!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Иванов ќе има годишно обраќање во Собранието во 12 часот


Скопје, 26 декември, 2017 - 11:28 (META) 

Претседателот, Ѓорге Иванов, денеска во 12 часот, ќе има годишно обраќање во Собранието на Република Македонија.

Пратениците од опозицијата уште решаваат дали ќе го следат годишното обраќање на Иванов.

Тие наредните денови ќе ја донесат и главната одлука – дали повторно ќе се вклучат во работата на парламентот.

Лани, бидејќи Собранието сè уште не беше конституирано, Иванов обраќањето го направи во неговата резиденција.

Во 2015 година, пак, Иванов обраќање го одржа пред полупразен парламент, односно во отсуство на пратениците на СДСМ и на ДУИ.

Тогаш тој повика на обединување и на ставање крај на политичката криза и оцени дека 2016 година ќе биде тест за Македонија.

 


Нема хунта – има легална власт!


Скопје, 22 декември, 2017 - 10:58 (META) 

Тврдењата на ВМРО-ДПМНЕ во насока дека власта е хунта и дека лицата поврзани со настаните од 27.04.2017, кои се притвор, таму се ставени неосновано, не се нови, но, бидејќи се повторуваат во континуитет, оправдано е да се оцени нивната вистинитост, пишува „Вистиномер“.

Зборот „хунта“ е специфичен збор со шпанско потекло, Junta, кој, пак, потекнува од латинскиот израз junctus… Ова, според онлајн речникот Мерием-Вебстер означува „совет или комитет за политички или владини цели“; „група на луѓе кои ја контролираат владата посебно после револуционерно преземање на власта“.

Ако тргнеме по постоечките дефиниции, ВМРО-ДПМНЕ со овој израз кажува дека сегашната власт во Македонија е дојдена со државен удар и со помош на некакви милитантни групи (во војска, полиција или парамилитантни) и владее со Македонија делумно од 28 април, а целосно од 31 мај кога е изгласана владата на Зоран Заев.

Раководните поединци на ВМРО-ДПМНЕ во заминување, иако можат да користат во јавниот политички речник секакви зборови и да тврдат што сакаат – по проверката на „Вистиномер“ на потеклото и значењето на зборот „хунта“ и на тврдењето дека притворените лица за настанот од 27 април се во притвор само затоа што си ја сакаат државата и не се согласуваат со политиките на власта и Зоран Заев – можеме да оцениме дека станува збор за невистинити тврдења, односно дека станува збор за невистина.

(Целиот текст од „Вистиномер“ можете да го прочитате и да го преземете ТУКА)


Пратеничка група на ВМРО-ДПМНЕ: СДСМ не сака опозиција и не е заинтересирана за реформи


Скопје, 11 декември, 2017 - 14:29 (META) 

Социјалдемократскиот сојуз, нивното парламентарно мнозинство и Владата на Република Македонија ја загрозуваат евро-атлантската перспектива на Република Македонија, соопшти денеска пратеничката група на ВМРО-ДПМНЕ.

„Со продолжените постапки на политички реваншизам, политички прогон и провокации кои не одат во насока на интересите на Република Македонија и нејзините граѓани, СДСМ јасно покажува дека не им е приоритет ниту европската агенда, ниту реформите во државата, ниту економијата, ниту стандардот на граѓаните. Единствено нешто што СДСМ го интересира е да си ги запоседнат фотелјите однесувајќи се раскалашено, а своето незнаење, неспособност и афери да го покриваат со политички прогон и реваншизам“, велат од ВМРО-ДПМНЕ.

Од пратеничката група на опозицијата велат дека со свои активности ќе стори сѐ што е во нејзина можност да и покаже на јавноста дека СДСМ не ја интересира ништо друго освен да биде власт без опозиција и без никаква контрола.

„СДСМ покажа дека не сака да има опозиција ниту во Собранието на Република Македонија, ниту во државата. Нивната неодговорност е видлива и е плод на опиеноста од власт. Тргнаа по погрешен пат кој ќе и нанесе лоши последици на целата држава и на сите нејзини граѓани“, се вели во соопштението на пратеничката група на ВМРО-ДПМНЕ.


Нацев: ВМРО-ДПМНЕ не потклекнала и во многу потешки времиња


Скопје, 7 декември, 2017 - 20:44 (META) 

По десетти пат се собравме за да им кажеме на сите дека притворените се наши браќа, а не терористи чиј единствен грев е што си ја сакаат државата, рече Дејан Митески од ВМРО-ДПМНЕ на вечерашниот протест на партијата пред Кривичниот суд, поради притворањето на 36 лица осомничени за насилствата во Собранието од 27 април, меѓу кои се и шестмина пратеници на опозициската партија.

Пред него, Александар Нацев рече дека сите 36 притворени се жртви на политички реваншизам и на прогонот „од страна на антидржавната хунта на СДСМ“.

– ВМРО-ДПМНЕ не потклекнала и пред многу други предизвици и во многу потешки времиња, ВМРО надживеала империи, војни, надживеала вештачки творби од држави, а ќе го преживее и ова денес – рече Нацев.

Светлана Колариќ од ВМРО-ДПМНЕ истакна дека СДСМ ја замолкнал правдата во Македонија и дека „терористи и тешки криминалци, убијци и разбојници се на слобода, а на нивните места се ставаат луѓе кои се невини“.

Таа изјави дека можеби СДСМ знаел, го очекувал или го подготвувал сценариото за 27 април.

Меѓу присутните на вечерашниот протест беше и лидерот на ВМРО-ДПМНЕ, Никола Груевски.


ЕП ќе помага во дијалогот меѓу власта и опозицијата во Собранието


Скопје, 9 ноември, 2017 - 18:15 (META) 

Претседателот на Собранието, Талат Џафери и европратеникот и известувач за Македонија во Европскиот парламент, Иво Вајгл, кој е во дводневна посета на земјава, на денешната средба разговарале за можноста за отпочнување на дијалог меѓу различните пратенички групи во Собранието, под покривителство во Европскиот парламент.

Ваквиот дијалог, како што се наведува во соопштението од средбата, има за цел да придонесе кон создавањето на позитивна атмосфера во Собранието и подобрена комуникација меѓу опозицијата и власта по одредени прашања.

На средбата, Џафери го информирал Вајгл за актуелните случувања на политички план и за планираните активности на Собранието до крајот на оваа календарска година.

Вајгл истакнал дека Европскиот парламент ја поддржува Македонија на патот кон Европската Унија и работи на тоа земјите од Западен Балкан да имаат еднаков третман во регионален контекст.

Собранието и понатаму останува посветено на реформите кои се неопходни за приближување до Европската Унија и добивање на позитивна препорака од страна на Европската комисија во првата половина од следната година, нагласил претседателот на законодавниот дом на средбата.


Касами: Убедени сме дека во Тетово доаѓа нова власт што ќе работи во служба на граѓаните


Тетово, 29 октомври, 2017 - 19:09 (META) 

Ние сме убедени дека во Тетово ќе се случат промени и оти доаѓа нова власт што ќе работи во служба на сите тетовци, изјави кандидатот за градоначалник на Тетово и лидер на Движењето Беса, Билал Касами, по гласањето на избирачко место во гимназијата „Кирил Пејчиновиќ“.

Тој додаде дека во вториот круг гласачите имаа можност да изберат локална власт што ќе работи во нивни интерес.

– Се надеваме дека веќе од вечерва, односно од утре, во локалната власт ќе дојдат нови луѓе кои пред да мислат за себе, повеќе ќе мислат за граѓаните и кои ќе реализираат проекти што се во служба на сите граѓани – изјави Касами.


Ѓорчев: Со упадите во општините се случува масовна политичка и партиска репресија


Скопје, 6 октомври, 2017 - 16:43 (META) 

Факт е дека во Македонија во моментов, секојдневно се случува политичка репресија, се случуваат упади во општините и се случуваат масовни притисоци и врз кандидатите на ВМРО-ДПМНЕ и врз гласачите и врз цели групи на граѓани, изјави членот на ИК на ВМРО-ДПМНЕ, Владимир Ѓорчев.

Тој додаде дека и денеска имало директен атак и директен упад врз општините Вевчани, Крива Паланка и Берово.

– Досега удрија врз општина Прилеп, општина Неготино, општина Штип, Кавадарци, Велес, Македонски Брод, Ново Село. Претепуваат актуелни и градоначалници што исто така се сега кандидирани. Вперуваат пиштол во луѓе што се исто така во моментот кандидирани. Првпат во независна Македонија имаме убиство на кандидат на избори. Вакви работи во Македонија никогаш немало. Никогаш немало недела дена пред избори упади во општини, репресија врз гласачи и репресија врз цели социјални групи. Никогаш немало ситуација каде што биле убивани кандидати или, пак, буквално на улица претепувани – изјави Ѓорчев.

Тој додаде дека во моментов се случува „масовно беззаконие“.

– Со упадите во општините се случува масовна политичка и партиска репресија која личи на 1948 година, но ова нема долго да трае – додаде Ѓорчев.


Хојт Ји: За интеграцијата во НАТО и во ЕУ е клучно да се утврди кој прислушувал


Скопје, 3 октомври, 2017 - 11:08 (META) 

Многу е важно да се утврди одговорноста за нелегалното прислушување и за наводните владини злоупотреби во врска со него, бидејќи тоа ќе биде клучен чекор за Македонија да ги увери НАТО и Европската Унија, како и другите меѓународни партнери, дека е подготвена да се интегрира во тие организации. Ова го истакна заменикот помошник државен секретар на САД, Хојт Брајан Ји, во интервју за емисијата „360 степени“ на „Алсат-М“.

– Тоа е важно и за граѓаните на земјата да се уверат дека е воспоставено владеење на правото. Ги повикуваме сите политички партии, политички и владини лидери, членовите на Собранието, да сторат сè што можат да биде спроведена правдата, СЈО да ја добие потребната поддршка за да си ја заврши работата и да нема политички притисок врз обвинителите и судиите од инволвираните во утврдување на одговорноста. Тоа треба да се направи во разумен рок и да не се одолжува – вели Хојт Ји.

Според него, клучно за државата е да се направат потребните реформи во судството, кои треба да овозможат независно судство, ослободено од политички притисок.

– Тоа е важно за граѓаните, за интеграцијата во НАТО и во ЕУ, но и за привлекување странски инвеститори – нагласува Ји.

Во врска со односите власт – опозиција, тој вели дека Македонија не може да си дозволи луксуз на постојани одложувања и опструкции од партиите. Според Хојт Ји, на секоја демократија ѝ е потребна силна влада, но и силна опозиција која нема само да блокира предлози со кои не се согласува, туку и ќе нуди алтернативи.

Тој во интервјуто се осврна и на влијанието на Русија во регионот на Западен Балкан. Според него, Македонија треба да се спротивстави на руското влијание и на дезинформациите што пристигнуваат од Москва.

– Гледаме дека Русија се обидува да ја обесхрабри интеграцијата на земјите од Западен Балкан во НАТО и во ЕУ. Важно е Македонија да работи со нас, со ЕУ и со партнерите во регионот, да продолжи да се противи на малигните влијанија од кој било извор, да продолжи да ја зајакнува независноста на медиумите, важно е да има силни, професионални, независни медиуми кои ќе се спротивстават на дезинформациите од Русија или други извори – изјави Хојт Ји.


Заев: Постојат реални можности да добиеме препорака, а потоа и датум за преговори со ЕУ


Скопје, 7 септември, 2017 - 20:42 (META) 

Премиерот Зоран Заев, во обраќањето пред зградата на Владата по повод прославата на 8 Септември – Денот на независноста, рече дека во Македонија има одговорни политичари кои знаат што им е потребно на граѓаните, но има и свесни граѓани кои знаат што ѝ е потребно на државата.

Тој додаде дека од земја „генератор на криза“, Македонија е претворена во „мотор на развој на регионот“.

– Постојат реални можности Македонија да добие чиста препорака, а потоа и датум за преговори со Европската Унија. Реални се надежите и дека Република Македонија може да биде 30. членка на НАТО – рече Заев.

Тој додаде дека клучен тест се локалните избори, а Владата е определена да организира и да спроведе фер, демократски и регуларни избори, со нула толеранција за евентуални злоупотреби.

Според премиерот, друг тест се и реформите, за да се овозможи независно судство, објективни медиуми, независни институции, како и развој на добрососедски односи и регионална соработка.

Освен пред зградата на Владата, прослава по повод 8 Септември имаше и во Собранието, каде што претседателот на законодавниот дом, Талат Џафери, во обраќањето пред премиерот и пратениците рече дека пред 26 години биле поставени стратешките цели на државата, како на внатрешен така и на надворешен план.

– На внатрешен план, Македонија беше дефинирана како граѓанска држава која се темели врз индивидуалните и колективните човекови права и слободи, врз принципите на парламентарната демократија и владеењето на правото, почитувањето на приватната сопственост и пазарните законитости. Притоа, општество беше дефинирано како мултиетничко, мултикултурно и мултиконфесионално. На надворешен план, како приоритетна стратешката цел беше поставена целосната интеграција во евроатлантските структури – рече Џафери.

По повод стоте дена од конституирањето на Собранието, тој додаде дека ова парламентарно мнозинство „има храброст, волја, знаење и капацитет да направи значајни чекори напред во остварувањето на тие стратешки цели“.

– Секако дека во овие процеси очекувам свој придонес да даде и опозицијата, со аргументирана критика, меѓутоа и со конструктивни предлози. А мнозинството е должно да создаде услови за опозицијата да може сето ова да го артикулира преку институциите на транспарентен начин пред јавноста – додаде Џафери.


Поезија, вицови и исмевање на новите кадровски решенија на Владата во Собранието


Скопје, 15 август, 2017 - 12:57 (META) 

Пратениците на ВМРО-ДПМНЕ на денешното продолжение од расправата за разрешување на државниот јавен обвинител, Марко Зврлевски, покрај пофалбите за работата на јавниот обвинител, рецитираа поезија и раскажуваа вицови на сметка на новите кадровски решенија на власта во државните институции.

Крсто Јовановски од ВМРО-ДПМНЕ од собраниската говорница изјави дека за попрофесионален јавен обвинител тој не знае, а неговиот партиски колега Зоран Илиоски рече дека политичката порака која сака да се испрати до целото правосудство е дека „мора да слуша што ќе им каже Зоран Заев во спротивно ќе бидат разрешени“.

– Со оваа дебата за разрешување на Марко Зврлевски се сака да се дефокусира јавноста од значајните теми и проблеми во Македонија. Деновиве имаме случаи кои укажуваат на тоа дека Македонија станува полициска држава. Пред неколку дена беа застрелани дечиња, а вчера во Струга се случи и убиство – рече Илиоски.

Пратеникот на опозициската партија, Иван Иванов од говорницата раскажа виц со кој на шеговит начин сакаше да потенцира дека власта ги распродава националните за своите лични интереси.

Неговиот колега Димитар Стевананџија ја рецитираше „Тешкото“ од Блаже Конески, која како што рече, им ја посветува на сите културни работници.

– Овие стихови им ги посветувам на сите културни работници да си ги искинат дипломите и да ги фрлат пред Министерството за култура затоа што од денеска директор на „Танец“ е човек со средно градежно образование. Денеска дискутираме за Зврлевски за да се прекрие средбата на Заев со Динко Велев – бугарскиот ловец на мигранти – рече Стевананџија.