!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Ребалансот на буџетот ќе се најде пред пратениците пред летниот одмор


Скопје, 22 јуни, 2017 - 16:04 (META) 

Министерот за финансии, Драган Тевдовски, информираше дека се работи на подготовки на ребалансот на буџетот, кој пред пратениците ќе биде доставен пред тие да заминат на летен одмор.

– Во моментов правиме проценка на обврските со буџетот. Ќе направиме сè што е во наша надлежност да добиеме буџет кој ќе биде прагматичен, имајќи ги предвид обврските што се наталожени со години, а во исто време да дадеме можност на нашите реформски приоритети – изјави Тевдовски на потпишувањето на договорот за користење средства од ИПА-програмата во ЕУ Инфоцентарот.

Во однос на еврообврзницата, тој изјави дека во согласност со постојниот буџет, кој е изгласан од претходната власт, има потреба од задолжување и на внатрешниот и на надворешниот пазар со еврообврзница.

– Постои потреба за финансирање на потребите на буџетот преку задолжувања. За нас е важно да обезбедиме  вакви финансирања со релативно ниска цена – додаде Тевдовски.


Министерството за финансии нема направено нови долгови врз основа на државни записи


Скопје, 21 јуни, 2017 - 14:59 (META) 

Министерството за финансии нема направено нови долгови врз основа на државни хартии од вредност, како што беше посочено од ВМРО-ДПМНЕ, и покрај огромниот интерес за државните записи од страна на инвеститорите, информираат од министерството.

Во соопштението на министерството се вели дека „издавањето државни хартии од вредност е предвидено со буџетот за 2017 година, каде стои дека буџетскиот дефицит ќе се финансира и преку домашни извори“.

„Државните хартии од вредност издадени со последните две аукции се стриктно за покривање стари долгови. На 6 јуни беше одржана аукција на државни хартии од вредност на која беа издадени хартии од вредност во ист износ, колку што беше потребен за да се покријат старите долгови. Добро е да се спомене дека побарувачката на таа аукција беше четирипати поголема од запишаниот износ или 2,1 милијарди денари“, се вели во соопштението.


Анѓушев уште еднаш ги повика ЕЛЕМ да го сопрат објавувањето јавни повици


Скопје, 19 јуни, 2017 - 16:31 (META) 

Вицепремиерот за економски прашања, Кочо Анѓушев, уште еднаш го повика раководството на АД ЕЛЕМ, веднаш да го запре објавувањето на јавните повици со проценета вредност од 80 милиони евра, за да се избегне штета на државниот и на буџетот на компанијата.

„Наспроти укажувањето од Владата, раководството на ЕЛЕМ, најпрвин во петокот, на 15 јуни, објави јавен повик за набавка на рударска опрема за РЕК Битола во вредност од 34 милиони евра, за денеска да го објави и јавниот повик за изградба на топлификација на Битола, Новаци, Логоварди и на Могила во вредност од 46 милиони евра“, се вели во соопштението од кабинетот на Анѓушев.

Оттаму потсетуваат дека раководството на ЕЛЕМ имало 11 години да ги реализира овие проекти, а особено проектот за топлификација на Битола.

Вицепремиерот нагласи дека одредена штета е веќе направена со објавувањето на јавните повици, но според него, „крајно време е управниот одбор на компанијата да донесе одлука за мораториум на проектите за да не се направи поголема штета и да не се загрози имиџот на Македонија и во меѓународни рамки“.


Тевдовски: Буџетот е тенок, но има пари за плати и за пензии


Скопје, 8 јуни, 2017 - 14:44 (META) 

На сметката на буџетот заклучно со 31 мај има 6,5 милиони евра, а на девизната сметка 209 милиони евра, пари од еврообврзницата, информираше денеска министерот за финансии, Драган Тевдовски.

Тој додаде дека во буџетот има доволно пари за сервисирање на тековните трошоци и за исплата на плати и на пензии. Парите од еврообврзницата, пак, ќе се користат за враќање на долговите до крајот на годината.

Тевдовски информираше дека секторот за буџет во Министерство за финансии веќе работи на подготовка за ребаланс на буџетот, кој можеби ќе се случи и порано од септември.

„Со ребалансот на буџетот сакаме да ги исчистиме неефикасните трошења, да видиме колку простор останува за да воведеме некои од мерките што се предвидени со програмата на Владата, како што е зголемување на минималната плата. Во јули веќе ќе треба да се почне и со проекциите за буџетот во 2018 година, во кој ќе бидат имплементирани најголем дел од економските мерки“, изјави Тевдовски.

Во однос на долгот на државата кон буџетските корисници, јавните претпријатија, јавните здравствени установи, институции и општините, Тевдовски додаде дека до сите нив се испратени барања за да ги достават потребните податоци, за да се види колку точно изнесуваат доспеаните неплатени побарувања. Тој податок треба да се има на истекот од првите 100 дена од работењето на Владата.

Јавниот долг, според министерот за финансиии, изнесува повеќе од 50 проценти од домашниот бруто-производ (БДП).

Прва поголема сума за враќање на кредит има во јануари следната година (90 милиони евра), но според Тевдовски, покритични се 2020 и 2021 година, кога треба да се враќа повеќе од една милијарда евра.

– Во стопанството има вишок ликвидни средства од 250 милиони евра кои се замрзнати. Една од опциите е да ги користиме овие пари, бидејќи граѓаните би плаќале помала камата. На средбата со гувернерот Димитар Богов разговаравме и за оваа опција на користење на овие евтини пари, чијашто камата би била помала од процентот на пораст на економијата. Затоа, кога ќе носиме одлуки, треба да гледаме долгорочно и да мислиме на долгот што треба да го враќаме за две-три години – додаде Тевдовски.

Во однос на даноците, ќе има зголемување на персоналниот данок, додека трошоците за придонеси на фирмите нема да се зголемат, а нема да има зголемување ни на данокот на додадена вредност (ДДВ).

Тевдовски информираше дека за една недела исплатиле поврат на ДДВ од две милијарди денари, што е половина од сумата исплатена во првите четири месеци од годината. Според него, со редовното враќање на овие средства ќе се раздвижи економијата и компаниите ќе почнат да размислуваат за инвестиции.

Тевдовски не најави намалување на платата на административците туку, напротив, ниската плата ја посочи како проблем поради кој во некои важни сектори, како на пример во Министерство за финансии, недостигаат кадри, како квалитетни ИТ-инженери.

На прашањето кој ќе биде прв човек на Управата за јавни приходи, Тевдовски кажа дека тоа сè уште се дискутира помеѓу коалициските партнери.


ВМРО-ДПМНЕ: Заев лаже за амнестијата, за празниот буџет и за јавниот долг


Скопје, 7 јуни, 2017 - 9:37 (META) 

„Лагите на Заев нема да го подобрат стандардот на граѓаните. Тие очекуваат од него да ги исполни ветувањата што ги даде пред избори, а не со манипулации и со дезинформации да ги дефокусира од обврските што ги презеде“, велат од ВМРО-ДПМНЕ во утринското соопштение.

Заев лажеше дека кој било од ВМРО-ДПМНЕ во разговорите со СДС побарал каква било амнестија, реагираат од опозициската партија на изјавата на премиерот Зоран Заев во интервјуто за националниот јавен сервис МРТВ, дека било побарано амнестирање на врхушката на поранешната владејачка партија, но дека тоа било одбиено.

„Човек што е двапати аболиран за криминал, веројатно со ваквите дезинформации сака да си подготви терен и за трета амнестија за случајот „Поткуп“. ВМРО-ДПМНЕ и досега повеќепати демантираше дека воопшто се разговарало со Заев на оваа тема“, реагираат од партијата.

Од партијата велат дека неточни се тврдењата на Заев дека во буџетот се останати само шест милиони евра и дека јавниот долг ја наминал ликвидност на буџетот.

„Неговиот министер за финансии се пофали дека на 5 јуни се исплатени околу 77 милиони евра од буџетот на име на субвенции, стипендии и пензии. Вистината е дека новата Влада на СДС во буџетот доби 130 милиони евра, освен ако Заев не сакаше несвесно да признае дека 124 милиони евра мистериозно исчезнале. Заев лажеше дека јавниот долг надминувал 50 отсто од БДП, а дека скриениот долг изнесувал повеќе од милијарда евра. Фактичката состојба гласи дека јавниот долг на 30 април 2017 година изнесувал 45,9 отсто. Со овие паушални бројки и лаги, Заев и практично го загрозува кредитниот рејтинг на Република Македонија и ризикува кредиторите во иднина да бараат повисоки каматни стапки“, стои во демантот, во кој се додава дека граѓаните од Заев не очекуваат лаги и манипулации, туку очекуваат да ги исполни изборните ветувања.


ВМРО-ДПМНЕ: СДСМ денеска призна дека буџетот не е празен


Скопје, 5 јуни, 2017 - 20:54 (META) 

СДС денеска призна уште една своја голема лага со која ги манипулираше и ги плашеше граѓаните, дека во буџетот на Република Македонија немало пари и дека Македонија е пред економски колапс, стои во реакцијата на опозициската ВМРО-ДПМНЕ на првата седница на новата влада предводена од премиерот Зоран Заев.

„Денеска, на своите фејсбук-профили, гордо, со исплатените субвенции за земјоделците, пензиите и за стипендиите на студентите се пофалија членови на Владата и на парламентарната група на СДС. Сите овие проекти ВМРО-ДПМНЕ ги третираше како проекти и реформи од највисок интерес“, стои во реакцијата и се додава дека владата на ВМРО-ДПМНЕ во буџетот оставила 180 милиони евра.

Од партијата наведуваат дека СДСМ со постизборна измама успеала да обезбеди мнозинска поддршка и дека граѓаните сега ќе чекаат да ги реализираат ветувањата.

„Граѓаните сега од нив очекуваат не само да се фалат со проектите почнати и реализирани од ВМРО-ДПМНЕ, туку да ги остварат ветувањата за изградба на нови 500 километри автопат, просечна плата во висина од 30.000 денари, 16.000 денари минимална плата и 100.000 денари плата за докторите“, се вели во реакцијата.


ЕК: Македонија треба да развие конкретна фискална стратегија


Брисел, 23 мај, 2017 - 16:36 (META) 

На годишниот економски и финансиски дијалог на ЕУ со земјите на Западен Балкан и Турција во Брисел државите се согласиле да ги забрзаат економските и социјалните реформи, со цел зајакнување на макроекономската стабилност, зголемување на конкурентноста и инклузивен пораст.

Како што е наведено во заедничките заклучоци, Македонија се согласила да развие конкретна стратегија за фискална консолидација, да ги заштити инвестициите, да ја зголеми транспарентноста на јавниот сектор, да ги зајакне капацитетите на планирање на буџетот и да се усвои програма за управување со јавните финансиски реформи.

Во заклучоците на Советот за економски и финансиски прашања на ЕУ е побарано и подобрување на ефикасноста на јавната потрошувачка, како и рационализација на трансферот на плаќања.

За да се помогне во финансиската стабилност, властите треба да развијат сеопфатна стратегија за решавање на лоши кредити и да се поттикне употребата на домашната валута во финансиски трансакции.

„Денес сите седум земји кандидати и потенцијални кандидати за членство во ЕУ се обврзаа да ги забрзаат економските и социјалните реформи со крајна цел, зголемување на конкурентноста. Фокусот сега е имплементација на реформите, така што на луѓето во тој регион ќе им се обезбедат подобри работни места“, изјави еврокомесарот за проширување и за соседска политика, Јоханес Хан.


Костовски: Со исплатата на субвенциите паднаа во вода манипулациите на СДС


Скопје, 18 мај, 2017 - 15:44 (META) 

„Од денеска, со исполнувањето на законската можност, почна и исплатата на субвенциите во земјоделството“, изјави на прес-конференција Дарко Костовски од ВМРО-ДПМНЕ.

Тој додаде дека помагањето на земјоделството и на земјоделците секогаш било и ќе остане фокус на политиките на ВМРО-ДПМНЕ.

„Земјоделците добија повеќе од една милијарда евра субвенции додека ВМРО во изминативе 10 години го имаше мнозинството и одлучуваше околу земјоделската политика, за разлика од времето на СДС кога земјоделците не добиваа ниту евро помош од државата. Со денешната исплата, паднаа во вода манипулациите кои СДС и од нив контролираните медиуми ги ширеа дека нема пари во буџетот. Буџетот е ликвиден и пари за земјоделците се обезбедени и во согласност со динамиката за исплата, ќе бидат исплаќани“, додаде Костовски.


СДСМ: Ќе има ревизија на сите трошења на пари на граѓаните од Груевски и од соработниците


Скопје, 17 мај, 2017 - 16:43 (META) 

„Граѓаните набргу ќе ја добијат новата реформска влада, која детално ќе ги преиспита сите задолжувања што беа направени на крајно нетранспарентен начин изминативе години, а исто така ќе направи и детална ревизија на сите нетранспарентни трошења на парите од буџетот“, се вели во реакцијата на СДСМ на текстот „СДСМ наследува полн буџет од 180 милиони евра кеш за трошење, во 2006-та ВМРО-ДПМНЕ наследи само 1 милион евра и блокирана сметка“, објавен на порталот „Курир“.

Во реакцијата се вели дека досегашната власт на Никола Груевски го издигна јавниот долг на историски највисоко ниво, во висина од најмалку 4,7 милијарди евра.

„Пред 11 години, во 2006 година, јавниот долг изнесуваше само 1,8 милијарди евра. Новата реформска влада транспаретно и отчетно ќе раководи со јавните финансии и граѓаните ќе ги добијат сите потребни информации за нетранспарентните задолжувања и трошења направени изминативе години“, се додава во реакцијата на СДСМ.


Миноски: За исплата на субвенциите, чекаме да се објави одлуката на Уставен суд


Скопје, 11 мај, 2017 - 13:37 (META) 

Министерот за финансии, Кирил Миноски, денеска изјави дека буџетот е ликвиден, а за исплата на земјоделските субвенции ќе се чека да се објави одлуката на Уставниот суд на официјалната веб-страница или во „Службен весник“.

– Треба да ја видиме одлуката и да видиме кога ќе биде објавена. Доколку не е спорна и ако не постои законска пречка, ќе може да се почне со исплата на субвенции – изјави Миноски, одговорајќи на новинарски прашања во Градски парк, на одбележување на Денот на финансиската едукација.

Тој изјави дека во моментов не постои потреба од ребаланс на буџетот, како и за издавање еврообврзница, бидејќи постои доволна ликвидност на домашниот пазар и наплатата на приходите е на соодветно ниво.