Кривична пријава против Канческа – Милевска и нејзини поранешни соработници


Скопје, 28 декември, 2017 - 13:22 (META) 

Управата за финансиска полиција поднесе кривични пријави против поранешната министерка за култура, Елизабета Канческа – Милевска, нејзиниот заменик Драган Недељковиќ и против Ѓ.Т., државен советник за финансиски прашања и раководител на сектор за финансии во Министерството за култура, информираат од таму.

Кaнческа-Милевска и нејзините соработници се осомничени за кривично дело несовесно работење во службата и причинување штета на буџетот во износ од 2.770.640 евра.

„Во периодот од јули 2009 до февруари 2017, тројцата осомничени со пропуштање должен надзор, несовесно постапиле во вршењето на своите овластувања и должности, на начин што спротивно на член 581 став 2 од Законот за трговски друштва, кој децидно наведува странски друштва не можат да вршат дејност на територијата на Македонија се додека не организираат подружници, примиле времени ситуации – фактури од странскиот правен субјект „Светлост Театар“ ДОО Белград, кој не е регистриран даночен обврзник во Македонија“, се вели во соопштението на Управата за финансиска полиција.

Како што појаснуваат од таму, во фактурите, незаконски бил вкалкулиран дополнителен износ претставен како данок на додадена вредност (ДДВ) од 18 проценти, при што, министерот и заменик-министерот потпишале шеесет и четири решенија за исплата на средства, а раководителот на сектор за финансиски прашања потпишала налози за исплата на парични средства на штета на буџетот на Македонија, со кои извршиле плаќање во странство врз основа на 11 договори за извршување услуги, стоки и работи.

„Притоа, спротивно на член 14 став 2 од законот на ДДВ, извршиле противзаконска исплата на ДДВ надвор од границите на Македонија, иако извршените услуги, стоки и работи од страна на ‘Светлост Театар’ ДОО Белград се спроведени на територијата на Македонија“, се додава во соопштението на Управата.


САД ги намалија средствата кои им ги доделуваат на ОН


Вашингтон, 26 декември, 2017 - 14:02 (META) 

САД соопштија дека го намалуваат придонесот во буџетот на Обединети нации за повеќе од 285 милиони долари за фискалната 2018-19 година. Намалувањето ќе се однесува на управувањето и поддршката на ОН.

Американската амбасадорка при ОН, Ники Хејли вчера изјави дека „неефикасноста и претераното трошење на ОН се добро познати“ и додаде дека САД нема да дозволи да се искористува „великодушноста на американскиот народ или трошењето да биде неконтролирано“.

Хејли наведе дека станува збор за историска одлука и претставува „голем чекор во добар правец“ за зголемување на ефикасноста на ОН.

Одлуката за намалување на учеството на САД во буџетот на ОН следи откако Генералното собрание на ОН усвои резолуција со која се осудува одлуката на американскиот претседател, Доналд Трамп да го признае Ерусалим за главен град на Израел.


Државата плаќа здравствено осигурување за 19.062 лица повеќе, од што има сиромашни


Скопје, 25 декември, 2017 - 13:09 (META) 

Државата го финансира здравственото осигурување на сиромашни лица, но во 2015 година, таа бројка изнесувала повеќе, отколку што има лица што живеат под прагот на сиромаштија, се вели во публикацијата од „Фајненс тинк“ насловена „Универзално здравствено осигурување на Репупблика Македонија-ефекти од спроведување на проектот Здравствено осигурување за сите“.

Имено, за 2015 година се јавува разлика од 19.062 лица, помеѓу лицата, што здравствено се осигурени како сиромашни и лицата што живеат под прагот на сиромаштија.

„Овие придонеси ги обезбедува буџетот на државата и ги уплатува месечно во име на повеќе од 250.000 лица во буџетот на Фондот за здравство. Пресметките покажуваат дека Фондот за овие лица месечно уплаќа 881 денари, наспроти трошокот, исплатата од ФЗОМ за услуги од 1.492 денари за истите, односно овие лица користат здравствени услуги месечно за 611 денари (41 процент) повеќе отколку што државата обезбедува финансиски средства за нивото здравствено осигурување“, се вели во истражувањето.


Собранието со 62 гласа „за“ го изгласа државниот буџет за 2018 година


Скопје, 22 декември, 2017 - 18:48 (META) 

Собранието, со 62 гласа, без гласови против и без воздржани, вечерва го изгласа Буџетот на Република Македонија за 2018 година.

Буџетот за 2018 година ја отсликува економската и социјалната политика на Владата, чија цел е стабилен економски пораст, подобар животен стандард, повисоко ниво на социјална правда како и ефикасно и домаќинско управување со парите на граѓаните, рече министерот за финансии, Драган Тевдовски, за дополнетиот предлог-буџет за 2018 година, во своето експозе пред пратениците во Собранието, каде што пленарна расправата за буџетот се одвиваше без присуство на опозицијата.

budzet

Тевдовски за следната година очекува зголемување на приватната потрошувачка, како и на извозот, кои, како што рече, позитивно ќе се одразат на состојбите во економијата и порастот од 3,2 проценти.

– Предвидени се повеќе средства за клучните столбови во општеството, повисоки плати во здравството, образованието, армијата, повеќе пари за исполнување на стандардите за влез во НАТО, а предвидена е рестрикција во трошењето на непродуктивните трошења – рече Тевдовски.

Во однос на капиталните инвестиции, тој најави интензивирање на изградбата на инфраструктурните проекти и појасни дека ќе се обрне посебно внимание на забрзување на процесот на гасификација, за граѓаните да добијат поевтино греење и за почиста животна средина.

За задолжувањето, Тевдовски појасни дека тоа ќе биде од странскиот и од домашниот пазар на државните хартии од вредност. Задолжувањето на странскиот пазар ќе биде преку еврообврзница или преку поволни кредити.

denari

Пратеникот на СДСМ, Томислав Тунтев рече дека во историјата на Македонија, по трет пат, буџетот, кој е најважен финансиски документ, се носи без опозиција.

– Жалосно е да дебатираме, бидејќи салата е празна. Опозицијата не тука за да дебатира за она што значи живот и опстојување на сите граѓани, без исклучок. Како парламентарно мнозинство, се надевавме дека опозицијата ќе смогне напори да учествува во дебатата. За првпат парламентарното мнозинство прифати шест амандамни на опозицијата, и затоа сега зборуваме за дополнет предлог-буџет. За првпат се носи буџет кој не е фиктивен, кој не е напумпан и не се однесува на изборна година. Буџетот е ослободен од непродуктивни ставки, така што капиталните расходи се однесуваат исклучиво на капитални инвестиции кои враќаат вредност – рече Тунтев и додаде дека со овој буџет се предвидува финансиска стабилизација на Македонија.


Буџетот на Град Скопје е за 10 проценти помал во однос на лани, изнесува 100 милиони евра


Скопје, 19 декември, 2017 - 13:12 (META) 

Советот на Град Скопје на денешната трета седница го усвои предлог-буџетот на Град Скопје за 2018 година, што е за 10 проценти помал во однос на буџетот за 2017 година предложен и усвоен од претходното градско раководство. Буџетот на Град Скопје за 2018 година изнесува вкупно 6,2 милијарди денари (100.813.008 евра).

Градоначалникот на Град Скопје, Петре Шилегов рече дека „со овој буџет, крајна цел е Скопје да биде функционален, зелен и велосипедски град.“ Тој додаде дека предложениот буџет за 2018 година е еден сублимат од веќе започнатите и нови проекти.

– Акцентот го ставивме на подобрување на животната средина, развивање на транспортната мрежа, дел за патната и комуналната инфрастуктура, изградба на системи за водоснабдување, односно за инвестиции што ќе придонесат за подобар економски пораст и развој на нашиот град – рече Шилегов.

Тој најави инвестиции во јавниот превоз преку набавка на електрични еко-автобуси и реконструкција на автобуски стојалишта, изградба на нови велосипедски, пешачки и трим-патеки, подигнување на јавно зеленило на магистрални улици и паркови, проекти за зелени кровни површини на станбени згради, се со цел, процентот на зеленило драстично да се зголеми во Скопје.


Наместо за буџетот, Собранието денеска ќе гласа за нов државен јавен обвинител


Скопје, 15 декември, 2017 - 12:10 (META) 

Наместо за предлог-буџет за 2018 година, Собранието денеска ќе гласа за изборот на нов државен јавен обвинител, функција за која Владата го предложи Љубомир Јовески, член на Советот на јавни обвинители.

Од Собранието соопштија дека „поради неодложни активности на дел од членовите на Владата“, која попладнево ќе одржи заедничка зедница со владата на Албанија во Поградец, седницата за буџетот за 2018 година е презакажан за следниот петок.

Денеска, покрај изборот на државен јавен обвинител, пред пратениците ќе бидат и измените на Законот за Судскиот совет, измените на Законот за заштита на сведоци што ги бараше СЈО и законот за укинување на Советот за утврдување на факти и покренување на постапка за утврдување одговорност за судија, предложени по скратена постапка.

Инаку, за избор на Јовески за државен јавен обвинител е потребно просто мнозинство, односно 61 глас.

Пратениците на ВМРО-ДПМНЕ и на коалицијата „За подобра Македонија“ досега не присуствуваа на комисиските седници, а оваа е прва пленарка на која ќе се види дали тие целосно ќе ја бојкотираат работата на законодавниот дом.


Тевдовски: Со буџетот за 2018 се фокусиравме на ефикасно трошење на парите


Париз, 14 декември, 2017 - 14:33 (META) 

Министерството за финансии се фокусираше на ефикасност во трошењето на средствата во буџетот за 2018 година, рече министерот за финансии, Драган Тевдовски на министерската конференција во Париз на тема „Доброто деловно јавно управување-сервис за граѓаните и бизнисите“, организарана од Организацијата за економска соработка и развој (ОЕЦД).

Тој додаде дека важно е да има инвестиции и трошење, но уште поважно е за што парите ќе бидат потрошени.

„Ние не се фокусиравме толку на расходната страна и намалувањето на расходите, колку на тоа, за што се трошат средствата. Наш приоритет како министерство и влада е да ја зајакнеме ефикасноста при трошењето на јавните средства, притоа обезбедувајќи, расходите ефективно да се користат за вистинските цели, а јавноста да добие вредност за парите“, рече Тевдовски.

Тој додаде дека за социјалните трансфери и земјоделски субвенции, Владата многу повеќе се фокусира на нивната правилна употреба.

Во однос на транспарентноста на трошењето, Тевдовски истакна дека, „доколку јавноста е запознаена како се управува со средствата и како тие се трошат, тогаш би можела да врши постојан притисок врз функционерите кога тие не управуваат добро со средствата.“

За Стратегијата за управување со јавни финансии потенцираше дека треба да биде усвоена до крајот на годината, и спроведена во наредните години.


Заев ги поздрави и ги оцени како морален чин оставките на членовите на ДИК


Скопје, 11 декември, 2017 - 16:16 (META) 

Премиерот Зоран Заев ја поздрави одлуката на членовите на Државната изборна комисија да ги вратат парите од бонусите, како и оставките на дел од нив, кои ги оцени како морален чин.

– Се работи за исклучителни професионалци кои имаа сериозна улога во едно сериозно време и ја завршија професионално. Одлуката што ја донесоа знам дека е законска, но, веројатно е неетичка и неморална. Јас го поздравувам чинот што го поднесоа сите, а тоа е враќање на парите назад во буџетот, а истовремено поднесоа и лична одговорност како морален чекор, веројатно заради критиките од јавноста – рече Заев.

Премиерот додаде дека истовремено тие испратиле и сериозна порака на морално и етичко однесување, по реакциите на јавноста, заради, како што рече, нетранспаретноста на одлуката што ја донесоа и заради тоа што претходно не ја информираа јавноста дека ќе го искористат членот 19 од Изборниот законик што им овозможува дополнителни надоместоци.

Оставки од функции денеска си поднесоа претседателот на ДИК, Александар Чичаковски и членовите на Комисијата од СДСМ, Виолета Дума и Игор Милев.


Ковачевски: Буџетот ќе биде донесен најдоцна до 23 декември


Скопје, 8 декември, 2017 - 11:31 (META) 

Буџетот за 2018 година може да биде донесен најдоцна до 23 декември, изјави за „Мета“ пратеникот на СДСМ, Васко Ковачевски, кој претседаваше со Комисијата за финансирање и буџет.

Тој додаде дека се чека претседателот на Собранието, Талат Џафери, да се врати од Соединетите Американски Држави, околу 15 декември, и во тој период да ја закаже пленарната седница на која ќе се расправа за буџетот за следната година.

– Расправата во Собранието треба да трае до пет работни дена. Ако претседателот Џафери ја закаже седницата околу 18 декември и опозицијата учествува во расправата, најдоцна до 23 декември буџетот ќе биде донесен. Доколку опозицијата не учествува, донесувањето на буџетот може да биде и порано – изјави Ковачевски.

По завршување на расправата за предлог-буџетот на Комисијата за финансирање и буџет, тој утре ќе се најде пред Законодавно-правната комисија во Собранието, која амандманите треба да ги разгледа од правен аспект. Потоа предлог-буџетот ќе се врати во Владата, која во рок до пет дена треба да го врати во Собранието.

-Утре, штом Законодавно-правната комисија ќе го разгледа предлог-буџетот од правен аспект, тој се враќа во Влада, која може да направи дополнувања по однос на шесте прифатени амандмани. Законскиот рок за дополнувањата во Влада пет дена. Потоа буџетот се враќа во Собрание – додаде Ковачевски.

Комисиската расправа за предлог-буџетот се одвиваше без опозицијата, а пратениците прифатија четири амандмани на ВМРО-ДПМНЕ и два на Беса, што се однесуваат на субвенции за печки на пелети, ТИР-зоната во Куманово, изградба на колекторски систем во Неготино, решавање на проблемот со депонијата во Струга, изградба на детски парк во Нерези, Општина Карпош.


Како „копи-пејст“, „препишани“ и „излишни“, не поминаа 95 амандмани за буџетот


Скопје, 7 декември, 2017 - 15:03 (META) 

„Не се прифаќа“. „За побараното со овој амандман веќе се предвидени пари во буџетот за 2018 година“. „Општините треба да аплицираат во соодветното министерство и ќе добијат пари од буџетот“. Така денеска гласеше постојано одговорот што го даваше Ширет Елези, заменик-министер за финансии, како претставник на Владата, на сите прашања од претседавачот на седницата на собраниската Комисија за финансирање и буџет, Васко Ковачевски, како се изјаснува Владата за одреден амандман.

До попладневната пауза беа разгледани 95 амандани за буџетот за 2018 година, а од нив, освен трите што Беса ги повлече, сите беа отфрлени со само еден глас „за“ или без гласови за поддршка. Пратениците од ВМРО-ДПМНЕ и денеска не учествуваа во работата на комисијата. За разлика од нив, на седницата беа пратениците од Беса, кои ги образлагаа своите предлози.

Пратениците Жаклина Лазаревска, Диме Велковски, Ивана Туфегџиќ, Горан Милевски прашува како е можно најголемиот дел од амандманите да бидат буквално истите, со истата побарана сума и со истото образложение, „а да се смени само „старски дом“ со „училиште“ или да се смени името на местото.

– Од една ставка ги барат сите пари од Филхармонија. И што ќе се случеше ако министерството ги прифатеше барањата? Кога ги пишувале амандманите брзале, не виделе дека во сите бараат по 20 милиони од Филхармонија. Па, помножете со бројот на амандмани и ќе видите дека така Македонска филхармонија не само што ќе остане без пари, туку ќе ѝ се создаде и долг од 7 милијарди денари. Овие амандмани немаат врска со реалноста. Седнале во еден ден, само градовите ги смениле, сè друго е исто – рече Милевски.

Независната пратеничка Ивана Туфегџиќ, пак, амандманите од ВМРО-ДПМНЕ ги оквалификува како „чист популизам“, само за да се каже дека се поднесени амандмани, а тие се или непотребни или технички неуредни.