Проектот за чистење на ОХИС и судските закони денеска на владина седница


Скопје, 11 декември, 2018 - 9:21 (META) 

На својата 107. седница, денеска Владата ќе ги разгледува предлог-законите за судството, а ќе се зборува и за проектот за чистење на дворните површини на ОХИС.

Министерството за правда треба да ги достави за одлучување Предлог-законот за изменување и дополнување на Кривичниот законик, Предлог-законот за изменување и дополнување на Законот за судовите, Предлог-законот за изменување и дополнување на Законот за Судскиот совет, Предлог-законот за извршување на санкциите, Предлог-законот за прекршоци.

На предлог на Министерството за правда, ќе се разгледува и анализата за примената на Законот за правда за децата, за период јануари – јуни 2018 година.

Исто така, на денешната седница на Владата ќе биде презентирана и информацијата за потпишување на Меморандумот за соработка помеѓу Владата, Канцеларијата за услуги на проекти на Обединетите нации (UNOPS) и Министерството за надворешни работи на Норвешка, со кој ќе се реализира проектот за чистење на дворните површини на ОХИС.

Владиниот кабинет ќе одлучува и за предлог-измената на Среднорочната програма за работа на Фондот за иновации и технолошки развој (ФИТР) за финансиска поддршка на микро, мали и средни претпријатија за 2018-2020 година.

Ќе се дискутира и за формирање на Агенција за квалитетот во високото образование, што ја предлага Министерството за образование и наука.


Европските компании кои инвестирале во руски гасовод ќе се соочат со санкции од САД


Вашингтон, 12 јули, 2018 - 10:32 (META) 

Санкции за европските компании кои инвестирале во рускиот гасовод „Северен поток 2“ кон Германија, најави администрацијата на американскиот претседател Доналд Трамп.

– Бевме јасни дека постои ризик од воведување санкции за компаниите кои работат во секторот на рускиот енергетски извоз –  изјави претставник на американскиот Стејт департмент.

Тој додаде дека Вашингтон смета дека „гасоводот ќе ја поткопа целата енергетска безбедност и стабилност на Европа, давајќи и на Русија уште еден инструмент за вршење политички притисок врз европските земји, особено врз Украина“.

Доколку САД ги спроведе санкциите, засегнати ќе бидат компаниите „Унипер“ (Uniper), „Винтершел“ (Wintershall), „О-ем-ве“ (OMV), „Анжи“ (Engie) и „Шел“ (Shell).


Цената на нафтата на највисоко ниво во последните три години


Лондон, 21 мај, 2018 - 11:46 (META) 

На лондонскиот пазар, цената на нафтата се зголеми за разлика од претходните шест недели, па достигна на највисоко ниво во последните три и пол години.

Зголемување на цената на нафтата е последица на падот на производство во Венецуела, зголемената глобална побарувачка и најава за повторно воведување на санкции кон Иран од страна на САД.

На лондонскиот пазар, цената за барел нафта се зголеми за 2,5 отсто, односно по прв пат од декември 2014 година се зголеми на повеќе од 80 долари.

На американскиот пазар, барелот поскапе за 0,8 отсто односно на 71,30 долари.


СЕММ: Порталите се најчеста мета за жалби за неетичко известување


Скопје, 29 март, 2018 - 14:24 (META) 

Статистиката, од Комисијата за жалби на Советот за етика во медиумите (СЕММ) покажува дека, во периодот од 2014 до 2017 година, најголем дел од жалбите за неетичко известување на медиумите – 79 проценти – се однесувале на интернет порталите. Потоа следуваат телевизиите со 12,6 отсто, весниците и неделниците 8 отсто и новинските агенции 0,5 отсто.

Најмногу жалби, 59, поднеле организации и здруженија од граѓанскиот сектор, 51 се дело на јавни функционери, јавни институции и партии, 55 дошле од медиуми и новинари и 49 се водат во категоријата „други“.

Вкупниот број на донесени одлуки од страна на СЕММ е 214, од кои, во 175 е прекршен Кодексот на новинарите и изречена е морална санкција.

Во 28 одлуки жалбите биле неосновани, а 11 жалби се решени по пат на медијација, односно помирување на страните.

Овие бројки официјално ќе бидат презентирани на утре на Годишното собрание на СЕММ.


Валенса бара санкции од ЕУ за Качински и за највисоките полски функционери


Варшава, 2 јануари, 2018 - 16:57 (META) 

Поранешниот претседател на Полска и добитник на Нобеловата награда за мир, Лех Валенса побара од Европската Унија за газењето на правната држава и на демократските вредности во последните две години да не ги казнува Полјаците и самата земја, туку исклучиво владејачките конзервативци на чело со Пaртијата на правото и правдата на Јарослав Качински.

– Санкции не треба да се воведуваат против Полска, туку против власта на Партијата на правото и правдата. Последиците треба да ги сносат тие што ги носат одлуките. Не ги пуштајте на Запад. Не доаѓајте со делегации. Блокирајте им ги сметките. Удрете по пратениците на Партијата на правото и правдата и на владата, но не удирајте на Полјаците – вели Валенса во интервјуто кое денеска го објави полскиот весник „Жечпосполита“.

Легендарниот водач на отпорот на Полска против комунистичкиот режим ги обвини полските конзервативци дека ги рушат демократските институции во земјата и да се обидуваат да ја вратат Полска во Средниот век, заложувајќи се ЕУ да ги прогласи за персона нон грата највисоките полски функционери на чело со претседателот на државата Анджеј Дуда и поранешната премиерка Беата Шидло.

– Победија на изборите, но не освоија уставно мнозинство. А тоа што го прави власта, тоа е промена на системот, нешто за што народот не даде согласност. Не сакаме да излегуваме на улиците. Не сакаме насилство. Нека ни помогнат нашите пријатели од ЕУ, чиј дел сме, бидејќи останавме блокирани во Полска – вели Валенса.

Европската комисија во декември, минатата година прв пат во историјата на ЕУ против Полска ја активираше т.н. нуклеарна опција, односно членот 7 од Лисабонскиот договор, според кој земјите – членки кои ја газат демократијата од основните вредности на Унијата можат да бидат казнети со одземање на правото на глас во ЕУ.


Трамп ја критикуваше Кина поради наводите дека ѝ дава нафта на Северна Кореја


Вашингтон, 28 декември, 2017 - 21:00 (META) 

Претседателот на САД, Доналд Трамп денеска ја критикуваше Кина во врска со објавените информации во медиумите дека нафта од кинеските бродови незаконски била префрлана во севернокорејски бродови на море, јавуваат светските агенции.

Трамп на „Твитер“ наведе дека Кина е „фатена во прекршок“ и дека е „многу разочаран што Кина дозволува нафтата да стигне во Северна Кореја“.

Американскиот претседател додаде дека „никогаш нема да има пријателско решение за севернокорејскиот проблем“, ако продолжи ваквата практика.

Министерството за надворешни работи на Кина вчера соопшти дека Пекинг ги применува санкциите на Обединетите нации кон Северна Кореја и дека нема информации за префрлање на нафта.


Владата денеска ќе ги разгледува законите за ОТА и за следење на комуникации


Скопје, 26 декември, 2017 - 12:38 (META) 

Владата на денешната седница, закажана во 14 часот ќе ги разгледува предлог-законот за новата Оперативно-техничка агенција (ОТА) и новиот Законот за следење на комуникациите, кои се дел од реформите во безбедносните служби и системот за прислушување, што произлегоа од извештаите на експертскиот тим на Европската комисија предводен од Рајнхард Прибе.

Со новите закони, следењето на комуникациите ќе се врши преку новата независна институција ОТА, а не како што беше досега преку Управата за безбедност и контраразузнавање. ОТА ќе го активира сигналот и „ќе им овозможува на органите овластени за следење на комуникациите (УБК, Министерството за одбрана, МВР, Јавното обвинителство, Царинската управа, Финансиската полиција) пристап до податоците од комуникациско-информациските системи на операторите“.

Новиот Закон за следење на комуникациите, покрај функционирањето на ОТА, треба да обезбеди поголема контрола и надзор над работата на безбедносните службите и системот за следење на комуникациите.

На денешната седница се очекува Владата да ги усвои предложените закони и да ги достави во Собранието на гласање.

На оваа 45.седница на владата ќе бидат разгледани и измените на законите за електронски комуникации и за класифицирани информации, кои се прават заради нивно усогласување со новите закони за ОТА и за следење на комуникациите.

Министрите денеска ќе ги разгледуваат и законските решенија за Законот за судовите, Законот за извршување на санкциите, Законот за јавнообвинителска служба, Законот за кривичната постапка, Законот за јавното обвинителство, како и Законот за Народниот правобранител. Со измените на овие закони треба да се зајакнат контролните механизми врз работата на полицијата, односно гонење и санкционирање на случаи на полициска бруталност.

Имено, предложените измени на Законот за јавно обвинителство предвидуваат во Основното јавно обвинителство за гонење на организиран криминал и корупција да се формира посебно одделение за истражување и гонење на кривични дела сторени од лица со полициски овластувања и припадници на затворската полиција.

На денешната седница, владата ќе ја разгледа и предлог-одлукатa за усвојување на годишната програма за работа на „Македонска радио-телевизија“ за 2018 година и предлог-одлука за одобрување на Финансиски план за 2018 година на МРТВ.


Трамп: Северна Кореја ќе биде на листата на земји што го поддржуваат тероризмот


Вашингтон, 20 ноември, 2017 - 19:37 (META) 

Претседателот на САД, Доналд Трамп, соопшти дека САД ќе ја стават Северна Кореја на листата на земји што го поддржуваат тероризмот.

Трамп рече дека на Северна Кореја ќе ѝ бидат наметнати уште санкции, тврдејќи дека Пјонгјанг одамна требал да се најде на листата и дека ова е дел од кампањата за „максимален притисок“ кон таа држава.

Моментално на оваа листа се наоѓаат Иран, Судан и Сирија.

– Покрај тоа што му се заканува на светот со нуклеарно уништување, Северна Кореја повеќепати ги поддржа чиновите на меѓународен тероризам, вклучувајќи и атентати на странска територија – додаде Трамп.


Брисел воведе економски санкции за Венецуела


Брисел, 14 ноември, 2017 - 15:00 (META) 

Министрите за надворешни работи на ЕУ денеска одобрија економски санкции, вклучувајќи и ембарго на оружје за Венецуела.

– Се што правиме е за дијалог меѓу владата и опозицијата да се најде демократско и мирно решение – рече шефот на шпанската дипломатија Алфонсо Дастис.

Во заедничкото соопштение на земјите-членки на ЕУ се наведува дека мерките за забрана за патување во Унијата и замрзнувањето на средствата „ќе бидат искористени постепено и флексибилно“, а може и да бидат продолжени.

Во соопштението се наведува дека регионалните избори во Венецуела, одржани на 15 октомври биле со бројни неправилности и оти тоа влијаело врз ставот на ЕУ.

Министрите на ЕУ подоцна ќе одлучат кои лица ќе бидат ставени на црна листа, но засега фокусот е на силите за безбедност, министрите во владата, институциите обвинети за кршење на човековите права и непочитување на демократските принципи на владеење на правото.


САД воведуваат нов пакет санкции кон Венецуела


Вашингтон, 9 ноември, 2017 - 21:06 (META) 

Властите на САД денеска соопштија дека ќе воведат нов пакет санкции кон Венецуела, против десет високи функционери кои Вашингтон ги обвинува за поткопување на изборниот процес во земјата, цензура на медиумите и корупција, јавуваат светските агенции.

„САД не можат а да не реагираат додека режимот на претседателот (Николас) Мадуро продолжува да го уништува демократскиот поредок и просперитетот на Венецуела“, изјавил министерот за финансии на САД, Стивен Мнучин.

На списокот на новите санкции, меѓу останатите, се наоѓаат потпретседателката на земјата, Сандра Облитас Руза, амбасадорот во Италија, Хулијан Изајас Родригес Дијас и министерот за култура, Ернесто Емилио Виљегас Полхак.

САД првите санкции кон Венецуела ги воведоа на 31 јули, оваа година, додека на 25 август Белата куќа соопшти дека воведува дополнителни финансиски санкции, меѓу кои и забрана за купување на новите обврзници кои ги издава владата на Венецуела или нејзината национална нафтена компанија – ПДВСА.

Длабоката политичка и економска криза со месеци ја тресе Венецуела, која е поделена помеѓу приврзаниците на претседателот Мадуро и либералната опозиција која бара вонредни претседателски избори.