Владата организира пет јавни расправи за уставните измени


Скопје, 5 декември, 2018 - 10:24 (META) 

Владата соопшти дека почнувајќи од денеска, ќе организира серија јавни дискусии со експертската јавност и со граѓаните за нацрт-амандманите за измени на Уставот.

Првата јавна расправа ќе се одржи денеска со почеток во 16:30 часот, во Свечената сала во седиштето на Владата. Говорници ќе бидат премиерот Зоран Заев и проф. д-р Владо Поповски и проф. д-р Љубомир Фрчкоски.

Втората јавна расправа ќе се одржи утре со почеток во 12 часот, на универзитетот ФОН во Скопје. Говорници ќе бидат премиерот, ректорот на универзитетот ФОН, проф. д-р Нано Ружин и проф. д-р Темелко Ристевски.

Третата јавна дискусија ќе се одржи на задутре со почеток во 10 часот, во Македонската академија на науките и уметностите. Говорници ќе бидат вицепремиерот Бујар Османи, министерот за надворешни работи Никола Димитров, академик д-р Владо Камбовски и д-р Светомир Шкариќ.

Четвртата и петтата јавна расправа ќе се одржат во Штип и во Тетово на 10 декември, понеделник, со почеток во 10 часот.

На јавната дискусија во Општина Штип говорници ќе бидат премиерот Заев, судијката Маргарита Цаца Николовска и проф. д-р Ѓорѓи Спасов. Дискусијата ќе ја отвори градоначалникот на Општина Штип, Благој Бочварски.

На јавната дискусија во Универзитетот на Југоисточна Европа (УЈИЕ) во Тетово, говорници ќе бидат вицепремиерката и министерка за одбрана, Радмила Шекеринска, вицепремиерот Османи, проф. д-р Беса Арифи и проф. д-р Блерим Река. Дискусијата ќе ја отвори ректорот на УЈИЕ, проф. д-р Абдулменаф Беџети.


Власта и опозицијата се препукуваат, граѓаните дишат отров


Скопје, 3 декември, 2018 - 10:28 (META) 

Синоќа речиси сите мерни станици на Министерството за животна средина покажаа неколку пати поголемо количество на канцерогените ПМ10 и ПМ2,5 честички.

Опозициската ВМРО-ДПМНЕ ја обвини власта дека е виновна што граѓаните се гушат од енормното загадување на воздухот, а од СДСМ велат дека Владата заедно со сите надлежни институции активно работи на надминување на долгогодишниот проблем со аерозагадувањето.

„Концентрацијата на опасните канцерогени ПМ10 честички е повеќе од пет пати над дозволеното, а Шилегов и Макрадули наместо итно да преземат мерки, ги омаловажуваат и замолкнуваат невладините активисти и граѓаните. СДСМ додека беа опозиција ветуваа итни мерки за почист воздух и манипулираа дека кога ќе дојдат на власт веднаш ќе го решат проблемот со загадувањето. Откако се сместија во удобните фотелји заборавија на своите ветувања и речиси две години немаат реализирано ниту еден проект за подобрување на воздухот“, велат од опозициската ВМРО-ДПМНЕ.

ВМРО-ДПМНЕ предлага да се обезбедат средства во буџетот и да се постават најмалку три дополнителни статични и четири мобилни мерни станици. Статичните да бидат поставени во близина на РЕК Битола, РЕК Осломеј во Кичево, како и Дрисла, а мобилните во Радовиш, Прилеп, Гостивар, како и во Петровец.

Од СДСМ велат дека во 2018 година постои намалување на бројот на деновите со надмината дозволена загаденост од 50 микрограми, споредено со 2016 и 2017 година.

„Според просекот од сите мерни станици во Македонија, во периодот од први јануари до 30 ноември 2018 година, регистрирани се 88 загадени денови, што е благо намалување во однос на 2016 и 2017 кога бројот на загадени денови бил 99. Претстои уште работа и затоа, Владата предводена од СДСМ, надлежното министерство, општините и сите останати засегнати институции постојано преземаат мерки за справување со загадениот воздух, со крајна цел, загадувањето за две години да биде намалено за 50 отсто во Скопје и од 30 до 50 отсто во цела Македонија“, велат од владејачката партија.


Казните за граѓаните и фирмите ќе се намалат до 75 отсто


Скопје, 3 декември, 2018 - 10:07 (META) 

Во владина постапка влегува Законот за прекршоци во кој се предвидуваат измени за намалување на висината на казните за правните и физички лица, со што, како што велат од Владата се воведува разумна казнена политика.

„Предвидуваме намалување на глобите за физичките лица за 75 отсто. Со новото решение, минималната глоба за физичко лице е 15 евра, а максималната глоба ќе биде 250 евра, наместо досегашните 1.000 евра. За правните лица, при одмерување на глобата ќе се води сметка за приходот остварен во претходната година, број на вработени и претходно санкционирање за исти или слични прекршоци. Во законот прват се прави градација помеѓу малите, средни и големи претпријатија“, рече премиерот Зоран Заев кој измените ги презентираше со министерката за правда Рената Дескоска.

Дескоска рече дека казнената политика нема да биде политика за полнење на буџетот, туку ќе биде насочена кон опомена на оние кои што згрешиле.

Таа посочи дека околу 200 закони во кои е уредена висината на казната, ќе треба да се усогласат со Законот за прекршоци и нема да смеат да ги надминат утврдениот минимум и максимум.

„Доколку казната за нерегистрирано возило изнесувала 500 евра, со новиот закон ќе изнесува 250 евра, казната за технички неисправно возило сега изнесува 400 евра, со новиот закон истата не смее да надминува 250 евра, за предизвикување бучава казната сега изнесува 450 евра, со новиот закон сега казната нема да смее да надмине 250 евра“, рече Дескоска.

Извршната директорка на Стопанска Комора на Македонија, Билјана Пеева Ѓуриќ рече дека Законот за прекршоци е од особен интерес за претставниците на бизнис заедницата кој треба да биде коректив и поттик за деловните субјекти да можат да го корегираат своето работење и да ги исполнуваат сите предвидени законски обврски. Таа дополни дека бизнис-заедницата имала важна улога во процесот на креирање на законското решение.


Граѓаните во Тетово бараат повеќе контејнери за отпадоци


Тетово, 26 ноември, 2018 - 10:05 (META) 

Имајќи предвид дека отпадоците во контејнери не се селектираат и распоредот на нивното собирање не е задоволителен, граѓаните од Тетово бараат од властите да распоредат повеќе контејнери за отпадоци, за да се спречи нивната пренатрупаност и со тоа одржувањето на чистотата во градот ќе биде поефикасна, пренесува Порталб.мк“.

Во повеќето случаи, контејнерите се полни, а граѓаните се жалат дека немаат место каде да ги фрлаат отпадоцитеБехар Асани, жител од Тетово, посочува дека треба да има повеќе контејнери, и тоа пропорционално според бројот на жителите.

„Мислам дека бројот на поставени контејнери е недоволен врз основа на бројот на жители. Во повеќето случаи, тие се поставени на погрешни места, и верувам дека им пречат на возилата“, вели Асани.

Директорот на Јавното комунално претпријатие во Тетово, Џелал Чека нагласува дека е свесен за ситуацијата и за таа цел се нарачани нови контејнери.

„Чистењето на контејнерите за отпадоци се врши еднаш во 24 часа и тоа после 23 часот, додека во текот на денот, после 14 часот, чистиме на локации каде што има потреба. Точно е дека постои потреба за повеќе контејнери за отпадоци и затоа нарачавме нови контејнери, но во повеќето случаи не можеме да ги поставиме поради тоа што на некои локации има недостаток на простор. Имаме барања за контејнери во некои населби, и ќе ги поставиме штом ги добиеме новите контејнери“, вели Чека за „Порталб.мк“.

Иако контејнерите, како што истакна директорот, се чистат еднаш на ден, според поплаките на граѓаните, тоа не е доволно, бидејќи во нив се фрлаат различни габаритни материјали кои веднаш ги полнат контејнерите

Контејнерите за отпадоци во Тетово, имаат уште еден недостаток, односно околу 80 проценти од нив немаат капаци, па се шири лоша миризба. Недостатокот на чистење и одржување доведува до нивно преполнување. Тоа што ја влошува ситуацијата е и тоа што отпадоците што се фрлаат во нив не се селектирани. Ова прашање, ЈКП Тетово вети дека ќе почне да го решава следната година. Претпријатието планира да замени половина од контејнерите со нови, што ќе имаат капаци.


Дураки за загадувањето: Јас не се занимавам со граѓаните, Македонија не е Швајцарија


Скопје, 22 ноември, 2018 - 12:15 (META) 

Министерот за животна средина и просторно планирање Садула Дураки вели дека „не се бави со граѓаните“, на прашање на телевизија „Сител“, за тужбата што граѓаните ја подготвуваат против државата заради здравствените последици кои ги трпат поради загадувањето.

„Сега, јас не се бавам со граѓаните. Граѓаните може да се тужат, и тоа“, накратко одговори Дураки на прашањето, кој е неговиот став.

На констатацијата дека имаме големо аерозагадување, а мерачите не работат, министерот вели дека „Македонија не е Швајцарија.“

„Почнавме, еден чекор е напред, и тоа“, дополни Дураки.

На прашањето што конкретно се презема, само накратко рече дека, постои работна група која ќе ги каже чекорите и прв пат во Македонија има програма за аерозагадување.

Сепак, тој како министер не се наоѓа на чело на таа работна група на Владата иако, според ресорот кој го води тоа би било најлогично, туку на негово место е неговиот заменик, Јани Макрадули.

На прашањето на „Мета“ упатено до портпаролот на Владата, Миле Бошњаковски, зошто програмата на Владата за справување со аерозагадувањето ја промовираше заменик-министерот Макрадули, кој и претходно беше единствениот висок владин функционер кој зборуваше на оваа тема на сите јавни настапи и одговараше на новинарски прашања, и дали Македонија воопшто има министер за животна средина, кој по својата функција треба да превземе политичка одговорност за една така важна тема од сопствениот министерски ресор како прекумерното загадување на воздухот, добивме одговор: „Заменик министерот е назначен за координатор на телото за спроведување на стратегијата“.

Дураки вчера учествуваше на Третата министерска конференција за животна средина и климатска акција во Западен Балкан, организирана од Советот за регионална соработка (РСС) и Министерството за животна средина и просторно планирање.


 За приход од 100.000 денари ќе се плаќа данок од 10.800 денари


Скопје, 6 ноември, 2018 - 12:03 (META) 

Не стивнуваат реакциите од бизнис-секторот, но и од граѓаните кои имаат поголеми месечни приходи по најавата на Владата дека од 1 јануари 2019 стапува на сила нов закон за данок на личен доход со кој се укинува рамниот данок и се воведува прогресивно оданочување. Даночните промени предизвикаа и повеќе дилеми околу износот и начинот на плаќање на даноците за личен доход.

Според новата регулатива, доколку даночната основа на поединечна исплата по некој од основите кој се даночи со прогресивни стапки го надминува прагот од 90.000 денари, за делот над 90.000 ќе се плати данок по повисоката стапка од 18 отсто уште во моментот на исплатата. На пример, доколку се исплаќа надоместок по основ на договор за дело од 100.000 денари, исплатувачот ќе треба да плати вкупен данок од 10.800 денари (10 отсто односно 9.000 денари за делот што е до 90.000 денари и 18 отсто односно 1.800 денари за делот што го надминува прагот од 90.000 денари).

На крајот на годината, со годишната даночна пријава ќе се врши пребивање помеѓу вкупниот доход што го остварило едно лице и вкупниот данок што бил платен, и доколку постои разлика помеѓу платениот данок и данокот што треба да се плати за остварениот доход, на лицето ќе му се врати повеќе платениот данок, или пак лицето ќе треба да доплати.

На пример, доколку на лицето од горниот пример тие 100.000 денари му се единствениот доход во годината, на него ќе му бидат вратени 800 денари, затоа што 100.000 денари на годишно ниво е под годишниот праг од 1.080.000 денари за повисоката стапка од 18 отсто.

„За да можат граѓаните навремено и прецизно да следат колку доход имаат остварено во текот на годината, колку данок имаат платено, колку данок треба да доплатат или да им се врати, а со тоа и соодветно да си планираат, ќе се изработи онлајн сервис преку кој граѓаните во кое било време ќе можат да ги добијат сите овие информации, и преку кој ќе можат предвреме да доплатат даночен долг“, информираа од Министерството за финансии.

Најавата на Владата ги фати неподготвени работодавачите и работниците со оглед на тоа што промената се најавува само два месеци пред да стапи на сила и на крајот на годината кога компаниите веќе ги имаат подготвено финансиските планови за 2019 година. Речиси сите стопански комори реагираа, а некои од нив побараа одложување на примената на прогресивниот данок за пет години. Реагираа и вработените во компаниите од софтвреската индустрија со образложение дека тие не се најбогатиот слој граѓани за кои власта тврди дека е наменета новата даночна реформа.

Од друга страна, од Министерството за финансии тврдат дека директно зголемување на даноците ќе има само за 38.000 лица, а кај 453.000 лица ќе има намалување на ефектвната даночна стапка.

„За најголем дел од популацијата новата ефективна даночна стапка е пониска од моменталната, додека позначајно зголемување има единствено кај најдоходовните 1 отсто. За најдоходовните 1 отсто од населението, зголемувањето на ефективната даночна стапка изнесува 4 процентни поени, додека за групата под тоа, зголемувањето е 0,6 процентни поени“, соопшти Министерството за финансии.


Свилановиќ: Ромките се најранлива група во регионот


Белград, 31 октомври, 2018 - 14:01 (META) 

Најранилва група во регионот на Западен Балкан се Ромките, беше истакнато на регионалната конференција што започна денеска во Белград, Србија, во организација на Регионалниот совет за соработка (РСС), а под покровителство на Владата на Србија и CARE Интеренешнл Балканс.

„Девет од десет млади Ромки на возраст од 18 до 24 години во целиот регион не се школуваат, не проаѓаат никакви обуки, ниту се вработени“, изјави Горан Свилановиќ, генералниот секретар на РСС, повикувајќи се на истражување за положбата на Ромите.

Тој додаде дека поради тоа постои голема потреба да се вложува во нивното образовние, вработување, економска самостојност и зацврстување.

„Интеграцијата на Ромите не само што е еден од важните приоритети за регионот во врска со проширувањето кон ЕУ, туку тоа е и потреба на нашите општества“, изјави Свилановиќ.

Потпретседателката на Владата на Србија, Зорана Михајловиќ го потенцираше регионалниот пристап кон решавање на ова прашање за полесно надминување на положбата во која се наоѓа ромската заедница и посебно Ромките.

На Конференцијата под име „Економската (не)зависност на Ромските жени, предизвици и рани причинители“ учествуваат преку 130 владини службеници, претставници на цивилното општество и на меѓународни организации од регионот.

Еден од говорниците е и Аксел Ахмедовски, министер во Владата задолжен за спроведување на Стратегијата за подобрување на позицијата на Ромите во државата.


Истражување: Повеќе од една петина од граѓаните на Србија сакаат да се иселат


Белград, 15 октомври, 2018 - 11:22 (META) 

Повеќе од една петина од граѓаните на Србија, или 22 отсто сакаат да се иселат од државата покажало истражувањето „Зошто луѓето заминуваат од Србија“, јавува дописничката на „Мета“ од Белград.

Бројките покажуваат дека секоја година од Србија се иселуваат помеѓу 40 и 70.000 лица, а ако кон тоа се додаде и негативниот природен прираст, Србија годишно губи по 100.000 жители.

Како што соопштила организацијата „Србија 21“, за иселување најмногу размислуваат младите помеѓу 18 и 29 години (34 отсто или околу 450.000 граѓани).

Од тие кои сакаат да си заминат, 45 проценти размислуваат за трајна преселба, а најголем мотив за тоа се стандардот (41 отсто), подобра платена работа (36 отсто), и лошата ситуација во државата (9 отсто) од испитаниците.

Најголем дел од граѓаните на Србија (85) отсто сакаат да се иселат во Европа, а само во два отсто во Русија.

Организацијата „Србија 21“ го спровела истражувањето во текот на јуни и јули годинава на примерок од 1.000 полнолетни граѓани.


Заев апелираше до пратениците за историска можност да го обезбедат патот кон ЕУ и НАТО


Скопје, 9 октомври, 2018 - 10:59 (META) 

Премиерот Зоран Заев апелираше до пратениците дека имаат историска должност пред граѓаните да го обезбедат патот на Македонија кон стабилност и економски просперитет.

– Сите пратеници имаат историска должност пред граѓаните да го обезбедат патот на Македонија кон стабилност и економски просперитет. Тоа е патот кон НАТО и ЕУ кој води преку македонско-грчкиот договор – напиша Заев на неговиот фејсбук-профил и на „Твитер“.

На вчерашната 92-седница, Владата ја донесе одлуката за уставните измени, односно во Собранието да ги достави измените за кои ќе бара поддршка. Тоа се случува во период кога уште не е дефинирано дека е подготвен теренот за менување на Уставот, оти за тоа е потребно двотретинско мнозинство во парламентот, односно 80 пратеници.

 

 


Протестите во Тирана против син на пратеник не биле проследени од националните медуми


Тирана, 3 октомври, 2018 - 11:40 (META) 

Неколку стотици луѓе протестираa во Тирана, бидејќи еден од синовите на пратениците извршил насилство врз неговата девојка, но кон него не било покренато обвинение, и покрај обидите на девојката тоа да го стори, јавува дописничката на „Мета“ од Тирана.

Сепак, медиумите на албански јазик во повеќето случаи или ја цензурирале веста или пак манипулирале со информациите, како и со бројката на демонстранти.

Протестите биле цензурирани од сите национални телевизии вклучително и националната телевизија „РТШ“. Протестот единствено бил прикажан од страна на „Факс њус“, нов медиум кој бил основан пред една година.

Националниот „Визион плус“ не го пренесувал протестот во живо, но во централните вести информирал дека „само десетина луѓе протестирале и дека повеќе луѓе протестираат кога политичките партии ги организираат.“

Протестите биле организирани од страна на невладините организации.