!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Надлежната комисија не нашла пропусти во случајот со починатите во брзата помош


Скопје, 30 март, 2017 - 19:23 (META) 

Комисијата за стручен надзор на Министерството за здравство тврди дека немало лекариски пропусти во лекувањето и при транспортот на двајцата пациенти од Крива Паланка, кои, кон средината на овој месец, починаа во возило на брза помош на кое му откажаа сопирачките, пренесува „Телма“. Комисијата беше формирана од Министерството за здравство за да го испита случајот.

Комисијата, повикувајќи се на документацијата што ја добиле, тврди дека по дефектот на возилото на брзата помош, екипа на брза помош од Скопје пристигнала по само 14 минути, откако била повикана, а не по половина часа, како што тврдело семејството на еден од починатите пациенти.

Стручниот надзор, според комисијата, покажал и дека случајот бил навреме пријавен во полиција.

„Известени се и МВР и Центарот за управување со кризи и нивното мислење било дека штом има лекар кој констатирал смрт, нема потреба од нивен увид и од увид на обвинителството – изјавил претседателот на комисијата, д-р Слободан Ристовски.

Комисијата не гледа пропуст ниту во тоа што двајцата тешко болни пациенти биле превезувани во едно амбулатно возило.

Од надлежното јавно обвинителство сè уште нема информација дали ја добило документацијата од МВР и дали ќе отвори постапка за случајот.


Зврлевски: Неопходни се законски измени за контрола на прислушувањето


Скопје, 28 март, 2017 - 11:28 (META) 

Нелегалното следење на комуникациите доведе до голема општествена криза во Република Македонија, но ова не е првпат системите за следење на комуникациите да бидат злоупотребени во земјава, изјави републичкиот јавен обвинител Марко Зврлевски, на конференција на тема „Следење на комуникации – законска рамка и искуства, улогата на јавниот обвинител“, која денеска се одржува во Скопје.

– Системите за следење на комуникациите како средство се користат и се злоупотребуваат и од други земји. Токму поради тоа улогата на јавните обвинители треба да стане поизразена, за да се намалат ваквите злоупотреби – рекол Зврлевски, пренесува „Телевизија 24“.

Токму поради овие причини, нагласил Зврлевски, потребни се измени на законското решение со кое се регулира следењето на комуникациите. Според него, иако е предвидено главниот збор да го има јавниот обвинител, тоа е само на хратија, бидејќи системите за следење на комуникацијата и понатаму остануваат единствено во рацете на Министерството за внатрешни работи.

Зврлевски смета дека според законските измени што ги предлага и меѓународната заедница, треба да се воведат силни контролни механизми на употребата на средствата за следење на комуникациите.

На меѓународната конференција присуствуваат јавни обвинители и нивни заменици од Албанија, Косово, Русија, Турција, Бугарија, Словенија, Хрватска и од Босна и Херцеговина.


Откриени 20 килограми марихуана на граничниот премин Блаце


Скопје, 22 март, 2017 - 16:43 (META) 

Царинските инспектори во соработка со Министерството за внатрешни работи вчера на граничниот премин Блаце, пронашле и заплениле 20 килограми марихуана, сокриена во возило што го управувал македонски државјанин.

Како што соопшти денеска Царинската управа, возилото вчера околу 10.30 часот се пријавило за влез во земјава.

„При прегледот на возилото, во задните врати на комбито помеѓу лимот и тапацирот, поточно во левата и во десната задна врата и во внатрешноста на моторот биле пронајдени 42 пакувања, со вкупна тежина од околу 20 килограми. Сите пакувања биле наполнети со растителна материја, а при нејзиното тестирање со тестер за дрога добиени се индикации дека се работи за марихуана. Сите подготвени документи, дрогата и лицето се предадени на службени лица од Министерството на внатрешни работи за понатамошна постапка“, стои во соопштението на Царинската управа.


Молотов коктел фрлен во угостителски објект во Тетово


Тетово, 20 март, 2017 - 13:59 (META) 

Утрово, околу 4.30 часот, две непознати лица го искршиле изложното стакло и фрлиле молотов коктел во угостителски објект во Тетово, информираат од МВР.

Случајот бил пријавен од очевидец, а екипа на тетовската противпожарна бригада го изгаснала пожарот, во кој биле оштетени неколку маси и столови во објектот, лоциран на крстосницата од улиците ЈНА и Јане Сандански.

Полициските екипи кои извршиле увид, во близина на местото пронашле уште едно шише со течност, чекан и тесла.

Од полицијата велат дека преземаат мерки за пронаоѓање на сторителите и за целосно расчистување на случајот.


Шестмина осомничени од Прилеп, Битола и од Арачиново уапсени во акцијата на МВР


Скопје, 19 март, 2017 - 13:46 (META) 

Шестмина, од вкупно осум осомничени лица, биле уапсени во вчерашната акција на МВР против организирана криминална група која подолго време се занимавала со продажба на разни видови наркотици на територијата на целата држава, соопшти денеска Јавното обвинителство за гонење организиран криминал и корупција.

Во акцијата, која МВР ја спровело по насоки од обвинителството, осомничени се лица од Прилеп, Битола и од Арачиново. Двајца од осомничените, како што информираат од обвинителството, не се достапни за органите на прогонот.

На петмина од уапсените, на барање на обвинителството, судот им одредил мерка притвор, а на еден куќен притвор.

„Лицата се товарат дека сториле кривично дело неовластено производство и пуштање во промет на наркотични дроги, психотропни супстанции и прекурсори, од член 215, а на еден од осомничените му се става на товар и дека сторил кривично дело перење пари и други приноси од казниво дело од член 273 од Кривичниот законик“, стои во соопштението на Јавното обвинителство.

Надлежен јавен обвинител во меѓувреме издал наредби за вештачење на траги од дрога, вештачење на ДНК и на наркотични супстанци што биле најдени за време на полициската акција.

Како што соопштија од МВР, во текот на акцијата биле запленети околу 700 грама хероин, 250 грама кокаин, помеѓу 8 и 10 килограми марихуана и 570 таблети екстази.


МВР: Во тек е акција против организирана криминална група – дилери на дрога


Скопје, 18 март, 2017 - 14:07 (META) 

Министерството за внатрешни работи попладнево соопшти дека во тек е оперативна акција против организирана криминална група, која се занимавала со продажба на разни видови наркотици на територијата на целата држава.

Од МВР не соопштуваат повеќе детали за акцијата и каде се споведува. Оттаму велат дека по нејзиното завршување јавноста ќе биде детално информирана.


Нухиу: МВР има капацитет за одржување на јавниот ред и мир и безбедноста на граѓаните


Скопје, 16 март, 2017 - 18:11 (META) 

Министерството за внатрешни работи има капацитети и е максимално посветено на одржувањето на јавниот ред и мир и на безбедноста и сигурноста на граѓаните. Ова, осврнувајќи се на актуелната ситуација во земјава, денеска го истакнал министерот за внатрешни работи, Агим Нухиу, на средбата со претставниците на комисијата за избори, имунитет и деловничко уредување на германскиот Бундестаг, придружувани од амбасадорката на Германија во Македонија, Кристине Алтхазуер.

На средбата двете страни ја нагласиле успешната соработка помеѓу двете земји и изразиле подготвеност за нејзино продлабочување и за интензивирање во иднина.

„Министерот Нухиу, воедно, изрази и благодарност за поддршката која ја добиваме од Сојузна Република Германија, како од аспект на материјално-техничка опрема, така и од аспект на организирање на разни обуки и усовршување во различни области од полициското работење. Претставниците на Бундестагот истакнаа дека соработката и партнерството со Република Македонија ќе бидат продлабочени и интензивирани и во иднина, заради евро-атлантска интеграција на земјата“, стои во соопштението на МВР за средбата.


МВР го потврди нападот на Фрчкоски, но не открива детали за преземените мерки


Скопје, 5 март, 2017 - 14:02 (META) 

Министерството за внатрешни работи денеска потврди дека три непознати лица во петокот го нападнале професорот на Правниот факултет, Љубомир Фрчкоски.

„Во врска со настанот од 3 март, кој од страна на ректоратот на Универзитетот „Св. Кирил и Методиј“ во Скопје беше пријавен како физички напад врз професор, беше излезено на местото на настанот, при што е констатирано дека на тој датум, околу 14.15 часот на УКИМ, поточно на службеното паркиралиште кај Правниот факултет „Јустинијан Први“, на Љ.Ф. му пришле три непознати машки лица облечени со качулки на главата. Тие му се обратиле со зборовите „Како не ви е срам“ и додека му зборувале едниот од нив го снимал со мобилен телефон. Во моментот кога им одговорил „Зашто да ми е срам“, тој го удрил непознато лице што му го поставило прашањето, по што трите лица заминале во правец кон булевар Гоце Делчев“, стои во соопштението од министерството.

Сепак, од МВР не соопштуваат какви мерки се преземаат за расветлување на случајот, ниту дали досега успеале да ги идентификуваат и да ги пронајдат напаѓачите.


Двајца осомничени за убиството во Прилеп


Прилеп, 4 март, 2017 - 14:10 (META) 

Две лица се осомничени за убиството на 65-годишниот маж кој завчера беше пронајден мртов, со две убодни рани на телото, во стан во Прилеп, во кој живеел како потстанар.

Како што соопшти денеска МВР, станува збор за лицата С.М. (32) и В.М.(33), и двајцата од Прилеп, кои целосно го признале извршувањето на кривичното дело. Против двајцата е поднесена кривична пријава за убиство.

Според полицијата, осомничените подолго време се познавале со жртвата и често го посетувале неговиот дом.

Критичниот ден, двајцата, откако купиле алкохол, отишле во станот. Таму С.М. побарал пари од жртвата, а откако бил одбиен, отишол во кујната каде зел нож и двапати го прободел 65-годишниот маж, во пределот на бубрезите и во градите.

„Второосомничената цело време била присутна за време на извршувањето на кривичното дело. Откога го извршиле кривичното дело, од џебот на панталоните го одзеле мобилниот телефон на жртвата, како и телевизорот од станот. Потоа го зеле клучот од станот, заклучиле и се дале во бегство“, стои во соопштението на МВР за случајот.


Судството, СЈО, НВО, МВР, бизнис-секторот билe мета на власта според Стејт департментот


Вашингтон, 4 март, 2017 - 13:02 (META) 

Неуспехот од воспоставувањее на независен и непристрасен судски систем, мешањето на власта во судството, опструкциите на работата на Специјалното јавно обвинителство, притисокот и заплашувањето на невладиниот сектор, влијанието на владејачката коалиција во приватниот бизнис и загрозувањето на слободата на говорот во медиумите се дел од забелешките нотирани, во добар дел и детално, во најновниот извештај на американскиот Стејт департмент за состојбите во Македонија за минатата 2016 година.

Судство, Јавно обвинителство и Специјално јавно обвинителство

Иако Уставот (на Македонија, н.з.), предвидува „автономни и независни“ судови, поддржан од независен и од автономен Судски совет, Стеј департментот нотира дека судството во земјава не успеало да демонстрира независност и непристрасност, со судии подложни на политичко влијание и со корупција.

Како пример за политизацијата на судството се наведува изборот на 28 нови судии на почетокот на септември од страна Судскиот совет, од кои „голем дел се перципирани како лојални на владејчката партија ВМРО-ДПМНЕ“.

„Правните експерти и аналитичари тврдат дека поддржувачи на ВМРО-ДПМНЕ доминираат во Судскиот совет и дека партијата влијае на нивото назначување“, стои во извештајот, во кој се нотира и дека бројни судии ја обвинуваат владата дека ја користи својата надлежност врз државниот буџет за да вршат контрола над судството“.

Во врска со опструкциите врз работата на Специјалното јавно обвинителство, Стејт департментот нотира дека во периодот од 2012 до 2016 година, Основниот суд Скопје 1 прифатил 99 отсто од барањата за притвор на Обвинителството за гонење на организиран криминал и корпуција, но само четири од вкупно 23 барања за притвор на СЈО се одобрени, од кои едно подоцна е отфрлено со контроверзните помилувања на претседателот Ѓорге Иванов, а три се редуцирани на домашен притвор.

„Кон крајот на арпил, претседателот на Основниот суд Скопје 1, Владимир Панчевски, назначи две нови судијки во одделот за организиран криминал и корупција на судот… Ниту една од судијките нема доволно судско искуство за да го оправда назначувањето. Двајцата судии беа назначени да работат на предмети поднесени од Специјалното јавно обвинителство…“, стои во извештајот.

Министерството за внатрешни работи и полиција

Извештајот на Стејт департментот забележува дека постојат голем поплаки за незаконска или прекумерна употреба на сила од страна на полицијата при извршувањето на нејзините должности.

„Меѓународните набљудувачи, амбасадите и локалните невладини организации укажуваат на корупција, недостиг од транспаретност и политички притисок во МВР, кои се пречка во напорите за борба против криминалот, особено против организираниот криминал“, стои во извештајот на американскиот Стеј департмент.

Медиуми и слобода на говор

Изваштајот нотира и дека голем број претставници на медиумската заедница често ја обвинуваат владата за непочитување на слободата на говор во медиумите, а ги наведува и случаите на физички напади врз новинари.

„…Четири од пет национални телевизии („Сител“, „Канал 5“, „Алфа“ и МТВ1) имаа сихнронизирано известување во корист на ВМРО-ДПМНЕ. Новинарите пријавуваат притисок за прифаќање провладини гледишта, а во спротивно се соочуваат со губење на своите работни места. Неколку новинари пријавија закани и заплашувања упатени до нив, од кои дел, наводно, доаѓаат од владини функционери. Извештаите регистираат повеќе од 30 случаи на насилно однесување од претставници на јавни институции против новинари. Овие инциденти се движат од физички напади до смртни закани, како и одземање или уништување на новинарска опрема“, се наведува во извештајот.

Економија

Стејт департементот, повикувајќи на тврдења од невладините организации, во извештајот наведува дека доминантната улога на владата создала услови за корупција во економијата, наштетувајќи им на бизнис-релациите и намалувајќи го економскиот пораст.

„Мешањето на владата во приватните бизниси е широко распространето… Според НВО, снимките (прислушуваните разговори, н.з.) покажуваат дека владата, директно или индиректно, контролира значаен дел од приватните компании и изнудува средства од нив…“, стои во извештајот.

Предвремени парламентарни избори

За изборниот ден, повикувајќи се на прелиминарниот извештај на ОБСЕ/ОДИХР, Стејт департментот нотира дека генерално бил добро спроведен, но забележува дека изборите се одвивале „во опкружување што го карактеризира недостиг од јавна доверба во институциите и во политичкиот естаблишмент и наводи за принуда врз гласачи“.

„Според ОДИХР, изборите не успеаја да исполант некои од важните укажувања на ОБСЕ за демократски изборен процес, вклучувајќи заплашување на гласачи, широко присутен притисок врз јавните службеници, купување гласови, принуда и злоупотреба на јавни ресурси“, се вели во извештајот.

НВО и „десороизација“

Стејт депарментот во извештајот забележува дека домашните и странските организации за човекови права генерално работеле без ограничувањата од владата, но нотира дека според извештатите, кон крајот на декември минатата година, даночните власти во земјава почнале инспекции во дел од невладините организации.

„Управата за јавни приходи (УЈП) почна со спроведување ревизии по изборите. Овие ревизии коинцидираа со повикот на поранешниот премиер и актуелен лидер на ВМРО-ДПМНЕ, Никола Груевски, за „десоросоизација“ на земјата, алудирајќи на ставање крај на меѓународната помош со донации за НВО. Опозициската партија СДСМ подоцна откри дека 42 членови на опозицијата кои отворено го критикувале Груевски и претходната влада, исто така биле предмет на ревизии и на истраги. Критичарите, вклучувајќи го и омбудсманот, ваквите ревизии ги оценија како ’лов на вештерки’ и ги повикаа јавните институции да не им служат на интересите на политичките партии или на нивни членови“, се додава во извештајот на Стејт департментот.