!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Силен земјотрес го погоди Бали


Данпасара, 22 март, 2017 - 9:53 (META) 

Земјотрес со јачина од 5,5 степени според Рихтеровата скала утринава го потресе Бали, без да предизвика материјална штета, но создаде паника кај туристите кои набрзина ги напуштале хотелите.

Потресот се случил нешто по 7 часот по локално време. Епицентарот бил околу 20 километри североисточно од главниот град Данпасара, на длабочина од 118 метри, во близина на популарното одморалиште на југот на земјата.

Индонезија се наоѓа на таканаречениот „огнен прстен“, каде се судираат тектонските плочи, што предизвикува чести сеизмички и вулкански активности.


Силен земјотрес во Турција


Земјотрес со јачина од 5,5 степени според Рихтеровата скала го погодил југоисточниот дел на Турција, соопшти турскиот центар за управување со кризи.

Епицентарот на потресот бил во градот Самат, во провинцијата Адијаман, стои во соопштението.

Американскиот геолошки завод наведе дека магнитудата на потресот изнесувала 5,6 степени и дека земјотресот бил на длабочина од 10 километри.

Нема информации за причинета штета.


Најмалку 15 загинати во земјотрес на југот на Филипини


Манила, 11 февруари, 2017 - 10:56 (META) 

Најмалку 15 лица загинале, а околу 100 биле повредени во земјотрес со јачина од 6,5 степени според Рихтеровата сакала што денеска го погодил јужниот дел на Филипини, јавуваат светските агенции.

Земјотресот, според агенциите, ја погодил провинцијата Суриаго дел Норте, на островот Минданао.

„И понатаму ја проценуваме ситуацијата, потребите на населението и причинетата материјална штета“, изјавил претставник на филипинските власти.


Силен земјотрес ја погоди Колумбија


Богота, 6 февруари, 2017 - 15:47 (META) 

Силен земјотрес со јачина од 5,7 степени според Рихтеровата скала, потресе делови од Колумбија.

Епицентарот на потресот бил во југоисточната област Хуила, а се почувствувал и во престолнината Богота, каде луѓето ги напуштиле објектите од страв.

Засега нема информации за причинета штета и за евентуални жртви.

Утринава земјотреси ја погодија Турција и грчкиот остров Лезбос.


Земјотрес во Турција, има повредени


Анкара, 6 февруари, 2017 - 10:34 (META) 

Земјотрес со јачина од 5,3 степени според Рихтеровата скала утринава ја погоди Турција и оштети куќи во пет крајбрежни села, а има и повредени, соопшти турскиот сеизмолошки центар.

Турските медиуми јавуваат дека најмалку четири лица се повредени во земјотресот, чиј епицентар бил под Егејското Море, во близина крајбрежниот град Ајвачик, во северотурската провинција Џанакале.

Според првичните информации, оштетени куќи има во селата Тасагли, Тузла, Јуари, Џам и Гулпинар.
По земјотресот, следувал и потрес со јачина од 4,9 степени според Рихтеровата скала.

Земјотресите се чести во Турција, која се наоѓа на граница на тектонски плочи.

Земјотрес со јачина од 5,1 степен според Рихтеровата скала утринава го погодил и грчкиот остров Лезбос, но нема информации за причинета материјална штета или за жртви.

Според информациите на Атинскиот геофизички институт, епицентарот бил на северот на островот.


Извлечени уште шест тела од затрупаниот хотел во Италија


Рим, 24 јануари, 2017 - 11:51 (META) 

Уште шест тела беа извлечени од хотелот во централниот дел на Италија, на кој пред речиси една недела се урна снежна лавина. Спасувачките екипи сè уште бараат 17 исчезнати лица.
Сега е потврдено дека 12 лица смртно настрадале откако лавината го прекри хотелот „Ригопијано“.

Спасувачите не губат надеж дека ќе пронајдат преживеани, откако вчера под урнатините и под снегот беа пронајдени три живи кутриња.

Во петокот спасувачите извлекоа неколку преживеани од урнатините на хотелот кои опишаа како преживеале страшни 48 часа заробени во мрак и на студено, јадејќи снег за да ја изгаснат жедта.

Спасувачката акција се одвива бавно затоа што спасувачите често мораат да копаат со голи раце од страв да не предизвикаат ново уривање.

Лавината се случи неколку саати по силните потреси во таа област, која минатата година беше зафатена од серија земјотреси.


Силен земјотрес регистриран кај Папуа Нова Гвинеја


Порт Морсби, 22 јануари, 2017 - 13:41 (META) 

Земјотрес со јачина од 7,9 степени според Рихтеровата скала, денеска ја погодил Папуа Нова Гвинеја, соопшти американскиот геолошки институт, јавуваат светските агенции.

Потресот се случил на 40 километри западно градот Пангуна, на островот Бугенвил, во Папуа Нова Гвинеја, на длабочина од 153 километри, соопштил американскиот институт. Оттаму проценуваат дека е можно земјотресот да предизвикал умерена штета на осторовот Бугенвил.

Центарот за тревога од цунами на Пацификот првично издал предупредување дека се можни опасни бранови во некои од крајбрежните делови на Папуа Нова Гвинеја и на соседните Соломонски Острови, но подоцна предупредувањето било повлечено.

Земјотрес со иста јачина ја погоди Папуа Нова Гвинеја кон средината на декември минатата година, но не беше предизвикана никаква штета.

Архипелагот Папуа Нова Гвинеја се наоѓа во јузопадниот дел на Тихиот Океан, и во т.н. пацифички Огнен прстен, територија подложна на силна сеизмичка активност.


Силен земјотрес регистриран на Фиџи


Сува, 4 јануари, 2017 - 13:14 (META) 

Земјотрес со јачина од 7,2 степени според Рихтеровата скала денеска е регистриран кај островот Фиџи, но нема извештаи за евентуални последици и за штети, соопшти американскиот геолошки институт.

Пацифичкиот центар за предупредување издаде предупредување за цунами, кое беше на сила еден час.

Епицентарот на потресот бил на 284 километри југозападно од престолнината Сува, на длабочина од околу 15 километри.
Жителите на туристичкото место Нади, на главниот остров, се евакуирани по потресот, јави радиото „Нов Зеланд“.


Земјотрес со јачина од 4,2 степени ја погоди Италија


Рим, 2 јануари, 2017 - 13:24 (META) 

Централна Италија беше погодена од земјотрес со јачина од 4,3 степени според Рихтерова скала, пренесуваат италијанските медиуми.

Епицентарот на земјотресот се наоѓал 30 километри од местото Матињано, околу 100 километри од Рим.

Според податоците, земјотресот се случил ноќеска, на длабочина од 10 километри, а засега нема податоци за жртви или предизвикана материјална штета.

Централна Италија пред неколку месеци беше погодена од два силни земјотреси кои предизвикаа голем број жртви и огромна материјална штета.


Земјотрес ја погоди Романија


Букурешт, 28 декември, 2016 - 10:13 (META) 

Земјотрес со јачина од 5,2 степени според Рихтеровата скала утринава ги затресе источните делови на Романија, а се почувствува и во престолнината Букурешт, соопштија сеизмолозите.

Засега нема извештаи за евентуална штета или повредени.

Рускиот институт објави дека јачината на земјотресот бил 5,2 степени, додека американскиот геолошки завод наведува дека бил од 5,6 степени.

Епицентарот на земјотресот е регистриран на длабочина од 100 километри, околу 1.20 часот по локално време.

Земјотресот ја погодил областа Вранцеа, североисточно од Букурешт.

Оваа област во 1977 година беше погодена од земјотрес со јачина од 7,2 степени според Рихтер, при што загинаа околу 1.500 лица, од кои повеќето во Букурешт.