Во буџетот се предвидени повеќе приходи од глоби, а се најавува намалување на казните


Скопје, 4 декември, 2018 - 13:45 (META) 

Во предлог-буџетот за 2019 година се предвидува од глоби, судски и административни такси за граѓаните и компаниите во државната каса да се слеат 2.092.032.000 денари или 34 милиони евра, што е зголемување во однос на годинава кога во буџетот за оваа ставка биле предвидени 2.000.000.000 денари или 32,5 милиони евра.

Владата проектира зголемување на овие приходи, а истовремено најави дека во владина постапка влегува Законот за прекршоци во кој се предвидуваат измени за намалување на висината на казните за правните и физички лица.

Според најавите предвидено е намалување на глобите за физичките лица за 75 отсто.

Mинистерката за правда Рената Дескоска при презентацијата на законските измени рече дека казнената политика нема да биде политика за полнење на буџетот, туку ќе биде насочена кон опомена на оние кои што згрешиле.

Ваквата изјава е контрадикторна со буџетските проекции кои предвидуваат зголемување на ставката од глоби.

Таа посочи и дека околу 200 закони во кои е уредена висината на казната, ќе треба да се усогласат со Законот за прекршоци и нема да смеат да ги надминат утврдениот минимум и максимум, што значи дека граѓаните најверојатно ќе почекаат додека Собранието ги усогласи законите со новата регулатива за намалување на казните.


Казните за граѓаните и фирмите ќе се намалат до 75 отсто


Скопје, 3 декември, 2018 - 10:07 (META) 

Во владина постапка влегува Законот за прекршоци во кој се предвидуваат измени за намалување на висината на казните за правните и физички лица, со што, како што велат од Владата се воведува разумна казнена политика.

„Предвидуваме намалување на глобите за физичките лица за 75 отсто. Со новото решение, минималната глоба за физичко лице е 15 евра, а максималната глоба ќе биде 250 евра, наместо досегашните 1.000 евра. За правните лица, при одмерување на глобата ќе се води сметка за приходот остварен во претходната година, број на вработени и претходно санкционирање за исти или слични прекршоци. Во законот прват се прави градација помеѓу малите, средни и големи претпријатија“, рече премиерот Зоран Заев кој измените ги презентираше со министерката за правда Рената Дескоска.

Дескоска рече дека казнената политика нема да биде политика за полнење на буџетот, туку ќе биде насочена кон опомена на оние кои што згрешиле.

Таа посочи дека околу 200 закони во кои е уредена висината на казната, ќе треба да се усогласат со Законот за прекршоци и нема да смеат да ги надминат утврдениот минимум и максимум.

„Доколку казната за нерегистрирано возило изнесувала 500 евра, со новиот закон ќе изнесува 250 евра, казната за технички неисправно возило сега изнесува 400 евра, со новиот закон истата не смее да надминува 250 евра, за предизвикување бучава казната сега изнесува 450 евра, со новиот закон сега казната нема да смее да надмине 250 евра“, рече Дескоска.

Извршната директорка на Стопанска Комора на Македонија, Билјана Пеева Ѓуриќ рече дека Законот за прекршоци е од особен интерес за претставниците на бизнис заедницата кој треба да биде коректив и поттик за деловните субјекти да можат да го корегираат своето работење и да ги исполнуваат сите предвидени законски обврски. Таа дополни дека бизнис-заедницата имала важна улога во процесот на креирање на законското решение.


Граѓаните да пријават дотур на стока во центарот на Скопје од 7.30 до 18 часот


Скопје, 29 ноември, 2018 - 15:53 (META) 

Градот Скопје упати апел до стопанските субјекти да ја почитуваат одлуката на Советот за запирање на возилата за доставување на стока во централното градско подрачје во периодот од 7.30 до 18 часот.

– Се надеваме дека апелот ќе вроди со плод, но подготвени сме да казнуваме доколку се крши одлуката на Градот – вели Мирослав Богдановски, директор на Инспекторатот на град Скопје.

Според него, состојбата околу почитувањето на забраната ќе ја мониторираат и градските инспектори и сообраќајната полиција, но очекуваат со свои пријави на прекршителите на забраната за дотур на стока во централното градско подрачје да се јавуваат и граѓаните на телефон 3297 231.

Забраната е донесена во март годинава како една од мерките за намалување на загадувањето на воздухот во градот. Со оваа одлука, трајно се забранува запирање на возилата за доставување стока во централното градско подрачје во тој период.


Мнозинството граѓани не знаат каде треба да пријават говор на омраза во медиумите


Скопје, 9 ноември, 2018 - 17:07 (META) 

Мнозинството од граѓаните немаат одговор за тоа каде треба да поднесат пријава доколку забележат дека некои од медиумите шири говор на омраза, што претставува кривично дело кое се казнува со парична глоба и казна затвор од 1 до 5 години, покажува спроведената анкета од страна на Центарот за истражувања ИПСОС Македонија“, подржана од Фондацијата Конрад Аденауер и Здружението на новинари на Македонија, пишува „Порталб.мк“.

Истражувањето било спроведен во септември годинава на 1.033 испитаници.

Според анкетата, 46,2 отсто од граѓаните не дале одговор на прашањето каде треба да го пријават доколку забележат говор на омраза во медиумите, 9,2 проценти велат дека тоа би го пријавиле во Агенцијата за аудио и аудиовизуелни услуги, 8,5 отсто во Советот на честа на ЗНМ, 8,4 проценти во Комисијата за заштита од дискриминација, 6,7 отсто во Комисијата за слободен пристап до информациите од јавен карактер, 6,2 проценти во институцијата Народен Правобранител на Македонија, 5,2 отсто во Советот за етика на медиумите на Македонија и 2,9 отсто во Јавното обвинителство.

Претходно од Хелсиншкиот комитет за „Порталб.мк“, изјавија дека граѓаните на Македонија многу малку се запознаени и препознаваат говор на омраза, бидејќи правната рамка е непрецизна. Тие бараат власта да спроведе кампања со цел јавноста да биде запознаена со говорот на омраза.

Од друга страна, Владата на Македонија преку националната стратегија за развивање на концептот „Едно општество и интеркултурализмот во Македонија“, ќе се бори против говорот на омраза, а најавуваат и нови пријави кои ќе се поднесат од МВР за лицата кои ширеле говор на омраза низ социјалните мрежи и други начини.

Стратегијата ќе се изготви во период од шест месеци во форма на документ, и според власта е важен имајќи го предвид степенот на поделба на општеството по разни основи.


Граѓаните малку го препознаваат говорот на омраза, надлежните воопшто не го препознаваат


Скопје, 6 ноември, 2018 - 13:18 (META) 

Граѓаните на Македонија многу малку го препознаваат говорот на омраза. Врз основа на податоците и статистиките, органите на јавниот ред и мир не ги земаат предвид тужбите за ваквото кривично дело, а потребна ни е и попрецизна законска рамка и кампања од извршната власт за спречување на говорот на омраза што во земјава се шири во алармантни размери, особено во последната деценија, пишува „Порталб.мк“.

Според Хелсиншки комитет за човековите права, се проценува дека во Македонија не е регулирана законската рамка за говорот на омраза, односно не е прецизна, граѓаните не го препознаваат ова кривично дело, за што извршните власти треба да промовираат кампањи, а судската власт треба конечно да почне да ги санкционира сторителите.

„Правната рамка за препознавање и санкционирање на говорот на омраза не е прецизна и не овозможува јасна рамка за дефинирање и опфаќање на говорот на омраза, со што не создава услови за развој на судската практика. Има недостаток од јавните области за препознавање на говорот на омраза и спречување на истиот во јавните простори, со што појавата на препознавање на говорот на омраза кај граѓаните е слаба“, велат од Хелсиншкиот комитет.

Хелсиншкиот комитет врши надзор и пријавување на говорот на омраза во платформата говорнаомраза.мк. Од февруари 2014 година, до денес се регистрирани 551 случаи, од кои 341 се уважени и проверени, но никој не е казнет. Поголемиот дел од пријавите се поради етничка припадност, политичка припадност и сексуална ориентација и родов идентитет.

„Според судските статистики, можеме да заклучиме дека е особено мал бројот на судски постапки и дека за ова можеме да кажеме дека ова дело не се препознава и се занемарува, со што оневозможува судски практики како основ за унапредување на ова право. Хелсиншкиот комитет има доставено вкупно 9 кривични пријави за говор на омраза врз различни основи во периодот од 2013 година до 2018 и има поднесено 13 пријави во Одделот за Компјутерски криминал и вештачење на МБР, но за ниту едно од овие пријави не е покрената тужба во кривичните судови и за истите нема судска завршница“, велат од Хелсиншкиот комитет.

Од таму бараат извршната власт да се ангажира околу промовирањето на вредностите на еднаквост и толеранција кон разликите, како и да понуди едукативна содржина за јавноста за да може да препознаат говор на омраза.

Инаку, Владата на Македонија преку националната стратегија за развивање на концептот Едно општество и интеркултурализмот во Македонија, ќе се бори против говорот на омраза, а најавуваат и нови кривични пријави преку МВР за лицата кои ширеле говор на омраза по социјалните и другите мрежи. Стратегијата ќе се изготви во период од шест месеци во вид на документ и според важноста е значаен имајќи ја во предвид поделбата на општеството на разни основи.

Сите граѓани кои се изложени на говор на омраза, случаите можат да ги пријават во МВР, Обвинителство, Комисијата за Заштита од дискриминација, Агенцијата за Аудио и Аудиовизуелни Медиумски Услуги, Здружението на Новинари на Македонија – Совет на честа, во Советот за Етика на Медиумите во Македонија (КЕММ), исто така и во онлајн на платформата www.govornaomraza.mk.

Од февруари 2014 година во Република Македонија, во сила стапиле новите законски одредби со кои се забранува и казнува говорот на омраза и ширењето на материјали преку интернет, со кои се промовира или поттикнува омраза, дискриминација или насилство, против било кој поединец или група, врз било кој основ на дискриминација. Со измените во Кривичниот Законик кои ги усвои Собранието по итна постапка на почетокот од 2014 година и стапија во сила во средината на февруари (осум дена по нивното објавување во Службен весник на Р. Македонија, бр. 27 од 05.02.2014), за сторителите се предвидуваат парични казни и казна затвор од 1 до 5 години.


Во Македонија „врие“ од говор на омраза, но случаите ретко имаат судска завршница


Скопје, 29 октомври, 2018 - 11:16 (META) 

Од стапувањето на сила на новите законски измени на Кривичниот законик за говор на омраза во февруари 2014 година, Кривичниот суд Скопје има осудено само две лица со парична глоба поради говор на омраза.

Бројот на казни е многу мал, споредено со пријавите на дигиталната платформа „Пријави и спротивстави се на говорот на омраза” каде за истиот период се евидентирани 341 случаи, додека полицијата има поднесено кривични пријави за 24 случаи, пишува „Порталб.мк“.

Полицијата го истражува говорот на омраза со бавно темпо, додека судството не го казнува, со оглед на големиот број пријави кои се поднесени во граѓанската дигитална платформа за пријавување на говор на омраза. Освен тоа, во Македонија, особено за време на владеењето на ВМРО-ДПМНЕ, според анализата на „Порталб.мк“, говорот на омраза бил многу нагласен, а имало и еклатантни случаи кога некои лица и групи јавно го користеле, но истовремено не бил санкциониран од органите за редот.

Според податоците кои ги обезбедил порталот, во текот на периодот 2014-2018, Кривичниот суд има осудено само две лица со парична глоба, и тоа во 2017 година.

За истиот период, Министерството за внатрешни работи има евидентирано уште 22 други случаи на говор на омраза, но ниту еден од нив нема судски епилог во Кривичниот суд.

Судот ги осудил двете лица според член 181 од Кривичниот законик, кој предвидува парична глоба или затвор до три години за лице кое се потсмева со странска држава или со нејзините највисоки државни претставници.

Дополнителни податоци за говор на омраза може да се најдат и преку интернет платформата „Пријави и спречи говор на омраза”. Граѓаните во оваа веб-платформа пријавиле десет пати повеќе случаи на користење на говор на омраза во споредба со кривичните пријави кои се покренати од страна на полицијата.

Според статистичките податоци кои се објавуваат преку оваа веб-платформа, од 2014 до 2018 година, граѓаните пријавиле 341 случаи на користење на говор на омраза, а во повеќето од нив ваков вид говор се користел врз основа на етничка, политичка и сексуална припадност.

Инаку, овој месец, МВР има поднесено кривични пријави против лица кои користеле говор на омраза и им се заканувале на пратениците кои гласаа за уставните измени, како и против новинарот Миленко Неделковски и актерот Тони Михајловски, и двајцата блиски со поранешната влада на ВМРО-ДПМНЕ. Неделковски е обвинет за „Загрозување на безбедноста” и „Дистрибуција на расистички и ксенофобични материјали”, додека Михајловски е обвинет заради упатена закана кон новинарот Бранко Тричковски.

Сите граѓани кои се изложени на говор на омраза, случаите може да ги пријават во полиција односно МВР, во Обвинителство, Комисијата за заштита од дискриминација, Агенцијата за аудио и аудиовизуелни медиумски услуги, Здружението на новинари на Македонија – Совет на Честа, во Советот за етика во медиумите во Македонија (KЕММ), но и во онлајн платформа “www.govornaomraza.mk”.


За девет месеци во тетовско изречени 3.584 казни за брзо возење


Тетово, 12 октомври, 2018 - 11:57 (META) 

Во изминатите девет месеци од годинава, на поширокото тетовско подрачје откриени и соодветно санкционирани се 3.584 сообраќајни прекршоци. Се работи за пречекорувања на максимално дозволената брзина, информираат од Секторот за внатрешни работи Тетово.

Според податоците, 1.096 од нив биле во населено, а 2.358 надвор од населено место. Прекршоците биле направени од патнички моторни возила, додека вкупната бројка на пречекорувања во овој период од товарни возила изнесувала 130.

СВР Тетово информира дека констатираните прекршоци се заокружени со соодветни поднесоци и со 1.511 времени забрани за управување на патничките и 68 на товарните возила, во времетраење од три месеци до една година.

Секторот за внатрешни работи Тетово продолжува со контролни активности за брзината со која се движат возилата, бидејќи неприлагодената брзина според условите на патот и оваа година е најчестата причина за сообраќајни несреќи во тетовско, истакнуваат од СВР Тетово.


ААВМУ: Се надминува максималното време за пропаганда за референдумот


Скопје, 14 септември, 2018 - 15:24 (META) 

Агенцијата за аудио и аудиовизуелни медиумски услуги (ААВМУ) денеска упати предупредување до радиодифузерите дека не се почитува максимално дозволеното време за јавна пропаганда, а таа се емитува во програмски содржини каде што не е дозволено.

„Не се почитува дозволеното време за емитување на рекламните пораки „ЗА“ референдумот, вакви реклами се емитуваат и во програми во кои тоа не е дозволено, во случајов во посебни информативни програми, и рекламирањето во врска со референдумот не е означено и не е јасно одвоено од другите реклами на радиодифузерите“, стои во соопштението од ААВМУ.

Агенцијата потсетува дека Упатството за медиумско претставување за време на референдум предвидува најмногу четири и пол минути на секој реален час пропаганда „ЗА“ и исто толку за пропаганда „Против“, односно вкупно девет минути на секој реален час. ААВМУ појаснува и дека редовните рекламни блокови не смее да се користат за пропагандата за референдумот, а пропагандата не смее да се емитува во вести, посебни информативни програми, директни преноси од верски, спортски, културни, забавни и други настани, како и во и околу програми за деца и млади.

Медиумскиот регулатор им порача на радиодифузните куќи дека во наредните денови ќе ги казнува ако забележи некои од наведените прекршувања.


Од околу 1.000 дронови во Македонија, регистрирани се само 52 летала


Скопје, 17 август, 2018 - 15:43 (META) 

Во Македонија од цивилни лица и фирми се користат околу 1.000 воздухоплови без екипаж, а од нив до 15 август кај нас се регистрирани само 52, објаснува Драги Стојаноски, раководител на Секторот за безбедност на воздушен сообраќај и воздухопловна навигација во Агенцијата за цивилно воздухопловство (АЦВ).

Казните за неовластено користење, се од 300 евра, ако се плати истиот ден, до 600 евра за плаќање подоцна.

– Се надеваме дека сопствениците на леталата ќе сфатат дека и оваа дејност мора да биде регулирана и ќе си ги извршат обврските да се регистрираат според Уредбата за воздухоплови без екипаж – вели Стојаноски.

Тој вели дека е проблем и тоа што кај осигурителните куќи уште нема слух да изготват понуди за осигурување на овие летала, со што би им се овозможило некакво олеснување и помош и на сопствениците на воздухопловите без екипаж и на луѓето што ќе претрпат некакви повреди или штета од овие летала.

Уредбата, како и потребните формулари за регистрирање на  воздухоплови без екипаж може да се најдат во одделот за воздухоплови без екипаж на веб-страницата на АЦВ.

Регистрираните дронови добиваат маркичка со регистерски број и со QR-код, а сопствениците се задолжени 24 часа пред летањето да пријават со електронско писмо каде планираат да летаат со својот дрон и во кој временски период. Од следната седмица тоа ќе се прави директно на веб-страницата на Агенцијата, каде корисниците ќе се логираат и ќе ги оставаат своите податоци.

– Проверуваме и со МВР и со Министерството за одбрана, оти, на пример, иако за некој објект го знаеме ограничувањето, министерствата може во некои случаи, односно во некои денови, да наложат многу поголема оддалеченост од објектите. Од почетокот на месецот до 15 август имавме 63 пријавени настани и сите можеа да се следат на картата на нашата веб-страница – објаснува Момироски.

Од 63-те лета, по околу една четвртина отпаѓа на Скопје и Охрид, а потоа следуваат Куманово со 17 отсто од летовите, Тетово со 7 отсто, како и Струмица и Македонски Брод со по 5%.

Од Агенцијата апелираат сите сопственици на дронови со долет поголем од 15 метри и максимална височина над 15 метри или тежина при полетување од половина килограм да ги регистрираат овие летала, за да избегнат проблеми со законот.


Глобите за царински прекршоци намалени за 75 отсто


Скопје, 6 август, 2018 - 9:30 (META) 

За 75 проценти во просек се намалени глобите за царинските прекршоци за кои е предвиден мандатен платен налог, односно за оние кои можат да се платат на лице место, информираат од Министерство за финансии.

Од таму додаваат дека со измените на Царинскиот закон се врши намалување на глобата од 250 евра на 50 евра за правно лице и од 50 евра на 15 евра за физичко лице.

„Како што истакна министерот за финансии Драган Тевдовски, целта на измените е подобрување на легислативата во насока на создавање на униформна, правична и пропорционална примена на прекршочните одредби, соодветно на тежината на сторениот прекршок. Со измените на Царинскиот закон се овозможува и побрз проток на стоките. Имено, тој овозможува взаемното признавање на издадените одобренија за овластен економски оператор во рамките на ЦЕФТА. Ова е голема придобивка за македонските трговски друштва кои тргуваат во регионот“, се вели во соопштението.

Од Министерство за финансии додаваат дека признавањето на одобренијата за економски оператор ќе овозможи побрз проток на стоката која се извезува, помалку физички и документарни контроли и можност да се одбере местото каде ќе се спроведат контролите.

„Со измените на законот се врши и усогласување со Конвенцијата за заедничка транзитна постапка. Со нив се усогласуваат одредбите кои се однесуваат на употреба на гаранции за обезбедување на плаќање на царинскиот долг или други давачки кои можат да настанат во врска со стоката ставена во транзитна постапка. Измените на законот стапуваат на сила кон средината на овој месец“, се додава во соопштението.