Македонија (АМСМ).

Поради интензивните врнежи од снег претходно беа воведени забрани за движење на камиони и на регионалниот пат Дебар-Маврово и на магистралниот пат Гостивар – Кичево, поточно на планинскиот превој Стража.

Сообраќајот на другите државни патишта се одвива отежнато по влажни коловози. Снег врне кај Страцин, на Маврово, Стража, Буково, Ѓавато, Попова Шапка, Пресека и во Смојмирово.


Променливо облачно со повремени врнежи од дожд


Скопје, 21 март, 2018 - 8:54 (META) 

Времето во Македонија денеска ќе биде променливо облачно со повремени врнежи од дожд, а на планините од снег, особено претпладне.

Повеќе врнежи ќе има во северозападните делови каде локално се очекува да наврнат над 15 литри на квадратен метар. Ќе дува умерен јужен ветер.

Утринската температура ќе се движи од 3 до 8 , а дневната од 10 до 18 Целзиусови степени.

Во Скопје времето ќе биде променливо облачно, претпладне со повремен дожд. Ќе дува умерен до засилен југозападен ветер кој кон крајот на денот ќе го промени правецот во северен.

Утринската температура ќе се спушти до 4 Целзиусови степени, а дневната ќе се искачи до 14 степени.

Утре времето ќе биде облачно со повремени врнежи од снег, а во крајниот југоисточен дел од дожд. Локално ќе има услови за појава на замрзнат дожд. На повеќе места се очекува да наврнат околу 20 литри на квадратен метар. Во поголем дел од земјава ќе се формира помала снежна покривка, а на планините значително ќе се зголеми.

Постепено затоплување ќе има од недела во текот на денот, кога врнежите ќе бидат претежно од дожд.


Облачно време со врнежи од дожд, на планините снег


Скопје, 19 март, 2018 - 9:22 (META) 

Времето денеска ќе биде облачно со врнежи од дожд. На планините врнежите ќе бидат од снег. Пообилни врнежи ќе има попладне во западните и северните делови од државата.

Максималната температура ќе биде во интервал од осум до 12 Целзиусови степени.

Во вторник ќе биде претежно суво со умерен до засилен западен ветер. Во среда врнежи ќе има претежно во западните делови. Значително заладување од УХМР очекуваат од четврток, поради што врнежите на повеќе места ќе преминуваат во снег.


Нивото на Охридско Езеро се зголемува брзо, поради врнежите и топењето на снегот


Охрид, 15 март, 2018 - 12:54 (META) 

Поради брзото топење на снегот, интензивните врнежи на дожд и високите температури, екипите на ЕЛЕМ се на терен, и го следат брзиот пораст на нивото на Охридско Езеро, информираше директорот на оваа институција, Драги Миноски.

Тој додаде дека се преземаат потребните мерки во случај да продолжат ваквите временски прилики.

– Работиме максимално за да го оптимизираме нашето производство, имајќи предвид дека и нашите електрани во изминативе два месеци работат на максимално ниво. Ја употребуваме водата и правиме напори за да ја задржиме, но притоа да не направиме штета на Охрид и Струга, а исто така да не направиме штета ни по течението на реката Дрим – рече Миноски.

Тој објасни дека се контактира и со надлежните органи во соседна Албанија, се со цел да се контролира ситуацијата низ целиот Дримски басен.

Градоначалникот на Охрид, Јован Стојаноски изјави дека се следи состојбата на реките и каналите кои се влеваат во езерото.

– За жал, поради нераспишана тендерска постапка лани, коритата на реките и каналите не беа исчистени. Но ние исчистивме делови на најкритичните места, а целосно чистење ќе направиме по смирување на водотеците – рече Стојаноски.