Додека се гради нов антикорупциски систем, Македонија „се снаоѓа“


Скопје, 9 декември, 2018 - 20:41 (META) 

МВР, кое треба да гони корупција, е разорена институција и и треба реформа, тврди Павле Трајанов, поранешен министер за внатрешни работи. Антикорупциската комисија, со години обвинувана за партизираност, и формално не функционира од крајот на март.

По две кривични пријави за примање и за давање поткуп бил резултатот на Македонија во борбата против корупцијата минатата година, покажуваат податоците на МВР. Тоа е најслаб резултат на полицијата во гонење на тоа кривично дело, а лани бил најслаб резултатот и во откривање на другите кривични дела од областа на организираниот криминал – трипати помалку од 2010 и три и пол пати помалку од 2015 година.

– Во Македонија многу повеќе криминал открија истражувачките новинари и истрагите на СЈО, отколку државните органи задолжени за тоа, пред се МВР,  институција која треба да се бори против корупцијата и криминалот. МВР е разорена институција. Таа е комплетно надвор од системот за борба против корупцијата – смета Павле Трајанов, претседател на Демократскиот сојуз, поранешен министер за внатрешни работи и долгогодишен оперативец во МВР.

Минатата година полицијата открила и помалку кривични дела „злоупотреба на службената положба“, „даночно затајување“ и „фалсификување исправа“.

Трајанов смета дека на МВР му е потребна темелна реформа.

– Не можат само да се правдаат дека чекаат наредба од јавен обвинител. Во МВР има неколку илјади луѓе со многу високи плати и треба да се изборат со корупцијата. Се истражува, се пишуваат колумни, но додека отсуствува ефикасна борба против корупцијата од надлежната институција, тешко дека може да се постигне позначаен резултат – смета Трајанов.

Состојбата наскоро ќе се смени, убедена е власта, пред се со новиот закон за спречување корупција, кој е во собраниска процедура.

– Наскоро целиот институционален и законски систем за превенција и борба против корупција ќе биде во функција, а во меѓувреме го правиме тоа што можеме – рече премиерот Зоран Заев на отворањето на конференцијата „За општество ослободено од корупцијата“.

Заев нагласи дека еден од приоритетите на Владата е транспарентното водење на политиките, правилното функционирање на судскиот систем, ефикасна борба против корупцијата, но и почитувањето на човековите права.

– Веќе се разгледуваат резултатите од имплементацијата на нашиот концепт за отворена и транспарентна Влада. Според индексот на отвореност Владата како централно-извршно тело е на прво место во регионот со 76 отсто исполнување на индикаторите – рече Заев и додаде дека ова го потврдило истражувањето за отвортеност на институциите за извршаната власт во ЈИЕ и во Македонија.

Ефикасноста на полицијата и работата на Државната комисија за спречување корупција, меѓу другите фактори, се одразуваат и на Индексот за перцепција на корупција, што од 1995 година го објавува „Транспаренси интернешнел“, според кој Македонија минатата година, со индекс 35 била најслабо рангирана од 2010 година. Македонија лани се пласирала во ранг на Виетнам и Етиопија.

data-viz-korupcija-MK1

Индексот рангира 180 земји и територии според забележаното ниво на корупција во јавниот сектор. На скалата индексот 0 е многу корумпирана, а 100 е земја чиста од корупција. Минатата година две третини од земјите имале индекс понизок од 50. Највисоко котирале Нов Зеланд и Данска со индекс 89 и 88, и регионот на Западна Европа. Најлоши региони биле Подсахарска Африка и Источна Европа (просечен индекс 34).


Полициите на Албанија и Црна Гора потврдија дека Груевски ги минал нивните граници


Скопје, 16 ноември, 2018 - 10:30 (META) 

Полициите и на Албанија и на Црна Гора вчеравечер се огласија со соопштенија по бројните написи во медиумите дека поранешниот македонски премиер Никола Груевски за Будимпешта заминал преку двете земји. Двете земји потврдија дека во неделата Груевски ги напуштил земјите. Со оглед на фактот дека од Подгорица и од Тиват тој ден немало летови за Будимпешта, најверојатно Груевски ја напуштил земјата по сувоземен или по морски пат, или пак летал за Будимпешта преку Белград.

Според Одделот за граници и миграции на Државната полиција на Албанија, „Н.Г. на 11.11.2018 во 19.11 часот ја напуштил територијата на Албанија преку граничниот премин „Хани Хоти“ и влегол во Црна гора како патник во возило со регистерски таблички CD1013A, сопственост на унгарската амбасада во Тирана“.

Дополнително, албанската полиција соопштува дека во времето на неговото преминување немала добиено потерница или белешка дека по Груевски се трага.

„Интерпол Скопје на 13 ноември 2018, во 19.35 до Интерпол Тирана испрати меѓународна потерница за ова лице“, соопшти Државната полиција на Албанија.

Управата за полиција на Црна Гора пак соопшти дека Груевски ја напуштил земјата истиот ден кога влегол, а полицијата во целост ги почитувала законските процедури.

„По повод написите објавени во медиумите, како и по интересирањето на медиумите за ова прашање, а кои се однесуваат на тоа дека поранешниот премиер на Македонија, Никола Груевски, влегол во Црна Гора на 11 ноември 2018 година, заради вистинито информирање ве известуваме за следното: Никола Груевски влегол во Црна Гора во наведениот ден и во истиот ден излегол од Црна Гора. Црногорската полиција во овој случај во целост ги почитувала законските процедури“, гласи соопштението на црногорската полиција.

За разлика од нивните колеги од Албанија, црногорската полиција не известува каде и во колку часот Груевски ја напуштил земјата.

Со оглед на фактот дека од аеродромите во Подгорица и во Тиват тој ден немало летови за Будимпешта, најверојатно Груевски ја напуштил земјата по сувоземен или по морски пат, или пак летал за Будимпешта преку Белград, Истанбул или Москва. Засега нема реакции од владите и министерствата за внатрешни работи на БиХ и Србија.


Кој, каде и како ја кренал рампата за Груевски?


Скопје, 15 ноември, 2018 - 16:38 (META) 

Откако владиниот портпарол Миле Бошњаковски денеска соопшти дека Одделот на внатрешна контрола во МВР спроведува постапка за можна инволвираност на полициски службеници дека му помогнале во бегството на Никола Груевски, а дополнително СВР Скопје, го утврдува начинот на бегството, како и евентуално надворешни помагатели, се поставува прашањето дали поранешниот премиер државната граница ја минал нелегално или на граничен премин.

Ова уште повеќе бидејќи во албанските медиуми излезе информацијата дека „извештаите на албанската полиција сугерираат дека поранешниот македонски премиер Никола Груевски на 11.11.2018 година во 19:11 излегол од Албанија во Црна Гора со автомобил на унгарската амбасада во Тирана – возило таблички CD1013A.“. Потоа и  шефот на кабинетот на унгарскиот премиер Орбан, тврди дека Груевски барање за азил во Унгарија го поднел во „унгарска амбасада надвор од Македонија“.

Во случај бегството да е направено со илегално преминување на државната граница, за тоа би му бил потребен најмалку еден помагач или Груевски пребегал во договор со припадник или припадници на граничната полиција.

Од друга страна, ако преминал на граничен премин, невозможно е  поранешен премиер што ја извршуваше таа функција 10 години да биде непрепознаен по лик при полициската контрола. Доколку пак бил маскиран и со лажен пасош или лична карта, вистинскиот идентитет би се утврдил без проблеми, со биометриска проверка за да се види дали лицето што сака да ја мине границата ги има биометриските параметри снимени во личниот документ. За такво нешто полицаецот има право да го задржи патникот и до 24 часа, вели членот 13 од Законот за гранична контрола.

„Полицискиот службеник при извршувањето на граничните проверки на лица е овластен:
– да побара валиден патен  документ или друг документ пропишан за преминување на државната граница,
– да го утврди идентитетот на лицето кое има намера да ја премине државната граница,
– да провери дали се исполнети условите за влез и излез од Република Македонија утврдени со закон,
– да даде упатства и наредби со цел за непречено и брзо одвивање на граничните проверки.
– доколку постојат индиции, односно основи за сомневање за сторено кривично дело или прекршок, да изврши гранични проверки на втора линија што подразбира и преглед или претрес на лицето, предметите и превозното средство што истото ги поседува,
– да ја провери валидноста на патниот документ, односно на друг документ пропишан за преминување на државната граница,
– да изврши проверка на отпечатоци од прсти и дланки и други биометриски податоци во соодветните евиденции,
– да изврши проверка во оперативните (побарани) и други евиденции и електронски бази на податоци за лица, предмети превозни средства и
– да го задржи лицето за време неопходно потребно за извршување на граничните проверки, но не подолго од 24 часа.“, стои во членот 13.

Според наведените обврски од оваа законска одредба, доколку Груевски бил пред очите на полицискиот службеник а бил пуштен да помине, вината на службеното лице е јасна. Доколку пак бил сокриен во некое возило, станува збор најмалку за „несовесно работење во службата“.


Заев: Нема политички договор со Груевски, тој ќе се врати и ќе ја служи казната


Скопје, 14 ноември, 2018 - 16:47 (META) 

Остро и категорично ги отфрлам сите шпекулации за каков било политички договор со Никола Груевски, порача премиерот Зоран Заев денеска, одговарајќи на новинарски прашања по прес-конференцијата со премиерот на Малта, Џозеф Мускат.

Тој порача оти е убеден дека Груевски ќе се врати и ќе ја отслужи затворската казна.

– Имаше многу скептици што велеа дека нема да видат политичари исправени пред суд, но тоа се случи. Имаше многу скептици дека нема да има судски пресуди – тоа се случи. Досега се потврди владеење на правото до максимум и независност на правосудните институции до максимум, низ еден комплетно транспарентен процес. И јас сум убеден, дека времето ќе покаже, Груевски ќе се врати назад и ќе ја служи својата казна, и секако ќе биде исправен пред суд, да се брани, а системот да докаже дека е виновен и за други дела – рече премиерот.

Прашан дали полицијата постапувала неправилно, Заев рече дека се постапувало строго по законите.

– Министерството за внатрешни работи постапи исклучиво согласно законот. Како и за секој човек, без наредба на судот, министерството не може да пристапи во делот на следење, негово набљудување или слично. Без наредба, Министерството за внатрешни работи не може ни вас, ниту на мене, ниту на било кој граѓанин да му пристапи. И од таков аспект, морам да кажам дека строго е постапено по закон, на еден внимателен и демократски начин. Секако, проверката на возилата кои што излегуваат од штабот на ВМРО-ДПМНЕ, од страна на полицијата, е согласно наредбата која што е добиена од полицијата, за  внатрешна потерница, да се бара лице, во конкретниот случај, Никола Груевски, за да биде испорачан на отслужување на казната затвор. Немаше налог за влез во политичка партија,  ниту пак некој имаше намера, да направи таков влез во политичка партија, исклучително се постапувало согласно наредбите – рече Заев.


Штипската полиција заплени рекордни 77 килограми марихуана


Штип, 5 ноември, 2018 - 16:32 (META) 

Штипската полиција го сопрела велосипедистот Б .С (40) кај селото Стар Караорман и утврдила дека на велосипедот возел набрани стебла со марихуана со тежина од три килограми. Подоцна, при претрес на неговиот стан исто така било откриено големо количество на марихуана.

Опојното растение во различни големини, обработено и необработено, го имало секаде во сите делови од станот – на под, во вреќи, спакувано и обработени количини во кеси, подготвени за продажба на улица. По собирањето на сите количини, утврдено е дека во станот има 74 килограми марихуана. Пронајдена е и опрема за ситнење.

-При претрес на станот, пронајдени се повеќе најлонски вреќи со марихуанаа во вкупна тежина од околу 74 килограми и други предмети кои се фото и видео документирани и подигнати за вештачење. Четириесетгодишниот Б.С.  е лишен од слобода и против него е поднесена кривична пријава за сторено кривично дело „Неовластено производство и пуштање во промет наркотични дроги, психотропни супстанции и прекурсори“- соопшти Гордана Панајотова, портпарол на СВР Штип.

На Б.С. му е одреден 30-дневен притвор, но за истрагата остануваат повеќе дилеми. Пред се, се трага по местото од каде потекнува дрогата. Реонот од каде се движел со велосипедот е простор каде порано се одгледуваше ориз, непосредно до реката Брегалница. Количината на пронајдената марихуана е историски најголемата што штипската полицијата ја има најдено неколку децении наназад.

Од Основното јавно обвинителство, каде отворија истрага,  потврдија дека марихуаната е дадена на вештачење во Министерството за внатрешни работи, со цел да се утврди квалитетот и за кој вид на марихуана се работи. Засега од истрагата потврдуваат дека Б.С. ја набавил дрогата, но останува да се открие кој ја засадил. Интересно е дека неодамна бил направен претрес на сега притворениот осомничен дилер, но не било пронајдено ништо. Инаку, Б.С. веќе има одлежано казна затвор за истото дело.


Во Македонија „врие“ од говор на омраза, но случаите ретко имаат судска завршница


Скопје, 29 октомври, 2018 - 11:16 (META) 

Од стапувањето на сила на новите законски измени на Кривичниот законик за говор на омраза во февруари 2014 година, Кривичниот суд Скопје има осудено само две лица со парична глоба поради говор на омраза.

Бројот на казни е многу мал, споредено со пријавите на дигиталната платформа „Пријави и спротивстави се на говорот на омраза” каде за истиот период се евидентирани 341 случаи, додека полицијата има поднесено кривични пријави за 24 случаи, пишува „Порталб.мк“.

Полицијата го истражува говорот на омраза со бавно темпо, додека судството не го казнува, со оглед на големиот број пријави кои се поднесени во граѓанската дигитална платформа за пријавување на говор на омраза. Освен тоа, во Македонија, особено за време на владеењето на ВМРО-ДПМНЕ, според анализата на „Порталб.мк“, говорот на омраза бил многу нагласен, а имало и еклатантни случаи кога некои лица и групи јавно го користеле, но истовремено не бил санкциониран од органите за редот.

Според податоците кои ги обезбедил порталот, во текот на периодот 2014-2018, Кривичниот суд има осудено само две лица со парична глоба, и тоа во 2017 година.

За истиот период, Министерството за внатрешни работи има евидентирано уште 22 други случаи на говор на омраза, но ниту еден од нив нема судски епилог во Кривичниот суд.

Судот ги осудил двете лица според член 181 од Кривичниот законик, кој предвидува парична глоба или затвор до три години за лице кое се потсмева со странска држава или со нејзините највисоки државни претставници.

Дополнителни податоци за говор на омраза може да се најдат и преку интернет платформата „Пријави и спречи говор на омраза”. Граѓаните во оваа веб-платформа пријавиле десет пати повеќе случаи на користење на говор на омраза во споредба со кривичните пријави кои се покренати од страна на полицијата.

Според статистичките податоци кои се објавуваат преку оваа веб-платформа, од 2014 до 2018 година, граѓаните пријавиле 341 случаи на користење на говор на омраза, а во повеќето од нив ваков вид говор се користел врз основа на етничка, политичка и сексуална припадност.

Инаку, овој месец, МВР има поднесено кривични пријави против лица кои користеле говор на омраза и им се заканувале на пратениците кои гласаа за уставните измени, како и против новинарот Миленко Неделковски и актерот Тони Михајловски, и двајцата блиски со поранешната влада на ВМРО-ДПМНЕ. Неделковски е обвинет за „Загрозување на безбедноста” и „Дистрибуција на расистички и ксенофобични материјали”, додека Михајловски е обвинет заради упатена закана кон новинарот Бранко Тричковски.

Сите граѓани кои се изложени на говор на омраза, случаите може да ги пријават во полиција односно МВР, во Обвинителство, Комисијата за заштита од дискриминација, Агенцијата за аудио и аудиовизуелни медиумски услуги, Здружението на новинари на Македонија – Совет на Честа, во Советот за етика во медиумите во Македонија (KЕММ), но и во онлајн платформа “www.govornaomraza.mk”.


Спасовски: Ќе ги обезбедуваме пратениците се додека има причина за тоа


Скопје, 22 октомври, 2018 - 12:57 (META) 

Сите пратеници кои гласаа за иницијативата за промена на Уставот се обезбедувани од полицијата, изјави денеска министерот за внатрешни работи Оливер Спасовски, одговарајќи на новинарско прашање по промовирањето на новонабавената униформа наменета за припадниците на Единицата за специјални задачи денеска во касарната Илинден.

– Направивме безбедносна проценка на пратениците, претежно оние кои гласаа за отпочнување на процесот на уставни измени и тие ќе бидат обезбедувани се до оној момент, додека таа проценка не биде поинаква – појасни министерот.


Исчезнало 11-годишно дете во Прилеп


Прилеп, 13 август, 2018 - 11:10 (META) 

Прилепската полиција бара 11 годишно дете, кое, како што пријавил неговиот татко, А.С. (55) од Прилеп, излегло од дома околу 15 часот од саботата и потоа не се вратило дома.

Потрагата е во тек.


ВМРО-ДПМНЕ: МВР лажеше дека апсело терористи за да ги покрие скандалите


Скопје, 8 август, 2018 - 15:28 (META) 

Опозициската ВМРО-ДПМНЕ порача дека министерот за внатрешни работи Оливер Спасовски и СДСМ се срам за Македонија и го нарушуваат нејзиниот углед со лаги и манипулации, бидејќи вчера излажале дека МВР уапсила седуммина македонски државјани што се бореле со терористите во Сирија, а всушност станувало збор само за преземање на уапсените.

„За да ги покрие скандалите, злоупотребите и криминалите во кои се фатени пријателите на Заев, вчера повторно беше злоупотребено МВР за да се дезинформира јавноста со измислена голема полициска акција против терористи и радикали. Вистината е дека МВР лажеше!“, порача ВМРО-ДПМНЕ, тврдејќи дека поради лагата Спасовски вчера се криел, а МВР не давало дополнителни информации кога и каде биле приведени радикалите.

Опозициската партија посочува дека станува збор само за репатријација, односно преземање на скопскиот аеродром на радикалите уапсени од меѓународната коалиција.

„Вистината ни ја открија денеска нашите партнери од Пентагон кои посочија дека Сириските Демократски Сили до јули заробиле 600 странски платеници од повеќе од 40 земји. Kако што откриваат меѓународните медиуми, македонската полиција вчера немала никаква акција, туку била извршена само репатријација односно преземање на приведените македонски државјани на скопскиот аеродром“, вели партијата.


Полицијата влезе во Фондот за иновации и технолошки развој


Скопје, 26 јули, 2018 - 9:32 (META) 

Во просториите на Фондот за иновации и технолошки развој вчера влегла полицијата, по налог на Обвинителството за организиран криминал.  Се проверува документацијата поврзана поврзани со последната одлука на фондот за доделување неповратни средства за македонски компании.

Од обвинителство велат дека бидејќи се работи за предистражна постапка, нема да даваат информации.

Основното јавно обвинителство за гонење на организиран криминал и корупција во понеделникот оформи предмет и почна истрага по допрен глас за можнни злоупотреби при доделување грантови од Фондот за иновации и технолошки развој.