Одбраната на Груевски ќе поднесе жалба на пресудата во случајот „Тенк“


Скопје, 23 мај, 2018 - 13:47 (META) 

Адвокатот на обвинетите во случајот на СЈО „Тенк“, Димитар Дангов рече дека одбраната ќе поднесе жалба на пресудата со која на затворска казна од две години денеска беше осуден Никола Груевски, а поранешниот помошник-министер во МВР, Ѓоко Поповски доби казна затвор од шест години и шест месеци.

Дангов рече дека Судот немал никаква основа да изрече осудителна пресуда туку напротив пресудата требала да биде ослободителна.

На новинарско прашања зошто Груевски не присуствувал во Судот за време изрекување на пресудата, Дангов рече дека таа одлука била негово лично право.

Веднаш откако во судницата беше изречена пресудата групата од триестина демонстранти која е на тревникот пред зградата на Кривичниот суд почна да скандира „Никола Никола“ и порача дека станува збор за голема неправда бидејќи обвинетите не биле виновни.


Шекеринска: Посетата на Столтенберг е порака сама по себе


Скопје, 15 јануари, 2018 - 15:21 (META) 

Посетата на генералниот секретар на НАТО на Македонија, Јенс Столтенберг е порака сама по себе, изјави министерката за одбрана Радмила Шекеринска по повод посетата на Столтенберг на Македонија в среда и четврток.

– Тоа значи дека во изминатите шест месеци успеавме Македонија да ја вратиме назад на евроатлантската патека и успеавме да ги неутрализираме сите оние лоши вести, кои во континуитет во изминативе години доаѓаа во Македонија. Посетата ја гледаме како можност Македонија да се претстави во поинакво светло, како држава која ги решава своите проблеми, која работи на својот приоритет, и која реално верува дека членството во НАТО и во ЕУ значат поголема сигурност и поголем просперитет на граѓаните – додаде Шекеринска.

Таа потенцираше дека во делот на одбраната, има со што да се пофалиме, односно со податоци за зголемен буџет во одбраната, со веќе зголемено учество во мисијата на НАТО во Авганистан, и со нови политики на транспарентност и интегритет.

– Македонија, за да биде вистински член на НАТО прво треба да си обезбеди интегритет, транспаретност и одговорност во своето функционирање. Посетата на генералниот секретар не е подарена, туку заслужена. Тоа не е доволно за членство, но сепак покажува дека сме тргнале на вистинскиот пат. Столтенберг нема да го решава проблемот со името, тој ќе ја прати пораката дека кога една држава сака да стане членка на НАТО и ги влече вистинските потези – го гарантира владеењто на правото и основните вредности кои се во основата на нато алијансата, дека тогаш таа ја добива шансата за членство во НАТО – изјави Шекеринска.


Пеливанов: И Јанкулоска и Ставрески рекоа дека Талески е „корумпиран до даска“


Скопје, 13 декември, 2017 - 16:54 (META) 

Со незаконски склучените договори за превоз на ученици буџетот на Општина Битола бил оштетен за половина милион долари, истакна обвинителот на Специјалното јавно обвинителство, Трајче Пеливанов во излагањето на обвинението, односно во воведните зборови на денешното рочиште за случајот „Транспортер“ во кој првообвинет е поранешниот градоначалник на Битола, Владимир Талески и уште 20 лица.

– Станува збор за криминално сценарио во кое покрај првообвинетиот Владимир Талески се вклучени и директорите на училиштата кои прифаќале фактури по повисоки цени. За ваквата бескруполозна злоупотреба на правото на слободен превоз чувме и во прислушуваните разговори меѓу Гордана Јанкулоска и Зоран Ставрески, тогашни министри, кои ќе кажат за Талески дека е „корумпиран до доска“ – рече Пеливанов во воведните зборови и нагласи дека СЈО бара осудителна пресуда.

Според обвинението на СЈО, во учебните 2009/2010 и 2010/2011 Општина Битола склучувала договори со фирми превозници спротивно на Законот за јавни набавки, при распишување на тендерите не била наведена висината на средствата предвидени за оваа намена, а не била формирана ниту тричлена комисија. Поради тоа, за сите договори, разликата меѓу проценетата цена и вредноста на склучените договори е околу 570.000 евра.

По воведните зборови на Пеливанов, адвокатите на обвинетите побараа прекинување на денешното рочиште бидејќи било доцна и завршило работното време на судот. Следното рочиште на кое Талески и останатите обвинети треба да се произнесат дали се чувствуваат виновни е закажано за 23 јануари.

Инаку, адвокатите на Талески и на другите обвинети бараа одложување на денешното рочиште бидејќи во судницата не беа овозможени услови за визуелно и тонско снимање на судењето.

По паузата во судницата беа поставени две камери за кои одбраната повторно приговараше дека не ги задоволуваат условите пропишани со Законот за кривична постапка. Но, судијката Лидија Петровска ги отфрли приговорите и одлучи сепак да почне главната расправа.


Апелација ја одложи седницата за ПИ-мерките во „Поткуп“ на неопределено време


Скопје, 27 ноември, 2017 - 12:18 (META) 

Апелацискиот суд Скопје ја одложи на неопределно време јавната седница на која треба да се расправа по жалбите на одбраната на премиерот и лидер на СДСМ, Зоран Заев, околу користењето на посебните истражни мерки (ПИМ) како доказ во судскиот процес за случајот „Поткуп“, во кој Заев е обвинет.

Причина за одложувањето на седницата е тоа што судијата известител по овој предмет, Африм Фидани, е избран за судија во Врховниот суд.

Судијата Сафет Кадриу соопшти дека сè уште не е направена прераспределба и поради тоа се одложува седницата на неопределено време.

Одбраната и Заев бараат снимките да не бидат доказ бидејќи веќе биле објавени во јавноста, односно делови од нив биле ставени на видеосервисот „Јутјуб“, а потоа преземени и објавени од медиумите.

Поради чекањето на одлуката на Апелацискиот суд, минатата недела беше одложено рочиштето за „Поткуп“, а следното е закажано за 25 декември.

Заев во случајот „Поткуп“ е осомничен за барање и за земање поткуп во висина од околу 200.000 евра од струмичкиот бизнисмен Иван Николов-Сачевалиев, во врска со легализација на земјиште.


Апелација денеска ќе одлучува дали снимките за Заев ќе бидат доказ во „Поткуп“


Скопје, 27 ноември, 2017 - 10:01 (META) 

Апелацискиот суд Скопје денеска треба да одржи седница на која ќе ја разгледува жалбата на одбраната на премиерот и лидер на СДСМ, Зоран Заев, која бара видеоснимките од посебните истражни мерки (ПИМ) да не бидат користени како доказ во судската постапка за случајот „Поткуп“, во кој Заев е обвинет.

Адвокатите на Заев, претходно, од Кривичниот суд побараа да ги издвои овие снимки од доказниот материјал, но судот го одби нивното барање и донесе решение тие да бидат доказ.

Одбраната и Заев бараат снимките да не бидат доказ бидејќи веќе биле објавени во јавноста, односно делови од нив биле ставени на видеосервисот „Јутјуб“, а потоа преземени и објавени од медиумите.

Поради чекањето на одлуката на Апелацискиот суд, минатата недела беше одложено рочиштето за „Поткуп“, а следното е закажано за 25 декември.

Заев во случајот „Поткуп“ е осомничен за барање и за земање поткуп во висина од околу 200.000 евра од струмичкиот бизнисмен Иван Николов-Сачевалиев, во врска со легализација на земјиште.


Македонија и Бугарија договорија и потпишаа меморандуми за соработка во битни сектори


Струмица, 23 ноември, 2017 - 15:06 (META) 

Владите на Македонија и на Бугарија денеска во Струмица, по заедничата меѓувладина седница, потпишаа серија спогодби за соработка од областа на одбраната, телекомуникациите, туризмот, енергетика и на економијата.

Министрите за одбрана, Радмила Шекеринска и Красимир Каракачанов, потпишаа Протокол за соработка во спроведувањето обуки за припадници на АРМ во воентите школи во Бугарија и за интензивирање на соработката.

Со потпишување меморандум, министерот за информатичко општество и за администрација, Дамјан Манчевски, и бугарскиот министер за транспорт и информатички технологии, Ивајло Московски, го официјализираа и намалувањето на меѓународните тарифи за роаминг во телекомуникациските услуги.

Во согласност со договорот, регулаторните тела на двете држави треба да почнат процедура со која ќе ги поттикнат операторите да склучат договори за пониски цени при разговор, пораки и интернет во роаминг. Во моментов, за минута разговор во роаминг од Бугарија во Македонија се плаќа меѓу 90 и 210 денари и 750 денари за еден мегабајт интернет.

Бугарската министерка за туризам, Николина Ангелкова, и македонскиот заменик-министер за економија, Кире Наумов, потпишаа Договор за соработка во туризмот со кој, исто така, се предвидува и заедничко учество на туристички саеми, заедничко објавување туристички промотивни материјали, организација и учество на конференции, семинари и други туристички настани, како и заеднички настап на трети пазари.

Министрите, покрај тоа, потпишаа и два договора за соработка во енергетскиот сектор, со кои се предвидува од почетокот на 2018 година да се воспостави заеднички пазар за распределба на преносни капацитети меѓу електроенергетските оператори на двете земји. Со договорите се предвидува олеснето тргување со струја.

Бугарскиот оператор за гас „Булгартрансгаз“ ЕАД и АД „Македонски енергетски ресурси“ – МЕР потпишаа Договор за спроведување студија за исплатливост на изградба на нова гасна меѓусистемска врска, а агенциите за катастар на Македонија и на Бугарија потпишаа договор за размена на картографски и геодетски материјали и информации.

Претставниците на двете влади пред меѓувладината седница го посетија манастирот „Водоча“, а потоа се поклонија пред споменикот на загинатиот македонски претседател Борис Трајковски.


Двочасовна пауза на рочиштето за „Труст“, СЈО не ги нумерирало доказите за одбраната


Скопје, 23 ноември, 2017 - 11:45 (META) 

Примерокот од листата на докази на СЈО за случајот „Труст“ повторно предизвика застој на денешното рочиште во Кривичниот суд во Скопје, поради што судијката Лидија Зимбовска даде двочасовна пауза.

СЈО денеска почна со изведување на доказите, но адвокатите на одбраната реагираа дека во листата што ја добиле од обвинителството, доказите не се нумерирани и не можат да го следат обвинителот за кои докази зборува.

Поради ова судијката Зимбовска даде два часа пауза, за СЈО повторно да ја испечати листата со докази, кои се наведени на 80 страници, овојпат со редни броеви како што бараат адвокатите.

Инаку, денеска пред судот треба да сведочи Васил Ристовски, управител на „Силекс неметали“, една од трите фирми за кои се води постапка во случајот „Труст“. Ристовски, кој денеска се појави во судот, треба да сведочи попладне, по паузата.

На претходното рочиште сведочеше Фаим Имери – Фичо, сопственик и управител на фирмата „Фичо сервис“, која со години соработува и ѝ продава градежни машини на фирмата „Трансмет“ на бизнисменот Сеад Кочан, обвинет во случајот.

Кочан, Авировиќ и Ватиќ, како и фирмите „Трансмет“, „Силекс неметали“ и „Вато“, СЈО ги товари дека со невистинити и фалсификувани документи добиле тендер на „Електрани на Македонија“ (ЕЛЕМ) вреден 17 милиони евра.


Завршни зборови за „Тврдина 2“ и ново рочиште за случајот „Транспортер“


Скопје, 6 ноември, 2017 - 9:35 (META) 

Специјалното јавно обвинителство и одбраната на обвинетите, денеска во Кривичниот суд во Скопје треба да ги изнесат завршните зборови во случајот „Тврдина 2“, во кој првообвинет е поранешниот началник на петтата управа, Горан Грујовски, заедно со шестмина вработени во УБК. Тие се товарат за уништување на документација поврзана со системите од незаконското прислушување.

Со завршните зборови судењето за случајот „Тврдина 2“ е пред самиот крај, односно останува уште судот да ја соопшти пресудата.

На претходното рочиште, кое се одржа во четвртокот минатата недела, судијката Лидија Петровска одлучи да не ја чека екстрадицијата на Грујовски од Грција во Македонија и да му се суди во отсуство. Адвокатот Љупчо Шврговски најави жалба на ваквата одлука на судијката Петровска, а одбраната, како што рече тој, ќе се жали и на решението на Петровска да не им дозволи да докажат дека „предмет на уништување биле безмалку тривијални документи, како лекарски уверенија, потврди за поправка на возила, пристап до чекалната на УБК, решенија за годишни одмори…“, а не документи со највисок степен на класификација – државна тајна.

Обвинителката на СЈО, Ленче Ристоска, по завршувањето на рочиштето, изјави оти е уверена дека судот ќе донесе осудителна пресуда за „Тврдина 2“.

– Целосно сме убедени дека судот ќе донесе осудителна пресуда, бидејќи има уверливи докази за тоа – изјави Ристоска.

Инаку, денеска во Кривичниот суд треба да се одржи рочиште за случајот „Транспортер“, во кој првообвинет е поранешниот градоначалник на Битола, Владимир Талески. Тој и уште дваесетина други обвинети се товарат за злоупотреби со превозот на ученици во Битола.

Претходното рочиште беше одложено бидејќи една од обвинетите не дојде во судот поради сообраќајна незгода.

Талески тогаш изјави дека постапката ќе ја истера докрај и ќе докаже дека во неговото работење немало криминал.

– Ако сме грешеле ние, тогаш грешеле сите општини во Македонија – изјави Талески по првото рочиште за случајот „Транспортер“.

Судија во „Транспортер“ е истата судијка од случајот „Тврдина 2“, Лидија Петровска.


Груевски бара да му го вратат пасошот за да се сретне со Орбан


Скопје, 30 октомври, 2017 - 16:16 (META) 

Со одземениот пасош на лидерот на ВМРО-ДПМНЕ, Никола Груевски, не се попречуваат правата само на едно лице, туку се одземаат правата на стотици илјади лица – членови, гласачи и поддржувачи на најголемата опозициска партија во државата. Ова беше дел од аргументацијата на адвокатите на Груевски на денешната јавна седница во Апелацискиот суд, по повод жалбата на лидерот на ВМРО-ДПМНЕ, кој е првообвинетиот во случајот „Титаник“ на СЈО, на последната одлука на Кривичниот суд да му будат укинати мерките на претпазливост, односно да му биде вратен пасошот и да се укине обврската еднаш неделно да се јавува во суд.

Инаку, Груевски денеска не беше присутен на јавната седница во Апелацискиот суд.

– Денеска одлучувате за нормалното функционирање на најголемата опозициска партија, кое е важно за демократијата во една држава. Одлучувате дали во оваа држава ќе се дозволи нормално артикулирање на политичките права и интереси на илјадници граѓани. Маргинализирањето на опозицијата и државата без опозиција е многу лошо – рече адвокатот Боро Тасевски.

Тој и неговиот колега од одбраната на Груевски, Димитар Дангов, истакнаа дека на Груевски му е потребен пасошот заради извршување на политичките активности, од кои дел се во странски држави.

Како потврда на своите твредења, тие до судот и до обвинителите на СЈО доставија покана од премиерот на Унгарија, Виктор Орбан, испратена до Груевски.

Тие се повикаа и на практиката на Кривичниот суд во случајот „Пуч“ пред две години, кога, како што рекоа, на сегашниот премиер, Зоран Заев, му бил вратен пасошот со образложение дека истрагата за случајот е завршена и има поднесено обвинение.

Обвинителката на СЈО, Лиле Стефанова, рече дека одењето во странство за присуство на политички семинари или состаноци е причина на Груевски да не му биде вратен пасошот, бидејќи, како што рече, во текот на истрагата за случајот тој неколкупати го оправдувал своето недоаѓање на распит во СЈО со политички активности во странство.

Таа нагласи дека СЈО останува на ставот дека двете мерки – одзмање на пасошот и обврската Груевски да се јавува еднаш неделно во суд – се неопходни заради непречено и ефикасно водење на кривичната постапка.

– Недоаѓањето на Груевски на главната расправа во суд поради вакви причини ќе значи одложување на рочиштата за сите други 20 обвинети и одолжување на постапката – рече Стефанова.

Кога станува збор за практиката на судот, Стефанова рече оти ќе се повика на случајот „Кампања“, кога на лидер на политичка партија (Љубе Бошкоски) му беше одреден притвор.

Апелцискиот суд Скопје треба да донесе одлука по жалбата на Груевски во рок од 48 часа.


Укинување на пресудите и ново судење за случајот „Монструм“, бара Обвинителството


Скопје, 3 октомври, 2017 - 16:55 (META) 

Јавната обвинителка Лилјана Спасоска на денешната јавна седница за случајот „Монструм“ во Врховниот суд побара укинување пресудите на Кривичниот и на Апелацискиот суд и враќање на предметот на повторно судење.

Врховниот суд на јавна седница денеска ги разгледуваше жалбите на шесттемина осудени за доживотните затворски казни што им ги одреди Основниот суд Скопје 1, а кои беа потврдени и од Апелацискиот суд во Скопје.

Барањето на Спасоска, која е и в.д. шеф на Јавното обвинителство, на местото на разрешениот Марко Зврлевски, е поради „неутврдена фактичка состојба“, но и поради евентуално постоење на прислушувани разговори, кои ги поседува Специјалното јавно обвинителство, и кои би можеле да го сменат текот на постапката, пренесува „Телевизија 24“.

Обвинителката пред судот, исто така, побарала да бидат уважени и жалбите на одбраната на осудените за петкратното убиство кај Смиљковско Езеро, кои и денеска пред Врховниот суд ги отфрлија обвинувањата дека се извршители на масакрот и повторно тврдеа дека се невини.

Според адвокатите на осудените, нема докази дека тие се сторители на петкратното убиство, а пресудите на Кривичниот и на Апелацискиот суд се пристрасни и неправични. Одбраната има забелешки и на сведочењето на заштитетниот сведок, кое, според адвокатите, е контрадикторно.

Тие посочија и дека, според судското вештачење, времето на смртта на жртвите не можело прецизно да се утврди, а сведоците не ги препознале обвинетите.

За петкратното убиство кај Смиљковското Езеро, на доживотен затвор се осудени Алил Демири, Африм и Аѓим Исмаиловиќ, Езим и Хаки Азири и Самил Љута. Масакрот кај Смиљковското Езеро се случи на 12 април 2012 година, на Велики четврток, пред големиот христијански празник Велигден, кога беа убиени момчињата Кире Тричковски, Филип Славковски, Цветанчо Ацковски, Александар Наќевски и рибарот Борче Стефановски.