Ѓоко Поповски осуден на 9 години затвор во случајот „Триста“ за набавка на возила во МВР


Скопје, 22 мај, 2018 - 13:21 (META) 

Кривичниот суд денеска го осуди поранешниот помошник-министер во МВР, Ѓоко Поповски на 9 години затворска казна за случајот на СЈО „Триста“ за незаконска набавка на 300 полициски возила за МВР во периодот од 2008 до 2012 година.

Според пресудата, Поповски треба и да ја надомести штетата од приближно половина милион евра и судските трошоци. Судијката Добрила Кацарска рече дека Поповски бил свесен дека со неговото постапување може да настапи штетна последица и дека бил должен да се грижи за финансиите на МВР, кои всушност се пари на даночните обврзници.

-Министерството исплатило 318.050.292 денари односно 27.894.522 денари повеќе од збирот на економски најповолните понуди за набавка на возила. Со ова е нанесена е штета на МВР од големи размери – рече Кацарска.

Таа истакна дека 11 економски оператори доставиле понуда за сите возила. Комисијата не предложила избор на економски најисплатливите понуди. Договорите наместо да се склучат со прворангираните економски оператори, се склучувале со другите оператори.

Поповски претходно се изјасни дека не е виновен и дека очекува ослободителна пресуда. Тој е осуден за злоупотреба на службената положба и овластување.


Лазаревски и Костовски номинирани за наградата на ЕП за свиркачи на годината


Скопје, 21 мај, 2018 - 10:56 (META) 

Во Европскиот парламент во Стразбур на 29 мај ќе бидат соопштени имињата на добитниците на наградата „Новинари, укажување и бранители на правото на информирање“, која годинава се доделува во чест Дафне Каруана Галиција, малтешката новинарка, која беше убиена со бомба поставена во нејзиниот автомобил во октомври лани.

Меѓу номинираните се и Ѓорѓи Лазаревски и Звонко Костовски,  вработените во МВР кои го открија скандалот со масовното прислушување и придонесоа за промена на власта во Македонија.

Номинирани се и Јан Куцијак, словачки истражувачки новинар, кој истражуваше даночни измами меѓу бизнисмени и словачки политичари, потоа Џулијан Асанж, основачот на „Викиликс“, Марија Ефимова, укажувач, која откри корупција поврзана со малтешките политичари и Рафаел Халет, укажувачот за даночна евазвија во Луксембург, поврзан со „Луксембург Ликс“.


Завршни зборови за „Тенк“, продолжуваат судењата за „Тендери“ и „Тотал“


Скопје, 14 мај, 2018 - 10:18 (META) 

Во Основниот суд Скопје 1 денеска ќе се одржат три судски рочишта за случаите на Специјалното јавно обвинителство, од кои за еден ќе се изнесуваат завршните зборови.

Во судењето за случајот „Тенк“, во кој, за набавката на прескапиот блиндиран „мерцедес“ вреден близу 600.000 евра, на поранешниот премиер Никола Груевски и поранешниот помошник министер во МВР Ѓоко Поповски, треба да бидат изнесени завршните зборови на одбраната. Во овој случај обвинета е и поранешната министерката за внатрешни работи Гордана Јанкулоска, но постапката за неа беше издвоена поради „ризична бременост“.

Во Кривичниот суд покрај овој процес, денеска ќе има рочишта и за  случаите „Тендери“ и „Тотал“. Во првиот случај и се суди на поранешната министерка за култура Елизабета Канческа – Милевска, за тендерот за завршни работи во Музејот на македонската борба за државност и самостојност од проектот „Скопје 2014“. Во овој случај обвинети се уште двајца членови на Комисијата за јавни набавки.

Во случајот „Тотал“, му се суди на новинарот Драган Павловиќ-Латас, кој не присуствуваше на претходните три рочишта поради здравствени, односно семејни причини. Латас се товари дека давал лажни податоци во завршните сметки и даночните пријави при што преку неговите фирми затаил данок во износ од 7.466.981 денар или 121.414 евра, а лично тој затаил 3.876.471 денар или 63.032 евра.


МВР за Диво Насеље: Противдржавен чин што не смее да се повтори


Скопје, 9 мај, 2018 - 13:20 (META) 

Министерството за внатрешни работи на тригодишнината од акцијата во кумановската населба Диво Насеље, кога загинаа осум припадници на полицијата, порача дека тој „нечовечки и противдржавен чин не смее никогаш да се повтори!“

„Припадниците на полицијата се тука да ги штитат граѓаните и уставниот поредок на државата и не смеат никогаш да бидат жртви на никакви поинакви интереси. Овие осум херои ги жртвуваа сопствените животи за да ги заштитат граѓаните, жртва за која треба сите да се вложиме и да работиме вредно, за веќе никогаш да не ни се случи.  Нашето заедничко, едно општество за сите е гарант на мирот и соживотот. Граѓаните секогаш ќе ја паметат нивната храброст, а иституциите во Република Македонија ќе ја осигураат правдата, како должност и кон нивните семејства и кон населението. Одговорните за настаните во Диво Насеље ќе се соочат со одговорноста“, стои во соопштението на МВР.


Заев: Полицијата никогаш не смее да биде злоупотребена за политички цели


Штип, 6 мај, 2018 - 18:46 (META) 

После сите премрежја и предизвици со кои се соочија службите во Министерството за внатрешни работи, можам слободно да кажам дека успеавме да ја вратиме основната функција на оваа служба – да биде најцврстиот столб кој ја гарантира државноста – рече премиерот Зоран Заев денеска во Штип на свеченото одбележување на Денот на полицијата.

Според Заев, новата зададена цел е полициските и безбедносните служби да ги достигнат западно – европските професионални стандарди.

– Многу е важно Македонија да ги професионализира и деполитизира службите и да изградиме систем кој ќе ги осигура основните функции на полицијата независно од промената на политичките раководства на власт. Полицијата и Министерството за внатрешни работи никогаш повеќе не смеат да бидат злоупотребени во политички цели заради одржување на поединци на власт – рече Заев и додаде дека граѓаните никогаш повеќе нема да се плашат од оние коишто се повикани први да бидат во нивна заштита.


Спасовски: Во МВР имало група која по нарачка бришела траги и докази


Скопје, 27 април, 2018 - 15:41 (META) 

Во МВР постоела група која бришела траги и докази, рече министерот за внатрешни работи Оливер Спасовски на дебатата „Омбудсманот меѓу специјалните надлежности и капацитетите:Надворешна граѓанска контрола врз работата на полицијата“.

– Во МВР постоела група која била задолжена за бришење на трагите, по нарачка и потреба. Група која била политички окупирана, пред се, од високо позиционирани функционери во министерството и затоа ни се случува да имаме случаи за кои не можеме да најдеме докази и да дојдеме до релевантни сознанија бидејќи доказите или ги нема или повеќе не се такви како во време на извршувањето на кривичното дело – вели Спасовски.

Тој информираше дека во изминатите десет месеци, во МВР биле покренати кривични постапки против 33 лица за сторени 36 кривични дела меѓу кои и за злоупотреба на службената положба, за изнуда и за насилство. Дисциплински постапки се поднеле против 291 лице, вработено во МВР.

Со измените на Законот за Народниот правобранител што беше донесен во Собранието во февруари годинава, надзорна контрола врз полицијата треба да има Омбудсманот, а во обвинителството и во судот да бидат формирани специјализирани одделенија за гонење на полициски службеници за незаконско работење и прекумерна употреба на сила.

Универзитетскиот професор, Гордан Калајџиев вели дека не е избран најдобриот модел и изрази револт поради тоа што како што наведе моделот бил избран на затворен состанок во МВР, на идентичен начин како што тоа било сторено со моделот за следење на комуникации.

– Иако ова многу квалитетно го отворивме како прашање, го затворивме многу набрзина со пропусти во законските решенија – рече Калајџиев.

Тој истакна дека во моделот за надворешна контрола на полицијата фокусот е ставен пред се на тешките повреди, додека, од друга страна со системот на надзор ќе останат нечепнати случаите со полицијата со кои секојдневно се соочуваат граѓаните.

– Пајак службата е рекет систем за полнење на буџетот. Не може да се крене едно возило освен во случаи кога суштински го блокира сообраќајот – рече Калајџиев.


Демолирани автомобилите на Шилегов и неговата сопруга


Скопје, 19 април, 2018 - 16:09 (META) 

Непознат сторител ги демолирал автомобилите на скопскиот градоначалник, Петре Шилегов и на неговата сопруга, кои биле паркирани пред зграда на улицата „Хелсинки“.

Од МВР информираат дека сопругата на Шилегов вчера во 23.10 часот пријавила дека во периодот од 17 до 22 часот на паркингот пред зградата се оштетени нејзиниот автомобил „ауди Q5“ и автомобилот на нејзиниот сопруг „ауди А5“.

На возилото на сопругата на Шилегов му се искршени предното лево крило, предниот лев фар, предната и задната лева врата и задното крило, а кај возилото на градоначалникот оштетени биле предното лево крило, предната лева врата, задниот лев штоп и багажникот. Со оштетувањето причинета е материјална штета, која дополнително ќе биде утврдена.


Од денеска до четврток ќе има посебен сообраќаен режим поради Дигиталниот самит


Скопје, 17 април, 2018 - 11:55 (META) 

СВР Скопје ќе воспостави посебен сообраќаен режим за сообраќајниците околу хотелот „Александар палас“ и спортскиот центар „Борис Трајковски“, поради Дигиталниот самит кој ќе почне утре. Посебниот сообраќаен режим ќе почне од денеска во 15 часот и ќе важи до четврток.

„Со посебниот режим ќе бидат затворени и пренасочени за сообраќај улиците Јадранска магистрала, Скупи, делови од булеварите 8 Септември, Илинден како и другите сервисни улици кои што гравитираат кон двата објекта. Исто така, посебен сообраќаен режим е предвиден и за обиколницата на автопатот до скопскиот аеродром“, информираат од МВР.


Параглајдерист починал по слетувањето во Гевгелиско


Гевгелија, 10 април, 2018 - 10:28 (META) 

М.Ќ.(47) од село Мрзенци-гевгелиско, кој бил член на Клуб за екстремни спортови, вчера бил пронајден починат над село Сермин-гевгелиско, во близина на манастирот „Свети Илија“.

Како што соопшти МВР, настанот бил пријавен вчера, попладне во 15 часот.

На М.Ќ., по неговото успешно слетување со параглајдер, му се слошило и по кратко време тој починал. Од страна на лекар од Итната медицинска помош била констатирана смрт, наведуваат од МВР.

Увид на местото на настанот извршиле Јавен обвинител и увидна екипа од Полициска станица Гевгелија. По Наредба на Јавен обвинител телото на починатиот било предадено за обдукција


МВР (и ЈО) по 9 постапувања за малолетничка дозволија системот да остане „труден“


Скопје, 21 февруари, 2018 - 10:36 (META) 

Од постапувањето, односно несоодветното постапување на МВР и на ЈО (другите задолжени не се исклучени од одговорноста), сите институции во државата останаа „трудни“, исто како и граѓаните кои мораат да се соочат со овој срам од нефункционирањето на правната држава, пишува „Вистинимер.мк

Министерството за внатрешни работи во консултација со надлежно јавно обвинителство излегоа со сооопштение пред неколку дена околу случајот со малолетничката–штитеничка на државата во кое цениме дека има извртена вистна, т.е. спин:

Во врска со случајот со 12-годишното девојче штитеник на ЈУ за згрижување на деца со воспитно-социјални проблеми, од страна на МВР постапувано е од крајот на 2016 и во текот на 2017 година и 2018 година и според евидентираните оперативни сознанија и комуникација со надлежното ОЈО, ја информираме јавноста за следното:

Малолетното девојче во текот на споменатиот период е девет пати пријавувано за исчезнато лице од страна на вработени во социјално-згрижувачките установи, при што во сите девет случаи е постапувано од страна на соодветните полициски служби.

[Извор: МВР – Соопштение, датум: 16.02.2018]

Kontraspin-foto-Vistinomer-1024x281-e1500652724996

Контраспин: МВР во соопштение за јавноста изнесе тврдење дека 9 пати е постапувано од страна на соодветни полициски служби по пријави дека е исчезнато лице од Јавна установа за згрижување на деца со воспитно-социјални проблеми, што го сметаме како своевидно извртување на вистината односно спин.

Во моментот додека се пишува овој текст, во јавноста е потврдено дека уште две малолетнички–штитетнички на соодветната ЈУ се или биле трудни, при што едната ја прекинала бременоста, додека другата одбива и сака да го роди дететото. Самото ова сознание, заедно со претходниот случај на 12-годишното девојче, кое неодамна абортираше, го отвора сомнежот дали МВР постапувало или „постапувало“.

Консултирајќи искусни полициски службеници кои биле и на високи функции во системот, може да се најде разбирање за нивната теза дека МВР е сведено во многу случаи како да станува збор за невладина организација, а не за институција задолжена за откривање и гонење на криминалот и заштита на безбедноста на граѓаните, пред сè, поради Законот за кривична постпка од 2013 година, кога главна улога во истрагата му е дадена на јавниот обвинител.

Но, тоа што може да се најде разбирање, секако не смее да значи амнестија за МВР и префрлање на вината само кај Јавното обвинителство, кое, пак, очигледно, според неколку тврдења, не сторило речиси ништо (досегашна истрага на Канцеларија на НП, изјава на Министерката за труд и Социјална политика Мила Царовска и веб страницата на Обвинителството, каде не може да се најдат активности за посочениот период).

Имено, додека топката се префрла од МВР кон ЈО, бидејќи МВР тврди дека се до почетокот на оваа година го известило ЈО во посебни извештаи, МВР треба да одговори зошто по 9 пријавувања за исчезнатото лице, реагирале експресно дури на 14.11.2017, кога од болницата во Велес добиле известување дека малолетничката е донесена кај нив во бессознание. Тогаш конечно системот профункционирал, девојчето го испитувале и од Институтот за судска медицина, па врз основа на наодот МВР, дури на 19-ти февруари поднела кривична пријава против некој си Е.Х, до ОЈО, а и натаму го испитувала случајот, односно истрагата продолжува и против други лица.

Повеќе прочитајте на „Вистиномер.мк“.