!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

ВМРО-ДПМНЕ: Има доволно средства за инсулинска терапија на пациентите


Скопје, 12 април, 2017 - 16:59 (META) 

„СДС очајно се обидува да направи сензационална вест од вообичаена финансиска процедура во едно министерство, со единствена цел да го наруши угледот на Министерството за здравство“, се вели во реакцијата на ВМРО-ДПМНЕ на прес-конференцијата на пратеничката на СДСМ, Јагода Шахпаска.

Од партијата велат дека „најважно е дека до крајот на годината има доволно средства за да се покријат потребите на сите пациенти на инсулинска терапија“.

„Воопшто не станува збор за кратење на средствата за инсулинска терапија, туку имајќи предвид дека буџетот за 2017 година се планира уште во претходната година, проектиран е буџет за оваа година пред да се спроведе постапката за јавна набавка, а потоа буџетот се репрограмира врз основа на постигнатите цени на јавната набавка и роковите за доспевање на фактурите. Тоа е нормална и вообичаена процедура во финансиското работење на Министерството и воопшто не станува збор за кратење на средствата, туку за тековно репрограмирање на буџетот врз основа на финансиските импликации“, се додава во реакцијата на ВМРО-ДПМНЕ.


СЈО: Четири нови истраги за затајување данок и за злоупотреба на јавна функција


Скопје, 23 март, 2017 - 12:16 (META) 

„Табла“, „Триста“, „Тотал“ и „Тифани“ се четирите нови истраги што Специјалното јавно обвинителство ги отвори денеска.

Според обвинителката Катица Јанева, постојат материјални и вербални докази дека од 2008 до 2016 година Министерството за финансии и Управата за јавни приходи не си ги извршиле законските должности, дозволиле поединци и служебни лица да работат спротивно на законот и овозможиле тие да стекнат лична корист на сметка на државниот буџет.

Во случајот „Триста“, помошник на министерот за внатрешни работи кој бил задолжен за спроведување јавни набавки, со набавка на 300 возила за МВР го оштетил буџетот за 453.570 евра, бидејќи тендерот за купување, сервисирање и за одржување на возила им го доделил на компании кои не дале најевтина понуда.

– Со купување возила, сервисирање и одржување, „Порше Македонија“, „Колевски“, „Бохемија“, „Кадиз“, „Ауто-Македонија“, „Авто-куќа“ и „Ауто мобил“ прибавиле противимотна лична корист, бидејќи понудите од компаниите не биле утврдени за најповолни, што било единствен критериум за јавната набавка – информираше јавната обвинителка Фатиме Фетаи.

„Тотал“ се однесува на даночно затајување за што е осомничен сопственикот и управител на фирмите „Тотал“, „Медиа макс тотал“ и „Медиа макс“. Тој, според СЈО, давал лажни податоци и ги користел правните лица како параван, затајувајќи 121.414 евра данок.

Како што посочи обвинителката Фетаи, постои основано сомневање дека од 2008 година до 2005 година осомничениот давал лажни податоци за утврдување на фактичката состојба за плаќање данок и за исполнување на даночните обврски во однос на плаќање данок на додадена вредност, данок на добивка и персонален данок.

– Осомничениот како управител, преку правните лица си правел набавки за себе лично. Под изговор дека тоа се набавки за потребите на правните лица, купени се душеци „меџик тач“ во износ  3.080 евра, рачен часовник „брајтлинг“ од 2.341 евра, мебел вреден 65.940 евра, персиски теписи, дизајнирани кујнски садови – информираше Фетаи.

Во случајот „Тифани“, сопственичката, управител и единствен потписник на „Смарт центар“ и на „Смарт груп ДООЕЛ“, сторила кривично дело даночно затајување.

Таа е осомничена дека од 2008 до 2014 година, за да ги избегне даночните обврски, давала лажни податоци и на тој начин одбегнала плаќање на данок на добивка од 37.634 евра, како и персонален данок од 16.924 евра.

– Осомничената ги користела како параван правните субјекти и за себе купувала долна облека во вредност од 500 евра, здолништа, чанти во вредност од 33.508 евра, очила, шминка, мебел, точаци, сигурносни врати – информираше Фетаи.

Во случајот „Табла“, пак, директор на основно училиуште „Реџо Рушиќ“ од Зајас, спротивно на решението на Министерство за образование и без да спроведе јавна набавка, за која законски е обврзан, изградбата на објект ѝ ја доделил на компанијата „Баупрф ДООЕЛ“ од Кичево, со што го оштетил буџетот за 200.000 евра.

За ниеден од осомничените не е побрана мерка за обезбедување присуство.

Обвинителката Ленче Ристоска рече дека спротивно на пишувањата во медиумите, ниеден медиум не е под истрага, а доколку некои лица кои се сопственици или на накој начин поврзани со медиуми, од интерес на јавноста е да се истражат случаите и да се дознае вистината.

Специјалната јавна обвинителка Катица на денешната прес-конференција уште еднаш побара Собранието да го продолжи рокот за завршување на истрагите и подигнување на обвинителни акти, бидејќи финансиските истраги што ги води СЈО се комплексни и е потребен подолг период за обвиненија.

– Роковите на СЈО се пократки од оние по кои постапуваат другите јавни обвинителства и од оние кои што се определени од Законот за кривична постапка. Бараме Собранието да ја разгледа законската одредба што ја скратува работа и заеднички да најдеме решение – рече Јанева.


Задолжувањето да не се користи за политички цели, велат од Министерство за финансии


Скопје, 21 март, 2017 - 12:30 (META) 

Министерството за финансии води одговорна политика на управување со јавниот долг, која не е и не може да биде предмет на дневно-политички манипулации, се вели во реакцијата на Министерството за финансии на соопштението на СДСМ.

– Во согласност со Законот за јавен долг и максималниот износ за задолжување на домашниот пазар, објавениот календар за аукции, како и во согласност со понудата и со побарувачката на државните хартии од вредност од страна на инвеститорите, Министерството за финансии носи одлука за оптималниот износ – велат оттаму.

На соопштението на СДСМ реагираа и од ВМРО-ДПМНЕ, од каде што велат дека „државниот долг и аукциите на државни хартии од вредност станаа редовна пропагандна алатка на СДСМ“.

„Секогаш кога сакаат нешто да стават под тепих и да ја дефокусираат јавноста од политичките случувања, тие плетат заговори за „грчко сценарио“ и за банкрот. Иронијата да биде поголема, пред два дена кредитната агенција „Стандард и Пурс“ во својот извештај наведе дека долгот на државата е низок. Ова е само една од низа меѓународни институции како Светска банка, ММФ, кредитната агенција „Фич“ кои наведуваат дека државниот долг е низок“, велат од ВМРО-ДПМНЕ.

Од партијата додаваат дека издавањето на државни хартии од вредност секаде во светот е редовна постапка за финансирање на буџетот.


СДСМ: Миноски да не помисли да ги задолжи граѓаните повеќе од доспеаните обврски


Скопје, 21 март, 2017 - 10:08 (META) 

„Го предупредуваме Кирил Миноски, кој во моментов извршува техничка функција како министер за финансии и е во заминување, да не ги задолжува граѓаните на Македонија повеќе од потребниот износ за враќање на доспеаните долгови за оваа недела“, се вели во соопштението на СДСМ.

Во него се додава дека обврските што стасуваат за наплата оваа недела изнесуваат 88 милиони евра и дека Миноски треба во рамките на овој износ да го планира денешното задолжување на домашниот пазар.

„Истовремено укажуваме дека во буџетот има доволно средства за исплата на тековните обврски на државата кон граѓаните, за што потврдa има и од надлежното министерство. Неконтролираното темпо на задолжување на граѓаните што досегашната власт го правеше нетранспарентно и за непродуктивни трошења, го издигна јавниот долг на историски највиско ниво од 50,1 проценти од домашниот бруто-производ“, се додава во соопштението.


Јанева: Откривме и вративме 66.909 избришани разговори


Скопје, 15 март, 2017 - 17:17 (META) 

Специјалната јавна обвинителка Катица Јанева денеска го објави третиот шестмесечен извештај за работата на СЈО за периодот од 15 септември 2016 до 15 март 2017 година.

Во извештајот на Јанева се наведува дека и во овој период имало опструкции на работата на СЈО и проблеми во соработката со правосудните и со другите институции.

Специјалната јавна обвинителка очекува и дека напредокот постигнат во еден дел од отворените истражни постапка наскоро ќе резултира со поднесување обвиненија.

Според структурата на кривичните дела опфатени во извештајот, најголем дел од нив се за злоупотреба на службената положба и овластување со кои бил оштетен буџетот на Република Македонија.

Во врска со финансиското работење на СЈО, во извештајот се наведува дека од одобрениот буџет за 2016 година, Специјалното јавно обвинителство, заклучно со 31 декември 2016 година, потрошило 48,70 отсто од партите, додека од буџетот за 2017 година, кој изнесува 228.005.000 денари (3,7 милиони евра), од 1 јануари до 15 март СЈО потрошило 28.636.159 (465.629 евра) или 12,56 отсто од буџетот.

Јанева во извештајот наведува дека во овој период СЈО добило специјализирани информатичко-форензички софтверски решенија со чија помош биле откриени уште 66.909 избришани аудиоснимки.

– Со тоа вкупната бројка на аудиофајлови се искачи на 606.555. На овие фајлови, како и на претходните 540.646 е извршен електронски попис, кој се наоѓа на вкупно 15.906 страници во електронска форма. При попишувањето е утврдено дека времетраењето на сите аудиофајлови изнесува 13.200 часа – се вели во извештајот на Јанева.

Интересно е што во извештајот е наведено и дека при доставување на предметот „Пуч“ од Основното јавно обвинителство за гонење организиран криминал и корупција до СЈО, покрај другите списи и докази е доставен и хард диск за кој било утврдено дека потекнува од канцеларијата во Управата за безбедност и контраразузнавање (УБК), која ја користел осудениот Звонко Костовски.

Хард дискот, како што се посочува во извештајот, не бил предложен во листата на докази во случајот, а по анализата СЈО утвдило дека на него биле генерирани фајлови од комуникација меѓу два телефонски броеви, чија цел бил лидерот на СДСМ, Зоран Заев, која била прислушувана без судски налози.

– Од страна на ова јавно обвинителство извршен е електронски попис на овие материјали, кој е сочинет на 27.189 страници во електронска форма. При тоа, детектирани се 31.495 аудиофајлови со времетраење од 671 час и 72.513 СМС-пораки кои биле цел на апликацијата која бележи комуникација помеѓу два телефонски броеви – стои во извештајот.

Извештајот на Јанева, како што соопштуваат од СЈО, денеска бил доставен и до Советот на јавни обвинители и до Собранието на Република Македонија.

Целиот извештај можете да го погледнете на следниот линк.


Општините Новаци и Алмопија ќе го развиваат туризмот со пари од ЕУ


Скопје, 14 март, 2017 - 11:49 (META) 

Завршната конференција на проектот „Жива историја – живо наследство“ ќе биде организирана во општинската сала на Општина Новаци, утре во 12 часот.

Проектот, кој чини 293.036 евра, е финансиран од Европската Унија во рамките на Програмата за прекугранична соработка помеѓу Македонија и Грција.

Целта на овој проект е да се зајакне соработката помеѓу општината Новаци и грчката општина Алмопија, за да се промовираат и да се заштитат природното и културното наследство на оваа прекуграничната област.

За таа цел беше формирано стратешко партнерство меѓу двете општини.

Како резултат на проектот, беа направени три туристички патеки за велосипедизам, планинарење и за крстосување со теренски возила. Исто така била направена и мобилна апликација за убавините на Мариово и на Новаци, за да се олесни туризмот во оваа област.

На настанот ќе се обратат Јаромир Левичек од Делегацијата на Европската Унија, градоначалникот на општина Новаци, Лазар Котевски, и градоначалникот на општина Алмопија, Димитрос Бинос.


Кина ќе го зголеми буџетот за војската за седум отсто


Пекинг, 4 март, 2017 - 16:42 (META) 

Кина оваа година ќе го зголеми буџетот за одбраната за околу седум отсто, соопштија властите во Пекинг, пренесуваат светските медиуми. Информацијата доаѓа во пресрет на годишниот состанок на Националниот народен конгрес во Пекинг.

Како што пренесува „Би-би-си“, Кина последните неколку години забрзано ги модернизира своите вооружени сили, а овој процес го следи и забрзаниот развој на екомијата на земјата.

Сепак, буџетот на Кина за одбрана и понатаму останува значително помал во однос на САД.

Дел од кинеските медиуми минатата недела пишуваа и апелираа буџетот на кинеската армија да се зголеми за најмалку 10 отсто за да може да одговори на неизвесноста што ја предизвикува американскиот претседател Доналд Трамп, кој предлага зголемување на буџетот на Пентагон за околу 10 отсто.

Неименуван поранешен висок офицер на кинеската армија за медиумите во Хонг Конг изјавил дека кинескиот воен буџет треба да се зголеми за 12 отсто за да може да им парира на САД.

Армијата на Кина, која има два милиони припадници е најбројна во светот.


СДСМ: Новата влада ќе преиспита за што биле потрошени 34,7 милиони евра во јануари


Скопје, 1 март, 2017 - 14:31 (META) 

Новата одговорна влада ќе ги преиспита сите нетранспарентни трошења на парите на граѓаните од буџетот, вклучувајќи ги трошењата на власта во заминување во јануари годинава, за време на нејзиното техничко функционирање, се вели во соопштението на СДСМ.

Од партијата велат дека „според, извештајот за извршување на буџетот за јануари 2017 година, владата во заминување потрошила 34,7 милиони евра повеќе од приходите што ги собрала тој месец“.

– Реализирани се 34,7 милиони евра од предвидените 302 милиони евра буџетски дефицит за цела година. Тоа е за 38 проценти повисока реализација од планираната месечна реализација на буџетскиот дефицит. Овој извештај покажува дека реализацијата на капитални инвестиции во јануари е на многу ниско ниво од само 4,8 проценти од предвиденото – велат од СДСМ.

Од партијата прашуваат „ако се земе предвид колку малку пари се реализирале за капитални инвестиции, тогаш за што владата со технички овластувања потрошила 34,7 милиони евра повеќе од собраните приходи“.

– Ваквите нетранспарентни трошења на народните пари ќе завршат со формирањето на новата одговорна влада, која ќе ги стави на увид на граѓаните сите буџетски намени – додаваат од СДСМ.


Манчевски: Град Скопје лани трошеше пари на непродуктивни проекти


Скопје, 16 февруари, 2017 - 14:33 (META) 

Извештајот за извршувањето на буџетот на Град Скопје од минатата година како и сите години претходно, покажува дека главна преокупација на Коце Трајановски му бил раскошот и луксузот на Никола Груевски, изјави денеска Дамјан Манчевски, потпретседател на СДСМ.

– Се трошеше за барокни фасади, плоштади, фонтани, луксузни административни згради и за други непродуктивни проекти. Коце Трајановски немаше пари за мерки за намалување на загадувањето, подземна сообраќајница во центарот на градот, проекти за енергетска ефикасност, ниту пак за нови мостови и главни сообраќајници. Во оваа прилика сакаме да најавиме дека веднаш по смената на Коце Трајановски на локалните избори во мај, ќе предложиме ребаланс на буџетот – рече Манчевски.

Тој додаде дека со ребалансот на буџетот ќе ја запрат изградбата на панорамското тркало како и изградбата на барокните фасади и како и на сите други објекти кои се дел од Скопје 2014.

Манчевски вети дека парите на граѓаните на Скопје ќе се пренасочат за мерки за намалување на загаденоста, за повеќе паркови и зелени површини, за нови средни училишта, за нови мостови, за нови сообраќајници, за нови проекти кои се од најголемо значење за граѓаните на Скопје.


Темелковски: Жителите на Кисела Вода со години живеат помеѓу градежен шут


Скопје, 13 февруари, 2017 - 15:03 (META) 

Недозволиво е жителите на општина Кисела Вода со години да живеат помеѓу градежен шут, раскопани улици и руинирана инфраструктура. Поради ова, сообраќајот во Кисела Вода се одвива небезбедно и отежнато и претставува закана по безбедноста и на возачите и на пешаците, изјави претседателот на Општинската организација СДСМ Кисела Вода, Филип Темелковски.

Тој истакна дека „алармантна е состојбата на булеварот Борис Трајковски, оставен со месеци со дупки и отворени канали и без осветлување.“

– Хаосот го предизвикуваат импровизациите наместо вистинска реконструкција на улиците. Врз калливите и раскопани улици, се става неквалитетен асфалт што го снемува за десетина дена. Ова го попречува нормално функционирање на граѓаните. Градоначалничката Билјана Беличанец и советниците од ВМРО-ДПМНЕ се служат со скапи импровизации за кои се одлеваат пари на граѓаните од општинскиот буџет, а не ги решаваат нивните проблеми – изјави Темелковски.