!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Шекеринска во еднодневна посета на Албанија


Тирана, 26 јули, 2017 - 10:36 (META) 

Министерката за одбрана, Радмила Шекеринска, денеска е во еднодневна посета на Тирана, каде ќе се сретне со албанската министерка за одбрана, Мими Кодели, соопшти Министерството за одбрана.

По средбата на министерките, македонската делегација, во која е и заменик-началникот на Генералштабот на АРМ, генерал – мајор Мухамет Рацај, ќе има официјални разговори со делегацијата од албанското Министерство за одбрана.
Шекеринска, исто така, ќе го посети и баталјонот на специјалните сили на албанските вооружени сили во Тирана, каде ќе биде изведена и показна вежба.

Македонија и Албанија во областа на одбраната соработуваат од 1998 година, кога беше потпишана и Спогодбата за билатерална соработка. Од 2004 г. на годишно ниво се потпишуваат и планови за билатерална соработка, кои вклучуваат поголем број заеднички активности во двете земји.


Советот на Врховниот суд што го ослободи Кочан треба да одлучува за притворите на Грујовски, Јакимовски и на Бошковски


Скопје, 19 јули, 2017 - 12:19 (META) 

Претседателот на Врховниот суд, Јово Вангеловски, и уште четворица судии треба да одлучуваат по жалбите на Горан Грујовски, Тони Јакимовски и на Никола Бошковски, обвинети во случаите „Таргет“ и „Тврдина“ на Специјалното јавно обвинителство (СЈО), на кои Апелацискиот суд Скопје вчера им одреди мерка притвор.

Апелацискиот суд вчера соопшти дека ги прифатил жалбите на СЈО и донел одлука да ги преиначи претходните решенија на Основниот суд Скопје 1, па на тројцата обвинети наместо мерки за претпазливост им одреди притвор, оценувајќи ги како основани наводите на СЈО дека кај Грујовски, Јакимовски и Бошковски постои опасност од бегство.

Во решенијата на второстепениот суд, сепак, е наведено дека Грујовски (поранешниот началник на петтата управа), Јакимовски (поранешниот шеф на кабинет на Сашо Мијалков) и Бошковски (вработен во УБК), имаат право на жалби на одлуките за притвор до Врховниот суд, кои треба да ги поднесат во рок од 24 часа откако ќе ги добијат решенијата од Апелација.

Како што појаснуваат од Апелацискиот суд, додека Врховниот суд не се произнесе за одлуката, тројцата обвинети нема да одат во притвор.

Засега нема потврда од одбраната на тројцата обвинети дека ќе поднесат жалби, но извесно е дека ќе ја искористат можноста да ги обжалат одлуките за притвор.

По жалбите треба да одлучува Кривичниот совет на Врховниот суд, чиј претседател е Вангеловски. Инаку, покрај него, членови на одделот за казниви дела на Врховниот суд се и судиите Ристе Катевеновски, Фаик Арслани, Џемали Саити и судијката Рахилка Стојковска.

Овој состав на Кривичниот совет на Врховниот суд во мај годинава, на тајна седница (немаше известување до медиумите), постапувајќи по барањето на Јавното обвинителство, донесе пресуда со која ги укина решенијата на Кривичниот и на Апелацискиот суд Скопје со кои му беше одреден притвор на бизнисменот Сеад Кочан. Објаснувањето на претседателот на Врховниот суд, Вангеловски, беше дека решенијата се укинати бидејќи СЈО не дало докази за да му биде одреден притвор на Кочан.

Дел од медиумите во текот на април годинава пишуваа дека Вангеловски трипати го менувал составот на Кривичниот совет за тој да обезбеди противтежа на одлуките што би произлегле од „непријатните барања и случаи“ на Специјалното јавно обвинителство.


ВМРО-ДПМНЕ бара од судот да не подлегнува на притисоци и да ги врати одземените пасоши


Скопје, 12 јули, 2017 - 16:11 (META) 

Судот не смее да подлегне на политичките притисоци и на пропагандата што во континуитет ја врши Специјалното јавно обвинителство против ВМРО-ДПМНЕ и нејзиното раководство. Ова од пред Апелацискиот суд Скопје денеска го порача членот на извршниот комитет на партијата, Зоран Илиоски.

Апелацискиот суд попладнево на јавна седница ги разгледува жалбите на одбраната на поранешниот вицепремиер, Владимир Пешевски, и поранешниот директор на Агенцијата за државни пасишта, Љупчо Георгиевски, обвинети во случајот „Траекторија“ на Специјалното јавно обвинителство, на одлуките на Основниот суд Скопје 1 да им бидат одземени пасошите.

Тој, во името на ВМРО-ДПМНЕ, побара судот да ги отфрли „политичките барања на СЈО и да донесе одлука со која ќе се вратат патните исправи на лицата опфатени во предметите на Катица Јанева“.


Апелација сè уште ги чека жалбите од СЈО


Скопје, 6 јули, 2017 - 13:27 (META) 

Во Апелацискиот суд Скопје досега не пристигнала ниту една од жалбите на Специјалното јавно обвинителство и на одбраната на обвинетите на одлуките на кривичните совети за одбиените барања на СЈО за притвори и за мерки за претпазливост, велат за „Мета“ од второстепениот суд.

Инаку, СЈО и обвинетите првин ги доставуваат жалбите до Основниот суд Скопје 1, од каде потоа се препраќаат во Апелацискиот суд.

На прашање на „Мета“ колку жалби досега пристигнале, од Кривичниот суд ни рекоа дека за тоа треба да се обратиме до Апелација бидејќи тие по автоматизам ги испраќале предметите таму.

– Досега кај нас не пристигнал предметот, не сме добиле ниту една жалба – ни изјави Сафет Кадрии, судија на Апелацискиот суд Скопје, задолжен за односи со јавноста.

Специјалното јавно обвинителство досега до Апелацискиот суд (преку Основниот суд) поднесе 25 жалби против одлуките на кривичните совети на Основниот суд Скопје 1, со кои беа одбиени барањата за притвор на 18 лица, опфатени во случаите за кои СЈО минатата недела поднесе обвиненија.

Жалби најави и одбраната на обвинетите, кои не се задоволни со решенијата на Кривичниот суд за одземање на пасошите и за наметнување обврска еднаш неделно обвинетите да се јавуваат кај службено лице во судот.


Прекинато рочиштето за „Диво Насеље“, отстранети обвинетите што бојкотираа


Скопје, 29 мај, 2017 - 14:34 (META) 

Судијката Верка Петковска го прекина судското рочиште за случајот „Диво Насеље“ поради немање услови за судење.

На почетокот на судењето, Петковска соопшти дека се одбиени барањата на одбраната за изземање на обвинителите, на претседавачкиот судски совет, со кој таа раководи, претседателот на Кривичниот совет, Стојанче Рибарев, како и на претседателот на Врховниот суд, Јово Вангеловски. Одбиени беа и барањата за сослушување нови сведоци.

На ваквата одлука обвинетите почнаа бурно да реагираат и гласно да негодуваат, по што судијката Петковска нареди нивно отстранување од судницата, а поради недолично однесување со 1.2000 евра казни еден од адвокатите на одбраната.

Одбраната побара изземање на обвинителите и на судиите откако им беше одбиено претходното барање да се сослушаат поранешната министерка за внатрешни работи, Гордана Јанкулоска, како и поранешниот шеф на Дирекцијата за безбедност и контраразнузавање, Сашо Мијалков.

Во случајот се обвинети 37 лица за тероризам и за терористичко здружување против Република Македонија.


Просечната нето-плата во јануари изнесувала 22.750 денари


Скопје, 24 март, 2017 - 13:27 (META) 

Просечната месечна нето-плата во јануари годинава изнесувала 22.750 денари, а бруто-платата 33.441 денари, објави Државниот завод за статистика.

Нето-платата во јануари е зголемена за 2,2 проценти во однос на истиот месец лани.

Ваквото зголемување се должи, пред сè, на зголемувањето на просечната месечна исплатена нето-плата по вработен во секторите информации и комуникации (9,4 проценти), јавна управа и одбрана, задолжително социјално осигурување (4,6 проценти) и рударство и вадење камен (4,2 проценти).

Во јануари, еден процент од вработените во Македонија не примиле плата.


Германија ги отфрли тврдењата на Трамп дека им должи пари на НАТО и на САД за одбрана


Берлин, 19 март, 2017 - 16:54 (META) 

Германската министерка за одбрана, Урсула фон дер Лејен, денеска ги отфрли тврдењата на американскиот претседател Доналд Трамп дека Германија должи „огромна сума“ пари на НАТО и на САД за одбрана, јавуваат светските агенции.

„Не постои долг кон НАТО. Парите за одбрана се вложуваат во мировните мисии на Обединетите нации, во нашата европска мисија и во заедничката борба против Исламска држава“, навела во своето соопштение Урсула фон дер Лејен.

Според германската министерка за одбрана, сите сакаат товарот да се дели рамномерно, но за тоа да се случи, неопходно е да се направи „модерен безбедносен концепт“, кој вклучува модернизација на НАТО, но и на одбранбениот систем на Европската Унија.

Претседателот на САД, Доналд Трамп, вчера на својот твитер-профил напиша дека Германија им должи на САД и на НАТО огромна сума пари за одбрана.


Кина ќе го зголеми буџетот за војската за седум отсто


Пекинг, 4 март, 2017 - 16:42 (META) 

Кина оваа година ќе го зголеми буџетот за одбраната за околу седум отсто, соопштија властите во Пекинг, пренесуваат светските медиуми. Информацијата доаѓа во пресрет на годишниот состанок на Националниот народен конгрес во Пекинг.

Како што пренесува „Би-би-си“, Кина последните неколку години забрзано ги модернизира своите вооружени сили, а овој процес го следи и забрзаниот развој на екомијата на земјата.

Сепак, буџетот на Кина за одбрана и понатаму останува значително помал во однос на САД.

Дел од кинеските медиуми минатата недела пишуваа и апелираа буџетот на кинеската армија да се зголеми за најмалку 10 отсто за да може да одговори на неизвесноста што ја предизвикува американскиот претседател Доналд Трамп, кој предлага зголемување на буџетот на Пентагон за околу 10 отсто.

Неименуван поранешен висок офицер на кинеската армија за медиумите во Хонг Конг изјавил дека кинескиот воен буџет треба да се зголеми за 12 отсто за да може да им парира на САД.

Армијата на Кина, која има два милиони припадници е најбројна во светот.


ВМРО-ДПМНЕ: Ќе стоиме цврсто на бедемот на одбраната на државните интереси


Скопје, 23 февруари, 2017 - 10:55 (META) 

Наша историска и идеолошка определба, но и мандат даден од мнозинството граѓани, е заштитата на државните и на националните интереси во која било форма, велат од ВМРО-ДПМНЕ и истакнуваат дека ќе стојат цврсто на бедемот на одбраната на тие интереси.

„ВМРО-ДПМНЕ нема да дозволи дефакторизација на македонскиот народ и на другите етнички заедници што живеат во Македонија. Тоа што го најавувавме за време на целата предизборна кампања, сега го гледаат сите. СДСМ се обидува сам со себе да се натпреварува во проширувањето на понудата кон албанските партии за да дојде на власт по секоја цена. СДСМ е цврсто влезен со намера за редефинирање на Република Македонија. СДСМ за оваа своја цел планира да го крши Уставот на Република Македонија. Тоа нема да го дозволиме“, велат од партијата.

Од ВМРО-ДПМНЕ го потсетуваат СДСМ и секој друг кој што сака да се коцка со државните и со националните интереси дека во Република Македонија има и други кои мислат на тие интереси и кои се подготвени да се борат за нив.

Според ВМРО-ДПМНЕ, нивната коалиција победила на изборите освојувајќи мнозинска поддршка и доверба од граѓаните на Република Македонија што ја препознале намерата на СДСМ за редефинирање на државата.


Обвинетите во „Диво насеље“ в петок ќе дадат искази пред судот


Скопје, 13 февруари, 2017 - 15:41 (META) 

Во големата сала на Врховниот суд денеска продолжи судењето против 37 обвинети за настаните во Диво насеље, во Куманово од 9 и 10 мај 2015 година. По рочиштата, кои неколку месеци се одвиваа зад затворени врати, поради сослушување на заштитетни сведоци на Обвинителството за гонење на организиран криминал и корупција и докази од посебни истражни мерки, денеска судењето повторно беше отворено за јавноста, односно беше дозволено присуство на новинарите.

На денешното рочиште сведочеа седуммина сведоци на одбраната кои зборуваа за тоа дали пред критичниот викенд, 9 и 10 мај 2015 година забележале нешто невообичаено.

На следното рочиштe, кое е закажано за в петок, искази треба да дадат 37-мината обвинети.

– Ниту еден од обвинетите не беше испрашан во обвинителската истрага бидејќи на ниту еден од нив не му беше дадено правото за увид во доказите. Потоа ни беше дозволено од страна на судскиот совет увид во доказите, но условите не ни дозволуваа многу увид бидејќи обвинетите се во затворите во Битола и во Прилеп и не беа во можност да дадат исказ. Тоа право ќе го искористиме сега во доказната постапка како испитување на обвинет – изјави денеска адвокатот на дел од обвинетите, Насер Рауфи.

Тој додаде дека во зависност од нивните искази, одбраната ќе предложи нови сведоци во текот на доказната постапка, односно, како што рече Рауфи, ќе бидат повикани лица кои ќе бидат споменати од обвинетите.

Во настаните во Куманово животите ги загубија осум припадници на специјалните полициски единици, а 37 беа ранети, додека во борбите со полицијата беа убиени 10 членови на вооружената група.

Судскиот процес за случајот „Диво Насеље“ почна во февруари 2016 година. На почетокот на јуни, целиот процес почна одново откако Обвинителството со овој случај го спои и предметот „Молња“, во кој осум лица се обвинети дека обезбедувале логистичка поддршка за кумановската група.

Обвинетите во случајот се товарат за тероризам и за терористичка организација.