Наумовски: Превозниците незаинтересирани за субвенциите за плински уреди во возилата


Скопје, 16 јануари, 2019 - 14:42 (META) 

Во буџетите на Град Скопје за 2018 и за 2019 година се предвидени пари за субвенции за вградување на плински уреди со цел намалување на штетните издувни гасови, наменети за приватните автобуски превозници, но овие средства минатата година останаа неискористени, поради тоа што превозниците не пројавија интерес да ги искористат, изјави за „Мета“ Никола Наумовски од кабинетот на градоначалникот на Скопје.

Според Наумовски, ниту годинава, барем засега, автобуските превозници не се заинтересирани да ги користат субвенциите, иако на неколкуте средби со нив од Град Скопје им било укажувано дека со тоа не само што ќе придонесат за намалување на загадувањето низ скопските улици, туку и ќе ги намалат трошоците за гориво.

Што се однесува до автобусите на ЈСП, според Наумовски, Градот смета дека е најдобро да се инвестира во нови автобуси, како што се најавените 40 автобуси на гас, кои годинава треба да станат дел од возниот парк на градското сообраќајно претпријатие.


Собранието одобри заем за набавка на еколошки автобуси за Скопје


Скопје, 8 јануари, 2019 - 16:24 (META) 

Собранието денеска го усвои Законот за гаранција на Република Македонија за обврските по Договорот за заем за финансирање на набавката на 30 до 40 нови автобуси на еколошко гориво за Скопје, со што ЈСП треба да замени дел од сегашните дизел возила на ЈСП без клима и дополнителна опрема.

Според информациите од Градот, новите автобуси ќе бидат нископодни и ќе работат на компримиран природен гас, со голема економска исплатливост и еколошка предност во учеството на намалувањето на аерозагадувањето.

Новите еколошки автобуси за потребите на јавното сообраќајно претпријатие „Скопје“ ќе се набават со 12 милиони евра, од кои 10 милиони евра ќе бидат заем од Европската банка за обнова и развој (ЕБОР), а останатите од буџетот на јавното претпријатие. Парите од ЕБОР ќе бидат кредитно задолжување на ЈСП Скопје, а државата ќе биде гарант.

Огласот за јавна набавка ќе се распише откако ЕБОР ќе го одобри заемот.


РКЕ: Ќе се намали цената за пренос на природен гас и за дистрибуција на гас во ТИР-зоните


Скопје, 27 декември, 2018 - 15:50 (META) 

Цената за пренос на природен гас ќе се намали за приближно 12 отсто, покажуваат пресметките на Регулаторната комисија за енергетика (РКЕ), изјави денеска претседателот на РКЕ Марко Бислимовски, пред почетокот на подготвителната седница на која се разгледуваат предлог-одлуките за пренос на природен гас на АД ГАМА и три одлуки за дистрибуција на природен гас во Струмица, Куманово и ТИРЗ.

Тоа според Бислимовски ќе значи намалување на трошоците за индустријата, но и за топланите во Град Скопје што ќе има позитивно влијание за намалување на цената за топлинската енергија што ќе ја носи регулаторот во јуни следната година.

– Со намалувањето на цената за пренос на природен гас, РКЕ сака да испрати сигнал за сериозна гасификација на Македонија – рече Бислимовски.

Тој нагласи дека цената за дистрибуција на гас во Струмица и Куманово останува иста, а за ТИР-зоните во Скопје ќе се намали за три отсто.

-На овој начин ќе се намали трошокот за мрежарина за сите компании кои се приклучени на преносната мрежа, како и на дистрибутивната мрежа во ТИР-зоните, а со тоа и нивните трошоци во производниот процес. Ќе предложиме и нов пристап на тарифирање на потрошувачите кои се приклучени на преносната мрежа во сопственост на АД ГАМА, односно сакаме да воведеме различни категории на потрошувачи – појасни Бислимовски.

Toj се надева дека намалувањето на цената за пренос на природен гас и за дистрибуција на гас во ТИРЗ ќе даде силен поттик и до Градот Скопје, кој веќе формираше јавно претпријатие, за сериозна гасификација на градот во 2019 година.

-На пртпријатијата во Струмица и Куманово ќе им предложиме да направат нов начин на тарифирање до крајните потрошувачи со цел да ги намалат колку што е можно повеќе трошоците за природен гас кај домаќинствата, а за индустријата да останат на приближно исто ниво, за да има посериозна гасификација и во овие два града. РКЕ ќе им помогне во текот на јануари да изработат соодветни тарифни модели – потенцираше Бислимовски.

Според директорот на РКЕ, во Струмица и Куманово има стотина домаќинства кои користат природен гас, а со новите тарифни модели се надеваат дека ќе се поттикнат повеќе домаќинства да се приклучат на дистрибутивните мрежи во двата града.


Државата ќе развива системи за дистрибуција на природен гас


Скопје, 19 декември, 2018 - 11:00 (META) 

На предлог на Министерството за економија, Владата на 110. седница ја прифатила информацијата за развој на системи за дистрибуција на природен гас во Македонија.

„Со цел да се изготви модел за развој на системи за дистрибуција на природен гас, Владата го задолжи Министерството за економија да формира работна група составена од двајца претставници на Министерството за економија, по еден претставник од кабинетот на премиерот, кабинетот на вицепремиерот задолжен за економски прашања, по еден претставник од министерствата за финансии, за транспорт и врски, за локална самоуправа и еден претставник од МЕР АД Скопје. Рокот за номинирање членови и заменици на работната група е пет дена. Моделот за развој на системи за дистрибуција на природен гас во земјата, министерството за економија е задолжено до Владата да го достави во рок од 45 дена“, информираат од Владата.


Европските компании кои инвестирале во руски гасовод ќе се соочат со санкции од САД


Вашингтон, 12 јули, 2018 - 10:32 (META) 

Санкции за европските компании кои инвестирале во рускиот гасовод „Северен поток 2“ кон Германија, најави администрацијата на американскиот претседател Доналд Трамп.

– Бевме јасни дека постои ризик од воведување санкции за компаниите кои работат во секторот на рускиот енергетски извоз –  изјави претставник на американскиот Стејт департмент.

Тој додаде дека Вашингтон смета дека „гасоводот ќе ја поткопа целата енергетска безбедност и стабилност на Европа, давајќи и на Русија уште еден инструмент за вршење политички притисок врз европските земји, особено врз Украина“.

Доколку САД ги спроведе санкциите, засегнати ќе бидат компаниите „Унипер“ (Uniper), „Винтершел“ (Wintershall), „О-ем-ве“ (OMV), „Анжи“ (Engie) и „Шел“ (Shell).


Обновливите извори на енергија го победија јагленот во Германија


Берлин, 11 јули, 2018 - 13:56 (META) 

Во првото полугодие на годинава, Германија добила повеќе струја од обновливите извори на енергија, отколку од јагленот, соопшти германската Асоцијација за енергија и вода.

Со тоа Германија и официјално влегува во иднината. Иако досега производената струја од хидроелектрани, соларни електрани и ветроелектрани и од биогас го надминуваше производството од јаглен и лигнит, тоа се случуваше само во одредени денови или седмици, но ова е првпат обновливите извори да доминираат во толку долг период.

Од јануари до јуни, обновливите извори учествувале со 36,3 отсто од вкупното производство, а јагленот само 35,1 отсто. Остатокот отпаѓа на струјата произведена од природен гас и од нуклеарните електрани.

Пресметките велат дека „зелената“ струја изнесувала 118 милијарди киловат часови, а тоа е дури 10 отсто повеќе отколку во истиот период во 2017 година. Струјата произведена со согорување лигнит и јаглен изнесувала 114 милијарди киловатчасови, значително помалку од 127 милијарди киловатчасови во првата половина на 2017 година.

Опаднало и производството на струја од природен гас – од 44 милијарди киловатчасови во првата половина на 2017 година, на 40 милијарди киловатчасови во првото шестмесечје на годинава.  Нуклеарната енергија во првата половина на годинава придонела со 37 милијарди киловатчасови.


Приходите на руските компании во Македонија пораснале за четири пати од 2006 до 2015 година


Скопје, 31 јануари, 2018 - 19:48 (META) 

Приходите на руските компании кои работат во Македонија се зголемиле од 63 милиони евра во 2006 година до преку 212 милиони евра во 2015 година, се тврди во анализата на бугарскиот „Центар за проучување на демократија“ (Centar for the stady of democracy).

Во анализата се наведува дека иако руското економско влијание во Македонија често се перципира како непосточеко, или, во најлош случај, многу ограничено, сепак, деталната проценка открива многу посуптилна слика, во која многу од каналите на ангажирање се индиректни, вклучувајќи трети земји и офшор компании.

„Најголем дел од руските инвестиции во Македонија се канализираат преку трети земји и офшор раеви како Кипар и Белизе, прикривајќи го вистинскиот распон на нивното економско влијание. Русија, исто така, воспостави енергетската зависност на Македонија со контрола на единствениот гасовод до земјава – преку Трансбалканскиот гасовод. „Гаспром“ на Македонија и наплаќа една од највисоките цени на гас во Европа и ја држи земјата заглавена во скапо проширување на мрежата на природен гас“, стои во извештајот.

Како клучна во зајакнувањето на врските меѓу Русија и Македонија се наведува владата на поранешниот премиер Никола Груевски.

„Руските странски директни инвестиции во Македонија се зголемија од 2014 година следејќи го воспоставувањето на поблиски врски со владата на поранешниот премир Никола Груевски“, се наведува во анализата.

Сепак, проценката на руските директни инвестиции изнесува само 31 милион евра во 2015 година, но, како што тврдат авторите на анализата, вистинската слика за руското економско влијание ја прават руските индиректни инвестиици кои ги надминуваат директните.

Според извештајот, „најранлив“ во случајот е енергетскиот сектор, пред се трговијата со нафта и гас, каде Русите веќе се имаат позиционирано, а изминатите неколку години имаа обиди, преку директни и индиректни инвестиции, да го зацврстат, па дури и да го монополизираат овој сектор.

Таков беше случајот со обидот за преземање на „Макпетрол“ од страна на „Балкан петролеум холдинг лимитед“, британско-кипарска компанија, чие сопствеништво, според некои извештаи, се врзува со руски бизнисмени со сметки на Британските девствени острови.

Во извештајот, е наведен и обидот на „Роснефт“, руската нафтена компанија чиј мнозински сопственик е руската влада, за преземање на грчкиот нафтен гигант „Хеленик петролеум“, инаку газда на „Окта“, во 2016 година.

Од оваа слика, според анализата, не треба да се изземе ниту нафтоводот „Турски тек“, кој Москва и понатаму го има на својата агенда.

Заклучокот во анализата е дека и покрај тоа што економското влијание на Русија во Македонија е многу помало од она во другите земји од Западен Балкан, постои значаен потенцијал за негово зголемување, ако се земат предвид руските планови во енергетскиот сектор за следната декада.

Авторите, исто така, нотираат и дека во последните две години, Русија вешто ја користи политичката нестабилност во Македонија обидувајќи се да ги поткопа врските на земјава со НАТО.


Минимално зголемување на индустриското производство лани во однос на 2016 година


Скопје, 31 јануари, 2018 - 10:05 (META) 

Индустриското производство лани, во однос на 2016 година е зголемено за 0,2 проценти објави Државниот завод за статистика.

Гледано по сектори, индустриското производство во секторот рударство и вадење на камен во декември лани во однос на истиот месец во 2016 година, бележи пораст од 1,8 проценти, во секторот преработувачка индустрија бележи опаѓање од 1,5 проценти, а во секторот снабдување со електрична енергија, гас, пареа и климатизација опаѓање од 11,2 проценти.

Намалувањето во секторот преработувачка индустрија е резултат, пред се, на намаленото производство на прехранбени производи, на пијалаци, на тутунски производи, на облека, на други неметални минерални производи и производство на метали.


Евакуација во Лондон поради опасност од истекување на гас


Лондон, 23 јануари, 2018 - 11:38 (META) 

Лондонската железничка станица Черинг крос и околните хотели и ноќни клубови ноќеска се евакуирани поради истекување гас.

Од клубот „Хевен“ и хотелот во близина се евакуирани околу 1.450 луѓе.

Службите за брза помош биле предупредени околу два часот по полноќ дека на улицата Крејвен, во близина на железничката станица Черинг крос, е забележана голема концентрација на природен гас. На местото веднаш пристигнале две противпожарни возила, 20 спасувачки возила и 20 пожарникари.

Полицијата ја затворила улицата „Странд“, главната сообраќајна артерија на британската престолнина, која води до плоштадот Трафалгар и апелираше граѓаните да го избегнуваат тој дел од градот.

Поставен е кордон од 150 метри, додека инженери се обидуваат да го најдат местото од каде што протекува гасот.


Кина годинава ќе биде поголем увозник на гас од Јапонија, поради борбата со загадувањето


Пекинг, 4 јануари, 2018 - 14:20 (META) 

Поради борбата со загадениот воздух, Кина оваа година може да ја надмине Јапонија во увоз на природен гас.

Кина, која е најголем увозник на нафта и јаглен, е трет најголем потрошувач на природен гас, по САД и Русија и 40 проценти од потребите за гас ги подмирува од увоз, бидејќи домашното производство не може да ја задоволи побарувачката.

Кинескиот увоз на гас минатата година надмина 67 милиони тони, што е за една четвртина повеќе од 2016 година. Кина и понатаму каска зад Јапонија, која годишно увезува околу 83,5 милиони тони гас, но кинескиот увоз на овој енерегенс во септември и ноември го надминува јапонскиот.

Според аналитичарите, Кина оваа година ќе стане поголем увозник на гас од Јапонија.

Кина минатата година покрена иницијатива со која се настојува, домаќинствата и бројните индустриски погони да ги насочи, наместо јаглен да користат гас, за да го намали загадувањето на воздухот, што предизвика голема побарувачка и увоз на гас.