!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Во Охрид пристигнаа полски туристи со првиот чартер-лет од Катовице


Охрид, 22 јуни, 2017 - 15:26 (META) 

„ТАВ Македонија“ утрово го пречека првиот чартер-лет од Полска на аеродромот „Св. Апостол Павле“ во Охрид, одбележувајќи го почетокот на соработката меѓу „ТАВ Аеродроми“ и еден од најголемите полски тур-оператори „Рего-бис“.

Првиот чартер-лет, управуван од полската авиокомпанија „Смол планет ерлајнс“ (Small Planet Airlines), пристигна од Катовице и донесе 220 полски туристи во Охрид.

– Ќе имаме еден чартер-лет неделно, односно секој четврток, од Катовице, опериран од „Смол планет ерлајнс“ (Small Planet Airlines) за време на летната сезона во 2017 година. Од денеска, па сè до крајот на септември, на охридскиот аеродром ќе пристигнат вкупно 14 сезонски летови од Катовице – изјави генералниот директор на „ТАВ Македонија“, Алпер Ерсој.

Како што изјавија од „ТАВ Македонија“ и во согласност со најавите од полскиот тур-оператор, авиолинијата Катовице – Охрид е само првата рута на која ќе сообраќаат чартер-летови од Полска. Варшава е следна дестинација, од каде што се очекуваат полски туристи да пристигнуваат на Охридско Езеро.

„Повеќе од 3.000 туристи ќе пристигнат со 14 летови со „ербас 321“, а со секој лет 220 патници ќе слетуваат во Охрид. Другите туристи ќе пристигнуваат со комфорни автобуси на секои десет дена. Ова не е само можност да им се излезе во пресрет на полските туристи за да можат да патуваат, туку ова е исто така можност да им помогнеме да ја истражат македонската култура и историја“, изјави Габриела Манка-Сокулу, сопственичка на „Рего-бис“.


„ЕУ за тебе“ утре во Охрид


Охрид, 20 јуни, 2017 - 14:23 (META) 

Шефот на Делегацијата на Европската Унија во Македонија, Самуел Жбогар, утре ќе го посети Охрид како дел од кампањата „ЕУ за тебе“.

Жбогар во Охрид ќе се сретне со градоначалникот, Никола Бакрачески, и ќе се запознае со реализацијата на проектот „Ватер нет“ (Water.net), финансиран од ЕУ. Овој проект е помогнат со 210.000 евра преку Програмата за прекугранична соработка со Грција, а неговата цел е да се отворат алтернативни можности за прекугранична соработка меѓу градовите Охрид и Едеса (Воден), познати по Охридското Езеро и по Воденските водопади.

Во центарот на Охрид во рамките на проектот е отворен Еколошки информативен центар, чија цел е да ги промовира убавините и туристичките производи на Охридскиот Регион, а исто така е изграден и дел од пешачката патека кај каналот Студенчишта, додека остатокот од патеката е изграден од Општината. Создадена е и подвижна лабораторија и кујна, како и ботаничка градина.

Кампањата има цел да ја подигне свесноста и да ја информира јавноста за помошта на ЕУ во земјата.


Прибе в петок на Охридската школа на природното право


Охрид, 20 јуни, 2017 - 12:48 (META) 

Рајнхард Прибе, раководителот на комисијата што во име на ЕУ во 2015 година го подготви списокот на неопходните реформи кои земјава треба да ги преземе за да го надмине застојот на патот кон зачленување во ЕУ, в петок во Охрид ќе одржи предавање на Охридската школа на природното право „Демократија и владеење на правото“.

Неговото пристигање во земјава вчера вицепремиерот за евроинтеграции, Бујар Османи, го најави за следниот вторник, но Прибе ќе пристигне порано за да учествува на конференцијата во Охрид во организација на МАНУ. Засега не е познато дали тој ќе има некои средби со политичари и со функционери.

Предавањето што ќе го одржи експертот на ЕУ е насловено „Демократија, владеење на правото и човекови права – релевантноста на вредностите на Европската Унија за земјите кандидатки“.

На школата која трае цела седмица, предавања ќе одржат професори од правните факултети од земјава, а ќе учествуваат и министерот за правда, Биљен Салији, и специјалните обвинителки Катица Јанева, Фатиме Фетаи и Ленче Ристовска.


Општина Охрид: Наскоро ќе донесеме соодветна правна одлука за хотелот во Лагадин


Охрид, 19 јуни, 2017 - 18:11 (META) 

Општина Охрид донесе решение за поништување на правосилноста на одобрението за градба на хотелот во Лагадин, на што инвеститорот со жалба го обжали предметното решение до соодветната второстепена комисија при Министерството за транспорт и врски, од каде жалбата на инвеститорот е уважена, а предметот е вратен на повторно одлучување на Општина Охрид, се вели во реакцијата на Општината на соопштението на граѓанската иницијатива „Охрид СОС“.

„Неколкупати ја известивме јавноста дека издаденото одобрение за изградба на споменатиот објект е поништено од страна на Инспекцискиот совет со образложение дека инвеститорот ненавремено известил за почнување со почеток на градежни активности. По уважувањето на жалбата од страна на второстепената комисија при Министерството за транспорт и врски, наведениот предмет е во фаза на обработка и целосно постапување по насоките дадени од страна на второстепениот орган и наскоро се очекува да биде донесена соодветна правна одлука“, се вели во реакцијата на Општина Охрид.


Два земјотреси почувстувани утрово во Охрид и во Ресен


Охрид, 18 јуни, 2017 - 10:16 (META) 

Два земјотреси со умерен интензитет утрово се случија во југозападниот дел на Македонија, односно во охридското епицентрално подрачје. Првиот, кој бил посилен, е регистриран во 2.01 часот, додека вториот со послаб интензитет – во 8 часот изутринава.

Според податоците на Телеметриската сеизмолошка мрежа на Природно-математичкиот факултет во Скопје, епицентрите на двата земјотреси се лоцирани во подрачјето меѓу градовите Охрид и Ресен.

Интензитетот на првиот земјотрес е 3,1 степени според Рихтеровата скала, со хипоцентар, односно на длабочина од пет километри, додека вториот е со интензитет од 2,5 степени се случил на два километра длабочина.

Засега нема пријавени случаи на предизвикана материјална штета.


Наместо во капела, погребник од Охрид ги оставал покојниците во комбе во двор


Охрид, 26 мај, 2017 - 15:26 (META) 

Сопственик и управител на погребалното претпријатие „Мирен сон“ со Охрид, подолг период починатите лица наместо да ги остава во капела ноќта пред погребот, ги чувал во комбето паркирано во дворот на неговото претпријатие. Поради тоа СВР Охрид против 51-годишниот Д.Ш. поднесе кривична пријава за несовесно работење во служба.

Иако не плаќал за чување на покојниците во капела, тој по погребот на покојниците на гробиштата во некои села, на роднините им наплаќал и за превоз до градските гробишта, влез во нив и за чување на телата во капелата.

Согласно Закон за гробишта и погребални услуги, пријавениот бил должен телата на починатите лица да ги однесе на чување во капела во ЈП „Градски гробишта”, а потоа од таму да ги подигне и да ги одвезе до гробиштата.


Во Охрид летово ќе биде забрането движење за туристички автобуси во центарот


Охрид, 15 мај, 2017 - 17:05 (META) 

Во текот на летната сезона, во централното подрачје на Охрид ќе биде забранет влезот на туристичките автобуси, било договорено на денешната средба на претставници на СВР Охрид, општинскиот сектор за локален економски развој, сообраќајни инспектори и на туристичките агенции.

Како што соопшти СВР Охрид, туристичките автобуси не ќе смеат да влегуваат во централното градско подрачје, а на дел од улицата Партизанска, на потегот од студентскиот дом „Кузман Шапкарев“ до „Комерцијална банка“, ќе биде одредено паркиралиште за  привремено запирање на туристичките автобуси. Тоа паркиралиште ќе биде исклучиво за кратко застанување на туристичките автобуси и за симнување на туристите.

Дозволена рута за туристичките автобуси се булеварот Туристичка и улиците Димитар Влахов, Кузман Јосифоски Питу и Партизанска, односно 15. Корпус, Питу Гули и Јане Сандански.

Дозволени места за паркирање за туристичките автобуси, по договор со Јавното претпријатие „Биљјанини извори“, останува просторот кај Градскиот полигон, на булеварот АСНОМ и во непосредна близина на Јавното претпријатие „Водовод“ кај „Биљјанини извори“.


Македонските акцијаши и волонтери на собрание и на работа во Охрид


Охрид, 13 мај, 2017 - 14:44 (META) 

Сојузот на акцијаши и на волонтери на Македонија, денеска во Охрид го оддржува првото годишно собрание. Акцијашите и волонтери го  разгледуваат извештајот за едногодишната активност. Ќе се разговара и за подготовките за меѓународен волонтерски камп – „Охрид 2017“.

По состанокот, македонските акцијаши и волонтери, организирани од охридските колеги, ќе изведат акција за расчистување на зелениот простор од Билјанини извори до хотел „Белведере“, во соработка со ЈП „Охридски комуналец“.

– Тоа се истите наши другари и пријатели од целата земја кои, заедно со своите пријатели, возрасни и млади членови од Балканот, први со својата хуманост, солидарност и акција, се вклучија и помогнаа на несреќните од поплавите во Скопје – вели за „Мета“ Зоран Стевоски, од акцијашкиот клуб „Брег на младоста“ од Охрид.


Заштитата на Студенчишко Блато, „Охрид СОС“ ја подигна на европско ниво


Охрид, 11 мај, 2017 - 15:27 (META) 

Од 15 до 19 мај, во Скопје и во Охрид во работна посета ќе биде проф. д-р Јос Ферхуфен, претседател на Европскиот разгранок на Светското друштво на научници за блатни еко-системи. Од Граѓанската иницијатива „Охрид СОС“ велат дека Ферхуфен доаѓа на нивна иницијатива и дека во Скопје ќе одржи серија предавања на Природно-математичкиот факултет.

Исто така, ќе биде специјален гостин на тркалезната маса во организација на Здружението за заштита на животни и на животна средина „Еден“ на тема „Влијанието на планираните инфраструктурни проекти врз биодиверзитетот во Охридско-преспанскиот Регион“.

Во Охрид, професор Ферхуфен ќе го посети Хидробиолошкиот завод и ќе оствари работна средба со членови на Граѓанската иницијатива „Охрид СОС“.

– Причината за неговата посета е опасноста од уништување на Студенчишкото Блато во Охрид – последниот филтер на езерото и дом и прибежиште на многу ретки и ендемски видови. Граѓанската иницијатива „Охрид СОС“ две години непрекинато и посветено се бореше за заштита на Студенчишкото Блато што конечно даде плод и на последната стручна расправа во Општина Охрид беше потврдено дека блатото останува строго заштитена зона – велат од Здружение за заштита на животните и на животната средина „Еден“.

Оттаму нагласуваат дека, сепак, целта не е докрај постигната бидејќи со заклучок на Владата од 2013 година на Општината ѝ е наложено да се заштитат само 4 до 5 хектари земја, што е неприфатливо оти е многу помалку  од 50-70 хектари кои се предвидени со последната интегрирана студија за блатото.

– На блатото не само што му е потребно да се заштитат сите негови делови кои се сè уште функционални, туку е неопходно и да се ревитализира тоа што било низ годините уништено – нагласуваат од здружението „Еден“.


Граѓани од Охрид самоиницијативно се упатуваат кон Скопје


Охрид, 28 април, 2017 - 0:37 (META) 

Од Охрид, градот во кој се протестираше речиси секоја вечер откако т.н. иницијатива „За заедничка Македонија“ ги почна собирањата во Скопје и во другите македонски градови, и од каде потекнува Богдан Илиевски, еден од водачите, вечерва поединци и групи самоиницијативно се организирале и со свои приватни возила тргнале за Скопје. Засега нема информации дека е ангажиран автобус за патување во Скопје.

Од извори на ВМРО-ДПМНЕ дознаваме дека никој од кај нив не организирал патување за Скопје.

Во Охрид вечерва е мирно. Граѓаните се во исчекување на разврската по упадот на граѓаните во Собранието, пред телевизиските приемници и на социјалните мрежи.