Москва: Македонија на сила се турка во НАТО


Москва, 13 јули, 2018 - 16:34 (META) 

Откако вчера Македонија и официјално доби покана за преговори за членство во НАТО, Москва оценува дека Македонија насила се турка во НАТО.

-Внесувањето на Македонија во НАТО со присила, само потврдува дека политиката на „отворени врати“ стана цел сама за себе и алатка да се стекне контрола врз геополитичка територија – вели портпаролката на руското министество за надворешни, Марија Захарова.

Премиерот Заев денеска само кратко одговори дека не ја слушнал информацијата и дека Македонија повеќе од две децении се обидува да стане земја членка на НАТО.

Македонија беше и дел од прашање до американскиот претседател Трамп на самитот на Алијансата каде го прашаа дали очекува зголемување на руското влијание врз дестабилизација на Балканот по поканата за Македонија, на што претседателот на САД не даде никаков одговор.


Заев: Нашето интегрирање во НАТО не е насочено против Русија


Скопје, 20 март, 2018 - 15:54 (META) 

Македонскиот премиер Зоран Заев одговарајќи на новинарско прашање на прес-конференцијата по тематската седница на Владата денеска порача дека тежнеењето на Македонија да се интегрира во НАТО не значи спротивставување на Русија и дека тоа членство е повеќедецениска аспирација на македонските граѓани.

Според Заев, зачленувањето во НАТО е важно за стабилноста и безбедноста на Македонија и на регионот.

Коментирајќи го соопштението на руското МНР за денешната средба на рускиот заменик-министер за надворешни работи Александар Грушко со македонскиот амбасадор во Москва, Гоце Карајанов, во кое е нагласено оти Грушко рекол дека „плановите за влез на Македонија во НАТО може да имаат негативни последици за регионалната безбедност и билатералните односи“, Заев порачува дека Македонија како своја стратешка цел го има и унапредувањето на соработката со Руската Федерација.

– Нашето интегрирање во НАТО не значи спротивставеност на унапредување на соработката со Руската Федерација, заради тоа што Македонија во своите стратешки цели има намера да ја унапреди соработката со РФ, пред се на економски, на културолошки, образовен, и на секаков друг план – рече македонскиот премиер.

Тој рече дека определбата кон НАТО е од пред 25 години.

– Сакам да напоменам дека уште во 1993 година со заедничката декларација во Парламентот, Македонија ги има утврдено своите стратешки приоритети, меѓу кои е НАТО интеграцијата. Впрочем, тоа е и израз на огромното мнозинство – преку 75 посто од граѓаните се за интегрирање во НАТО. Интегрирањето во НАТО е многу значајно и за стабилноста и безбедноста на Македонија, но и на целиот регион – рече Заев.


Москва предупреди на негативните последици од влезот на Македонија во НАТО


Москва, 20 март, 2018 - 15:11 (META) 

Рускиот заменик-министер за надворешни работи Александар Грушко на денешната средба со македонскиот амбасадор во Москва, Гоце Карајанов, рекол дека „плановите за влез на Македонија во НАТО може да имаат негативни последици за регионалната безбедност и билатералните односи“.

Според соопштението на руското Министерство за надворешни работи, двајцата дипломати „дискутирале за актуелните билатерални прашања, при што и двете страни изразиле подготвеност за соработка на полињата на заеднички интерес. Исто така било нагласена важноста на продолжување на работата на руско-македонската меѓувладина комисија за трговска, економска, научна и технолошка соработка.

На средбата, рускиот заменик-министер Грушко и амбасадорот Карајанов разговарале и за ситуацијата на Балканот.


Загинаа 71 лице во несреќа на руски патнички авион во Москва


Москва, 11 февруари, 2018 - 15:22 (META) 

Руски патнички авион со 71 патници се урна набргу по полетувањето од московскиот аеродром Домодедово, јавија руските медиуми.

Авионот Антонов Ан-148 на компанијата Саратов ерлајнс, летал од аеродромот Домодедово кај Москва до Орск на јужен Урал, јави Интерфакс. Извор од службите за итна помош изјавил дека авионот се урнал во близина на селото Аргуново и оти „патниците и екипажот немале шанса да преживеат“. Во авионот имало 65 патници и шест членови на екипажот.


Министерот Љупчо Николовски договорил помош од Русија за Фитосанитарната инспекција


Москва, 5 февруари, 2018 - 16:28 (META) 

Во рамки на официјалната тридневна посета на Москва, денеска министерот за земјоделство, шумарство и водостопанство, Љупчо Николовски, имал работна средба со министерот за земјоделство на Руската Федерација, Александар Ткачов, на кој се разговарало и за експертска помош од страна на Русија за македонската  фитосанитарна инспекција, согласно потпишаниот Меморандум за соработка, соопшти Министерството за земјоделство, шумарство и водостопанство.

Македонскиот министер на средбата посочи дека Владата на Република Македонија, ќе ја продолжи поддршката на македонските компании за промоција на нашите земјоделско-прехрамбени производи на рускиот пазар, преку поддршка за нивен настап на најголемите саеми во Москва, како што е актуелниот „Продекспо“ и „Светот на храната“. Министерот Ткачов, порача, Македонија да продолжи со промоција и збогатување на асортиманот со нови македонски производи, за кои има интерес на пазарот во Русија.

Извозот на македонски земјоделски производи во Русија бележи континуиран пораст во изминатите неколку години, а носечки производи се праските, доматите, зелката, сливите, цигарите. Извозот на земјоделско-прехранбени производи од Република Македонија во Русија во 2017 година изнесува 30,2 милиони евра. Русија е заинтересирана за извоз на житарици во Македонија, а најмногу за извоз на пченица.


Руско МНР: Еди Рама и понатаму ги турка големоалбанските амбиции


Москва, 17 јануари, 2018 - 20:48 (META) 

Одделот за медиуми на Министерството за надворешни работи на Русија вечерва порача дека изјавата на албанскиот премиер и претседател на Социјалистичката партија на Албанија, Еди Рама, за Законот за употреба на јазиците во Македонија е потврда дека тој и понатаму сака да ја реализира „тиранската платформа“ и да се заканува на уставните темели на македонската државност и на Охридскиот рамковен договор.

„Ваквата реторика на Еди Рама ја потврдува намерата и понатаму да ја турка одиозната ”тиранска платформа“ создадена со неговото лично учество. Реализацијата на одредбите на овој документ се заканува со поткопување на уставните темели на македонската државност, на Охридскиот рамковен договор и како последица – со нови меѓуетнички потреси на Балканот. Сето тоа е дел од големоалбанските амбиции кои се повеќе се шират и го доведуваат во прашање територијалниот интегритет на низа држави во регионот. Давајќи му големо значење на прашањето за употреба на јазиците, сметаме дека од принципиелна важност е таквите решенија да се донесуваат врз основа на согласност од сите гранки на државна власт и со широк консензус во општеството“, се вели во реакцијата од руското МНР.

Одделот за медиуми напоменува дека албанскиот премиер истовремено се пофалил и дека Социјалистичката партија на Албанија, на чие што чело е тој, имала врска со формирањето на „Ослободителната армија на Косово“ и со „битката за Косово“ во соседната Србија.


Стотици демонстранти уапсени во Москва


Москва, 5 ноември, 2017 - 17:44 (META) 

Стотици луѓе беа уапсени во центарот на Москва денеска, додека се собираа за протест кој беше забранет од власта. Протестот беше организиран од националистичка група.

Апсењата на плоштадот Манеж во непосредна близина на Кремљ се случија два дена откако агенција за домашна безбедност уапси некои од членовите на групацијата „Артподгатовка“, под сомневање дека сакале да извршат бомбашки напади на административни згради.

„Артподгатовка“ е прогласена за екстремистичка група од страна на суд. Нејзиниот водач Вјачеслав Маљцев, кој е во странство, повика на протести денеска, за да се побара оставка на претседателот Владимир Путин.
Според безбедносните агенции, денеска биле уапсени 376 луѓе во Москва и уште 36 лица во други градови.


ФСБ уапсила екстремисти кои подготвувале напади во Москва


Москва, 3 ноември, 2017 - 15:34 (META) 

Руската Федерална служба за безбедност (ФСБ) уапсила четири лица за кои се сомнева дека во Москва планирале напади на административни згради и на полицијата за време на претстојниот празник.

ФСБ наведува дека се уапсени припадници на „Артпадгатовска“ (Арилериска подготовка) кои, според сомневањата, за време на викендот, во текот на празникот Ден на народното единство, планирале да фрлат запаливи бомби на административните згради и да извршат напад на полицијата за да предизвикаат масовен бунт.

Групата ја основал опозицискиот активист Вјачеслав Маљчев, кој се кандидираше на минатогодишните избори.

ФСБ, заедно со припадниците на руското МВР, го пресекле дејствувањето на групата во уште пет града.
Судот од Краснојавск, на 26 октомври ја прогласи групата за екстремистичка.

Маљцев летово ја напушти Русија, а против него е поднесено обвинение за екстремизам.


Поради 130 лажни дојави за бомби, евакурани 100.000 жители на Москва


Москва, 6 октомври, 2017 - 21:01 (META) 

Во Москва денеска се создала огромна загриженост откако поради вкупно 130 дојави за подметнати бомби, биле евакуирани околу 100.000 луѓе од четирите московски аеродроми, од 15 трговски центри, повеќе од 20 училишта, пет железнички станици, неколку хотели и други објекти. Истрагите потоа утврдиле дека дојавите се лажни, односно не биле подметнати бомби.

– Од почетот на денот, безбедносните служби добија повеќе од 130 дојави за подметнати бомби. Од сите објекти беа евакуирани повеќе од 100.000 луѓе – вели за руските медиуми претставник на раководните структури во безбедносните служби.

Ова е досега најголемата серија лажни дојави, што е феномен што се случува од почетокот на септември годинава во неколку градови во Русија.

Најверојатно виновни за лажните дојави се руски државјани кои живеат во странство. Дојавите биле преку интернет и затоа било тешко да се идентификуваат.


Приведен рускиот опозициски лидер Алексеј Навални


Москва, 29 септември, 2017 - 18:09 (META) 

Руската полиција утрово во Москва од неговиот дом го привела рускиот опозициски лидер Алексеј Навални кратко пред да оди на митинг во градот Нижни Новгород, а ги привела и неговите соработници во тој град, јави Асошиејтед Прес, посочувајќи дека попладнево тој твитнал од полициска станица, каде, како што вели, го држат без обвинение или образложение зошто е приведен.

Тој требаше да го предводи митинготт собир во Нижни Новгород попладнево, а досега одржа шест собири во руски градови, како дел од неговата кампања за претседателските избори, за кои Навални рече дека ќе се кандидира.

Министерството за внатрешни работи на Русија соопшти денеска дека Алексеј Навални бил приведен поради повикот за недозволени митинзи. Но градската управа на Нижни Новгород го дозволила митингот.

Неговите соработници известиле дека опремата поставена на градскиот плоштад им била запленета, а двајца од оргаизаторите биле приведени.