Иванов: Лага е дека се одржала средба со посредник на Јанакиески


Скопје, 15 ноември, 2018 - 16:00 (META) 

Ниту е побарана, ниту одржана средба со посредник на Миле Јанакиески, како што е наведено во службената белешка на УБК, класифицирана „строго доверливо“, а која е основ за определување на мерката притвор, велат од кабинетот на претседателот Ѓорге Иванов, по објавата на решението на Основниот суд Скопје 1 за определување на мерка притвор за Јанакиески.

„Миле Јанакиески телефонски побара средба со Претседателот Иванов која е одржана на 13.11.2018 година, вторник во 16 часот во кабинетот на Претседателот на Република Македонија. На средбата, воопшто не беа дискутирани темите амнестија, на која се повикува судот во решението за притвор, која е во надлежност на Собранието на Република Македонија, ниту пак темата аболиција. Сметаме дека станува збор за конструкција на лаги врз основа на претпоставки со цел да се инволвира Претседателот на Република Македонија, видливо од јавно објавеното образложение на решението на Судот“, велат од претседателскиот кабинет.

Од таму додаваат дека ова претставува груба полициска манипулација и инволвирање на полициски службеници со што се извршени кривични дела злоупотреба на службена положба и овластување, фалсификување на исправа, употреба на исправа со невистинита содржина.

„Останува нејасно, врз основа на што се следат активностите на претседателот Иванов и неговиот Кабинет од страна на УБК? Очекуваме итни одговори од Министерот за внатрешни работи, од директорот на УБК, од претседателот на Основниот суд Скопје 1 на дописите од Кабинетот на Претседателот на Република Македонија коишто беа испратени денеска“, додаваат од кабинетот.


Кривичниот совет ги потврди притворите за петмината од „Империја“


Скопје, 14 ноември, 2018 - 17:01 (META) 

Кривичниот совет на Основен суд Скопје 1 ги одби жалбите на адвокатите на петмината притворени во случајот „Империја” што неодамна го отвори Специјалното јавно обвинителство. Во притвор се Орце Камчев, Цветан Панделески, Ненад Јосифовиќ, Тодор Мирчевски и Зорица Арсовска.

Според судот, на јавна седница Кривичниот совет ценејќи ги фактите и доказите во предлогот од СЈО за притвор и во изјавените жалби од адвокатите, донел решение за одбивање на жалбите и потврда на решенијата за притвор донесени од судијата на претходна постапка.


Јанкулоска: Нема причина за построги мерки за претпазливост


Скопје, 14 ноември, 2018 - 10:15 (META) 

Екс-министерката за внатрешни работи, Гордана Јанкулоска пред почетокот на рочиштето за „Титаник“, порача дека мерките за претпазливост што ги има ги почитува и дека нема потреба од построги мерки.

– Мерките за претпазливост ги почитувам, не постои никаква причина да бидат преиначени – рече Јанкулоска.

Јанкулоска која е неправосилно осудена на 6 години затвор во случајот „Тенк“, одземен и е пасошот и мора да се јавува во судот еднаш неделно.. Исто така, и беше издадена мерка забрана за напуштање на живеалиштето, односно Скопје.

Иако судењето за Титаник беше закажано да започне во 9.30 почетокот се одолговлечи бидејќи обвинетите Јанакиески и Божиновски не беа спроведени од затворот во Шутка во судот.


Миле Јанакиески и Кирил Божиновски од утрово во притвор


Скопје, 14 ноември, 2018 - 9:36 (META) 

СЈО поради сомневање за бегство, побара притвор за поранешните функционери од ВМРО-ДПМНЕ и обвинети во случајот „Титаник“, Миле Јанакиески и Кирил Божиновски. Кривичен суд го прифатил предлогот на СЈО и одреди 30 дневен притвор на двете лица.

„Кривичниот совет на одделението за организиран криминал и корупција при Основниот суд Скопје 1 – Скопје, постапувајќи по предлог на Јавното обвинителство за гонење кривични дела поврзани и кои произлегуваат од незаконското следење на комуникациите, за определување мерки за обезбедување присуство против М.Ј. и К.Б. опфатени во предметот со КОК бр. 7/18 од обвинителството означен како „Титаник“, по ценење на фактите и доказите во предлогот донесе решенија со кои го прифати предлогот и на двете лица им определи мерка притвор во траење од 30 дена заради постоење на основите од член 165 ст.1 точка 1. од ЗКП односно „ ако постојат други околности што укажуваат на опасност од бегство“, се вели во соопштението на Кривичен суд.

Од МВР потврдуваат дека Јанакиески и Божиновски од утрово се во притвор во затворот во Шуто Оризари.
По бегството на Груевски, вчера министерот за внатрешни работи Оливер Спасовски изјави дека во притвор треба да бидат ставени обвинетите од случаите на СЈО.

Јанакиески вчера изјави дека најостро го осудува бегството на Никола Груевски и дека нема намера да бега, дека ќе биде во Македонија и ќе дојде во суд на закажаното рочиште за „Титаник“.

-Најостро го осудувам ваквиот чин, бидејќи ќе влијае негативно на судските предмети во целост, а посебно во оние предмети каде сме заедно обвинети – рече Јанакиески.


Четири лица под истрага во Прилеп за кривично дело насилство


Прилеп, 5 ноември, 2018 - 11:36 (META) 

Основното јавно обвинителство Прилеп донесе Наредба за спроведување истражна постапка против четири лица, поради постоење основано сомнeние дека сториле кривично дело насилство.

Лицата се осомничени дека на 3 ноември во Прилеп, во присуство на голем број граѓани, ја загрозиле сигурноста и нанеле тешки телесни повреди на двајца оштетени. По претходна вербална расправија помеѓу оштетените и еден од осомничените, тој телефонски ги повикал останатите осомничени и со патничко моторно возило марка „Лада” започнале да ги бараат оштетените низ градот.

„Откако ги пронашле, се симнале од возилото и се упатиле кон оштетените. Сите четворица започнале да ги удираат оштетените лица по главата и телото. Притоа на едниот оштетен му нанеле животно загрозувачки повреди како последица на кои тој е неконтактибилен и се одржува во живот со помош на апарати, додека на второто нападнато лице му нанеле телесни повреди изразени со набиеници по главата и телото. Со ваквите дејства осомничените во јавноста предизвикале чувство на несигурност, загрозување и страв“, се вели во соопштението на Основно јавно обвинителство.

Со оглед на тоа што надлежниот обвинител процени дека за тројца од осомничените постојат околности кои укажуваат на опасност од бегство, како и основан страв дека ќе ја попречуваат кривичната постапка и ќе влијаат врз сведоците, до судијата на претходна постапка при Основниот суд Прилеп беше доставен и предлог за определување мерка притвор за овие лица.


Пo Сашо Василевски и пратеникот Љубен Aрнаудов излегува од куќен притвор


Скопје, 16 октомври, 2018 - 17:00 (META) 

Апелацискиот суд Скопје го прифати барањето на пратеникот на ВМРО-ДПМНЕ, Љубен Aрнаудов, со гаранција да се брани од слобода, однoсно да му се укиине мерката притвор. Тој е еден од пратениците кои обвинителството ги товари за упадот и насилствата во Собранието на 27 април минатата година.

Утрово Кривичниот совет на Основен суд Скопје 1 ја прифати гаранцијата од 400.000 евра и му ја укина мерката домашен притвор на Сашо Василевски, исто така пратеник на ВМРО-ДПМНЕ.


Пратеникот Сашо Василевски излегува од домашен притвор


Скопје, 16 октомври, 2018 - 13:46 (META) 

Пратеникот на ВМРО-ДПМНЕ, Сашо Василевски кој е обвинет за настаните во Собранието на 27 април минатата година, излегува од куќен притвор откако Кривичниот совет на Основниот суд Скопје 1 ја прифати понудената гаранција во недвижен имот.

– Кривичниот совет на одделението за Организиран криминал и корупција при Основниот суд Скопје 1 – Скопје, постапувајќи по предлог на одбраната С.В., обвинет во предметот  КОК бр. 40/18 поврзан со настаните од 27.04.2017 година во Собранието на Р.М., по претходно дадено позитивно мислење од надлежното обвинителство, донесе решение со кое ја уважи понудената гаранција во недвижен имот и ја укина мерката куќен притвор, а заради обезбедување присуство во текот на постапката му определи мерки за претпазливост и тоа Обврска на обвинетиот повремено да се јавува на овластено службено лице во судот во Охрид и привремено одземање на патната исправа како и забрана за издавање нова – соопшти Кривичниот суд.

Со пуштањето од домашен притвор, Василевски ќе може да присуствува на пленарните седници во Собранието каде во тек е расправата за измени на Уставот.

Во куќен притвор и натаму се пратениците Крсто Мукоски и Љубен Арнаудов, кои исто така имаат поднесено барање за укинување на оваа мерка


Почна молкот пред референдумот, право на глас имаат 1.806.336 гласачи


Скопје, 28 септември, 2018 - 9:50 (META) 

На полноќ заврши јавната кампања и започна 48-часовниот молк пред референдумот што ќе се одржи задутре, недела, 30 септември.

Според одлуката донесена од страна на Собранието на Република Македонија, прашањето за референдумот ќе гласи: „Дали сте за членство во ЕУ и НАТО, со прифаќање на договорот на Република Македонија и Република Грција?“

Право на глас на плебисцитарното изјаснување в недела имаат 1.806.336 гласачи, запишани во Избирачки список. Гласачките места на 30 септември ќе бидат отворени од 7 часот до 19 часот.

Утре ќе гласаат болните, изнемоштените, лицата во домашен притвор, затворениците, како и државјаните на Република Македонија во странство.

Референдумот ќе го надгледуваат околу 12 илјади домашни и речиси 500 странски набљудувачи.

За референдумот на 30 септември за гласање се пријавени 1.859 болни и немоќни лица во 69 од 80 општини. На локалните избори во 2017 година за гласање биле пријавени над 5.400 болни и изнемоштени лица.


Дескоска ги претстави новите објекти во затворот „Идризово“


Скопје, 29 август, 2018 - 17:01 (META) 

Министерката за правда Рената Дескоска и директорот на Управата за извршување на санкции Јовица Стојановиќ, денеска ги промовираа двата новоизградени објекти во затворот „Идризово“. Тоа се КПУ Идризово – отворено одделение за сместување на 294 осудени лица на површина од 3.800 м2, како и полуотворено одделение за сместување на 252 осудени лица на површина од 4.000 м2.

Новите одделенија се изградени по најсовремени европски стандарди и затворски правила. Ќелиите се за сместување на четири осудени лица, со бања, предвидени се заеднички простории за престој, работилници, фитнес сали, ќелии за лица со посебни потреби, шеталишта и игралишта, соопшти Министерство за правда.

Во отвореното одделение изградени се и гаражи и работилници во кои затворениците ќе работат. Добрите услови и работилниците помагаат за побрза и подобра ресоцијализација на осудените лица.

Министерката за правда Рената Дескоска истакна дека еден од приоритетите на Владата на Република Македонија, претставува и искоренувањето на сите облици на кршење на човековите права, спречување на мачењето и понижувачко постапување и казнување на затворениците.

– Новата Влада на Република Македонија со посетата на премиерот Заев на овој затвор, ги отвори вратите на Идризово за јавноста, која преку новинарите можеа од блиску да ги видат условите во оваа институција. Денеска повторно ги отвараме вратите на новоизградениот дел на Казнено поправниот дом Идризово во кој можете да видите поинаква слика, слика која ветува значително подобрени услови за сместување на лицата кои издржуваат казна затвор овде – истакна министерката Дескоска.

Во Идризово се сместени повеќе од 3/5 од затворениците во целата земја.

Покрај изградбата на новите одделенија во КПУ Идризово, изградена е пречистителна станица за отпадни води, извршена е реконструкција на постоен објект кој се адаптираше во Тренинг центар за одржување на обуки и проверка на знаењата на вработените во казнено-поправните и воспитно-поправните установи во Република Македонија, реконструирана е административната зграда, а набавена е и современа опрема за негово функционирање, односно набавена е информатичка опрема, опрема за симултан превод, кујна и мебел за сите простории во објектот.

Дескоска најави дека наскоро ќе биде пуштен во процедура и Законот за извршување на санкциите.

Проектот за изградба и реконструкција на казнено поправните и воспитно поправните установи во Република Македонија се реализира преку Министерство за правда – Управа за извршување на санкции со заем од Банката за развој на Совет на Европа (ЦЕБ), во износ од 46 милиони евра.

Директорот на управата за санкции Јовица Стојановиќ одговарајќи на новинарски прашања појасни дека со грант на Европската Комисија од затворот „Скопје“  во скопската населба Шуто Оризари во затворот Идризово ќе биде префрлена судницата. Причината е големиот број осудени лица кои се наоѓаат во најголемиот затвор во Македонија.

Со истиот грант, додаде тој, завршена е постапката за комплетна реконструкција во затворот во Битола, во кој  во мај-јуни беше затворен притворскиот дел што не ги исполнува условите.

Стојановиќ најави и воведување на пробацијата во сите затвори во Македонија,  проект што треба да почне од 3 септември.

 


Апелацискиот суд Штип изрече нов притвор за градоначалникот на Ново Село


Штип, 30 јули, 2018 - 16:22 (META) 

Апелацискиот суд суд во Штип ја прифати жалбата на Основното јавно обвинителство Струмица на укинувањето на мерката притвор за градоначалникот на Ново Село, Боро Стојчев, и останатите осудени и им изрече притвор до правосилноста на пресудата.

Во средата Основниот суд во Струмица го осуди актуелниот градоначалник на Ново Село на година и пол затвор, а неговиот син и внук добија казни од една година затвор. Сопругата на градоначалникот доби условна казна од една година поради здравствени причини.  Полицијата ги фати на месноста Попова Чука близу границата при обид за шверц на цигари.

По изрекувањето на пресудата судијата им ја укина мерката притвор, по што обвинителството се жалеше, па штипска Апелација им изрече притвор до правосилноста на пресудата, односно до 60 денови.