!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

ФРОДЕМ: Роденденската забава на ВМРО-ДПМНЕ, скапа парада на лажна сигурност


Скопје, 18 јуни, 2017 - 12:39 (META) 

„Вчера, на фамилијарна роденденска забава, по којзнае кој пат се изнаслушавме лажни зборови, измислици и самофалби. По кознае кој пат слушнавме за внатрешни и за надворешни непријатели, како и инфантилни пораки и блефови. Тоа беше скапа парада на лажна сигурност. Видовме, како купче персони, кои ја украдоа Македонија и ја приватизираа ВМРО-ДПМНЕ непречено продаваат магла, па дури и се закануваат“, порачува ФРОДЕМ во реакција на вчерашната прослава на 27. роденден на ВМРО-ДПМНЕ.

„Од друга страна, десетици илјадници луѓе по најразлични основи, од неразјаснети случаи, преку тешки монтирани прогонства, па сè до брутални бизнис-преземања, рекетирања, малтретирања и бркања од работа, секојдневно очекуваат да се почне со реална примена на Кривичниот закон. Затоа, ФРОДЕМ ја повикува новата власт без никакви задкулисни калкулации веднаш да пристапи кон враќање на поредокот и на правдата и кон конечното декриминализирање на Македонија“, стои во соопштението.


ВМРО-ДПМНЕ: Опседнатоста на СДС со нас нема да донесе полза за граѓаните


Скопје, 17 јуни, 2017 - 22:15 (META) 

ВМРО-ДПМНЕ вечерва се огласи со одговор на реакцијата на СДСМ на говорот на претседателот на опозициската партија, Никола Груевски, на вечерашната прослава на 27. роденден на партијата.

„Оваа опседнатост на СДС со ВМРО-ДПМНЕ и со Никола Груевски нема да им помогне на Ибраимовски, Шапуриќ и на Марко да донесат нови инвестиции, како тоа што го правеше тимот на ВМРО-ДПМНЕ кој донесе стотици инвеститори.Оваа опседнатост на СДС со ВМРО-ДПМНЕ и со Никола Груевски нема да помогне да падне невработеноста, како во време на ВМРО-ДПМНЕ кога таа од речиси 39 отсто падна на 22,9 отсто. Оваа опседнатост на СДС со ВМРО-ДПМНЕ и со Никола Груевски нема да отвори нови работни места, како што ВМРО-ДПМНЕ успеа да отвори околу 170.000 нови работни места“, се вели, меѓу другото, во реакцијата.


СДСМ: Годините на криминално владеење на Груевски завршија


Скопје, 17 јуни, 2017 - 21:12 (META) 

Единаесетте години власт на ВМРО-ДПМНЕ под водство на Никола Груевски ќе бидат запаметени единствено како години на криминал, корупција, сиромаштија и на масовно иселување на работоспособното население надвор од државата, порача СДСМ вечерва во реакција на говорот на претседателот на ВМРО-ДПМНЕ, Груевски, на 27. роденден на партијата.

„Катастрофата што ова криминално раководство на ВМРО-ДПМНЕ ѝ ја направи на Македонија е најголемиот антидржавнички чин во современата историја. Погубните политики во владеењето на Груевски и на неговите соработници резултираа со меѓународна изолација, партизирано судство, криминални тендери, урнисани државни институции и со огромно незаконско богатење на криминалното раководство на ВМРО-ДПМНЕ. Никола Груевски и ВМРО-ДПМНЕ за речиси 11 години владеење имаа неброени шанси да направат нешто добро за граѓаните и за државата. Но, наместо тоа, Груевски и соработниците беа единстевните кои правеа сè да ја осиромашат, да ја изолираат и да ја уназадат државата, додека во меѓувреме криминално се богатеа“, порача СДСМ.

Владејачката партија вели дека граѓаните навистина ќе ја увидат разликата помеѓу ВМРО-ДПМНЕ и СДСМ, оти СДСМ преку новата влада што ја предводи ќе ги санира штетите од владеењето на Груевски, ќе ги врати правдата, економскиот напредок и животот и ќе ги отвори евроатлантските перспективи.


Груевски: ВМРО-ДПМНЕ ќе се обнови и набргу пак ќе ја води државата


Скопје, 17 јуни, 2017 - 21:10 (META) 

ВМРО-ДПМНЕ за многу кратко време ќе се врати на власт, порача претседателот на партијата, Никола Груевски, во својот говор на вечершната прослава на 27. годишнина од основањето на партијата. Тој увери дека партијата ќе ги издржи сите притисоци и ќе се спротивставува на „погубните чекори“ на СДСМ.

– На оние на кои им е потребно поделено ВМРО-ДПМНЕ, да им порачам дека ќе одолееме на овие притисоци. Нашата битка не престанува овде, таа допрва почнува. Допрва ќе следуваат погубни чекори на СДСМ, на кои ќе мораме да се спротивставиме. Остануваме заедно како еден, ние сме ВМРО-ДПМНЕ, не заборавајте на нашите предци. Ќе дојде бргу денот кога ВМРО-ДПМНЕ ќе ја води земјата, кога народот ќе каже дека единствената опција е ВМРО – рече Груевски.

Претседателот на ВМРО-ДПМНЕ рече дека за партијата е подготвен „пеколен план“ да биде заслабната пред локалните избори.

– Откако ги донесоа на власт, сега наумиле нов план. Пред да го одработат ветеното, планот е да го ослабнат ВМРО-ДПМНЕ пред локалните избори и партиски да завладеат со судството и со медиумите. ВМРО-ДПМНЕ да е слаба и поделена, судството да ги гони челниците на ВМРО-ДПМНЕ. Тргнаа на ѓон, и на ѓон не така далеку од сега ќе завршат. Без никакви докази ќе штанцаат докази против луѓе од ВМРО-ДПМНЕ. Сакаат да создадат негативна слика за нас –  рече тој.

Груевски најави кадровски освежувања во партијата, корекција на грешките од минатото и подготовка за нов почеток. Најави и повеќе работа меѓу Албанците.

– Мора да работиме на исправување на искривената слика што ја создаваа за нас пред Албанците, која беше товар за албанските партии да му бидат партнери на ВМРО. Обичниот Албанец нема да има аир од СДСМ на власт, туку и ним, како и на сите други граѓани, им треба подобар живот, пари, работни места, стандард и услови за живот – порача лидерот на ВМРО-ДПМНЕ.

ВМРО-ДПМНЕ под слоганот „Единствени“ го прослави 27. роденден од формирање како политичка партија и 124-годишнината од основањето на историското ВМРО, на церемонија која се одржа вечерва во Музејот на македонската револуционерна борба.


ВМРО-ДПМНЕ денеска слави 27 години од основањето на партијата


Скопје, 17 јуни, 2017 - 13:12 (META) 

ВМРО-ДПМНЕ денеска прославува 27 години од формирањето на политичката партија, како и 124 години од основањето на Внатрешно-македонската револуционерна организација.

Церемонијата ќе се одржи вечерва, со почеток во 19 часот, во Музејот на македонската револуционерна борба, под мотото „Единствени“.

Во рамки на манифестацијата на одбележување на роденденот, вчера и завчера партијата одржа две панел-дискусии: „Единствени кои носат инвестиции и отвoраат работни места“ и  „Единствени кои реализираат проекти во инфраструктурата“.


Кралицата Елизабета слави „сафирен јубилеј“ – 65 години владеење


Лондон, 6 февруари, 2017 - 10:40 (META) 

Елизабета Втора (90), актуелна кралица на Обединетото Кралство со најдолго владеење во светот, денеска ќе прослави „сафирен јубилеј“ и на тој начин ќе стане првиот британски монарх кој обележал 65 години владеење со кралството.

По повод прославата, канцеларијата на британската кралица објави нејзин портрет од 2014 година, на кој кралицата е прикажана како носи сафирен накит, кој го добила од својот татко како подарок за венчавката во 1947 година.

Кралицата, сепак, веројатно ќе го прослави денот зад затворени врати, на својот имот во Сандрингхам во Норфолк.

По повод јубилејот, ќе бидат истрелани 41 плотун во лондонскиот Грин парк, како и 62 плотуни од Лондон тауер.

Кралицата сè поретко се појавува во јавност, а поради болест не присуствуваше ниту на божиќната ниту на новогодишната верска служба.


Одбележани 145 години од раѓањето на Гоце Делчев


Скопје, 4 февруари, 2017 - 13:36 (META) 

Со положување цвеќе на гробот и со панихида во црквата „Свети Спас“, денеска се обележа 145-годишнината од раѓањето на македонскиот револуционер Гоце Делчев.

Цвеќиња на гробот положија градоначалникот Коце Трајановски и претседателот на Советот на Град Скопје, Ирена Мишева, делегација од владата на Република Македонија, од кабинетот на претседателот на Република Македонија, од Собранието на Република Македонија, делегација од АРМ, како и претставници на политички партии, здруженија и граѓани почитувачи на неговата борба за слобода и на неговото дело.

Во црквата „Свети Спас“, покрај панихида на Македонската православна црква, настапи и мешаниот градски хор „Вардар“ под диригентската палка на Јасмина Ѓорѓеска.


Фестивалот „Охридско лето“ одбележа 56 години постоење


Охрид, 5 август, 2016 - 15:12 (META) 

Синоќа, со концертот на триото на Дамјан Пејчиновски на плажата Куба либре, фестивалот „Охридско лето“ го прослави својот 56. роденден.

Пред тоа, пред бројните љубители на уметноста, пријатели на фестивалот, директорот на оваа музичко-сценска манифестација, Оливер Арсовски, ја пресече роденденската торта.

– „Охридско лето“ испишува уште една успешна година во богатата фестивалска историја. Им се заблагодарувам на сите што ја помагаат манифестацијата, медиумите, како и на тимот што работи на реализација на програмата. „Охридско лето“ ќе биде празник на уметноста и во изданијата што следуваат – рече Арсовски.

Фестивалот „Охридско лето“ официјално својот почеток го бележи со концерт одржан на 4. август во далечната 1961 година, со настапот на оперската певица Ана Липша-Тофовиќ во црквата „Св.Софија“.

Фестивалот се одржува секоја година од 12 јули до 20 август, а од 1994 година е редовен член на Европската асоцијација на фестивалите.


СДСМ со видеозапис ѝ го честиташе роденденот на ВМРО-ДПМНЕ


Социјалдемократскиот сојуз денеска ѝ го честиташе роденденот на ривалската, владејачка партија ВМРО-ДПМНЕ со видеозапис во кој главен протагонист е поранешниот министер за финансии, Зоран Ставрески.

Во видеозаписот се изнесени податоци за економската состојба на земјата, а поткрепени се со контрадикторните изјави од прес-конференции на Ставрески, како и со неговите реплики од „бомбите“, во кои тој за задолжувањата и за владината економска политика разговара со поранешната министерка за внатрешни работи, Гордана Јанкулоска.


ВМРО-ДПМНЕ слави 26 години постоење


Скопје, 19 јуни, 2016 - 11:21 (META) 

Владејачката ВМРО-ДПМНЕ денеска ќе го прослави 26. роденден на партијата.

Под слоганот „Идеја и дело – посилни од сè“, вечерва во 20 часот ќе се одржи прославата пред Музејот на ВМРО.

Од формирањето на партијата, па досега, ВМРО-ДПМНЕ имала двајца лидери, Љубчо Георгиевски, кој ја раководеше до мај 2003 година, кога на челната позиција доаѓа актуелниот претседател на партијата, поранешниот премиер Никола Груевски. Георгиевски останува во партијата, како почесен претседател до 2004 година, кога поради несогласување со политиката на Груевски, се повлекува од матичната партија и формира сопствена, ВМРО-Народна партија.
ВМРО-ДПМНЕ е една од двете најголемите политички партии во Македонија и е на власт од 2006 година.

Партијата е идеолошки наследник на првобитната ВМРО-Внатрешна македонско-револуционерна организација, создадена во 1893 година.
По формирањето, ВМРО-ДПМНЕ беше првата партија што официјално се изјасни за самостојна македонска држава.