ВМРО-ДПМНE: Договорот од Преспа е правно-политички мртов


Скопје, 18 октомври, 2018 - 15:10 (META) 

Иако над еден милион и 200 илјади граѓани рекоа не за промена на името, Заев не се откажува, и со тоа директно ја крши волјата на граѓаните, се вели во реакцијата на ВМРО-ДПМНЕ, на изјавата на премиерот Зоран Заев.

„Во оваа фаза, договорот е чисто правно прашање, а како такво треба да се гледа низ призма на правото, законите и Уставот. Согласно правото Договорот од Преспа е правно – политички мртов, тоа го кажа ДИК, но тоа го кажува и Уставот. Одењето спротивно е злоупотреба на власта. Зоран Заев наместо насилно да турка спроведување на договор кој е одбиен од граѓаните, треба да си даде оставка како што вети, и не само заради штетниот договор кој го склучи, туку и за руинираната економија, урнисаното здравство и омаловаженото образование“, се вели во реакцијата на ВМРО-ДПМНЕ.


Германија бара да продолжи спроведувањето на Договорот, цензусот бил премногу висок


Берлин, 2 октомври, 2018 - 17:08 (META) 

Портпаролот на канцеларката Ангела Меркел, Штефан Зајберт изјави дека големата поддршка на референдумот е причина повеќе за продолжување на Договорот, иако излезноста била мала, пренесува „БТА“.

Според Зајберт, важно е да се продолжи со поддршката на спроведување на Договорот, кој, како што рече, претставува историска можност за надминување на една пречка во односите на Македонија со НАТО и ЕУ.

Портпаролот на Меркел посочува дека цензусот од 50 проценти, што не бил постигнат, е премногу висок, бидејќи избирачките списоци вклучуваат многу луѓе кои одамна ја напуштиле земјата


Вучиќ: Не се мешам во внатрешните работи на Македонија, го почитувам Договорот со Грција


Белград, 2 октомври, 2018 - 9:59 (META) 

Претседателот на Србија, Александар Вучиќ по повод референдумот во Македонија, рече дека Србија има јасен став, а тоа е дека го почитува секој Договор помеѓу Грција и Македонија, но дека не може да се запостави што мисли народот и не може да се наметне ништо на сила, јавува дописничката на „Мета“ од Белград.

Тој додал дека очекувал повеќе разбирање од светот за резултатот од референдумот во Македонија и ги замолил ЕУ и НАТО да покажат повеќе почит кон „малите народи“ бидејќи како што истакнал „демократијата, Уставот и законот се тука за да се почитуваат„ и „тогаш кога одлуката на народот не им се допаѓа.“

Прашан да ги искоментира оценките од ЕУ и НАТО за референдумот за новото име на земјата, Вучиќ додал дека не е негово да оценува ниту да се меша, но дека очекувал поразлични реакации.

„Се плашам и ми се чини дека некои луѓе од светот, нас малите балкански народи не потценуваат и мислат дека баш се може да помине“, изјави Вучиќ додавајќи дека се однесуваат така, како што може да биде само како што тие мислат.


Македонија и Албанија потпишаа договор за соработка во гасификацијата


Тирана, 21 септември, 2018 - 12:01 (META) 

Македонски енергетски ресурси АД Скопје и АЛБГАЗ од Тирана потпишаа Меморандумот за разбирање за воспоставување и развивање на деловна соработка за развој на преносните мрежи на природен гас во двете земји.

На потпишувањето на меморандумот присуствуваа министерот за економија Крешник Бектеши и албанскиот министер за енергетика Дамјан Ѓикнури.

– Денешниот Меморандум е чекор напред за развој на билатерално стратешко партнерство во секторот за природен гас, како продолжение на веќе потпишаниот Меморандум за соработка во областа на енергетиката, меѓу Министерството за економија на Македонија и Министерството за енергетика на Албанија – истакна Бектеши.

Тој потсети дека и двете земји, како потписнички и на Договорот за основање на ЕЗ, покрај усогласување на националните законодавства со европското,  се стремат да ги постигнат трите утврдени цели на енергетската политика на Унијата, а тоа се безбедноста, одржливоста и конкурентноста, притоа обезбедувајќи слободно движење на енергијата, без технички или регулаторни бариери.

– Радува фактот што изградбата на проектот ТАП на албанска територија е во завршна фаза. Соработката во областа на природниот гас, верификувана денеска од страна на првите луѓе на МЕР и АЛБГАЗ, Бајрам Реџепи и Арбр Аврами, како стратешко партнерство меѓу двете компании, ќе овозможи обезбедување на сигурност и диверзификација на снабдувањето со природен гас. Со ова ќе биде промовирана гасификацијата, испораката на дополнителни количини на природен гас помеѓу двете земји, но и поттикнување на инфраструктурните инвестиции во енергетскиот сектор, како и исполнување на обврските што произлегуваат од Регионалната иницијатива за централно и југоисточно европско поврзување со гас – рече Бектеши по потпишувањето.

Според Бектеши, Македонија и Албанија како две соседни земји кои сакаат да се интегрираат во европските структури, имајќи го предвид Берлинскиот процес, се повеќе од заинтересирани во најкус можен рок да се конкретизираат започнатите проекти, што ќе придонесе до уште  позајакната енергетска и економска соработка, имајќи предвид дека само со добра регионална интеграција ќе се обезбеди побрза интеграција во европското семејство.


Иванов до Столтенберг: Заслужуваме членство во НАТО без дополнителни услови


Скопје, 6 септември, 2018 - 10:58 (META) 

Претседателот Ѓорге Иванов и генералниот секретар на НАТО, Јенс Столтенберг разговарале за актуелната политичка состојба во Македонија, за евроатлантските интеграции на земјата и за напредокот на реформите во одбраната и безбедноста во согласност со НАТО стандардите, информираат од кабинетот на претседателот.

Иванов истакнал дека Македонија е силно посветена на промовирањето на мирот и стабилноста и придонесува за безбедноста во и надвор од нашиот регион.

„Претседателот Иванов потенцираше дека Македонија во континуитет покажува дека е доверлив и стратешки партнер и сојузник на НАТО,  додавајќи дека уште во 2008 година Македонија ги исполни условите за членство во НАТО и сиве овие години активно придонесувајќи во меѓународните мировни мисии, го заслужува членството во НАТО без дополнителни услови“, се вели во соопштението.

Столтенберг изјавил дека вистинското место на Македонија е во Европската Унија и НАТО Алијансата.

„Ќе продолжам да ги поддржувам нашите стратешки цели. Ho, Европската Унија и НАТО во никој случај не смеат да бидат алиби за лош договор“, му порачал претседателот Иванов на Столтенберг.

Иванов истакнал дека сите негови обврски како Врховен командант на вооружените сили во однос на одбраната се завршени и дека АРМ ги исполни поставените задачи и успеа да се покаже како рамноправен партнер со армиите на земјите-членки на НАТО како на обуките, вежбите и проверките, така и во пракса во изведувањето на операциите.

„Во таа насока, претседателот Иванов посочи дека го поддржа процесот на донесувањето на стратегискиот одбранбен преглед согласно препораките на НАТО советодавните тимови и дека новата стратегија, што е исклучиво ориентирана кон зачленувањето во НАТО, е изготовена. Имајки ги предвид новите реални предизвици со коишто се соочуваат регионот и Европа, додаде претседателот Иванов, одржувањето на безбедноста, стабилноста и просперитетот на нашиот регион треба да претставува колективен интерес на сите“, се додава во соопштението.


ЕУ: Зајакнување на трговијата со Иран е клучна за спроведување на договорот


Велингтон, 7 август, 2018 - 13:19 (META) 

Високата претставничка на Европската унија за надворешна политика и безбедност, Федерика Могерини изјави денеска дека ЕУ ги охрабрува компаниите да развиваат бизнис со Иран, бидејќи таа земја ги исполнува условите за примена на договорот за нуклеарно оружје.

Могерини, која е во посета на Нов Зеланд, изјави дека ЕУ вложува напори иранскиот народ да има економски бенефит кој го носи примената на договорот, бидејќи е во интерес на регионот и на целиот свет, пренесуваат светските медиуми.

Американскиот претседател, Доналд Трамп во мај одлучи да се повлече од договорот, а синоќа потпиша указ за повторно воведување на санкции кои денеска стапија на сила.

Првата фаза од санкциите подразбира блокада на финансиските трансакции, увоз на сировина како и казнени мерки во секторите за купување на автомобили и авиони. Втората фаза на санкции, кои ќе стапат на сила во ноември, ќе ги погоди нафтениот сектор и иранската централна банка.

ЕУ вчера изрази жалење поради повторното воведување на американски санкции, но очекува од Иран да продолжи во потполност да ги спроведува обврските преземени во рамките на договорот за нуклеарно оружје.


Министрите од регионот го повикаа Косово целосно да ги укине зголемените царини


Белград, 25 јули, 2018 - 15:07 (META) 

Министрите од регионот денеска во Белград на заеднички состанок ја повикаа косовската Влада целосно да ги укине зголемените царини за извоз на земјоделски производи во Косово, информираат од Министерство за земјоделство, шумарство и водостопанство.

Тие ја поздравиле одлуката на Косово за делумно укинување на зголемените царини, но побарале од Приштина итно и целосно да ги укине воведените зголемени царини за извоз на земјоделски производи.

Иницијатор на средбата и домаќин бил српскиот министер за трговија Расим Љајиќ, а на средбата учествувал и македонскиот министер за земјоделство Љупчо Николовски.

– Сметам дека енергијата која ја дадовме до сега вроди со плод. Вчера на владина седница, Приштина донесе одлука за повлекување на царината од поголем дел од производите. Но,имајќи предвид дека на сила се мерки за зголемена царина за дел од производи за кои Македонија има извоз во моментов, бараме укинувањето на одлуката да се случи веднаш. Сметаме дека е потребно итно отповикување на оваа одлука која е спротивна на договорот ЦЕФТА, но и на СТО. Ние очекуваме укинување на оваа одлуката – изјави Николовски.

Љајиќ ги повикал и останатите членки на договорот ЦЕФТА да работат на укинување и отстранување на сите трговски бариери кои се спротивни на принципите на слободната трговија.

Учесниците на денешниот состанок истакнале дека се залагаат за реформа на ЦЕФТА, за олеснување на трговијата на Западен Балкан.


Европската унија и Јапонија потпишаа договор за слободна трговија


Токио, 17 јули, 2018 - 13:23 (META) 

Договорот за слободна трговија кој го потпишаа Европска унија и Јапонија претставува „јасна порака против протекцинизмот“, изјави денеска претседателот на Европскиот совет, Доналд Туск во Токио, алудирајќи на американските царински тарифи кои ги воведе претседателот на САД, Доналд Трамп.

„Покажуваме дека сме многу силни и во подобра позиција кога работиме заедно“, изјави претседателот на Европската комисија, Жан Клод Јункер.

Договорот помеѓу ЕУ и Јапонија предвидува зона на слободна трговија која покрива речиси една третина од светскиот домашен бруто-производ (БДП).

Состанокот во Токио требаше да се одржи минатата недела во Брисел, но јапонскиот премиер Шинзо Абе ја откажал средбата поради поплавите во Јапонија во кои настрадаа повеќе од 200 лица.


Заев: Договорот создава подобра иднина за Македонија и Грција


Брисел, 13 јули, 2018 - 10:12 (META) 

Договорот создава пријателство и соработка, но и перспективи за граѓаните на двете земји, вели македонскиот премиер Зоран Заев во изјава за Независната балканска новинска агенција (ИБНА), кусо по потпишувањето на поканата за интеграција на Македонија во НАТО.

– Интеграцијата во НАТО ќе ги зајакне безбедноста и стабилноста во регионот и ќе придонесе за зголемување на инвестициите во целиот регион. Убеден сум дека со оваа разврска, резултатите ќе бидат позитивни како за граѓаните на Грција, така и за граѓаните на Македонија. Од овој аспект, сакам уште еднаш да ги истакнам пораката и важноста на овој договор. Договорот создава пријателство и соработка, но и перспективи за граѓаните на двете земји – вели македонскиот премиер.

Заев во изјавата, ги повикува грчките граѓани, исто како што ги повикува и македонските, да ги искористат можностите од договорот кој што „создава подобра иднина за Грција и Македонија“.

– Секако на крајот на целиот процес, по спроведувањето на референдумот и по промените во Уставот, ние, како што прифативме, ќе се викаме Северна Македонија. Паралелно, како што Грција ги прифати термините македонски јазик и македонски народ, така и ние го прифативме терминот грчки Македонци со посебностите на нивното културно наследство. Убеден сум дека пријателството што го имаме изградено, може да донесе, со взаемно почитување и взаемно признавање, само позитивни резултати за денешните генерации, а особено за следните генерации – порачува премиерот Заев во изјавата за ИБНА.


Рот: Договорот за името доказ дека е можно да се надминат и длабоките разлики


Лондон, 9 јули, 2018 - 12:48 (META) 

Историскиот договор меѓу Грција и Македонија за спорот со името покажа дека е можно да се надминат и длабоките билатерални разлики, доколку се зголеми довербата и постои политичка волја, нагласи денеска државниот секретар во германското Министерство за надворешни работи, Михаел Рот.

Тој во соопштение, пред учеството на состанокот со шефовите на дипломатиите на самитот ЕУ-Западен Балкан во рамки на Берлинскиот процес во Лондон, нагласи дека стабилноста и демократскиот развој на земјите во регионот е во интерес како на Германија, така и на Европа, како и дека се од особено значење за сопствената безбедност.

– Состанокот е можност за земјите во регионот да ја подобрат регионалната соработка и со тоа да го поттикнат своето приближување до ЕУ – нагласи Рот.

Тој истакна дека со цел постигнување на раст на довербата, не само меѓу политичарите, туку и меѓу граѓаните, германската Влада ја поддржува работата на регионалната младинска заедница во рамки на Берлинскиот процес.

– Тука станува збор за помирување на идните генерации во регионот во кој раните од војните и натаму се присутни – рече Рот.