Две лица загинаа, а 13 се ранети при пукотници во Торонто


Торонто, 23 јули, 2018 - 10:20 (META) 

Напаѓачот и една млада жена се убиени, а 13 лица се ранети во пукотници кои се случија во Торонто, пренесуваат светските медиуми.

Престрелките со оружје се случиле на авениите Данфорт и Логан, место каде што се наоѓаат многу познати ресторани, кафулиња и трговски центри.

Една млада девојка е во критична состојба, додека останатите ранети се хоспитализирани.

„Ги истражуваме сите мотиви и не е исклучена ниту една можност“, изјави шефот на полицијата на Торонто, Марк Саундер.

Градоначалникот на Торонто изјави дека градот се соочува со проблемот со вооружување и дека оружјето е лесно достапно.Годинава во Торонто е во пораст вооруженото насилство, а процентот на смртност е зголемен на 56 проценти од 26 проценти лани.


Борат го прелажа „путиновиот конгресмен“ Рорабакер, кој ја делеше и ништеше Македонија


Вашингтон, 17 јули, 2018 - 14:02 (META) 

Во својата нова провокативна комична серија „Who is America? (Која е Америка?)“, британскиот комичар Саша Барон Коен ги прелажа контроверзниот американски конгресмен Дејна Рорабакер, неговиот колега Џо Вилсон, како и поранешните сенатор и конгресмен Трент Лот и Џо Волш, да дадат јавна поддршка за измислената програма „Киндергардианс“, со која наводно на децата во градинките во Израел од тригодишна до 16 годишна возраст им се дава оружје скриено во играчки или накитено со нив и се обучуваат да пукаат „како мерка за справување со растечкото оружено насилство“ и истата да се копира и во САД.

Во видеото што им го презентирал на прелажаните се претставува и пешадиско оружје и ракетни фрлачи „за млади“, кое наводно се користи во Израел.

Коен им пристапил на соговорниците претставувајќи се како „израелски антитерористички експерт“, полковник Еран Морад. Во новата серија, која почна да се емитува вo неделата на каналот „Шоутајм“, Коен глуми четири лика и прави сатира на политичкиот и културниот живот во САД во ерата на Доналд Трамп.

Во првата епизода негови жртви се конгресмените Рорабакер, познат по своите изјави за Голема Албанија и за поделба на Македонија, по коишто се извинуваше, и Џо Вилсон, поранешните сенатор и конгресмен Трент Лот и Џо Волш, од кои првиот сега е лобист, а вториот радио-водител, како и низа поборници на слободното носење оружје.

Претставувајќи се како „терминатор за терористи“ тој ги интервјуира соговорниците, и за разлика од младиот републикански конгресмен од Флорида, Мет Гец, кој вели дека работите не функционираат така што конгресмените веднаш даваат поддршка пред камера за нешто што првпат го слушнале, Рорабакер и Вилсон „како од пушка“ велат дека идејата е одлична.

Рорабакер, републиканскиот конгресмен од 17-от округ во Калифорнија познат и како „омилениот конгресмен на Путин“, во февруари минатата година ја разлути владата и македонската јавност со изјавата дека „Македонија не е држава“.

– Со ова ќе ги разлутам сите, но што ми е гајле. Македонија не е држава. Жал ми е, ама не е држава – рече Рорабакер во интервју за албанската телевизија „Визион Плус“.

Претседателот на подкомисијата за Европа, Евроазија и растечките закани на Долниот дом на Конгресот на САД, потоа рече дека Косоварите и Албанците во Македонија „треба да бидат дел од Косово“, а остатокот од Македонија „треба да биде дел од Бугарија или која било друга држава со која се поврзани“.

Откако јавноста реагираше бурно, Рорабакер „дообјаснуваше“ што сакал да каже, обидувајќи се да се извлече од ситуацијата.  Тој потоа во официјална изјава рече дека Македонија е легитимна држава со право на самоопределување и почитување на границите.

„Мојот коментар алудираше, можеби погрешно, на мојата загриженост кон предизвиците во внатрешното владеење со кои Македонија се соочува во врска со етничките малцинства. Јас во никој случај не сакав да кажам дека некој друг, освен Македонците треба да го утврди суверенитетот или границите на Македонија. Ако моите зборови беа сфатени на друг начин, јас длабоко се извинувам“, рече Рорабакер неколку дена подоцна.

Саша Барон Коен се враќа со нов проект речиси една деценија по „Али Џи“, а најпознат е по неговиот филм за Борат од Казахстан во посета на САД.


Една година затвор за поседување оружје за дедото на малата Тамара


Скопје, 27 јуни, 2018 - 10:44 (META) 

Апелациониот суд ја преиначи пресудата за дедото на малата Тамара од Велес, кој беше осуден на условна казна затвор за поседување оружје по признанието на вина. Одлуката следува по жалбата на Обвинителството. Љупчо Стојановски со одлуката на второстепениот суд е осуден на ефективна казна затвор од 1 година.

На 11 јули се закажани завршните зборови за второто кривично дело „обид за убиство“. Адвокатката Павлина Зефиќ рече дека ќе ги вложат сите правни лекови за да ја оспорат пресудата.

Стојановски на 1 јуни минатата година пукаше во поранешниот министер за здравство, Никола Тодоров. Тој се товареше за две кривични дела – обид за убиство и недозволено изработување, држење и тргување со оружје или распрскувачки материи.

Според она што го кажал пред полицијата, тој дошол утрината сам во Скопје. Кај себе имал повратен билет за Велес. Кажал дека тој најпрвин го чекал Тодоров дома, но ексминистерот не се појавил. Потоа дошол пред Министерството за здравство и веднаш кога му се појавил пред очи, почнал да пука кон него. Тодоров не беше повреден.


ВМРО-ДПМНЕ: Со вработувањето на Командант Хоџа, Заев им попушта на насилниците


Скопје, 7 мај, 2018 - 15:21 (META) 

Единствена референца на пријателот на Заев, Командантот Хоџа, е тоа што тој склучил политички договор со првиот човек на СДСМ да му го ослободи Танушевци, а за возврат на тоа да добие висока политичка функција во владата. Но, кој го држел Танушевци заробено и каде се оружјето и лицата кои биле подготвени да се спротивстават на македонската полиција? Каква порака испраќа Заев до сите идни криминалци и насилници кои планираат да се закануваат и уценуваат?, праша на прес-конференција денеска Наум Стоилковски, портпарол на ВМРО-ДПМНЕ.

Тој рече дека со вработувањето на Џезаир Шакири – Хоџа, како негов советник за внатрешна безбедност и борба против радикализам, Заев ги посрамотил и државата и македонскиот народ.

– Ова е големо понижување и за граѓаните и за државата, но и за полициските службеници кои ги имаат загубено животите во борбата против ваквите екстремисти. Владата не е приватна сопственост на Зоран Заев и криминалниот картел околу него. Договорот на Командант Хоџа мора да биде раскинат, а институциите мора да покажат храброст и волја да ги бранат интересите на државата. По признанието на Шаќири, мора да следи сериозна истрага и да се утврди кој се’ му помагал во заканите и со какво оружје се заканувал? – рече Стоилковски, предупредувајќи дека издавањето безбедносен сертификат од највисок степен за Командант Хоџа, надвор од процедурите е кривично дело.


Двајцата повредени војници се во стабилна состојба


Скопје, 22 март, 2018 - 14:16 (META) 

Двајцата повредени војници се со прострелни рани и повреди на левата натколеница, информираше денеска министерот за здравство Венко Филипче, по нивната посета на Клиниката за трауматологија, ортопедски болести, анестезија, реанимација и интензивно лекување и ургентен центар.

– Едниот војник е на 28, а другиот е на 37-годишна возраст. И кај двајцата ќе се направи интервенција во текот на попладневните часови – изјави Филипче

Двајцата професионални војници на АРМ се повредија утринава во касарната „Кузман Јосифовски-Питу“ во Тетово.

Според првичните информации, при чистење на митралез испукан е еден куршум при што М.Ј. и В.Ш. добиле со прострелни рани.


Пукање во Чаир, повредено 24-годишно момче


Скопје, 20 декември, 2017 - 19:22 (META) 

Денеска околу 17.40 часот на ул. „Џон Кенеди“ во Скопје од возило во движење пукано е во лицето Б.И. (24), информираат од МВР.

Повредениот Б.И. веднаш е пренесен во болница, а полициски службеници се на лице место и преземаат мерки и активности за расчистување на случајот.


Двајца застрелани при обид да ограбат менувачница во Кисела Вода


Скопје, 27 ноември, 2017 - 17:52 (META) 

Две лица се убиени при вооружена пресметка во менувачница во скопската населба Кисела Вода.

Неофицијално, двете лица се убиени при обид да ограбат менувачница, која е лоцирана на булеварот Борис Трајковски, кај Чешма во Кисела Вода.

Според првичните информации, лицето во менувачницата најверојатно извадило оружје и ги убило разбојниците.

Пред менувачницата во моментов има големо полициско обезбедување и три амбулантни возила.


Борците на ИД пукаат со оружје од НАТО, тврди сириски генерал


Дамаск, 25 октомври, 2017 - 13:44 (META) 

Сириската армија во источниот град Ал Мајадин, кој се сметаше за главно складиште на терористите на Исламска држава, пронашла толку многу оружје што ќе ѝ требаат шест дена за да го собере, соопшти бригадниот генерал на сириската војска, Хасан Сухаил, додавајќи дека поголем дел од оружјето потекнува од земји членки на НАТО.

– Ќе ни требаат најмалку шест дена за да го однесеме сето оружје што го оставија борците на ИД откако побегнаа. Има многу странско оружје – рече Сахаил.

На видеоснимката што ја објави „Прес ТВ“ се гледаат беспилотни летала, пушки од различен калибар, автомобили, разна муниција, против-тенковска муниција, радарска опрема, медицинска опрема…

Генерал Сухаил на новинарите им соопшти дека најголем дел од оружјето е произведено во земји членки на НАТО, односно во Велика Британија, Белгија и во САД.

Од НАТО демантираат дека ИД поседувала нивно оружје, истакнувајќи дека тие не тргуваат со терористи.

И британскиот министер за одбрана го демантираше тврдењата на сирискиот генерал, нарекувајќи ги шпекулации.


Кај скопјанец откриен арсенал оружје и муниција


Скопје, 23 октомври, 2017 - 17:25 (META) 

Секторот за внатрешни работи Скопје – Единица за недозволена трговија, до скопското Основно јавно обвинителство поднесе кривична пријава против З.Г. (57) од Скопје, поради сомнеж дека неовластено изработувал и поседувал оружје, односно дека посредувал и тргувал со оружје или распрскувачки материи, како и дека прикривал стоки кои се предмет на криумчарење и вршел царинска измама.

Како што соопшти МВР, по преземени оперативно-тактички мерки, Единицата за недозволена трговија дошла до сознание дека З.Г. набавил поголемо количество оружје и муниција. Дел од муницијата носел во мотоциклот што го управувал, а дел се наоѓала во неговиот дом.

„На 19 октомври 2017 година, околу 18.40 часот, полициски службеници го забележале З.Г. со мотоцикл, марка „априлија“, во близина на пазарот на улица Маџари. Притоа, бил извршен преглед на З.Г. и претрес на мотоциклот и под седиштето биле пронајдени и одземени два сигнални револвера, еден сигнален пиштол и 150 куршуми. З.Г. бил приведен, а по извршените консултации и добиена усна наредба од јавен обвинител, бил извршен претрес во домот и во другите простории на З.Г. на улица Маџари. При претресот биле пронајдени и одземени 54 сигнални пиштоли, два сигнални револвери, осум пневматски пушки, 48 додатоци за цевки за пиштоли, осум спрејови за самозаштита, поголемо количество дијаболи, 5.850 куршуми калибар 9 милиметри за сигнален пиштол, две комбинирани батериски ламби со електричен парализатор, еден дел од пиштол – навлака и две празни пластични кутии за пиштол“, се наведува во соопштението од МВР и се додава дека оружје е доставено на вештачење.


Пукање во штаб на ДУИ и искршен штаб на ВМРО-ДПМНЕ


Кавадарци, 13 октомври, 2017 - 13:32 (META) 

Во текот на вчерашниот ден било искршено стакло на изборниот штаб на ВМРО-ДПМНЕ во Кавадарци, во село Злетово, a за време на јавниот собир на партијата бил приведен маж поради нарушување на јавниот ред и мир. Во село Пласница, пак, од автомобил биле испукани неколку куршуми кон штаб на ДУИ, информираат од МВР.

Синоќа во периодот од 1.50 до 2.15 часот во Информативен центар на улица Илинденска во Кавадарци биле искршени стаклата на објектот кој ВМРО-ДПМНЕ го користи како штаб. Полицијата информира дека работи на пронаоѓање на сторителот и на расчистување на случајот.

Во 20.50 часот во село Пласница од колона возила, која се движела од село Лисичани низ село Преглово кон село Пласница, биле истрелани неколку куршуми од огнено оружје во близина на штабот на ДУИ, кој се наоѓа на средсело. Претходно, во 20 часот, додека се одржувал јавениот собир на ДУИ на кој говорел градоначалникот на Пласница, непознато лице истрелало неколку истрели од огнено оружје.

Во село Злетово за време на јавниот собир на ВМРО-ДПМНЕ, С.Н. (71) викал и непристојно се однесувал, по што бил одведен во полициската станица во Пробиштип, каде му била поднесена прекршочна пријава.