До 9.000 евра за семејствата на жртвите од автобуската несреќа кај Ласкарци


Скопје, 19 февруари, 2019 - 12:52 (META) 

Повредените и семејствата на жртвите во несреќата од 13 февруари кај село Ласкарци треба да ги обезбедат потребните документи и да ги достават во осигурителната компанија „Еуросиг“ за да добијат оштета. Овој повик го упати директорот на компанијата, Кадри Моринај кој изрази сочувство до семејствата на настраданите.

-Упатив апел до семејствата да достават документација што поскоро. По три дена компанијата ќе изврши исплата. Им посакувам што поскоро закрепнување – изјави Моринај.

За повредените ќе се исплатат од 4.500 евра, а за семејствата на настраданите до 9 илјади евра.

-Оштетата ќе се врши според возраста и случаите, така како што предвидува законот. Вкупната сума изнесува 675 милиони евра – додаде Моринај.


Шестмина во критична состојба, на млада пациентка и се заканува ампутација на ногата


Скопје, 15 февруари, 2019 - 13:32 (META) 

Десетмина од повредените во несреќата што се случи кога автобус излета на автопатот Скопје-Тетово се во тешка состојба, а шестмина се во критична, рече денеска министерот за здравство Венко Филипче во изјава за медиумите.

Во болницата „8 Септември“, вкупно хоспитализирани се 28 пациенти од кои шест денеска ќе бидат пуштени на домашно лекување. На скопските клиники има осум повредени од кои четворица се во критична состојба.

– Двајца од повредените во автобуската несреќа коишто се хоспитализирани во болницата „8 Септември” имаат сериозни повреди на главата и се во критична здравствена состојба. Нивниот живот засега се одржува со апарати за дишење. На една млада пациентка која се наоѓа во Клиничкиот центар утрово ѝ се влоши состојбата и во моментот е на операција, состојбата со ногата и е лоша и можно е да ѝ ја ампутираат. Конзилиум од доктори одлучува што ќе се прави – рече Филипче.

Двајца од повредените во „8 Септември“ ноќеска се оперирани, односно 15-годишно момче и 40-годишен маж.

Како што информираше директорот на болницата, Христијан Костов, интервенцијата им била извршена откако било констатирано дека нивната состојба е влошена поради губење крв. Момчето е со повреда на црниот дроб, а на 40-годишниот пациент му е санирана повреда на тенкото црево.

-Двајца од пациентите овде се на респиратор уште првиот момент на пристигнување, имаат доминантна повреда на мозокот и коските на лицето. Кај едниот има и контузија на белите дробови. И двајцата се политрауматизирани, едниот е во доста лоша состојба, но времето ќе покаже. За сега интервенција не е потребна – рече Костов и додаде дека во моментов нема потреба од нови залихи на крв.


Истрагата на местото на несреќата продолжува, во тек е обдукција на загинатите (галерија)


Скопје, 14 февруари, 2019 - 12:58 (META) 

Билансот од вчерашната страотна сообраќајна несреќа на патот Скопје – Тетово, до сега е 14 загинати и триесетина повредени од кои седуммина потешко.

Истрагата на местото на несреќата продолжи и денеска, а во Институтот за судска медицина се врши обдукција на загинатите и нивна идентификација. Детали за несреќата од страна на Јавно обвинителство се очекуваат денеска или утре. Возачот на автобусот е пуштен на домашно лекување, а земена е и првична изјава.

Денеска и утре се денови на жалост, и се откажани бројни културни манифестации како и прослави за Св.Трифун.

Општина Гостивар денеска одржува комеморативна седница, бидејќи најголем дел од починатите и повредените се од таму. Сообраќајната несреќа е тема во регионалните медиуми, а телеграми со сочувство пристигаат од сите земји во регионот и пошироко.

Повредените денеска ги посети и премиерот Зоран Заев, како и министерот за здравство Венко Филипче кој ја следи состојбата на повредените кои се лекуваат на неколку клиники.

 


Филипче: Бројот на загинатите е 14, не 15, а седум се во критична состојба


Скопје, 14 февруари, 2019 - 12:47 (META) 

Не се основани шпекулациите дека починал уште еден од повредените во вчерашната автобуска несреќа, и дека бројката се искачила на 15 загинати, соопшти министерот за здравство Венко Филипче претпладнево, по посетата заедно со премиерот Зоран Заев и вицепремиерот Бујар Османи, кој инаку е хирург, на полесно повредените кои се хоспитализирани во скопската Градска болница „8 Септември“.

Премиерот Заев се заблагодари и на итната помош, на полицијата и пожарникарите, како и на „8 Септември“ и на Клиничкиот центар, како и на тетовската болница, но исто така и на локалното население што прво притрчано да помага на повредените.

– Сакам да се заблагодарам на „8 Септември“ каде сме сега, на Клиничките центри, сите други јавни институции и во Тетово и во Гостивар, но и на полицајците и пожарникарите и на сите други јавни служби кои беа со желбата да помогнат на луѓето и да учествуваат во нивното спасување.  Сакам да се заблагодарам од името на Владата за солидарноста и хуманоста на нашите сограѓани од селото кошто притрчаа во првиот момент и буквално покажаа човечност, големина. Владата е подготвена да помогне за се што треба, за повредените, секако и за семејствата на загинатите. Навистина огромна трагедија, која ја обви во тага целата наша земја – порача премиерот Заев.

И министерот Филипче изрази сочувство до семејствата на загинатите, како и благодарност до локалното население.

Тој уверуваше дека сите возила на Итна помош од Скопје веднаш по дојавата се упатиле кон местото каде излета и се преврте автобусот на Дурмо Турс и изрази огромна благодарност до приватните болници „Аџибадем Систина“ и „Неуромедика“ бидејќи веднаш ги испратиле своите возила за Итна помош за да помогнат во помагањето и превезувањето на повредените.

-Исклучително брзо и промптно реагираше службата за Итна помош, на ефикасен и професионален начин дадоа брза помош. Мора да дадам благодарноста на двете приватни болници кои излегоа во пресрет со нивните амбулантски возила и ги транспортираа повредените овде во „8 Септември“. 80 отсто од персоналот беше на работа за вмногу краток временски интервал од 15 минути и се организираше системот, се направи тријажа и се сместија во соодветните оддели за лекување тука и во Клиничкиот центар. Во овој момент во „8 Септември“ има четири пациенти кои се во одделот за интензивна нега и се во критична состојба, и уште тројца пациенти кои се во Клиничкиот центар во одделот за интензивна, врз кои во текот на ноќта се изврши хируршка интервенција и тие утрово се во критична состојба. Искрено се надевам дека овие 7 пациенти ќе ја надминат оваа криза и понатаму ќе го продолжат лекувањето – рече Филипче, појаснувајќи дека ноќеска е оперирана уште една пациентка во „8 Септември“ која уште е во критична состојба.


Бројката на загинати во автобуската несреќа се зголеми на 14, а шестмина се борат за живот


Скопје, 14 февруари, 2019 - 0:11 (META) 

По завршување на синоќешната вонредна владина седница по повод тешката сообраќајна несреќа на патот Скопје-Тетово, премиерот Зоран Заев соопшти дека бројката на загинати се зголеми на 14, а шестмина се борат за живот.

Телата на загинатите се дадени на обдукција на Институтот за судска медицина каде што се врши идентификација.

Министерот за внатрешни работи Оливер Спасовски информираше дека истрагата за причините за несреќата продолжува и денеска.

Владата денеска и утре ги прогласи за денови на жалост, а општините Неготино и Демир Капија ги откажаа сите настани предвидени за прослава на „Св.Трифун“.

Граѓаните на Скопје се мобилизираа и на социјалните мрежи нудеа помош за роднините на загинатите и повредени патници, од кои, најголем број се од Гостивар. По тој повод, Општина Гостивар денеска ќе одржи вонредна седница на која ќе се донесе одлука за прогласување на тридневна жалост.


Петмина мртви откако воз удри автобус кај Ниш


Ниш, 21 декември, 2018 - 14:21 (META) 

Во голема несреќа што се случи утрово, кога воз удри автобус на „Ниш Експрес“ близу српскиот град Ниш, животите ги загубија пет лица, а се стравува дека бројката на жртви може да расте, бидејќи во Клиничкиот центар во Ниш во критична состојба се уште двајца 16-годишници.

Како што јавуваат српските медиуми, на обележан премин, но без рампи, на пругата кај Доње Меѓурово воз што сообраќал на линијата Ниш – Прокупље околу 7.30 часот удрил во автобусот во кој, покрај возрасните, имало и многу средношколци што оделе на училиште. Автобусот бил преполовен, а задниот дел од возот излегол од шините.

Во несреќата загинале двајца возрасни и едно 15-годишно момче, а подоцна во текот на операциите во Клинички центар Ниш починале 42-годишна жена и 15-годишна средношколка.

Глетката била ужасна, а според српските медиуми, полицајците, медицинскиот персонал и пожарникарите на местото на несреќата плачеле додека ги извлекувале повредените.

Повредени биле 27 лица, сите од автобусот, а во тешка состојба се десетмина.


Возачот на автобусот кој се преврте кај Лесковац возел со околу 100 километри на час


Лесковац, 17 декември, 2018 - 11:02 (META) 

Неприлагодена брзина за условите на патот, односно веројатно околу 100 километри на час е причината за тешката несреќа на македонскиот автобус кој ноќта во неделата се преврте близу Лесковац, Србија при што загинаа три лица, а 32 се повредени, јавуваат српски медиуми, повикувајќи се на извори во истрагата.

Автобусот, според преживеаните патници, почнал неконтролирано да се движи, по што се превртел кај Брестовац, речиси пред Лесковац.

Потешко повредените во болниците во Ниш и во Лесковац синоќа ги посети македонскиот министер за здравство, Венко Филипче.

Српските медиуми јавуваат дека возачот, кој се сомничи дека е одговорен за трагедијата, е уапсен.

–  Според досегашните информации, постои сомневање дека возачот возел со брзина од околу 100 километри на час иако патот бил завеан со снег и лизгав, што довело до несреќата – вели извор од истрагата за српските медиуми.

Како што синоќа изјави министерот Филипче, во Лесковац се сместени осум пациенти, кои се полесно повредени, а за денеска или утре би биле испратени во Македонија. Во Ниш се сместени пациенти се посериозни повреди, кои се под постојан надзор, а двајца од нив можеби ќе треба да се оперираат. Како што рече Филипче, во договор со колегите од Клиничкиот центар Ниш, ќе се реши дали ќе бидат оперирани таму или ќе бидат транспортирани во Скопје.

– Спиев и ме разбуди викање. Погледнав и видов дека автобусот оди лево-десно. Се фатив за седиштето и одеднаш автобусот се преврте. Раката ми остана под седиштето – вели Ремзи Демиров (55) од Штип, кој со автобусот на „Еуро Бус“ патувал за Виена. Хоспитализиран е во Ниш.

Голем број екипи на Итна помош и пожарникари од Лесковац и Ниш многу бргу пристигнале на местото на несреќата.

– Глетката беше страшна. Автобусот беше свртен на страна, патниците лелекаа и бараа помош, додека скршени стакла беа разлетани на сите страни. Четири лица беа заробени во автобусот. Докторите веднаш истрчаа да помогнат, за жал, за тројца беше доцна – вели соговорник за „Србија данас“.


Бројот на загинати во земјотресот во Индонезија се искачи на 436


Џакарта, 13 август, 2018 - 10:19 (META) 

Бројот на загинати во земјотресот на индонезискиот остров Ломбок порасна на 436, а причинетата материјална штета се проценува на стотици милиони долари.

Повеќето жртви од земјотресот со магнитуда од 7 степени што го погоди Ломбок на 5 август загинаа во урнати згради, велат надлежните.

Властите на Индонезија наведоа дека во земјотресот се оштетени куќи и други објекти, како и инфраструктура, а дека материјалната штета изнесува најмалку 342 милиони долари.

Околу 350.000 жители на островот Ломбок беа принудени да ги напуштат своите домови.


Најмалку 50 загинати и 150 повредени во пожарот во Грција


Атина, 24 јули, 2018 - 9:38 (META) 

Најмалку 50 луѓе ги загубија животите во пожари во Грција кои од вчера беснеат во најголем дел во областа Атика кај Атина. Локалните власти стравуваат дека бројката на загинати во пожарот ќе се зголеми на 60, бидејќи се уште има многу исчезнати.

Портпаролот на Владата, Димитрис Ѕанакопулос соопшти дека Атика се соочувала со многу тешка ноќ.

– Бројот на потврдени загинати, за жал, во овој момент е над 20, а повредени се повеќе од 88 возрасни лица, од кои 11 се сериозно, како и 16 деца – рече Ѕанакопулос.

Грчкиот премиер, Алексис Ципрас синоќа ја прекинал посетата на Босна и Херцеговина по што итно се врати во Атина. Градот Мати што е во непосредна близина е целосно уништен од пожарите, a рибари и крајбрежната стража спасиле околу 700 луѓе.

Според спасувачите од Црвениот крст, во двор на таверна во населбата Мати, во источниот дел на областа Атика, биле пронајдени јагленисани тела на 26 лица помеѓу кои и деца, кои биле прегрнати во неколку групи, објавуваат грчките медиуми.

Претпоставките на спасувачите се дека луѓето тргнале кон морето за да се спасат, но на 30-40 метри оддалеченост, поради големината и јачината на огнените јазици, нивните обиди биле залудни.

Грција вчера побара меѓународна помош, преку механизмот на ЕУ, позитивно одговориле Шпанија и Кипар, а помош ќе добие и од САД, по упатеното барање од министерот за одбрана.

Македонија ќе испрати два авиони за гаснење на пожарот. Утрово, пожарот иако е ставен под контрола, се уште не е целосно изгасен.


Повредени 20 работници во сообраќајка кај Мамутчево


Велес, 23 јули, 2018 - 15:47 (META) 

Дваесет работници се повредени во сообраќајката што се случи попладнево околу 13:20 часот на излезот од велешкото село Мамутчево. Се судриле камион и автобус кој превезувал работници од Велес.

Како што информира за МИА Весна Лазаровска од ЈЗО Општа болница Велес со возила на итна медицинска помош од Велес во болницата итно биле донесени 20 повредени работници.

– Сите беа прегледани и им беше укажана медицинска помош од тимот на Општа болница Велес предводени од хирургот д-р Филип Тодоровски. Од нив кај осуммина беа утврдени полесни телесни повреди и истите се хоспитализирани во болницата, а останатите 20-ина по укажаната медицинска помош во амбулантата на болницата испратени се на домашно лекување – информира Лазаровска.

Екипа на СВР Велес е на терен и прави увид за утврдување на причината за сообраќајната несреќа.