Османи – Хан: Македонија ќе успее да ја оствари Агендата 2025 на ЕК


Брисел, 12 ноември, 2018 - 16:41 (META) 

Македонија успешно ќе се приклучи на стратегијата на Комисијата за проширување со земјите од Западниот Балкан и ќе успее да ја оствари Агендата 2025, му порачал вицепремиерот Бујар Османи на еврокомесарот за проширување и соседска политика Јоханес Хан на нивната денешна средба во Брисел, соопшти Секретаријатот за европски прашања.

– Планот 18 е веќе усвоен на Влада и неговата имплементација, сега за сега, се одвива непречено. Очекувам навреме да бидат адресирани сите клучни области и да се создадат услови за конфирмација на одлуката за почеток на преговорите. Собранието го даде првото зелено светло за уставните измени согласно договорот од Преспа, со што, не само што се отвори патот за имплементација на обврските од Договорот, туку се создадоа услови и за забрзување на реформскиот процес на земјата согласно заклучоците на Европскиот совет од јуни – рекол Османи на средбата.

Тој нагласил дека односите меѓу Македонија и Грција се унапредуваат со забрзано темпо, потсетувајќи на обновата на авионските летови меѓу Атина и Скопје, по пауза од 10 години.

Османи го информирал Хан и за напредокот во подготовката на преговарачката структура за почеток на преговорите, нагласувајќи дека Владата работи на тоа да го вклучи во процесот и граѓанскиот сектор и академската заедница.


Дескоска: Скринингот ќе помогне да се создаде нова реформска динамика


Брисел, 27 септември, 2018 - 15:50 (META) 

Владино-државна делегација составена од 40 експерти и предводена од вицепремиерот за европски прашања Бујар Османи, министерката за правда Рената Дескоска и шефот на техничкиот преговарачки тим Бојан Маричиќ денеска формално го започна објаснувачкиот скрининг за Македонија и Албанија, како подготовка за почеток на преговорите за полноправно членство во Европската унија.

Дескоска рече дека делегацијата е подготвена да ги вложи напорите во процесот на скрининг, а потоа во процес на преговори.

„Почитувањето на човековите права, независното судство, владеењето на правото и демократијата не се само барања што треба да се исполнат при пристапувањето во ЕУ. Тие се, исто така, стратешките цели на Владата, тие се наши цврсти и недвосмислени цели. И ова беше потврдено во нашата Владина програма и во плановите за реформи, План 3-6-9 и План 18“, рече Дескоска.

Таа потенцираше дека владеењето на правото не значи само усвојување на законодавство во согласност со ЕУ, туку и негова конзистентна имплементација на одржливи решенија.

Дескоска смета дека скринингот ќе помогне да се создаде нова реформска динамика која ќе ја унапреди консолидацијата на Македонија како стабилна, модерна демократија, која ги поддржува и го зајакнува владеењето на правото и целосно ги опфаќа европските вредности.

Маричиќ укажа дека Македонија е во клучна фаза на градење на преговарачката структура која ќе го води процесот на општествена трансформација и промена на однесување, кој е потребен за пристапувањето кон ЕУ, но верува дека партнерски однос со Европската комисија ќе помогне во исполнување на стратешката цел.


Вучиќ: Спогодба со Приштина мора да се постигне кога-тогаш


Белград, 13 септември, 2018 - 16:35 (META) 

Претседателот на Србија, Александар Вучиќ, денеска порача дека дијалогот со Приштина ќе биде продолжен но и дека се мали шансите да се сретне со претседателот на Косово, Хашим Тачи, во Њујорк, во текот на Генералното собрание (ГС) на Обединетите Нации (ОК), како што денеска најави приштинска „Коха диторе“.

– Уште не сум сосема сигурен, но веројатно во Њујорк ќе оди премиерката Ана Брнабиќ, а не јас, бидејќи, просто сакам да бидам повеќе во земјава – рече Вучиќ одговарајќи на новинарски прашања по посетата на болницата во Земун.

Тој порача дека Белград ќе ги продолжи разговорите со Приштина и дека спогодба кога-тогаш мора да се постигне, бидејќи „без долгорочно градење мир нема да бидеме во ситуација да продолжиме со олку успешни економски резултати.

Последната рунда на дијалогот меѓу Белград и Приштина на највисоко ниво беше закажана за 7 септември во Брисел, но Вучиќ и Тачи не се сретнаа, поради најавите од Приштина дека во рамките на претстоечката посета на српските средини на Косово на српскиот претседател нема да му се дозволи посета на хидроакумулацијата и браната „Газиводе“. Тогаш високата претставничка на ЕУ, Федерика Могеринни, порача дека повторно ќе ги повика двајцата претседатели на средба во Брисел пред последната седмица на септември.

Вучиќ денеска на новинарите им изјави дека „многумина во регионот не сакаат стабилност и мир, туку продолжување на постојаниот политички суди на Србите и Албанците“.

– Тие би сакале Србите и Албанците никогаш да не се договорат и сите да напредуваат, а Србите и Албанците не. На некои не им е мило што Србија, која што заостануваше, има најбрзо растечка економија, што го намалува долгот и невработеноста и привлекува инвестиции. Затоа им е потребна Србија која би војувала. И затоа смислуваат дека сум рекол нешто за што на сите им е јасно дека не била таа смислата – рече Вучиќ.

Српскиот претседател денеска негираше дека во говорот во Косовска Митровица минатиот викенд пофално зборувал за поранешниот претседател на Србија, Слободан Милошевиќ, порачувајќи дека било спротивното и дека поставил „во суштинска смисла, линија на дисконтинуитет со политиката на Милошевиќ, но без лична омраза и презир.

– Да, имаше ретка харизма, можеше да собере најмногу луѓе и гласови, но резултатите за Србија и за народот беа лоши – додаде Вучиќ.


Вучиќ нема да се состане со Тачи во Брисел


Брисел, 7 септември, 2018 - 13:17 (META) 

Претседателот на Србија, Александар Вучиќ, денеска во Брисел нема да се состане со својот косовски колега Хашим Тачи, односно дијалогот со посредување на ЕУ за нормализирање на односите меѓу Белград и Приштина засега е застанат.

Одлуката на новинарите во Брисел, по средбата на Вучиќ со еврокомесарката Федерика Могерини, им ја пренесе Марко Ѓуриќ, директор на Канцеларијата за Косово при српската влада.

– Поради сите лаги и измами од косовска страна, нема ни најмали услови да продолжи дијалогот и големо прашање е како ќе се разговара во иднина – рече Ѓуриќ.

Одлуката дали сепак Вучиќ утре и задутре ќе ги посети српските заедници на Косово се очекува за вечерва. Утрово беше соопштено дека тој наложил прекин на секаква комуникација со полицијата на Косово и КФОР, во врска со организацијата на таа посета.

Проблемот се случи откако Кадри Весељи, претседателот на косовскиот парламент, вчера рече дека нема причини Вучиќ да оди на Газиводе и дека може да се случи да му биде забрането влегувањето во Косово.

Езерото и хидроцентралата Газиводе според официјален Белград имаат стратегиско значење за опстанокот на Србите на северот на Косово, додека официјална Приштина одбива секаков разговор на таа тема.


Панел „Патот до Брисел преку Охрид“ по повод 17 години од Рамковниот договор


Скопје, 13 август, 2018 - 10:02 (META) 

Тематски панел „Патот до Брисел преку Охрид“ во рамки на одбележувањето 17 години од потпишувањето на Охридскиот рамковен договор ќе се одржи денеска во Клубот на пратеници во организација на Секретаријатот за европски прашања.

„Денес, Република Македонија е исправена пред еден од најважните предизвици во својата понова историја – да ја комплетира својата надворешна интеграција. Преку овој панел ќе се обидеме да создадеме врска меѓу Охрид, како симбол на внатрешната интеграција, и Брисел, кој ја симболизира нашата надворешна интеграција, т.е. нашата аспирација за полноправно членство во НАТО и Европската Унија“, се вели во најавата за настанот.

На панелот, како што е најавено, ќе се обратат претседателот на Владата на Република Македонија, Зоран Заев, претседателот на Демократската унија за интеграција, Али Ахмети, како и сер Барни Вајт Спунер, поранешен генерал на Британската армија и поранешен командант на НАТО во Република Македонија, за време на потпишувањето на Рамковниот договор.

Специјален гостин на панелот ќе биде и Евелин Фаркаш, поранешната заменичка на помошникот секретар за одбрана на САД, задолжена за Европа и Азија во администрацијата на Барак Обама, одговорна и за политика на САД кон Балканот.

На 13 август 2001 година беше потпишан Рамковниот договор со кој беше ставен крај на неколкумесечниот конфликт во Република Македонија. Документот по повеќедневно услогласување во Охрид, во Скопје во претседателската резиденција на Водно го потпишаа тогашниот претседател на државата Борис Трајковски, тогашниот премиер и лидер на ВМРО-ДПМНЕ Љубчо Георгиевски и лидерите на СДСМ Бранко Црвенковски, на ДПА Арбен Џафери и на ПДП Имер Имери.

Во својство на гаранти, документот кој е познат и како Охридски договор, го потпишаа и специјалните претставници на ЕУ и на САД Франсоа Леотар и Џејмс Пердју.


Димитров: Преговорите за Македонија следната година се тест за кредибилитетот на ЕУ


Брисел, 13 јули, 2018 - 16:35 (META) 

Министерот за надворешни работи, Никола Димитров, по 14. Совет за стабилизација и асоцијација кој се одржа во Брисел, порача дека една од причините зашто е важен почетокот на преговорите со Македонија е тоа што се и тест за кредибилитетот на Европската унија.

-Ние сме фанови на холандската стриктност и правичност, сакаме да го започнеме пристапниот процес токму затоа што е реформска алатка, сакаме да го направиме ова на начин што ќе го тестира кредибилитетот на сите земји членки. Станува се појасно дека ако Македонија не е една од земјите со пристапни преговори, тогаш има премногу преправање, а не доволно објективна проценка во нашиот регион – изјави Димитров на новинарско прашање како Владата може да се осигура дека идната година земји како Франција и Холандија нема повторно да го блокираат стартот на преговорите со Македонија во ЕУ.

Министерот оцени дека Македонија сака да се фокусира на домашните реформи и дека тоа што владата се обидува да го направи сега за една, две или три години е она што можеше да биде направено во последните петнаесет години.

– Ако порано беше автопат, сега патот е тесен и нагорен – рече Димитров.

Димитров заедно со државниот секретар за ЕУ, Бујар Османи, високата претставничка за надворешни работи, Федерика Могерини и еврокомесарот за проширување, Јоханес Хан, изразија огромно задоволство за последните случувања во Македонија, отворањето на патот за преговори во јуни 2019, поканата за членство во НАТО, постигнатиот договор со Грција како и со Бугарија.

Могерини, потпишувањето на Договорот со Грција го нарече „една од најголемите успешни приказни на нашето време без страв дека претерувам кога го кажувам ова”.  Хан потврди дека ќе биде во Македонија на 17 јули за стартот на техничкиот дел на процесот на скрининг со Владата.


Столтенберг на Заев и официјално му ја врачи поканата за НАТО


Брисел, 12 јули, 2018 - 16:25 (META) 

Генералниот секретар на НАТО, Јенс Столтенберг на премиерот Зоран Заев и официјално му ја врачи поканата за почеток на преговори, денеска во Брисел.

– Договорот за името ги отстрани пречките за отворање на пристапните преговори. Остваривте клучен напредок со кој се отвори патот за вашата земја да стане полноправна членка на НАТО. Сега ќе започнат деталните пристапни преговори кои ќе и помогнат на вашата земја да ги направи последните подготовки за целосно членство – изјави Столтенберг.

Премиерот Заев изрази благодарност до генералниот секретар, но и до премиерите на соседните Грција и Бугарија, за постигнувањето на договорите за добрососедство.

– Ова е историска одлука за земјата и за граѓаните, признание за нашата посветена работа две децении и за сите македонски политичари од независноста до денеска – рече Заев.

Тој изрази увереност дека членство на Македонија ќе ја консолидира демократијата во регионот и ќе служи како позитивен пример во Западниот Балкан

– Како идна 30 земја на Алијансата подготвени сме да дадеме позитивен пример и да придонесуваме за обликување на Западниот Балкан во мирен, просперитетен и демократски регион – додаде Заев.


Македонија денеска ќе ја добие поканата за пристапни преговори со НАТО


Брисел, 12 јули, 2018 - 10:00 (META) 

На вториот ден на самитот на НАТО во новата зграда на воениот сојуз во Брисел, денеска се очекува формално од генералниот секретар Јенс Столтенберг да биде врачена поканата за Македонија да ги почне пристапните преговори за да стане 30-та членка на НАТО.

Заклучокот за Македонија денеска ќе биде усвоен како дел од финалното соопштение на НАТО од страна на дваесет и деветтемина шефови на држави или на влади присутни на состанокот.

Вообичаено одлуката ја соопшти вчера Столтенберг, кој нагласи дека зачленувањето ќе се случи откако земјава во целост ќе ги спроведе обврските од договорот со Грција.

Денеска во седиштето на НАТО во Брисел, министерката за одбрана Радмила Шекеринска го потпиша Меморандумот за разбирање со кој Македонија се приклучува кон „Smart Defence“ иницијативата за муниција за копнено војување. Земјите-членки на оваа иницијатива ќе добијат муниција по пониски цени, ќе ги хармонизираат залихите и ќе имплементираат заеднички решенија за складирање на долг рок.

Премиерот Зоран Заев вчера, првиот ден на Самитот го започна со учество на панелот „НАТО ангажмани: Дијалози на Самитот во Брисел“. Учеството на панелот се совпадна со соопштението кое во истиот момент беше објавено, дека земјите членки на НАТО донесоа одлука да ја поканат Македонија да ги отпочне завршните преговори за полноправно членство во алијансата и македонската делегација беше пречекана со аплауз и одобрување од гостите и учесниците на панелот, соопштија од Владата.

Во дебатата на панелот, премиерот Заев одговарал на повеќе прашања и нагласил дека Република Македонија во изминатите години постојано работеше на подигање на стандардите и на имплементација на вредностите што ги негува алијансата.

Посебно внимание било посветено на Договорот за решавање на македонско-грчкиот спор за името и за стратегиско партнерство со Грција, со којшто се откочува зачленувањето на земјава во во Алијансата.

 


Македонија од ЕУ доби датум, ама и услови


Скопје, 29 јуни, 2018 - 10:42 (META) 

Премиерот Зоран Заев во своето обраќање  на тридневниот РОС-РОТ  семинар посветен на Евроатланската интеграција на Западен Балкан, кој се одржува во Собранието на Република Македонија, ја даде и следната изјава која ја сметаме за полувистина, пишува „Вистиномер.мк“

Дозволете на почетокот да споделам огромно задоволство за вчерашната одлука за добивање на датум за преговори со ЕУ, јуни 2019 година.Сакам да им честитам и на делегацијата на Албанија кои што исто така добија датум заедно со Македонија...

 [Извор: Веб-страница на Владата (од 1,20 до 1,40 мин.од видеото)   датум: 27.06.2018]

Образложение: 

Оваа изјава на претседателот на Владата Зоран Заев, во која тој го искажува своето огромно задоволство од одлуката за добивање датум за преговори со Европската унија во јуни 2019 година“ е делумно точна, бидејки Македонија доби условен датум за почеток на преговорите за членство во ЕУ.

Советот на министри на ЕУ ваквата одлука ја услови со одржување на реформскиот курс и притоа  очекува фокусот  да биде ставен на реформата на јавната администрација, борбата против корупцијата, судските реформи и реформата на разузнавачките служби.

Целиот текст можете да го прочитате на „Вистиномер.мк“.


Заев: Видовме каде ќе биде подигнато нашето знаме во НАТО


Го видовме местото каде треба да биде подигнато нашето знаме како 30-та членка на Алијансата. Тоа го чекаме од 2008 година, кога беше констатирано дека ги постигнавме стандардите. Оттогаш активно учествуваме на мисиите на НАТО за сузбивање на глобални терористички и ектремистички закани. Припадниците на АРМ добиваат доверба да бидат главни актери во сериозни безбедносни предизвици. Со мисиите растеа капацитетите на Армијата, рече премиерот Зоран Заев на прес-конференција на седиштето во НАТО во Брисел, пo неговата средба со генералниот секретар на НАТО, Јенс Столтенберг.

Тој рече дека се очекува поканата, а Македонија покажала дека се грижи за добрососедството со потпишување на договорите со Бугарија и Грција.

– Договорот со Грција го откочи нашиот прием во Алијансата и нашата земја го добива местото што го заслужува. Со Грција изградивме пријателство. Со Бугарија остваривме договор што долго се одложуваше и ќе ја продлабочи економската соработка – рече Заев.

Генералниот секретар на НАТО, Столтенберг, го поздрави договорот со Грција, кој го нарече производ на трпелива дипломатија.

– Топло ја поздравувам спогодбата за спорот за името. Тоа е големо постигање за Скопје и Атина и демонстрација на вредноста на трпеливата дипломатија. Откако ќе бидат завршени сите обврски од договорот за името ќе станете член на НАТО. Без исполнување на договорот нема да може да станете дел од НАТО – изјави Столтенберг.

Прашан за очекувањата од претстојниот Самит, тој рече дека верува оти земјата ќе биде поканета да почне пристапни преговори.

– Откако ќе ги завршиме пристапните преговори и ќе биде затворен договорот за името, тогаш земјата ќе стане полноправна членка, рече Столтенберг.