!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шекеринска не сака да ги коментира барањата на Москва за транскрипти


Скопје, 15 август, 2017 - 19:27 (META) 

Министерката за одбрана Радмила Шекеринска не планира да ги бара транскриптите од интервјуто за британската новинска агенција „Блумберг“, соопштија за „Мета“ од Министерството од одбрана.

„Министерката за одбрана нема намера да се меша во работата ниту на домашните, ниту на странските медиуми и оттаму воопшто не би сакале да го коментираме барањето на руското МНР за транскрипт“, велат од МО.

Оттаму истакнуваат дека министерката Шекеринска има дадено изјави и за други медиуми кои се достапни до јавноста.

„Позициите на Владата и на министерката Шекеринска за стратешката цел за членство во НАТО и добри односи со партнерските земји во меѓународната заедница како и со Русија се единствени, јасни и недвосмислени“, велат од МО.

Портпаролката на руското МНР, Марија Захарова по повод интервјуто на Шекеринска изјави дека обвинувањата на сметка на Москва за наводното мешање во внатрешните прашања на Македонија се исконструирани и неосновани. Таа оцени дека таквите изјави се во спротивност со ставот на официјално Скопје и на настојувањата на македонските власти за развој на конструктивни односи со Русија поради што побара агенцијата да го објави целиот текст од интервјуто, како и аудио и видео снимката од разговорот со Шекеринска. Захарова исто така рече дека руското МНР ја повикува Македонија да појасни дали зборовите на Шекеринска, кои ги објави „Блумберг“ се вистинити, имајќи предвид дека досега никој тоа не го демантирал.


Русија бара транскрипт од интервјуто на Шекеринска за „Блумберг“


Москва, 15 август, 2017 - 16:57 (META) 

Обвинувањата на сметка на Москва за наводното мешање во внатрешните прашања на Македонија се исконструирани и неосновани, рече портпаролката на руското Министерство за надворешни работи, Марија Захарова, по повод интервјуто на македонската министерка за одбрана Радмила Шекеринска за агенцијата „Блумберг“.

Захарова, како што пренесува „Спутник“, вели дека таквите изјави се во спротивност со ставот на официјално Скопје и на настојувањата на македонските власти за развој на конструктивни односи со Русија и јакнење на билатералната соработка.

– Имајќи предвид дека претходна жртва на „Блумберг“ неодамна беше и српската премиерка Ана Брнабиќ, ја повикуваме Агенцијата да го објави целиот текст од интервјуто, како и аудио и видео снимката од разговорот со Шекеринска – изјавила Захарова, додавајќи таквите обвиненија доаѓаат од русофоби кои во јавноста пласираат лажни и неосновани тврдења.

Таа оцени дека во тие инсинуации гледаат обиди на непријателите на Русија и Македонија дополнително да ги искомплицират традиционално пријателските односи меѓу земјите.

– Се обидуваат да го свртат вниманието на јавноста од реалните закани, кога станува збор за суверенитетот и територијалниот интегритет на Македонија, посебно со вовлекување на земјите во НАТО, не земајќи ги предвид националните интереси – вели Захарова.

Таа истакна дека руското МНР ја повикува Македонија да појасни дали зборовите на Шекеринска, кои ги објави „Блумберг“ се вистинити, имајќи предвид дека досега никој тоа не го демантирал.

„Блумберг“ неодамна објави интервју со Шекеринска, во кое таа рече дека новата влада ги зајакнува напорите за влез на Македонија во НАТО, тврдејќи дека членството во воената алијанса ќе ја заштити земјата од руското мешање.


ФСБ уапси украински агент кој подготвувал саботажи на Крим


Москва, 15 август, 2017 - 13:44 (META) 

Агентот на украинската безбедносна служба Генадиј Лименшко е приведен на Крим поради планирање саботажи, соопшти руската Федерална служба за безбедност (ФСБ).

„ФСБ спречи саботажи на неколку јавни и инфраструктури објекти на Крим“, стои во соопштението.

Како што се наведува, припадниците на одделот на ФСБ на Крим во градот Севастопољ во текот на истражните активности го привеле Лименшко, агент на регионалниот разгранок на украинската безбедносна служба, кој според руската служба испратен на Крим за да изврши саботажи.

Станува збор за украински државјанин од регионот на Харков, кој бил во редовите на единица на украинската војска која учествувале во антитерористички операции во Донбас.


Вашингтон планира да го ограничи движењето на руските дипломати


Вашингтон, 14 август, 2017 - 15:30 (META) 

Вашингтон би можел да го ограничи движењето на руските дипломати во САД и да ја заостри процедурата за нотификација како одговор на акцијата на Русија кон американските дипломати и дипломатскиот имот, пишува весникот „Известија“, повикувајќи се на дипломатски извори.

Весникот наведува дека станува збор за скратување на радиусот на движење на дипломатите и на техничкиот персонал на амбасадите и конзулатите од сегашни 40 километри на 16 до 24 километри.

За дипломатите ќе виде воведена процедура на нотификација според која вработените во руските дипломатски мисии мораат три дена порано да го известат Стејт департментот за своите планови да отпатуваат на поголема далечина од онаа кој им ја пропишале американските власти, пренесува „Спутник“.


Уапсени терористи кои подготвувале напади во Москва


Моксва, 14 август, 2017 - 13:56 (META) 

Руската служба за безбедност (ФСБ) соопшти дека уапсиле членови на терористичка група која во Москва и регионот подготвувале серија напади.

„ФСБ спречи активност на терористичка група која планирала серија терористички напади на јавни места, вклучувајќи и големи трговски центри. Групата врши самоубиствени напади со силни експлозиви“, стои во соопштението на ФСБ.

Како што се наведува, во специјалната операција е уапсен и организаторот на нападот, припадник на Исламска држава, кој е специјалист за правење експлозиви, како и двајца терористи -самоубијци.


Чавушоглу: Турција е против санкциите кон Русија


Анкара, 11 август, 2017 - 16:27 (META) 

Министерот за надворешни работи на Турција, Мевлут Чавушоглу, изјави дека Анкара и понатаму е против санкциите кон Русија, затоа што тие можат негативно да влијаат на турската економија.

– Во минатото, Турција претрпи штета како резултат на тие санкции. Санкциите против земјите со кои се граничиме и со кои сме партнери ѝ нанесуваат штета на нашата економија. Тоа е причина поради која не се приклучивме кон санкциите против Русија – изјави Чавушоглу.

Тој истакна дека Турција бара решение како проблемот да се реши преку дијалог, за економијата да не биде погодена.


Шекеринска: Влезот во НАТО ќе ја заштити Македонија од мешањето на Русија


Скопје, 9 август, 2017 - 12:10 (META) 

Влезот во НАТО ќе ја заштити Македонија од мешањето на Русија во внатрешни работи на земјата, вели министерката за одбрана, Радмила Шекеринска, во интервју за новинската агенција „Блумберг“.

– И пред изборот на новиот кабинет, бевте сведоци на „одлив“ на информации за обидите на Русија да постигне влијание во клучните политички области и во областа на безбедноста. Загрижени сме од овој факт. Веруваме дека членството на Македонија во НАТО може да стави крај на овие обиди – вели Шекеринска.

Таа вели дека владата на премиерот Зоран Заев се обидува да ги подобри односите со Грција и за девет месеци да ги спроведе реформите за земјата што побргу да стане членка на НАТО.

– Земјата мора да се справи со проблемите што се однесуваат на владеење на правото и независноста на судството, кои во моментов претставуваат проблем за влез на Македонија во НАТО. Ќе останеме посветени на овие реформи во реалноста, но ќе продолжиме да бараме од земјите членки на НАТО да ги ценат ваквите напори, да ги земат предвид резултатите и што поскоро да донесат одлука – вели Шекеринска.

Министерката за одбрана вели дека Македонија ќе го следи примерот на Црна Гора, која годинава стана членка на НАТО, и дека земјата во 2018 година ќе го зголеми својот буџет за одбрана, кој денес е помалку од 1 процент од БДП.


САД наскоро ќе ѝ одговори на Русија за протерувањето на американските дипломати


Манила, 7 август, 2017 - 16:03 (META) 

Американскиот државен секретар, Рекс Тилерсон, во Манила изјави дека Русија покажува „извесна подготвеност“ за почне разговори за решавање на кризата во Украина.

Тој додаде дека Вашингтон ќе одговори на одлуката на Москва да го намали бројот на американските дипломати во Русија.

По состанокот со рускиот министер за надворешни работи, Сергеј Лавров, на маргините на форумот на Асоцијација на државите од Југоисточна Азија, Тилерсон рече дека САД и Русија имаат длабоки разлики, но дека и понатаму има значајни безбедносни прашања за кои треба да се разговара.

Лавров претходно рече дека специјалниот претставник на американскиот претседател Доналд Трамп за преговори за Украина наскоро ќе дојде во Москва.

Тилерсон, сепак, рече дека САД до 1 септември ќе одговори на одлуката на Русија да го намали бројот на дипломати во таа земја.

Тој потврди дека за тоа разговарал со шефот на руската дипломатија, додавајќи дека САД сè уште немаат одлучено како ќе одговорат.

Рускиот претседател Владимир Путин нареди 755 американски дипломати да ја напуштат Русија, по воведувањето нови санкции кон земјата.


Захарова: Зголемувањето на рокот за издавање американска виза е нов притисок врз Русија


Москва, 4 август, 2017 - 15:23 (META) 

Рокот за издавање американски визи на граѓаните на Русија се зголеми, но тоа нема никаква врска со намалувањето на бројот на американските дипломати, вели портпаролката на руското МНР, Марија Захарова.

Таа истакна дека таквиот тренд бил присутен и во претходните месеци и поради тоа не може да се поврзе со новото намалување на персоналот на американската амбасада, воведено по одлуката на САД да воведе нови санкции кон Русија.
– Најсмешно е што периодот за издавање американска виза се зголеми неколкупати во последните четири-пет месеци. Претходно интервјуата за виза се закажуваа за десетина дена по предавањето на документите, а сега се закажува по еден до еден и пол месец – рече Захарова во интервју за телевизијата „Русија 1“.

Захарова вели дека сите изјави дека продолжувањето на рокот за издавање американски визи е последица на намалувањето на бројот на американските дипломати мора да се гледаат како „внатреполитички игри во САД“.

– Ние совршено добро сфаќаме дека тоа е застрашување, вид на притисок врз Русија – рече Захарова.

Кон крајот на јули, руското Министерство за надворешни работи соопшти дека Вашингтон треба да го изедначи бројот на својот дипломатски и технички персонал во Москва и во генералните конзуларни претставништва со бројот на руските дипломати и технички персонал кои работат во САД.


Москва: САД и ЕУ не се колебаа да се мешаат во внатрешните работи на Македонија


Москва, 4 август, 2017 - 14:16 (META) 

Заменик-претседателот на САД, Мајк Пенс, направи уште една серија на антируски изјави во Подгорица, заплашувајќи ги лидерите од Западен Балкан со митската „руска закана“ и притоа ја обвини нашата земја дека се обидува насилно да ги прекрои границите на регионот, стои во реакцијата на руското Министерство за надворешни работи на изјавата на Пенс дека официјална Москва се меша во внатрешните работи на земјите од Западен Балкан.

„Со жалење мора да истакнеме дека Вашингтон ја продлабочува употребата на примитивните клишеа водени од идеологијата од ерата на Студената војна, кои воопшто немаат допир со реалноста. Наметнувањето на земјите од Балканот очигледно деструктивен избор да се биде „или со Западот ли со Русија“, неизбежно ја дестабилизира ситуацијата во регионот, но и во одредени држави. Истовремено, Вашингтон активно ја промовира идејата дека не постои алтернатива за НАТО за земјите од Југоисточна Европа и продолжува да спроведува проекти кои се темелат на бескруполозна конкуренција и кои имаат контрадикторна економска логика“, се вели во реакцијата.

Руското МНР, осврнувајќи се надворешното мешање во работите на земјите од Балканот, потсетува дека САД и нивните сојузници го прекршија меѓународниот закон во 1999 година со илегалната употреба на сила за отцепување на Косово од Србија, но и со последните случувања во Црна Гора и во Македонија.

„Под силен притисок на Вашингтон, Подгорица го формализираше членството на Црна Гора во НАТО на 5 јуни 2017 година и покрај противењето на мнозинството граѓани. САД и Европската Унија не се двоумеа да ја игнорираат волјата на гласачите во Македонија и не ѝ дозволија на партијата што победи на изборите од 11 декември да формира влада. Кој се меша во внатрешните работи и користи силa на Балканот? Москва или Вашингтон?“, стои во реакцијата.

Руското МНР ги повикува своите американски колеги да престанат да ја демонизираат Русија и нејзината надворешна политика, која отсекогаш се темелела на почитување на партнерите, почитување на заедничките конструктивни работи и на заедничките интереси.