Стариот охридски чинар ќе се ревитализира и заштити


Охрид, 14 февруари, 2019 - 11:21 (META) 

За чинарот на плоштадот „Чинар“ кој е во лоша состојба, Општина Охрид побара и доби посебна дозвола од страна на Министерството за животна средина и просторно планирање ( МЖСПП) за имплементација на мерките за санација и ревитализација.

За таа цел, во тек е тендерска постапка за избор на стручна фирма која ќе превземе активности за санација, ревитализација и статичко обезбедување на чинарот.

Охридските чинари се прогласени за споменик на природата со Решението на Републичкиот завод за заштита на спомениците на културата.

Дополнително, чинарот кој се наоѓа на плоштадот „Чинар“, е едно од препознатливите обележја на градот Охрид. Ова многувековно дрво опстојало во различни периоди и епохи од историјата на Охрид и Македонија, што само по себе го прави симбол на времето, односно „сведок“ на настаните кои се случувале и одвивале долги години наназад.


Стопирана постапката за легализација на седум објекти во автокампот „Градиште“


Охрид, 6 февруари, 2019 - 13:10 (META) 

На вчерашната седница на Советот на општина Охрид, беше повлечена предлог-одлуката за легализација на седум бесправно изградени објекти во автокампот „Градиште“. Вршителот на должност градоначалник на општина Охрид, Константин Георгиески истакна дека, причина за ваквиот потег е разрешувањето на досегашната Комисија за денационализација и формирањето на нова од страна на владата, од која ќе се чека мислење поврзано со повлечената предлог одлука.

– Иако стручните служби солидно ја подготвиле информацијата за легализација на објекти во авто кампот “Градиште“  и прибавени се позитивни мислења од сите институции, сметаме дека поради новиот состав кој треба да биде избран во Комисијата за денационализација, овие точки треба да ги повлечеме од седницата и да ги разгледуваме во периодот кога ќе прибавиме мислење од новите членови на комисијата – истакна Георгиески.

В.д. градоначалникот кажа дека во Општина Охрид во тек е ревизија на документацијата, но и начинот како се стигнувало до одредени одобренија за градба.

Во тоа се вклучени и спорниот објект во Лагадин, како и вклопувањето на бесправно изградени објекти кај автокампот „Градиште“, на што реагираа наследниците на имотот.

– Се ревидира дали се воопшто донесени тие планови легално и законски за да стасаме до тие одобренија за градба кои мора да ги издаваме. Кога ќе дојде инвеститор и побара одобрение за градба на постоечки план, јас како градоначалник сум должен да постапам по тоа барање – рече Георгиеска.

Советниците од редовите на ВМРО-ДПМНЕ истакнаа дека и претходно и сега се соочуваат со проблем да не знаат какви објекти ќе се легализираат. Во иднина ќе бараат од општинската администрација и урбанизам слики од објектите за да знаат конкретно какви градби легализираат.

На 24-та седница на Советот на општина Охрид беа присутни и поголем број жители на Пештани кои претходно бараа повлекување на точката за легализација на бесправно изградените обејкти во Градиште.  Околу 100 семејства речиси  две децении водат правна битка за денационализација на имотите во АК Градиште или исплата на пазарана вредност


Oштетувањата на градското пристаниште во Охрид ќе бидат санирани пред летната сезoна


Скопје, 29 јануари, 2019 - 15:43 (META) 

Министерството за транспорт и врски веќе издвоило пари за санирање на оштетувањата на градското пристаниште, а работите ќе почнат кога тоа ќе го дозволи хидролошката состојба. Од буџетот на министерството се предвидени 7,8 милиони денари (126.800 евра) за санација на пристаништата.

Поради големото количество врнежи од дожд и снег и очекуваното зголемување на водостојот, работите за санацијата не може да почнат во овој период, а тоа би се случило дури кон крајот на април.

Последното поголемо невреме од март минатата година направи голема пукнатина на пристапниот дел на пристаништето, кој служи за спуштање кајчиња, глисери и други помали пловни објекти. Од Капетанијата на пристаништа велат дека најновото оштетување не ја загрозува стабилноста на објектот, но потсетуваат дека по самиот пристанишен ѕид има дупки и девијации кои мора да се средат.

Локалната самоуправа се правдаше дека нема никакви надлежности над објектот и не може да прави парцијални санации без претходни научни анализи и испитувања.

Градското пристаниште датира од далечната 1938 година. Сопствениците на пловни објекти бараат негова целосна реконструкција, доградба, осовременување и зголемување на капацитетот.


Прекината исплатата за штетите од земјотресите во Охрид


Охрид, 9 јануари, 2019 - 14:13 (META) 

Формирана е посебна комисија која ја чешла документацијата за исплатите од земјотресите во Охрид а покрената е и дисциплинска постапка против службеник во општината. Оваа информација од локаната самоуправа следи откако од ВМРО-ДПМНЕ обвинија за спорни плаќања на суми поголеми од настанатата штета.

Исплатата на штетите од земјотресите што се случија летото во 2017 година во Охрид е запрена откако на 6 декември лани започнал увид во документацијата за евентуални спорни плаќања. Ова објаснување доаѓа од локалната самоуправа по обвинувањата од ВМРО ДПМНЕ дека поседуваат информации, според кои Општина Охрид преку исплаќањето на штети за земјотресите Комисијата од општината доделила поголема сума на пари од штетата што се случила, за еден ист објект, на повеќе лица од едно семејство кои живеат на истата адреса во истиот објект.

Според ВМРО-ДПМНЕ, се работи за близок човек до СДСМ и до актуелното раководство во општината.

„За истиот овој случај, нашите информации велат дека се води и дисциплинска постапка во тајност поради уцени, за Претседателот и членовите на Комисијата за утврдување на штетите. СДСМ веднаш треба да одговорат за колкава сума на пари се работи, на кои луѓе се поделени парите и да приложи слики од штетата на објектот? Дали и за кои членови се води дисциплинска постапка и во какви корелации се со актуелното раководство на СДСМ во Охрид и во општината?“, праша на прес конференција Димче Арсовски, портпарол на ВМРО-ДПМНЕ.

Од ВМРО ДПМНЕ побараа надлежните институции да спроведат соодветна истрага и веднаш да се сноси одговорност. Од локалната обвинувањата ги отфрлија како неаргументирани. Но потврдуваат дека се води дисциплинска постапка.

„На 14.12.2018 година формирана е комисија со решение бр. 09-17994/1 со задача по увидот врз документацијата да направи записник за плаќањата, а на 31.12.2018 година е покрената дисциплинска постапка против државниот службеник кој е претседател на комисијата. Дисциплинската постапка ја води посебна комисија од седум члена која е формирана на 04.01.2019 година.“, велат од општината.

Од таму потсетуваат дека Комисијата за процена и утврдување на висината на штета настаната од природни непогоди, епидемии, епизоотии, епифитотии и други несреќи е формирана на 18 јули 2014 година со одлука на Советот на општина Охрид, односно од претходната локална власт на ВМРО-ДПМНЕ.


Државата ја презеде грижата за колекторот на Охридско Езеро


Охрид, 12 декември, 2018 - 12:46 (META) 

Владата на вчерашната седница донесе одлука да ја преземе грижата за колекторскиот систем на Охридското Езеро, ставајќи со тоа крај на маките со меѓуопштинското јавно претпријатие „Проаква“, кое беше нефункционално и создаваше загуби и не се грижеше за колекторот на загадени и отпадни води.

Со одлуката за формирање Јавно претпријатие „Колекторски систем“, всушност се прави поделба на досегашното Меѓуопштинско јавно претпријатие „Проаква“, кое беше заедничко за општините Охрид и Струга. Двете општини сега ќе треба да формираат свои јавни претпријатија за управување со водоснабдувањето на своите територии. Новото државно јавно претпријатие, пак, ќе ги преземе обврските за одржување, обновување и продолжување на колекторскиот систем.

Средствата за основање на ЈП „Колекторски систем“ во износ од пет милиони денари се обезбедени од сметката на Владата.


Оштетувањата на градското пристаниште во Охрид, нема да се санираат во догледно време


Охрид, 11 декември, 2018 - 12:34 (META) 

Оштетувањата на градското пристаниште нема да бидат санирани во пресрет на новогодишните празници кога во Охрид се очекуваат голем број гости. Најверојатно сликата нема да се промени ни за Водици. Последното невреме од месец март годинава, направи голема пукнатина на пристапниот дел на објектот кој служи за спуштање на кајчиња, глисери и други помали пловни објекти.

„Ние како локална самоуправа, пред се немаме никакви ингеренции и нема да влеземе во никаков проект без претходно да се направат геомеханички испитувања и се она што го бара науката во краен случај, за реконструкција на градското пристаниште. А не треба да се изземе од предвид дека надлежноста е на Министерството за транспорт и врски и Министерството за животна средина и просторно планирање. Има размислувања, има средби, сакаме како локална самоуправа да помогнеме, но првиот чекор треба да го направат овие посочени институции“, вели Томе Џамтоски, портпарол Општина Охрид.

Од Капетанијата на пристаништа на РМ, установија дека најновото оштетување не ја загрозува стабилноста на објектот. Посочија дека по самиот ѕид на Кејот, односно пристанишен ѕид, постојат дупки и девијации кои мора да се средат. Сопствениците на пловни објекти велат дека станува збор за стар објект кој датира од далечната 1938 година на кој повеќе од потребна му е неопходна поопширна санација. Во неодамна презентираниот проект на локалната самоуправа за реконструкција на кејот не се предвидени зафати за санација на пристаништето.

„Она што можам да го кажам во името на локалната самоуправа, е дека кај нас постои желба да се реконструира пристаништето иако има размислувања, реконструкцијата да биде со некакво проширување. Ова доаѓа од претставниците на фелата кои имаат бродови и го користат пристаништето во Охрид“, додава Џамтоски.

И додека со секое ново невреме кое ќе го зафати Охрид,  оштетувањата на објектот стануваат се поголеми, надлежните само преговараат, а конкретни мерки со децении никој не презема.


Ново оштетување на дел од градското пристаниште во Охрид


Охрид, 3 декември, 2018 - 16:24 (META) 

Последното големо невреме што го зафати Охрид предизвика ново оштетување на дел од градското пристаниште. Од Kапетанијата објаснуваат дека оштетувањето не ја загрозува стабилноста на објектот и додаваат дека веќе се известени надлежните органи во градот.

Градското пристаниште со тек на време попушта под налетот на брановите. Последното оштетување е голема пукнатина на пристапниот дел, која настана по големото невреме, кое го зафати Охрид во март годинава. Сопствениците на пловни објекти велат дека станува збор за стар објект кој датира од далечната 1938 година, на кој му е неопходна поопширна санација и посочуваат дека со секое ново невреме, оштетувањата на пристаништето стануваат поголеми.

– Разјадено е, уништено. Како што гледате од брановите кога беа, цело лето помина и зимата ќе фати, уште ништо не е направено – вели кајчарот Ираклија Каневче.

Неговиот колега Ристе Попоски се согласува дека несанирањето на оштетувањата создава неубава слика за градот.

-Имало случаи кога туристите се шетале, па пропаднале, се сопнале во таа дупка. Не е убава слика и за градот како туристичко место. Во Европа една коцка да фали, ќе ја стават каде што треба – вели Попоски.

Пукнатината на пристапниот дел на пристаништето кој служи за спуштање на кајчиња, глисери и други помали пловни објекти, не ја загрозува стабилноста на објектот, велат од Капетанијата на пристаништа на Република Македонија. Посочуваат дека оштетениот дел може да се санира со помал зафат.

– По самиот кејски ѕид, односно пристанишен ѕид, постојат дупки и девијации кои мора да се избегнат, за горните камења да не паднат во тие вдлабнатини. Исто така, голема е потребата и од негова надградба, бидејќи од година во година имаме сè повеќе пловни објекти кои треба некаде да бидат сместени – вели Горан Устијаноски, првиот човек на Капетанијата.


Општината загрижена за намалениот водостој на Охридското езеро


Охрид, 8 ноември, 2018 - 16:13 (META) 

Јавното претпријатие „Водовод и канализација“ на барање на локалната самоуправа ги исклучи пумпите со кои се зема вода за пиење од каптажата Билјанини извори и ја пренасочи во каналот Студечишта за да се спаси плашицата од помор. После апелите од екологистите и објавите во медиумите и од општината апелираат до надлежните итно да преземат соодветни мерки за надминување на проблемот со моменталниот водостој на Охридското езеро.

Нивото на езерото кое е на минимална дозволена кота ја загрижи локалната самоуправа. Во делот кај Студенчишкиот канал и поплитките делови на крајбрежјето на Охридското езеро, рибата поради нискиот водостој излегува на површина и наскоро може да се случи масовно да угинува поради недостаток на кислород. Од Општина Охрид испратија барање до Министерството за транспорт и врски да преземат соодветни мерки, со кои превентивно би се избегнале поголеми еколошки проблеми.

„Како општина, апелираме до надлежните институции и ја апострофираме сериозноста на проблемот со моменталниот водостој на Охридското езеро, особено на делот на каналот Студенчишта. Проблемот ескалира веќе одреден период наназад, што резултираше со намален водостој во езерото и каналот, што може да има сериозни последици врз рибниот фонд“, велат од општината.

За да се надмине оваа состојба, општината побарала од ЈП „Водовод и канализација“ да се исклучат пумпите со кои се зема вода за пиење од каптажата Билјанини Извори и истата да се пренасочи во каналот Студечишта за дотур на свежа вода и за да се зголеми нивото на вода и количеството на кислород.

Од Општината стравуваат од натамошно намалување на водостојот со оглед на тоа што временската прогнозата за наредниот период не најавува врнежи од дожд.

Претходно, еколозите побараа ЕЛЕМ да прекине со испуштање на вода од езерото и потенцираа дека нема вода во Билјанини Извори, а од пумпите на ЈП „Водовод“ нема дотур на свежа вода во каналот, што може да доведе до несакани последици.


Дел од охридската касарна предаден на Општина Охрид


Охрид, 8 ноември, 2018 - 12:08 (META) 

Се оствари еднодецениската заложба на охридската локална самоуправа, дел од поранешната касарна „Михајло Апостолски“ да биде препуштен на користење на град Охрид.  На вчерашната свеченост по повод одбележувањето на денот на ослободувањето на Охрид, градоначалникот Јован Стојаноски истакна дека касарна ќе прерасе во вистински образовен комплекс. Според урбанистичкото планско решение, предвидени се станбено – деловен комплекс, црква, спортски терени, пробивање на улица и преместување на неколку установи од градот, како и на некои образовни институции.

– Со низа проекти ќе се бориме да ги вратиме младите во Охрид и ќе го стопираме нивното иселување. Изминатиов период работевме на подобрување на условите за учење во сите образовни установи во градов. Вистински образовен комплекс ќе бидат просториите на касарната „Михајло Апостолски“, кои по долгогодишни постапки конечно се сопственост на општина Охрид. Тука ќе бидат сместени неколку образовни институции, а ќе има и други содржини – истакна градоначалникот Стојаноски.

Пред десетина години Министерството за транспорт и врски даде согласност за урбанистичкиот план на просторот на касарната. Министерството за образование и наука го доби делот од касарната уште во 2010 година, како и Министерството за внатрешни работи.

Градоначалникот Јован Стојаноски неодамна најави дека после целосно ставање во функција на просторот на поранешната касарна, Противпожарната единица и некои институции ќе бидат дислоцирани таму. Сепак, рече тој, претходно ќе се разговара со вработените и раководителите дали ваквото решение, односно преселбата се прифатливи за нив. Охридските пожарникари уште претходно нагласија дека ваквото решение не им одговара и ќе им ја отежне работата.


Јавните тоалети во Охрид повторно надвор од употреба, обиени автоматите за наплата


Охрид, 6 ноември, 2018 - 11:28 (META) 

Не престануваат континуираните оштетувања на јавните тоалети поставени во централното градско подрачје во Охрид. Овој пат насилно се исечени автоматите за влез во јавните тоалети поставени кај малиот плоштад.
И овој случај на уништување на јавните добра е пријавен во полиција и се` додека не се санира штетата тоалетите ќе бидат надвор од употреба.

Пред два месеци беа обиени автоматите за влез во двата јавни тоалети кои се поставени во стариот дел од градот кај Горна Порта, додека ова е второ уништување на автоматите за влез во јавните тоалети поставени кај малиот плоштад кај Т.Ц.АМАМ.

Охриѓани и туристите со децении чекаа градот да ги добие јавните тоалети, а ваквите вандалски чинови најмалку одат во прилог на угледот на најголемиот туристички центар со оглед на тоа што во градот се уште има туристи.