Два тима победија на „Фин хакатонот“, ќе креираат веб-апликација и игри за буџетот


Скопје, 9 јули, 2018 - 9:36 (META) 

Два тима победија на „Фин хакатонот“ за креирање на веб-апликација, видео и мултимедијална игра за Граѓанскиот буџет, кој викендов се одвиваше во Министерството за финансии. Тие ќе го делат наградниот фонд од 1,5 милиони денари, а и двата тима ќе имаат можност да го развијат својот производ и да отворат сопствена фирма преку кој понатаму ќе го пласираат.

Тимот составен од Стефан Митевски, Ивана Ѓорѓиевска Стојановски и Георги Михаилов имаа најдобра видео и мултимедијална игра. Најдобра веб-апликација пак, понуди тимот составен од Елена Андреева, Теди Пејоски, Елена Јовчевска, Каја Стоилеска, Александар Трпески и Александар Бака Марковски.

Двата тима ќе работат на развој на финални производи со Министерството за финансии и Фондот за иновации и технолошки развој, кои наскоро ќе им станат достапни на граѓаните.

„Фин хакатонот“ е во организација на Министерството за финансии и Бирото за иновации и технолошки развој. Целта на предизвикот кој траеше 48 часа во Министерството за финансии е да се направат јавните финансии и буџетот подостапни за граѓаните преку идеи од самите граѓани.


Буџетот на државата ќе биде претставен преку веб-апликација, видео и игра


Скопје, 5 јули, 2018 - 13:04 (META) 

Министерството за финансии ќе го направи буџетот уште подостапен и транспарентен за граѓаните преку веб-апликација, видео и мултимедијална игра, информираат од таму. Во апликацијата, видеото и играта ќе се прикажат приходите и расходите на државата, како тие се собираат и трошат, на начин приемчив за граѓаните.

Натпреварувачите на „Фин хакатонот“, кој го организира Министерството во соработка со Фондот за иновации и технолошки развој, ќе треба да ја исполнат оваа задача во рок од 48 часа, од петок до недела. Фондот за награда ќе биде 1,5 милиони денари.

– Најдобрите идеи доаѓаат од народот. Во овој случај граѓаните ќе креираат апликација, видео и игра кои ќе ги доближат јавните финансии до граѓаните. Ќе го употребиме нивното видување за буџетот да стане поразбирлив и подостапен за сите – рече министерот за финансии Драган Тевдовски, кој посочи дека имало голем интерес за пријавување на „Фин хакатонот“.

На „Фин хакатонот“ учествуваат седум тима натпреварувачи во групи од три до шест лица – програмери, графички дизајнери, економисти и креатори на софтвер.

Тие за време на викендот ќе се преселат во Министерството за финансии и континуирано ќе работат на идејното решение. Во недела жирито ќе избере најдобри предлози. Во жирито покрај министерот за финансии ќе бидат и директорот на Фондот за иновации Јован Депостовски, како и претставници на академската заедница, на невладиниот сектор и експерти.

Хакатонот е натпревар, предизвик, во кој во ограничен временски период и простор програмери, графички дизајнери, хакери и креатори на софтвер, да работат на развој на софтверски или мултимедијален производ на зададена тема.

– Буџетот претставува најсеопфатен документ на проектите и политките кои ги спроведува Владата. Затоа овој „Фин хакатон“ е посветен токму на буџетот. Граѓанскиот буџет добива нова форма, многу попристапна и поразбирлива за јавноста – додаде Тевдовски.


Тодоровиќ ги врати првите 433.000 евра од „Скопје 2014“ во буџетот на Општина Центар


Скопје, 4 јули, 2018 - 13:37 (META) 

Управата за финансиска полиција до Основното јавно обвинителство Скопје, поднела кривична пријава против поранешниот градоначалник на Општина Центар, Владимир Тодоровиќ, и лицата М.Т., поранешен секретар и Д.Р., вработен во Секторот за уредување на градежни земјиште и заштита на животна средина во Општина Центар, поради постоење на основано сомнение дека сториле кривично дело несовесно работење во службата, соопшти директорот на Управата за финансиска полиција, Арафат Муареми.

Според обвинението, тие го оштетиле буџетот на Општина Центар во износ од 433.389 евра за градежни работи кои се однесуваат за изградба на пешачкиот мост „Око“ на Вардар, граден од страна на компанијата „Конструктор инженеринг АД Сплит“.

Поради неисполнување на обврски од договорот, прекршување на рокот за изведување на работите, како и поради неквалитетно извршување на веќе изведените работи, во 2012 година Општина Центар го раскинала договорот со „Конструктор инженеринг АД Сплит“, чија што вредност изнесувала 119.197.783 денари.

– Пријавените В.Т, М.Т. и Д.Р. со препуштање на должен надзор, несовесно постапиле во вршење на своите овластувања и должности и на име на ненаплатени три банкарски гаранции го оштетитле буџетот од 26.653.424 денари (433.389 евра) – истакна Муареми.

Тој додаде дека овие пари на 30 јуни биле вратени на сметката на Општина Центар, но се надева дека кривична одговорност ќе има. Муареми исто така рече дека во тек се и други истраги за „Скопје 2014“ и дека за некои предмети имаат соработка со СЈО.


Владата предложи нови членови на Регулаторна комисија за енергетика


Скопје, 20 јуни, 2018 - 9:56 (META) 

На 75. седница Владата го состави списокот на нови членови на Регулаторната комисија за енергетика (РКЕ). Владата на Собранието му предлага да ги избере Марко Бислимоски,  за претседател, а за членови Наташа Вељановска, Атанаско Тунески и Куштрим Рамадани, кој е актуелен член на Комисијата.

Владата на 75. седница ја усвоила предлог – завршната сметка на буџетот за 2017 година, со конечен извештај на овластен државен ревизор. Во завршната сметка е констатирано дека минатата година капиталните инвестиции изнесувале 19,8 милијарди денари, вкупните приходи биле 179,70 милиони денари, додека вкупните расходи 196,56 милион денари.

На седницата исто така било одлучено за доделување на државна помош на друштво за производство и трговија „Теламон Европа Македонија“. Станува збор за нова инвестиција во Македонија, која изнесува 4 милиони евра и ќе оствари 300 вработувања во првите пет години. Компанијата Теламон произведува машини за спојување, автоматски машини за сечење кабли, ленти, машини за пресекување и затворање. Инаку, компанијата е една од најголемите во САД.

Исто така е донесена одлука да се усвои договорот со „Аим проперту“ за закуп на земјиште во Технолошко индустриската развојна зона Скопје 2.

На предлог од Mинистерството за труд и социјална политика, министрите го прифатиле предлог – законот за спречување и заштита од дискриминација.

Како една од точките, Александар Дамески е именуван за директор на прилепскиот затвор.


Град Скопје ќе го намали буџетот за 440.000 евра


Скопје, 14 јуни, 2018 - 13:18 (META) 

Со ребалансот на буџетот на Град Скопје за 2018, кој ќе се најде на седницата на градскиот Совет на 20 јуни, се предвидува да се потрошат 27 милиони денари (440.000 евра) помалку од претходно испланираните. Исто така, со ребалансот ќе се наменат пари за проекти што не биле планирани да се изведат годинава, известија од Град Скопје.

Така, наместо четири милијарди и 254 милиони денари (69,17 милиони евра), колку што изнесува буџетот сега, со ребалансот тој ќе се намали на четири милијарди и 227 милиони денари (68,73 милиони евра).

„Овој ребаланс е подготвен во согласност со усвоениот прв квартален извештај за извршување на Буџетот на Град Скопје за 2018 година. Во првиот квартал остварувањето на приходите се одвива согласно со планираното, а плаќањата на расходите се одвиваат редовно и навремено“, велат од Град Скопје.

Вкупните приходи за овој период од годината се 1,1 милијарди денари (17,88 милиони евра) што е 17 отсто од вкупно испланираните приходи за цела 2018 година. Притоа, има раст од 2 отсто во приходите во однос на истиот период минатата година.

Најголемите промени кои ќе ги донесе ребалансот се зголемување на ставката за комунални работи, каде сега ќе се додадат уште 67,15 милиони денари (близу милион и 10.000 евра), додека во секторот за сообраќај е предвидено намалување за 104,85 милиони денари (малку повеќе од 1,7 милиони евра). Притоа, најголемиот дел од новите пари за комунални дејности за наменети за реконструкција и подигнување на јавно зеленило, како и за расчистување диви депонии.

Новите проекти за кои ќе се наменат пари со ребалансот се изградба на улица Ленинова, реконструкција на бул. Никола Карев, изградба на ул. Боца Иванова, како и за изградб, одржување и реконструкција на улиците Брадфордска, Македонско – Косовска бригада, Андон Димитров (Жарко Зрењанин), Живко Фирфов, како и изградба, реконструкција и одржување на мали плоштади.

Ребалансот вклучува и 15,5 милиони денари за основачки влог за новото акционерско друштво кое ќе го формира Град Скопје и ќе обезбеди нови приклучоци на парно греење, но и треба да го спроведува процесот за гасификација на Скопје.


Во првиот квартал, уделот на земјоделството во БДП пораснат за 5,1 отсто


Скопје, 8 јуни, 2018 - 9:54 (META) 

Во земјоделството е забележан пораст од 5,1 отсто во првиот квартал, во споредба со истиот период лани, покажуваат податоците на Државниот завод за статистика. Во овој период земјоделство, шумарство и водостопанство учествуваат со 6,6 отсто во домашниот бруто-производ, за разлика од истиот период во 2017 година, кога овој процент изнесувал 1,5.

„Високиот раст во областа на земјоделството се должи на повисока откупна цена на земјоделските производи, зголемен извоз на земјоделско-прехрнбени производи, создавање на поволни економски услови за извоз, контрола на увозот на стоки и други фактори. Големо влијание имаат и мерките што се преземаат во делот на субвенциите како што е навремена исплата, зголемените субвенции за земјоделците со развоен потенцијал, и мерки за поддршка на млади земјоделци“, велат од Министерство за земјоделство, шумарство и водостопанство.


Град Скопје има буџет за уште околу 300 барања за субвенции за велосипеди


Скопје, 4 јуни, 2018 - 11:24 (META) 

Град Скопје ги информира граѓаните дека од објавениот jавен повик на 21 април до денеска, се поднесени 2.860 барања за субвенции за купување велосипед.

„Според предвидените финансиски средства за оваа намена во буџетот на Град Скопје, преостануваат средства за уште околу 300 барања. Средствата што Градот Скопје ќе ги субвенционира се во износ од 50 отсто од вредноста на велосипедот, но не повеќе од 3.000 денари по лице, со вклучен персонален данок на доход, како и 50 отсто од вредноста на адаптираниот велосипед за лица со телесна инвалидност, но не повеќе од 90.000 денари по лице, со вклучен персонален данок на доход“ се додава во соопштението.

За субвенционирање на граѓаните за набавка на велосипеди во буџетот на Град Скопје за 2018 година, се предвидени 10 милиони денари, од кои 9 милиони денари се предвидени за субвенции за велосипеди, додека еден милион денари за адаптирани велосипеди за лица со телесна инвалидност.

Јавниот повик се реализира по принципот „прв дојден, прв услужен“.


Тевдовски: Наплатата на приходите е одлична, засега нема ребаланс на буџетот


Скопје, 11 мај, 2018 - 13:45 (META) 

Министерот за финансии, Драган Тевдовски рече дека во моментов има одлична наплата на приходите и кога министерството ќе реши да направи ребеланс, јавноста ќе биде запознаена.

– Немало година, да не се направи ребаланс, но најголем дел од нив се правени поради слаба наплата на приходите. Ние во моментов имаме одлична наплата на приходи, но секако дека размислуваме како подбро да ги распределиме средствата – одговори Тевдовски на новинарско прашање на денешното отворање на настанот „Денови на финансиска писменост“ во „Скопје сити мол“.

Прашан за ниското ниво на реализација на капитални инвестиции од само седум проценти во првите месеци од годината, тој рече дека министерството прави притисок за нивна реализација.

– Капиталните инвестиции, се соодвтени на проекциите. Имаме одлична ликвидност и главната битка е да имаме реализација на инвестициите – додаде Тевдовски

Во однос на избор на гувернер тој додаде дека монетарната политика е независна од фискалната и како и до сега, тоа прашање ќе го остави на Собранието.


Кривични пријави за Божиновски и Делев за исплаќање 19.500 евра за незавршена работа


Скопје, 25 април, 2018 - 14:27 (META) 

Секторот за внатрешни работи (СВР) Скопје соопшти дека до Основно јавно обвинителство за гонење на организиран криминал и корупција поднел кривична пријава против К.Б. (37) од Скопје и Х.Д. (44) од с. Пиперово, струмичко, за злоупотреба на службена положба и овластување и нанесена штета на државниот буџет во висина од 1,35 милиони денари (22.000 евра).

Според наведените податоци во соопштението за медиумите, јасно е дека станува збор за Кирил Божиновски, поранешниот генерален секретар на Владата, и за Христијан Делев, поранешен заменик министер за економија.

Како што велат од СВР Скопје, во 2016 година бил склучен авторски договор меѓу  Г.Д. и Владата, во тоа време застапувана од Божиновски, како тогашен генерален секретар на Владата. Според договорот,  Г.Д., на барање на Генералниот секретаријат на Владата се обврзал во периодот од 28 јануари до 28 февруари 2016 година да изработи и достави „Интелектуален труд – прибирање на информации и податоци, анализа, изготвување извештај и негово елаборирање за енергетски суровини од аспект на правната легислатива“. Вредноста на склучениот договор била проценета со бруто износ од 1.352.400 денари.

Делев, иако, како што вели СВР Скопје, знаел дека Г.Д. не ги испочитувал договорените услови и рокови и не го доставил авторското дело, на 5 април 2017 година потпишал лажна изјава за завршена работа. Божиновски, пак, потоа потпишал наредба од буџетската сметка на Република Македонија на сметката на Г.Д. да се исплатат вкупно 1,2 милиони денари без ДДВ (19.500 евра), со што на буџетот му нанеле штета од 1,35 милиони денари.


Прва конференција на Министерството за финансии по повод Денот на буџетот


Скопје, 2 април, 2018 - 16:13 (META) 

Министерството за финансии реализираше голем број иницијативи за подобро, поефикасно и одговорно буџетско работење на сите нивоа и на сите јавни институции, изјави денеска премиерот Зоран Заев на првата годишна конференција на Министерството за финансии, по повод прогласувањето на 2 април за Ден на буџетот.

Говорејќи за економијата во државата, тој додаде дека се очекува растот на домашниот бруто-производ (БДП) да достигне 3,2 отсто.

„Од политичката стабилност и од политиките за враќањето на довербата кај инвеститорите се очекува раст на приватните инвестиции. Растот на платите и вработеноста во приватниот сектор, поддржан од владините мерки, придружени со очекувањата за ниска и стабилна инфлација во земјата, ќе придонесат кон зголемување на приватната потрошувачка“, рече Заев.

Министерот за финансии, Драган Тевдовски рече дека за прв пат од независноста, Министерството за финансии, има Стратегија за реформи во системот за јавни финансии.

„Таа го опфаќа периодот од 2018 до 2021 година и ги содржи сите значајни елементи на системот, почнувајќи од фискална транспарентност, преку воведување на среднорочно буџетирање и измени во системот на јавните набавки, па се до подобрувања во функционирањето на јавната внатрешна финансиска контрола, УЈП и Царината. Нејзина цел е среднорочно подобрување  на системот на јавните финансии во насока на ЕУ стандардите“, рече Тевдовски.

Претседателот на Собранието, Талат Џафери кој исто така се обрати на конференцијата рече дека  Собранието врши контрола на буџетот при разгледувањето и донесувањето на завршната сметка на буџетот што Владата е должна да ја поднесе до 30 јуни секоја година.

„Таа контрола е можна и преку институтот Пратенички прашања, потоа преку разгледување на Годишниот извештај на Државниот завод за ревизија, па сè до можноста за надзорни расправи. Меѓутоа, останува отворено прашањето, колку како Собрание ги користиме на ефикасен начин овие деловнички и законски можности за контрола, како врз прибирањето, така и врз трошењето на парите на граѓаните“, истакна Џафери.

На Првата конференција на Министерството за финансии, се обратија и директорот на Светска банка за земјите од Западен Балкан, Европа и Централна Азија, Линда Ван Гелдер, како и поранешните министри за финансии Таки Фити, Петар Гошев, Никола Поповски и Трајко Славески.

Првиот буџет на Република Македонија е донесен на 2 април 1992 година.