!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Убиен маж во пукање во Топанско Поле


Скопје, 25 ноември, 2017 - 8:11 (META) 

Во престрелка што се случила во 22.30 часот вчера, во населбата Топанско Поле, близу супермаркетот „Принц“, еден 35-годишник го загубил животот, а еден 52-годишник добил тешки повреди.

Во инцидентот на улицата Лазо Трповски, животот го загубил И.А од селото Блаце, а повредениот Љ.Ќ. живеел недалеку од местото на инцидентот, на улицата Дижонска. Тој е пренесен во Ургентниот центар со тешки повреди.

Како што за „Мета“ објаснија очевидци, полицијата при истрагата затворила големо подрачје околу местото на инцидентот и сообраќајот се пренасочувал.


Бројот на загинати во Египет се зголеми на 235 лица, претседателот најави „брутален“ одговор


Каиро, 24 ноември, 2017 - 19:04 (META) 

Египетскиот претседател Абдел Фатах ал-Сиси денеска најави „брутален“ одговор по нападот врз џамијата во Синај, во кој, според новите сознанија, животите ги загубиле 235 луѓе.

– Вооружените сили и полицијата ќе ги одмаздат нашите маченици и набргу со сила ќе ги вратат безбедноста и стабилноста – рече Сиси во телевизиското обраќање.

Египетската војска почна со воздушни напади на подрачјето на Синај, концентрирајќи се на планинското подрачје околу џамијата, каде, како што се верува, се кријат напаѓачите.

Вооружените напаѓачи упаднале во џамијата за време на молитвата на припадници на безбедносните сили. Очевидци велат дека прво се слушнала експлозија во близина на џамијата, а потоа напаѓачите, кои пристигнале со четири теренски возила, упаднале во џамијата и отвориле оган.


Паника во и околу метро-станицата Оксфорд во Лондон


Лондон, 24 ноември, 2017 - 18:56 (META) 

Една од најфреквентните метро-станици во Лондон вечерва е евакуирана, откако беше пријавен инцидент со пукање. Имаше информации и дека се пукало на улиците во близина и, според досегашните сознанија, најверојатно станува збор за терористички напад.

Полицијата не соопштува детали, туку само упати апел до граѓаните да не се движат во тој дел на Лондон без потреба. На улиците во близина се распоредени вооружени специјалци.

Во метрото владее паника, а дел од патниците виделе чад и слушнале истрели. Во рестораните на станицата имало луѓе во паника, кои викале и плачеле.

Евакуацијата и паниката во центарот на Лондон се случи точно во време на најголемиот метеж поради купувачката треска за т.н. „црн петок“.


Тројца убиени во „Волмарт“ во Колорадо, полицијата трага по напаѓачот


Денвер, 2 ноември, 2017 - 9:45 (META) 

Полицијата во Колорадо трага по напаѓач, кој вчера во 18 часот по локално време влегол во „Волмарт“ во Торнтон, Денвер, и со пиштол почнал да стрела кон купувачите и кон вработените.

Портпаролот на полицијата во Торнтон, Виктор Алива, соопшти дека напаѓачот убил три лица, а потоа со црвено возило побегнал во непознат правец.

Две лице починале на самото место, додека третото лице им подлегнало на повредите во болница.

– Напаѓачот е белец, во црна јакна, црвена маица и сини фармерки – рече Алива.

Засега нема индикации дека станува збор за терористички акт, затоа што никој не ја презел одговорноста.


Пукање во близина на Универзитетот „Јута“, едно лице убиено


Солт Лејк Сити, 31 октомври, 2017 - 10:26 (META) 

Полицијата на американскиот град Солт Лејк Сити соопшти дека едно лице е убиено во пукање кое се случило во близина на кампусот на Универзитетот „Јута“.

Локалните медиуми јавуваат дека во девет часот вечерта била прогласена тревога и дека студентите, професорите и вработените неколку часа биле заклучени.

Полицијата на „Твитер“ објави дека во тек е потрага за 24-годишниот Остин Бутејн, осомничен за пукањето, за кого се наведува дека е вооружен и опасен.

Во потрагата се вклучило и ФБИ, а ангажиран е и полициски хеликоптер.


Пукање во штаб на ДУИ и искршен штаб на ВМРО-ДПМНЕ


Кавадарци, 13 октомври, 2017 - 13:32 (META) 

Во текот на вчерашниот ден било искршено стакло на изборниот штаб на ВМРО-ДПМНЕ во Кавадарци, во село Злетово, a за време на јавниот собир на партијата бил приведен маж поради нарушување на јавниот ред и мир. Во село Пласница, пак, од автомобил биле испукани неколку куршуми кон штаб на ДУИ, информираат од МВР.

Синоќа во периодот од 1.50 до 2.15 часот во Информативен центар на улица Илинденска во Кавадарци биле искршени стаклата на објектот кој ВМРО-ДПМНЕ го користи како штаб. Полицијата информира дека работи на пронаоѓање на сторителот и на расчистување на случајот.

Во 20.50 часот во село Пласница од колона возила, која се движела од село Лисичани низ село Преглово кон село Пласница, биле истрелани неколку куршуми од огнено оружје во близина на штабот на ДУИ, кој се наоѓа на средсело. Претходно, во 20 часот, додека се одржувал јавениот собир на ДУИ на кој говорел градоначалникот на Пласница, непознато лице истрелало неколку истрели од огнено оружје.

Во село Злетово за време на јавниот собир на ВМРО-ДПМНЕ, С.Н. (71) викал и непристојно се однесувал, по што бил одведен во полициската станица во Пробиштип, каде му била поднесена прекршочна пријава.


Активисти на Беса пријавиле пукање во Арачиново


Скопје/Битола, 9 октомври, 2017 - 13:41 (META) 

Активисти на партијата Беса синоќа пријавиле во полиција дека додека лепеле плакати во селото Арачиново, во нивна близина застанало возило „голф“, од кое непознато лице истрелало еден куршум од огнено оружје, по што заминало во непознат правец.

Активистите, како што информираат од МВР, на местото нашле чаура, која ја однеле во полициското одделение во Арачиново.

Од МВР велат дека се преземаат мрки за пронаоѓање на сторителот и за целосно расчистување на случајот.

Инаку, од МВР информираат и дека ноќеска, четириестина минути по полноќ, на булеварот Први мај во Битола, полициска екипа од СВР Битола затекнала три лица како со црн спреј прскале на изборно пано со плакат од кандидатот за градоначалник на СДСМ.

Против тројцата битолчани се поднесени прекршочни пријави.


Само половина кампања, а цела серија инциденти, крв, насилства…


Скопје, 3 октомври, 2017 - 13:28 (META) 

Предизборната кампања за локалните избори е веќе на половина, а е силно обележана со насилство, крв, солзи, палки, куршуми и со демолирање изборни штабови.

Во најновиот случај, Елвис Бајрам, актуелниот градоначалник на општина Шуто Оризари, и Аднан Мемет, шеф на неговиот изборен штаб, вчера изеле ќотек во населбата Шуто Оризари. Според тоа што го кажаа, четири непознати лица физички го нападнале прво Мемет, а потоа и Бајрам. Насилниците побегнале, а екипа на брзата помош констатирала тешки повреди кај Бајрам. Веднаш бил однесен во скопската градска болница „8 Септември“, каде поради сериозноста на повредите бил хоспитализиран. Пратеникот Амди Бајрам тврди дека напаѓачите што го истепале син му Елвис се поврзани со кандидатот за градоначалник на оваа општина од редовите на СДСМ, Курто Дудуш.

Од другата страна, пак, сосема поинаква верзија – Курто Дудуш ги обвини Елвис Барјам и приврзаниците. Пратеникот од редовите на СДСМ вели дека тепачката, како што му пренеле, ја предизвикале Елвис Бајрам и неговите телохранители. Според него, Елвис и неговите придружници дошле и ги кинеле плакатите на Курто Дудуш залепени на штабот на СДСМ, сместен во дуќан на партиски симпатизер.

МВР вети дека ќе го истражи овој случај, како и претходните, но засега нема завршница за ниту еден.

Подолу е визуелизацијата на сите досегашни инциденти и подетално нивно објаснување.

  • Вчерашната тепачка беше продолжение на серијата инциденти од почетокот на изборната кампања, од кои сè уште најтежок е оној со тројцата ранети во Кичево на 27 септември. Носителот на независна листа на советници во Кичево, Алит Абази, бил застрелан во слабината, а Дестан Абдиу, кој учествувал во неговата кампања како шеф на изборниот штаб, и Шабан Далипи, кој било заедно со нив, се ранети во бутот, односно во потколеницата. Иако беше отфрлено мислењето дека станува збор за политички мотивиран инцидент, сепак останува фактот дека станува збор за учесници во кампањата.
  • Таа, пак, почна со многу оштетени штабови на политички партии, но и со излог на штаб измачкан со измет. На првиот ден од кампањата, 25 септември, бил искршен излог на штаб на ВМРО-ДПМНЕ во Кисела Вода, додека во Аеродром излог на изборен штаб на СДСМ, како што информираат од партијата, бил измачкан со измет.
  • Еден ден подоцна, односно ноќта меѓу 26 и 27 септември, непознати сторители насилно влегле во штабот на Демократската партија на Србите во Македонија на булеварот Кочо Рацин во Скопје. Откако претходно ги искршиле катанците со кои била обезбедена влезната врата, влегле и претурале низ канцеларијата. Иван Стоиљковиќ, претседателот на партијата, вели дека се работи за обид за политички притисок и за застрашување на членството.
  • Речиси во истото време, во населбата Расадник во општина Бутел, бил искршен месниот штаб на СДСМ Бутел. Непознати сторители ги искршиле прозорците и влезната врата на штабот, ги искинале постерите и ја оштетиле светлечката реклама.
  • Во петокот, на 29 септември, кандидатот за градоначалник од ВМРО-ДПМНЕ за Македонска Каменица, Дарко Митевски, го обвини противкандидатот од СДСМ и од коалицијата за искинати плакати во селата, кои потоа биле фрлени пред неговиот дом. Исто така, во петокот било пријавено дека е искршен излог на изборен штаб на ВМРО-ДПМНЕ на улицата Моша Пијаде во Кавадарци.
  • Ноќта меѓу саботата и неделата, на 1 октомври, биле искршени две стакла на излогот на изборниот штаб на Беса на улицата Тале Христов, во скопската населба Скопје Север и биле искинати шест плакати.
  • Вчера, пак, на 2 октомври, ВМРО-ДПМНЕ информираше дека е искршен партискиот изборен штаб во Битола. Според нив, искршениот штаб е доказ за нервозата на СДСМ од поразот на претстојните локални избори.
  • Вчера, засега непознат сторител ги скршил стаклото од излогот и стаклото од влезната врата на изборен штаб на СДСМ во скопското село Инџиково. Според полицијата, се работи на откривање на сторителите.
  • Утрово избувнал и пожар во пекарницата „Кендо“ во населбата Ѓорче Петров. Допрва ќе се утврдуваат причините за пожарот. Тоа што е интересно е дека пекарницата и куќата во која е таа се на Владо Мисајловски, поранешниот министер за транспорт и врски и кандидат на ВМРО-ДПМНЕ за градоначалник на општина Ѓорче Петров.

Пукање во Лас Вегас – 20 загинати и стотина повредени


Лас Вегас, 2 октомври, 2017 - 11:07 (META) 

Дваесет лица загинаа, а повеќе од 100 се повредени во вооружен напад на музички фестивал во Лас Вегас, соопштија денеска од медицинскиот центар во градот, додавајќи дека половина од повредените се во критична состојба.

Како што јавува телевизиската мрежа „Еј-би-си“, американската полиција соопштила дека елиминиран е еден од осомничените за пукањето и ги предупредила граѓаните да не излегуваат надвор во центарот на градот затоа што сè уште трае потрагата по другите напаѓачи.

Нападот се случи синоќа, за време на фестивалот за кантри-музика кај хотелот и казино „Мандалеј беј“, во јужниот дел на градот.


Поднесено обвинение за дедото на Тамара кој пукаше во Никола Тодоров


Скопје, 28 септември, 2017 - 17:24 (META) 

Обвинение за убиство во обид и за недозволено изработување, држење и тргување со оружје или распрскувачки материи е поднесено против Љупчо Стојановски, дедото на малата Тамара, кој пукаше во поранешниот министер за здравство Никола Тодоров на 1 јуни годинава, пред примопредавањето на министерската функција.

Како што соопшти Основното јавно обвинителство – Скопје, истрагата против Љ.С. е завршена, обвинението е поднесено, а за него е побарано продолжување на притворот.

Дедото на Тамара е речиси четири месеци во притвор. Неговата 9-годишна внука Тамара Димовска почина на 9 февруари 2015 година, додека чекаше да биде одобрено да и се изврши операција на ‘рбетот во странство. Нејзиниот дедо рече дека пукал во министерот бидејќи го смета за виновен за смртта на неговата внука.