Блокирани сметките на 79.811 граѓани и 28.352 фирми, има благо намалување од претходно


Скопје, 19 февруари, 2019 - 11:56 (META) 

Дури 108.163 граѓани и фирми заклучно со септември, минатата година имале блокирани сметки во банките, покажуваат податоците на Народната банка. Од вкупната бројка, 79.811 се физички лица, а 28.352 се правни лица.

Иако во текот на 2018 година има благо намалување на бројот на блокирани граѓани и фирми, забележливо е дека од 2015 година наваму односно веќе трета година по ред бројката на блокирани не паднала под 100.000 депоненти.

Според последните податоци, во банките има околу 1,7 милиони депоненти од кои 1,6 милиони се физички лица, а 114.943 се правни лица.


Известување при несреќи – факти, а не емоции


Скопје, 15 февруари, 2019 - 15:54 (META) 

Лесно е да критикувате седнати дома пред телевизор како известуваме, но не прашувате ли како ни е нас, кои работевме на студ, во тешки услови, во ситуација кога има многу луѓе околу тебе, во моменти на жал, а притоа да не згрешиме. Имаше грешки, ама тие беа направени од брзање, од трема, од емоции, и од потребата да се обезбедат што повеќе информации. Ич не беа лесни вклучувањата во живо од оваа несреќа, колку и да речам дека имам искуство со известување од различни несреќи – напиша на Фејсбук новинар на една од телевизиите кои известуваа од собраќајната несреќа на автобусот на „Дурмо турс“ на автопатот Скопје-Тетово, која загинаа 15 патници, а над 30 беа повредени, по низа коментари што ги прочитал на сметка на новинарите кои известуваа од несреќата, пишува „КриТинк“.

Оваа сообраќајна несреќа, со голем број жртви, повторно не наврати на прашањето, како треба да се постават медиумите во случаи кога известуваат за несреќи, а притоа да обезбедат избалансирано известување ослободено од сензационализам, шпекулации, да се почитува приватноста на настраданите и нивните семејства, да се почитува болката и жалоста, на што впрочем, упатуваат и  Кодексот на новинарите на Македонија и Прирачникот за етиката во новинарството.

Кодексот  предвидува и дека новинарите се „должни да ги почитуваат личната болка и жалост,“ (член 7),  па  оттаму не се препорачува во прв момент да објавуваат целосен идентитет на жртвите, во ситуација кога семејствата на настраданите сè уште не се официјално известени.

Во овој случај, при несреќата на патот Тетово – Скопје, како и во многу други ситуации,  дел од семејствата на настраданите од медиумите дознале дека настрадал нивни близок или на телевизија го препознале возилото на блиски роднини кое учествувало во сообраќајна несреќа што предизвикува стрес и шок.


МВР: Прво законски измени, потоа издавање на лични документи со новото име


Скопје, 11 февруари, 2019 - 15:49 (META) 

Граѓаните ќе добијат лични документи со новото име, откако ќе се сменат законите и подзаконските акти кои го регулираат изгледот и употребата на личните документи на граѓаните, информираа од МВР за „Мета“.

– По објавувањето во „Службен весник“ на одлуката за стапување во сила на името „Република Северна Македонија“ ќе се сменат законите и подзаконските акти кои го регулираат изгледот и употребата на личните документи на граѓаните. Потоа, согласно законските одредби, ќе биде спроведена јавна набавка и ќе бидат набавени обрасците за новите лични документи. До тогаш граѓаните непречено можат да ги користат постојните лични документи. За каква било промена, граѓаните ќе бидат навремено информирани – информираат од МВР.


Заев-Галовеј: Членството во НАТО е победа, да се задржи фокусот на реформите


Скопје, 7 февруари, 2019 - 12:45 (META) 

Премиерот, Зоран Заев, денеска се сретнал со Рејчел Галовеј, амбасадорката на Обединетото Кралство на Велика Британија и Северна Ирска.

Галовеј, како што информираат од Владата истакнала дека интеграцијата на Македонија во НАТО е голема победа за државата, бидејќи отвора перспективи за видливи економски придобивки.

„Обединетото Кралство планира во скоро време да ги почне процедурите за ратификација на Протоколот за членство на Македонија во НАТО. Исто така, таа ја охрабри земјата да продолжи со фокусот на реформскиот процес, што носи резултати за квалитетот на живот на граѓаните“, соопштуваат од Владата.

Премиерот Заев информирал дека е во тек заокружувањето на безбедносните реформи, дека до крајот на февруари се очекува во Парламентот да бидат изгласани со консензус измените на законите што се однесуваат на реформите во правосудниот систем, дека се во тек реформите за професионализација на јавната администрација, како и за избор на нови, политички независни членови на Антикорупциската комисија.


Заев: Постои волја да избришеме долгови за струја од 110 милиони евра на 200.000 граѓани


Охрид, 1 февруари, 2019 - 15:03 (META) 

Премиерот Зоран Заев на трибината „Силна економија – шанса за сите“ во Охрид соопшти дека, Владата има прогрес во преговорите со компаниите ЕВН и ЕЛЕМ за бришење на долгови за струја настанати до 2006 година, за 200.000 граѓани и семејства кои се заглавени во лавиринт со проблеми од извршители и блокирани сметки.

„Кога правно формално ќе го потпишеме договорот, јавно ќе соопштиме. Но, волјата од Владата за преземање на своите дејствија е нотирана, и од ЕЛЕМ како партнер во производството на струјата е потврдена, и волјата на ЕВН како приватна компанија исто така е потврдена. Намерата е да избришеме долг на граѓаните од 110 милиони евра. Тоа се огромни пари и ќе биде големо олеснување за граѓаните. Сите мерки коишто ги спроведуваме се во насока на било кој начин да вбризгаме пари кај граѓаните“, порача премиерот Заев.


Од годинава сите царински декларации ќе се поднесуваат електронски


Скопје, 8 јануари, 2019 - 12:15 (META) 

Годинава сите царински деклариции и акцизни документи ќе се обработуваат електронски. Ова беше истакнато денеска при посетата на министерот за финансии Драган Тевдовски на посетата на Царинската управа. Системот за управување со царински декларации на почетокот на февруари ќе почне да се применува на 11 пилот-проекти царински испостави, а веќе од средината на годината ќе почне да се применува во сите царински испостави во земјава.

-На овој начин за фирмите, значително се скратуваат трошоците и се намалува времето. Сите документи ќе се поднесуваат електронски. Наша цел е да автоматизираат процесите и со тоа  да им се понудат подобри услуги и на граѓаните и на компаниите – рече министерот за финансии Драган Тевдовски.

Системот за обработка на царински декларации и акцизни документи ќе овозможи и размена на податоците со другите институции, како на пример, Управата за јавни приходи при поднесување на ДДВ пријави кон кои се поднесуваат царински декларации или Завод за статистика и Народна банка за податоци за увоз и извоз.

Во првата половина од годинава ќе биде пуштен и нов терминал на граничниот премин Ќафасан. Проширувањето на царинскиот премин Ќафасан опфаќа нов увозно-извозен царински терминал од 9,5 илјади м2, пристапни патишта, објекти за царинење и други инспекциски органи како и реконструкција на постојните објекти.

-Општата цел на проектот e олеснување на прекуграничните постапки и спроведување на законите, што ќе се постигне со реконструкција на објектите за царинење и инспекција, обезбедени подобри услуги за економските оператори и побрз проток на стоката, како и зајакната заштита на државата и општеството – рече директорот на Царинската Управа, Ѓоко Танаскоски.

Инаку минатата година, како што истакна Танаскоски, беше пуштен во употреба новиот царински терминал на граничниот премин Табановце. Надградбата на терминалот, овозможува олеснување на прекуграничната трговија долж Коридорот 10 и спроведување на царинските постапки во модерни капацитети.

Во доменот на примена на концептот Овластен економски оператор, беше посочено дека идните активности на Царинската управа ќе тежнеат кон зголемување на бројот на издадени одобренија. преку натамошна промоција на концептот, и советување на компаниите и помош при соочувањето со новините од овој концепт.


МВР апелира граѓаните да се воздржат од употреба на пиротехнички средства


Скопје, 31 декември, 2018 - 13:53 (META) 

Во пресрет на новогодишната ноќ, Министерството за внатрешни работи апелира до граѓаните максимално да се воздржат од употребата на пиротехнички средства, како и од други нарушувања на јавниот ред и мир.

„Неовластената употреба на пиротехнички средства е казнива согласно Законот за прекршоци против јавниот ред и мир, Законот за заштита од експлозивни материи и Кривичниот законик на Република Македонија. Неовластената употреба на пиротехнички средства (петарди, палење ракети и други пиротехнички средства) со кои се нарушува јавниот ред и мир и безбедноста на граѓаните се казнува со глоба во износ од 200 до 500 евра“, се вели во апелот на МВР.

Од таму, исто така апелираат и до учесниците во патниот сообраќај да бидат внимателни и во целост да ги почитуваат сообраќајните правила и прописи, задолжително да поседуваат зимска опрема и да не седнуваат зад воланот под дејство на алкохол.

„Апелираме до граѓаните да ги почитуваат законските прописи и да соработуваат со полицијата. Сите нарушувања на јавниот ред и мир да ги пријават во полициска станица или преку бесплатниот телефонски број 192“, се додава во соопштението на МВР.


Стотина илјади штедачи не сакаат обесштетување од пропаднатите банки


Скопје, 20 декември, 2018 - 10:08 (META) 

Фондот за осигурување депозити не може да обесштети 101.909 штедачи кои ги чувале парите во банките и штедилниците за кои во изминативе години бил отворен стечај или ликвидација. Вкупната пресметана обврска за обесштетување на штедачите во 11 банки и штедилници кои биле членки на Фондот, а потоа згаснале изнесувала 1,5 милијарди денари.

Од 1997 година до 31.12.2017 година се обесштетени вкупно 20.042 штедачи во вкупен износ од 1,3 милијарди денари што претставува 90,05 отсто исплатени обврски од Фондот за обесштетување кон штедачите. Останатите 9,95 отсто претставуваат обврска за обесштетување во вкупен износ од 151,4 милиони денари или околу 2,5 милиони евра кон 101.909 штедачи кои од лични причини не го оствариле своето право на обесштетување од Фондот.

„Анализата на структурата на овие штедачи укажува дека над 50 отсто од нив имаат поединечни депозити – предмет на обесштетување помеѓу 100 денари и 1.000 денари кои можеби поради неатрактивноста на износот и покрај бројните јавни повици за можноста да го остварат своето право на обесштетување сепак истото не го остваруваат“, велат од Фондот.

Според законската регулатива, Фондот за осигурување на депозити во случај на настанување на ризичен настан врши обесштетување до 30.000 евра во денарска противвредност по депонент, во банка, филијала на странска банка или штедилница.


Иселениците ќе се самопопишуваат од 15 до 31 март 2020 година со посебна апликација


Скопје, 13 декември, 2018 - 11:53 (META) 

Пописот во Македонија ќе се спроведе во периодот од 1 до 21 април 2020 година, а за лицата со македонско државјанство кои се на привремена работа или престој во странство ќе се овозможи самопопишување во периодот од 15 март до 31 март 2020 година на посебна апликација достапна на веб-страницата на Државниот завод за статистика, превидува предлог-законот за попис на населението, домаќинствата и становите во Македонија, 2020 година објавен на Единствениот национален електронски регистар на прописи (ЕНЕР).

Во законот се воведуваат многу новини по кои пописот во 2020 година ќе се разликува од сите досегашни пописи.

Прв пат ќе има таканаречен комбиниран попис во кој ќе се користат податоци од административни збирки на податоци на повеќе институции и ќе се врши истовремено попишување на терен како поддршка на попишувачите.  Исто така, прв пат во земјава пописот ќе се спроведе со употреба на пренослив компјутер, на посебна апликација, при што задолжително се применуваат технички и организациски мерки согласно прописите за заштита на личните податоци.

Ќе се попишуваат државјани на Македонија кои имаат живеалиште или престојувалиште во земјава, без оглед на тоа дали во моментот на пописот се наоѓаат во Македонија или во странство, странски државјани кои се присутни во Македонија со одобрение за престој и лица без државјанство кои во моментот на спроведување на пописот се затекнати во државата.

Во предлог-законот се предвидува за лицата што ќе бидат опфатени со пописот да се обезбедат податоци за географски карактеристики, демографски карактеристики, економски карактеристики, образовни карактеристики, миграциски карактеристики, културолошки карактеристики и инвалидитет/функционална попреченост.  Новина во законското решение е што нема прашање за етничка и за верска припадност.

„Податокот за етничка припадност нема никаква употребна вредност, туку само се злоупотребува за политички цели и поради тоа стојам на ставот дека тој не треба да биде дел од пописот“, рече директорот на ДЗС, Апостол Симовски на неодамнешниот брифинг со новинарите.

Во предлог-законот пишува дека апликацијата со која ќе се врши попишувањето ќе биде изготвена на седум јазици: македонски, албански, турски, ромски, влашки,  српски и бошњачки. Вкупно потребните средства за организирање, подготовка и спроведување на пописот ќе изнесуваат 522.751.000 денари.


МВР информира за изменет сообраќаен режим поради денешните протести


Скопје, 12 декември, 2018 - 11:05 (META) 

Министерството за внатрешни работи информира дека денеска од 17 часот е закажан протест во Скопје организиран од страна на политичка партија со релација на движење од плоштадот ВМРО, десно по улицата Даме Груев право по улицата Васил Главинов, право по булеварот ВМРО, лево по булеварот Илинден до пред зградата на Влада.

„Од тие причини ќе бидат превземени мерки за посебен режим на сообраќајот по сообраќајниците на централното подрачје на Град Скопје во периодот непосредно пред и за време на одржување на протестот. МВР апелира  до граѓаните  да ги почитуваат наредбите што ги издаваат полициските службеници“, се вели во соопштението.