!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Снег на Водно, Скопска Црна Гора, Попова Шапка и на Маврово


Скопје, 7 октомври, 2017 - 11:18 (META) 

Падот на температурата придонесе и за појава на првиот снег во планинските предели. Првата снежна покривка денеска е регистрирана на Водно, Скопска Црна Гора, Попова Шапка и на Маврово.

На социјалните мрежи веќе се појавија и фотографии од првиот снег, кој е невообичаен за овој период од годината.
Од УХМР претходно соопштија дека во текот на денот ќе има повремени врнежи од дожд, кои на места ќе бидат пообилни и ќе надминат 20 литри на еден квадратен метар, а на планинските предели, на надморска височина над 1.500 метри ќе има врнежи од снег.

Во текот на денот ќе дува умерен, повремено засилен северозападен ветер, кој на моменти ќе дува си брзина до 70 километри на час, а дневната температура ќе се спушти до 16 Целзиусови степени.

Во Скопје и во околината денеска ќе биде променливо облачно со повремен дожд и со температура до 10 Целзиусови степени.
Поради драстичниот пад на дневната температура, БЕГ и „ЕЛЕМ Енергетика“ порано ја почнаа грејната сезона.


Облачно и студено со дожд и со снег на планините


Скопје, 7 октомври, 2017 - 10:01 (META) 

Времето во Македонија ќе биде облачно и студено, со повремени врнежи од дожд, кои на места ќе бидат пообилни, претежно во западните и во северните делови од земјава. На планините над 1.500 метри надморска висина ќе има и врнежи од снег. Ќе дува умерен, повремено засилен северозападен ветер со брзина и до 70 километри на час.

Утринската температура ќе се движи од 6 до 15 Целзиусови степени, а дневната температура од 8 до 16 степени.

Во Скопје ќе биде  променливо облачно со повремен дожд, а интензитетот на врнежите ќе се засилува. Ке дува умерен до засилен ветер од северозападен правец. Температурата ќе се движи околу 10 Целзиусови степени.

На планините над 1.500 метри надморска висина ќе има и врнежи од снег. Ќе дува умерен повремено засилен северозападен ветер, кој ќе предизвика значително и нагло опаѓање на температурата на воздухот за околу 13 степени. Од недела следува период на стабилно и суво време, со постепен пораст на дневната температура.

 


Утре дождливо време, на високите планини ќе паѓа снег


Скопје, 6 октомври, 2017 - 18:49 (META) 

Под влијание на влажен и студен воздушен бран, утре ќе има повремени врнежи од дожд, кои на места ќе бидат пообилни, односно ќе надминат 20 литри на еден квадратен метар. Вакви врнежи ќе има претежно во западните и во северните делови од земјава, вели прогнозата на Управата за хидрометеоролошки работи на Република Македонија.

На планините над 1.500 метри надморска височина ќе паѓа снег. Ќе дува умерен, повремено засилен северозападен ветер, кој на моменти ќе достигнува брзина до 70 километри на час, кој ќе предизвика значително и нагло опаѓање на температурата на воздухот за околу 13 степени.

Дневната температура ќе изнесува од 3 Целзиусови степени на крајниот запад на земјата до 8 степени крајниот исток. Во Скопје дневната температура ќе биде околу 10 степени, во Повардарието и на крајниот југоисток 15 до 16 степени, а во Охридско-струшкиот Регион до 13 Целзиусови степени.

Од недела следува период на стабилно и суво време со постепен пораст на дневната температура.


И денеска ќе има дожд, а можен е и снег


Скопје, 23 април, 2017 - 9:59 (META) 

Времето денеска во Македонија ќе биде главно променливо облачно, откако утринава температурите во некои места беа под нулата.

Во текот на денот температурата најмногу ќе се искачи во Гевгелија, до 20 Целзиусови степени, а во Охридско-струшкиот регион ќе достигне до 14 степени, со западен ветар. Во подрачјето од Гостивар до Дебар ќе бидат најниските температури во текот на денот , до 8 степени, а таму се можни врнежи.

Во Скопје температурата ќе се искачи најмногу до 17 Целзиусови степени, а во скопскиот регион, заедно со цела североисточна Македонија, исто така ќе врне дожд, и тоа попладне. На планините ќе паѓа слаб снег.

Умерен ветер од северозападен правец ќе дува во северна Македонија и во Повардарието и во Пелагонија, каде а во попладневните часови овој ветер од умерен ќе премине во засилен интензитет.

Од утре, под влијание на јужно воздушно струење ќе преовладува стабилно, суво и топло време со пораст на утринската и дневната температура.


Сончево со мала облачност и температура до 17 степени


Скопје, 22 април, 2017 - 9:22 (META) 

Денеска времето во Македонија ќе биде сончево со мала до умерена облачност, а ќе дува слаб до умерен ветер од северозападен правец.

Утринската температура се движи од минус 6 до 3 Целзиусови степени, а дневната ќе достигне од 9 до 17 степени.

Во Скопје се очекува слично време, сончево со мала до умерена облачност и слаб до умерен ветер од северен правец. Дневната температура во главниот град ќе достигне до 15 Целзиусови степени.

За утре синоптичарите најавуваат повторно појава на засилен ветер од северен правец, особено во северните делови од земјата и долж Повардарието. Утре во попладневните часови ќе има зголемување на облачноста и услови за појава на слаб краткотраен дожд, а преку ноќта на планините појава на слаб снег.


Поројни дождови, заладување и снег на планините најавува УХМР за вечерва


Скопје, 19 април, 2017 - 18:30 (META) 

Управата за хидрометеоролошки работи (УХМР) за доцна попладне и во вечерните часови најавува пообилни врнежи од дожд во северните и во источните делови на земјата, каде што локално ќе бидат поројни и проследени со грмежи.

„Во ноќните часови под влијание на студен бран проследен со спуштање на студен воздух од север ќе настапи нагло заладување, а на планините врнежите ќе преминат во снег, но ќе слабеат во текот на ноќта“, велат од УХМР.

Според попладневниот извештај на АМСМ, сообраќајот во државата се одвива по влажни коловози со можни одрони на неколку патни правци.

На Балканот, пак, снегот го отежна сообраќајот во Хрватска и во Босна и Херцеговина.

Дел од патиштата во Горски Котори и во Лика во Хрватска се затворени, а на некои од нив е забрането движењето на товарни возила. Снег има и во Сараево, што исто така предизвика метеж во сообраќајот.


Утре обилен дожд и грмежи, вечерта снег на планините


Скопје, 18 април, 2017 - 13:28 (META) 

Под влијание на нов влажен бран, утре времето ќе биде облачно со врнежи од дожд. Пообилни врнежи ќе има попладне во источните делови од земјава, каде локално ќе бидат поројни и проследени со грмежи. На места се очекува да наврнат повеќе од 25 литри на едедн квадратен метар, прогнозира УХМР.

Ќе дува засилен ветер од јужен правец. Во ноќните часови кон четврток, поради спуштање на студен воздух од север, на планините врнежите ќе бидат од снег. В четврток ќе има повремени слаби врнежи од дожд, а на планините ќе провејува снег. Ќе дува засилен ветер од западен, а в петок од северозападен правец.

Температурата значително ќе опадне, при што утринската за време на викендот на места ќе се спушти под нулата.


Врнежливо и студено време со северен ветер


Скопје, 17 април, 2017 - 9:54 (META) 

Времето денеска ќе биде променливо облачно и посвежо со повремени врнежи од дожд, особено претпладне и во западните и во источните делови. Ќе дува повремено засилен северен ветер кој ќе предизвика значително опаѓање на температурата.

Минималните температури ќе се движат од од 4 до 11, а максималните од 10 до 17 Целзиусови степени.

Во Скопје ќе биде променливо облачно и посвежо, со повремени врнежи од дожд. Ќе дува умерен до повремено засилен северен ветер. Температурата ќе се движи во интервал од 6 до 15 Целзиусови степени.

Според Управата за хидрометеоролошки работи, во Маврово во осум часот е измерена висина на снежна покривка од два сантиметра. Најниска температура од нула степени е измерена во Маврово, Крушево и Лазарополе, а највисока во Гевгелија од 10 Целзиусови степени.


Облачно време со повремени врнежи од дожд


Скопје, 27 март, 2017 - 9:14 (META) 

Времето денеска ќе биде облачно со повремени слаби врнежи од дожд, а на повисоките места и на планините, претежно во јужниот дел од земјава, дожд и снег. Ќе дува умерен северен ветер.

Tемпература на воздухот ќе опадне за 8 до 10 Целзиусови степени во споредба со вчерашната.

Минималната температура ќе се движи од нула до пет степени, а дневната од 8 до 14 Целзиусови степени.


Откажани повеќе летови во САД поради снежната бура на североистокот


Вашингтон, 14 март, 2017 - 10:33 (META) 

Снежната бура, која ја најавија метеоролошките служби на САД, го погоди денеска североисточниот дел на државата, поради што се откажани повеќе летови. Властите им препорачаа на луѓето да останат во своите домови.

Државните училишта во Њујорк, Бостон, Вирџинија и во Филаделфија се затворени.

Националната метеоролошка служба на САД издаде предупредување за снежна бура во региони во осум сојузни држави, вклучувајќи ги Њујорк, Пенсилванија, Њу Џерси и Конектикат.

Според прогнозите, до утре ќе се формира снежна покривка до 60 сантиметри.

Поради зимската бура, беше откажана и планираната посета на германската канцеларка Ангела Меркел на Вашингтон.