Магла на Стража, Ѓавато и Плетвар


Скопје, 7 февруари, 2019 - 9:41 (META) 

Намалена видливост од 30 до 50 метри поради магла утринава има на планинските превои Стража, Ѓавато и Плетвар.

Од јавното претпријатие „Македонија пат“ информираат дека од 05.40 часот е укината забраната за тешки товарни возила на патниот правец Маврово-Дебар која беше воведена поради врнежи од снег.

На останатите патни правци низ државата сообраќајот се одвива по наместа влажни коловози.

Сообраќајот надвор од градските средини е умерен, а на граничните премини од македонска страна нема подолги задржувања.


Во Тетово презентиран ДУП-от за Попова Шапка, екологистите разочарани


Тетово, 30 јануари, 2019 - 13:23 (META) 

Здружението за планирање, градежништво, трговија и услуги „Про-Инженеринг“ вчера го претстави Деталниот урбанистички план (ДУП) за Попова Шапка, а од Граѓанската иницијатива „Да ја спасиме Попова Шапка“ обвинија дека Општина Тетово одлучила да усвои план што никогаш не може да се реализира, известува „Порталб“.

ДУП-от за Попова Шапка предвидува неколку проширувања на патиштата и зголемување на капацитетите за паркирање. Во овој план не е вклучен делот каде што се наоѓаат ски-лифтовите, туку само делот кој што е замислен како викенд зона.

Присутните на презентацијата, граѓани и инвеститори, дадоа свои идеи за тоа што треба да се поправи во урбанистичкиот план. Од Општината велат дека предлозите ќе бидат разгледани и ќе бидат земени предвид.

-Откако ќе се разгледаат предлозите, ДУП-от ќе биде испратен до Министерството за транспорт и врски и ќе биде одобрен – објасни Арменд Фазлиу од Општина Тетово.

Од друга страна, од Граѓанската иницијатива „Да ја спасиме Попова Шапка“ велат дека планот е стар а презентацијата е направена само со цел Општина Тетово да се оправда дека во овие моменти подготвуваат нешто ново по барањата на Иницијативата.

-Деталниот план е истиот што го подготви поранешниот градоначалник Сади Беџети и сега истиот се преиспитува. Овој проект беше спречен од многу институции поради многуте негативни анкети кои предвидуваа дека со тоа се врши уништување на Попова Шапка – рекоа од граѓанската иницијатива.

Според нив не е усогласен со Мастер планот подготвен од ЕЛЕМ.

-Деталниот урбанистички план не е во согласност со Мастер планот подготвен од страна на ЕЛЕМ, план кој е во сила (објавен од Општина Тетово) и без усогласување или соодветна поврзаност на Мастер планот и ДУП-от не може да има квалитетно или долгорочно решение. Побарано е профилите на патиштата што водат кон централните хотели и хотелите што се предвидени за изградба, да имаат простор за паркирање на двете страни на патот. Жителите на викендичките бараат да се предвиди посебен влез или посебна врска за да се олесни сообраќајот помеѓу населбата и туристичкото одморалиште – велат од  Граѓанската иницијатива „Да ја спасиме Попова Шапка“.

Тие велат дека Општина Тетово со овој ДУП е во контрадикција со одлуките за уривање на оградите, активност што ја спроведе минатата година, а сега истата општина врши парцелизирање на површините каде што ќе се постави објект и површината околу него, и ја гарантира приватизацијата од страна на инвеститорот, чин што е во спротивност со одлуката за рушење на оградите.

Од Иницијативата бараат општината да организира уште еден состанок на повисоко ниво со урбанисти и добри познавачи на оваа проблематика.


Повеќе од една милијарда евра инвестиции во патната инфраструктура најави Владата


Скопје, 22 јануари, 2019 - 14:41 (META) 

Една милијарда и 270 милиони евра се предвидени за инвестиции во патната инфраструктура, рече денеска премиерот Зоран Заев на прес-конференција која беше посветена на изградени патишта лани, проекти кои се во тек, но и изградба, рехабилитација и реконструкција на патишта за оваа година, во должина од 770 километри, а за кои, парите се веќе обезбедени.

„Оваа година ќе има засилени активности на автопатот Кичево- Охрид, во должина од 60 километри за кој се надминати проблемите. Изградбата на автопатот Миладиновци – Штип е на крај и до Штип ќе се стигнува за помалку од 40 минути. Се гради и автопатот Скопје-Блаце, така што кон Приштина ќе се патува за 45 минути. Експресниот пат од Ранковце кон Крива Паланка ќе обезбеди безбедно и брзо патување до Бугарија. Квалитетните и нови патишта се важни за безбедноста на граѓаните и за економски раст“, рече Заев.

Прашан, дали доколку се одржат парламентарни избори, овие проекти ќе се реализираат премиерот рече дека проектите не може да бидат стопирани бидејќи се испланирни со програма и е предвиден буџет за нив.

Вицепремиерот за економски прашања Кочо Анѓушев потенцираше дека изградбата на патиштата ќе го заживее градежништвото, за кое има реални очекувања дека ќе даде сериозен инпут во зголемување на домашниот бруто-производ (БДП).

„Лани сите сектори остварија раст освен градежништвото. Лани беа завршени 193 километри во вредност од 30 милиони евра. Тоа е малку, но не ја изгубивме годината, туку подготвени се проекти за реализација на една милијарда и триста евра инвестиции во 987 километри патна инфраструктура. Имаме проекти кои се во тек во износ од една милијра и 35 милиони евра во должина од 363 километри. Започнувме нови 420 километри“, рече Анѓушев и додаде дека овие бројки му даваат за право да верува дека градежништвото ќе постигне добри резултати.

Според директорот на Јавното претпријатие за државни патишта (ЈПДП) Зоран Китанов, во оној момент кога ќе се создадат временски услови ќе може да почне да се работи на патиштата, за што ќе бидат ангажирани сите домашни градежни компании, а се очекува да работат 10.000 луѓе.

Парите за изградба на патиштата се обезбедени од сопствени средства на ЈПДП, кредити преку ова претпријатие.

Исто така, планирано е и воведување на електронска наплата на патарините, градење на два нови моста и реконструкција на 12.

Според министерот за транспорт и врски Горан Сугарески, целта е да нема отсечено место во државата, а со проект преку Светска банка, треба да се градат и локалните и рурални патишта.


Забрана за камиони кај Маврово и Стража, остатоци од снег на коловозите


Скопје, 4 јануари, 2019 - 9:49 (META) 

Сообраќајот на државните патишта се одвива по влажни  коловози, наместа со остатоци од кашест снег на коловозот. Снег со среден интензитет паѓа во Битола, Крива Паланка, Делчево, Демир Капија, Удово, Гостивар, Крушево, Павлешенци, Кочани, Делчево, Смојмирово, Маврово и на планинските превои Стража, Ѓавато и Плетвар.

АМСМ информира дека на регионалниот пат од село Рогачево до граничен премин Јажинце поради силен ветер наместа има намети од снег.

Се уште се во сила забраните за сообраќај за тешки товарни возила на патните правци крак Маврово – Дебар и Гостивар – Кичево преку планинскиот превој Стража.

Интензитетот на сообраќај на патните правци надвор од градските средини е умерен. На граничните премини нема подолги задржувања за влез и излез од државата.


Сериозна градежна патна и железничка инфраструктура најавува Анѓушев за 2019


Скопје, 27 декември, 2018 - 12:32 (META) 

Во организација на Канцеларијата на премиерот се одржа неформална предновогодишна средба и дружба на економскиот тим министри во Владата со претседателите на стопанските комори и претставници на бизнис-секторот.

Во рамките на оваа средба, вицепремиерот за економски прашања и координација со економските ресори, Кочо Анѓушев стави акцент на плановите за четирите клучни области, индустријата, трговијата, градежништвото и земјоделството кои имаат сериозно учество во севкупниот раст на бруто домашниот производ.

„Покрај автопатот Кичево – Охрид кој ќе продолжи да се гради, се градат експресните патишта, Штип – Радовиш, се гради Штип – Кочани, се гради излезот кај Куманово кон Крива Паланка, се гради излезот од Градско кон Прилеп, ќе се гради Скопје – Блаце. Ова се проекти од една груба бројка, од над една и пол милијарда евра заедно со железницата од втората фаза, којашто сега се тендерираше и сега е во фаза на евалуација, далекуводот од Македонија кон Албанија во вредност од 50 милиони евра кој е проектиран, а ќе се распише во јануари. Преку Законот за енергетика ќе се отвори простор за инсталација на 200 мегавати фотоволтаици кои ќе бидат распишани во две фази, првата ќе биде во првиот квартал во 2019“, соопшти Анѓушев.

Тој посочи дека со овие активности кои што се во тек, во 2019 започнува еден сериозен градежен процес на патна, железничка и енергетска инфраструктура кој на месечно ниво се очекува да има реализација од околу 50 до 60 милиони евра што ќе го подигне градежништвото на ниво на кое заедно со приватните градби ќе генерира раст.


Сугарески: 800 милиони евра за подобрување на патната инфраструктура


Кавадарци, 24 септември, 2018 - 12:40 (META) 

Во моментов низ целата територија на Македонија се работи на реализација на проекти во висина од преку 800 милиони евра, што е историски највисока инвестициска програма за подобрување на квалитетот на патната мрежа во државата, изјави министерот за транспорт и врски Горан Сугарески кој денеска изврши увид во изградбата на нов мост на реката Луда Мара во село Ваташа, Општина Кавадарци.

Сугарески додаде дека набрзо ќе започне да се реконструира регионалниот пат Кавадарци – Росоман.

– Исто така во тек е изградба на експресниот пат од Градско до Прилеп, а до ноември оваа година очекуваме да биде завршена рехабилитацијата на автопатска делница Неготино – Демир Капија. Сето ова е дел од големиот инвестициски циклус во патната инфраструктура што го најавивме – додаде тој.


Китанов: Капиталните инвестиции во патишта 3,5 милиони евра повеќе од лани


Скопје, 6 јули, 2018 - 13:26 (META) 

Директорот на Јавното претпријатие за државни патишта, Зоран Китанов денеска информираше дека во првата половина на 2018 година, реализирани се капитални инвестиции 3,5 милиони евра повеќе од лани.

– ЈП за државни патишта во вториот квартал од 2018 година има остварено инвестиции во вкупен износ од 2.217.070.250 денари или 36 милиони евра, што е зголемување од 37 проценти од лани. Споредбено за првото полугодие од 2018 година во однос на истиот период лани има реализација на инвестиции за 6,82 проценти повеќе, или 3,43 милиони евра – истакна Китанов.

Тој додаде дека овие средства се обезбедени од кредити од меѓународни финансиски институции, како и од сопствени средства на ЈП за државни патишта.

– Со околу 20 милиони евра, буџетски средства и со средства на ЈПДП, веќе се работи на рехабилитација на регионални патишта во должина од 230 километри. Со 86 милиони евра средства обезбедени од Европската банка за обнова и развој се планира рехабилитација на 26 патни правци во должина од 422 километри. Со 14 милиони евра од Светска банка се работи на рехабилитација на 13 патни правци во должина од околу 150 километри – додаде Китанов.

Инаку, за  оваа година се обезбедени вкупно 270 милиони евра за изградба на нови патишта, за реконструкција, рехабилитација и за обнова на повеќе од 60 патни правци ширум Македонија во должина од околу 800 километри. Дел од овие средства се од државниот и од буџетот на ЈПДП, а дел се обезбедени преку заем од Светска банка, ЕБОР и ИПА2.

Тој информираше и за приходот на патарините, кој во првата половина на годинава е зголемен за 54 милиони денари повеќе од лани, како резултат на како што рече, зголемениот обем на сообраќај и на подобрата организираност.

– Целта на ЈПДП и на Владата е да се реализираат програмските одредници „Македонија без црни точки” и инфраструктурно поврзување кое ќе овозможи пристигнување од еден до друг град за помалку од 90 минути – објасни Китанов.


Сугарески: Предвидени се 300 милиони евра инвестиции во патишта во Источниот регион


Штип, 5 април, 2018 - 15:06 (META) 

Должината на експресниот пат Штип – Кочани кој е во изградба, изнесува 28 километри и предвидено е да се гради во две фази, информираше денеска министерот за транспорт и врски, Горан Сугарески кој направи увид во градежните работи.

– Во тек е изградба на првата фаза од Штип до Крупиште во должина од 14,3 километри, инвестиција со вредност од преку 20 милиони евра. При изградбата на оваа фаза, наидовме на потешкотии при реализацијата на проектот, но успеваме да ги надминеме и во моментов вкупниот прогрес на градежните работи изнесува 20 отсто – изјави Сугарески.

Во однос на втората фаза од реализацијата, во тек е одобрување на тендерската документација.

– Источниот регион е токму оној во кој се предвидени најголеми инвестиции во изградба и реконструкција на патната мрежа. Тука ќе реализираме инвестиции од околу 300 милиони евра во изградба на автопати, два експресни патишта и реконструкција на регионалните патишта. Вкупниот прогрес на градежните работи на автопатот Миладиновци – Штип изнесува 77 отсто и согласно анекс-договорот што го потпишавме, очекуваме да биде завршен до септември оваа година – додаде Сугарески.


Градежниците ќе одговорат на офанзивната градба на патишта, ако се знаат условите


Скопје, 30 март, 2018 - 14:08 (META) 

Градежните компании ќе може да ја следат динамиката на офанзивата за изградба на патишта во државата, ако има добар план и организација, одговори на новинарско прашање претседателот на  Градежната комора на Македонија при Сојузот на стопански комори на Македонија (ССК), Ивица Јаќимовски.

– Компаниите имаа капацитет да го спроведат овој план ако има добра организација, основен проект и континуитет во извршувањето. Потребно е да биде обезбедена динамика на реализација, редовно сервисирање на обврските и плаќања, поставување на рокови. Но, релизацијата на изградбата на патната инфраструктура ќе зависи и од временските услови – рече Јаќимовски.

Министерот за транспорт и врски, Горан Сугарески, рече дека планот за изградба на патната инфраструктура е јасен и не гледа проблеми во изведбата, бидејќи средствата се обезбедени.

– На тендерите на Јавното претпријатие за државни патишта може да се јават сите заинтересирани домашни компании, бидејќи постапките ќе бидат транспарентни. Најголем дел од компаниите кои ги градат автопатиштата се домашни, а тие се и главни подизведувачи. Така што нашите градежни фирми се максимално вклучени во изградбата на инфраструктурата-  рече Сугарески.

Денеска во Сојузот на стопански комори на Македонија (ССК) компaниите разговараа со Сугарески за можностите за стимулирање и развој на секторот, актуелната состојба, законската регулатива, како и за предизвиците со кои се соочуваат во секојдневното работење.

Согласно најавениот буџет и инвестиции, Градежната комора на Македонија очекува стабилизирање и подобрување на состојбата во градежништвото .

Јаќимовски апелираше до властите да се носат поквалитетни детални урбанистички планови, затоа што за непланското градење, вината не ја гледа во инвеститорите, туку во локалната самоуправа.

 


Офанзивна изградба: 270 милиони евра за 800 километри на 60 патни правци


Скопје, 28 март, 2018 - 16:07 (META) 

Премиерот Зоран Заев најави дека за оваа година се обезбедени 270 милиони евра за изградба на нови патни правци, за комплетирање на започнатите инфраструктурни проекти и автопати како и за реконструкција, рехабилитација, одржување и заштита на регионални патишта

Тој додаде дека дел од овие средства, наменети за 60 патни правци во должина околу 800 километри, се обезбедени од буџетот и средства на Јавното претпријатие за државни патишта (ЈПДП), а дел се заеми од Светска банка, Европската банка за обнова и развој (ЕБОР) и ИПА2.

29541827_1739350552790795_2417357738823505708_n

– Со околу 20 милиони евра, буџетски средства и средства на ЈПДП ќе се работи на рехабилитација на регионални патишта во должина од 230 км. Оваа година ги комплетираме автопатите Демир Капија – Смоквица и Миладиновци – Штип. Во текот на месец април започнуваме со изградба на два нови експресни патни правци, Градско – Дреново и Штип-Радовиш. Во тек е изградба и на експресен пат Чатал (Страцин) – Длабочица – Крива Паланка. Со 86 милиони евра средства обезбедени од Европската банка за обнова и развој се планира рехабилитација на 26 патни правци во должина од 422 км. Во текот на месец јуни започнува рехабилитацијата на 7 патни правци. Со 14 милиони евра од Светска банка ќе се работи на рехабилитација на 13 патни правци во должина од околу 150 км. – рече Заев.

29572910_1739350556124128_561639302346533139_n

Директорот на Јавното претпријатие за државни патишта, Зоран Китанов рече дека испитувањата покажале дека нашите патишта се премногу оштетени и итно е потребна санација за да не дојде до уште поголеми оштетувања. Додаде дека работата на патиштата ќе се одвива во две фази и не може да се почне одеднаш, бидејќи немаат доволно механизација.

Тој најави и модернизирање и електронско наплаќање на патарините, како и зголемување на безбедноста на патиштата.

Министерот за транспорт и врски, Горан Сугарески, вели дека „цела држава ќе биде под градежна офанзива“.