Груевски за „Траекторија“ ги спори СМС-пораките, СДСМ и СЈО можеле да ги менуваат


Скопје, 14 февруари, 2018 - 13:50 (META) 

Поранешниот премиер Никола Груевски во продолжението на рочиштето за случајот „Траекторија“ побара од судот да ги отфрли СМС-пораките како недозволен доказ, бидејќи, како што рече, не може да се утврди нивната автентичност и оти многу лесно може да се манипулира нивната содржина. Тој рече дека е можно тоа да се правело и во СДСМ и во Специјалното јавно обвинителство (СЈО)

– За ова не треба никакво посебно знаење, доволен е компјутер со програма со која може да се отвори пораката, да се менува текстот без да оставите трага – рече Груевски обраќајќи се пред судот.

Тој рече дека пред Специјалното јавно обвинителство да ги добие СМС-пораките тие биле кај СДСМ, кој, како што рече, е нивни жесток политички противник и „партија која сака да ни нанесе политичка штета и правни последици”.

Тој додаде дека е теоретски можно и во СЈО да била менувана содржината на СМС-пораките за да се поткрепи обвинението.

Груевски побара пред да биде продолжена постапката, судот да донесе формално решение во врска со одбиеното барање 13 од вкупно 315 прислушувани разговори да не бидат доказ во процесот, затоа што веќе се јавно објавени и се наоѓаат на интернет.

– Бараме да имаме еднаков третман како оној што од овој суд му се дава на Заев – рече поранешниот претседател на ВМРО-ДПМНЕ и поранешен премиер.

Груевски рече оти разбира дека судот работи под политички притисок и побара да работи по закон и како што пишува во законот. Тој ова го наведе во контекст на приговорот на адвокатите дека навреме, односно во рок од еден до три дена, не им се доставуваат цд-та со записникот од рочиштата. Зборуваше и за барањето да бидат отфрлени вештачењата во овој предмет, бидејќи, како што рече се направени од вештаци без лиценци и од фирма која е странска експозитура, а што според македонската легислатива било незаконски.

На предлозите на Груевски, обвинителката од СЈО, Лиле Стефанова, рече дека тој само од мобилен телефон го читал предлогот што до судот го достави неговиот адвокат Димитар Дангов, а којшто судот веќе го одбил.

Стефанова нагласи и оти таа повеќе нема да се произнесува по предлози и приговори коишто се повторуваат и побара од судот, доколку тоа повторно се случи, на адвокатите да им биде одземен зборот.

На продолжението на денешното рочиште, на кое Груевски честопати приговараше, судијата Бошевски рече дека ќе им овозможи услови на адвокатите да ги слушаат снимките на бомбите и да направат препис во судот, а Груевски остана на барањето да им биде доставена и копија од таканаречените бомби.

Следното рочиште Бошевски го закажа за 1 март, а на терминот остана и покрај инсистирањето на адвокатот Дангов, кој бараше нов датум, бидејќи од 28 февруари до 5 март ќе бил во странство.


„Тенк“: Груевски и Јанкулоски не ги признаваат „бомбите“, вештачењата и надлежноста на СЈО


Скопје, 12 февруари, 2018 - 14:14 (META) 

Адвокатите на поранешниот премиер и лидер на ВМРО-ДПМНЕ, Никола Груевски, на денешното рочиште за набавката на „мерцедесот“ од 600 илјади евра, побараа од судот веќе објавените прислушувани разговори за случајот „Тенк“, да не бидат доказ во судскиот процес.

На денешното рочиште во Кривичниот суд во Скопје, покрај Груевски, беа присутни и другите двајца обвинети – екс министерката за внатрешни работи, Гордана Јанкулоска и поранешниот помошник-министер во МВР, Ѓоко Поповски.

Адвокатот Димитар Дангов рече дека четири од вкупно осум од незаконски прислушувани снимки се објавени на видео-сервисот „Јутјуб“ и како такви „се контаминирани“ поради што не смеат да се изведуваат како доказ.

Одбраната на обвинетите во текот денешната расправа ја оспори и надлежноста на Специјалното јавно обвинителство за овој случај.

Обвинителите на СЈО, Ленче Ристоска и Стевчо Донев се повика на одлуката на Апелацискиот суд Скопје, според која, „бомбите“ можат да се корист како доказ во овој случај, а ги повикаа обвинетите и нивните адвокати ако сакаат уште денеска да дојдат во СЈО и да ги слушнат разговорите.

Адвокатите на Груевски и Јанкулоска ги оспорија и двете вештачења за набавката на „мерцедесот“, што биле направени по барање на СЈО.

Според одбраната, на едниот вештак му била истечена лиценцата, додека другото го правел вештакот Тале Герамитчиоски, кој, како што рекоа, бил поранешен пратеник и министер од СДСМ.

На ова реагираше и обвинетитата Јанкулоска, која му се обрати на судот.

– Постои објективна оправданост и сомнеж во објективноста на вештачењата во однос на политичката кариера на вештакот Тале Герамичиоски и управителот на компанијата која била ангажирана, бидејќи токму во тој период исполнувале високи политички функции како избрани или именувани лица на предлог на СДСМ, а и јас исто така во тој период извршував високи функции во ВМРО-ДПМНЕ. Затоа барам од судот да го земе предвид овој објективен сомнеж бидејќи нивниот политички ангажман го загрозува моето право на правично судење – рече Јанкулоска.

Обвинителите на СЈО одговорија дека на вештакот му била продолжена лиценцата и за тоа приложија доказ, додека за партиската определба на Герамитчиоски рекоа дека не сакаат да коментираат оти тоа била негова лична определба.

По ова судијката Добрила Кацарска даде пауза од еден час, во која судот треба да одлучи по предлозите на одбраната.

Во случајот „Тенк“ , за набавката на „мерцедесот“ од 600 илјади евра, Јанкулоска и Поповски се товарат за кривичното дело „злоупотреба на службената положба и овластување“, додека поранешниот премиер е обвинет „за примање награда за противзаконито влијание“.


Тригодишнина од првата „бомба“: Разговорите кои ја потресоа и ја променија Македонија


Скопје, 9 февруари, 2018 - 14:01 (META) 

Со објавувањето на првиот комплет прислушувани разговори на 9 февруари 2015 година, по долго најавување во претходниот период, претседателот на тогаш опозициската партија СДСМ, Зоран Заев, предизвика лавина на настани и политички поместувања што после 11 години, минатата година ја симна од власта ВМРО-ДПМНЕ.

Додека уште траеше објавувањето на бомбите, СДСМ почна да поднесува кривични пријави против државни функционери почнувајќи од премиерот и претседател на ВМРО-ДПМНЕ, Никола Груевски, и министри и функционери на партијата, како и против директори на јавни претпријатија.

  • Од 20 до 22 април, од 3 до 5 мај, од 17 до 20 мај, на 19 јуни 2015 година групата експерти предводена од поранешниот директор на Директоратот за Западен Балкан, Рајнхард Прибе, по теренските посети на земјата го објави својот прв извештај. 
  • На 19 мај преговорите помеѓу Груевски и Заев завршуваат со неуспех. Во текот на мај се одржани две неуспешни лидерски средби.
  • На 11 јуни 2015 година во Брисел се одржани неуспешни преговори за излез од политичката криза во земјата помеѓу еврокомесарот Јоханес Хан, амбасадорите на ЕУ и САД во Скопје, и лидерите на македонските партии.
  • На 2 јуни се одржува лидерската средба на Никола Груевски, Зоран Заев, Али Ахмети и Мендух Тачи во Пржино, при што е составен Договорот од Пржино.
  • На 15 јули со ставање потписи на протоколот се официјализира Договорот од Пржино. Потоа следуваат средби на работни групи на партиите кои ги договараат деталите за точките на договорот, под водство на белгискиот олеснувач Петер Ванхауте.
  • На 1 септември 2015 опозицијата предводена од СДСМ се врати во Собранието.
  • На 15 септември Собранието го донесе законот за Специјално јавно обвинителство. Истиот ден, Советот на јавните обвинители ја избра Катица Јанева за прв човек на новоформираната институција.
  • Во Владата на 11 ноември 2015 година влегуваат двајца министри од СДСМ и тројца заменици министри, кои се во неа до 18 мај 2016.
  • На 15 јануари 2016 година Никола Груевски поднесува оставка на премиерската функција. Таа е прифатена од Собранието на 18 јануари, а на неговото место како технички премиер застанува Емил Димитриев.
  • Кон средината на јануари 2016 година, во Пржино е одржана повторна средба помеѓу лидерите на четирите најголеми политички партии во Македонија, со посредство на еврокомесарот Јоханес Хан.
  • На 12 февруари 2016 година СЈО отвори истражна постапка за својот прв случај, под кодно име „Титаник“, за изборни нерегуларности.
  • На 12 април 2016 претседателот на државата, Ѓорге Иванов, прогласи амнестија. По протестите, на 27 мај претседателот ја повлече одлуката за помилување за 22 најекспонирани политичари, а на 6 јуни и сите преостанати одлуки за помилување.
  • Една година по првиот договор од Пржино, на 20 јули 2016 четирите политички партии одржаа втора средба, наречена Пржино 2.
  • На 2 септември 2016 година во техничката влада влегуваат повторно министри од опозицијата.
  • На 18 октомври 2016 година претседателот на Собранието Трајко Вељаноски распишува предвремени парламентарни избори.
  • Изборите се одржуваат на 11 декември 2016 година, по што лидерот на СДСМ, Зоран Заев, формира парламентарно мнозинство помеѓу партиите СДСМ, ДУИ, Беса и Алијанса за Албанците.
  • Претседателот на Република Македонија, Ѓорге Иванов, му го дава мандатот на Никола Груевски во јануари 2017 година, но тој долго време не успева да формира коалиција. Иванов одбива да го даде мандатот на Заев, но по долги притисоци тоа се случува на 17 мај 2017 година.
  • Вечерта пред полноќ на 31 мај 2017 година Собранието на Македонија со 62 гласа „за“ ја избра владата на Заев.
  • На 1 декември 2017 година Никола Груевски ја најавува и оставката на претседателското место во ВМРО-ДПМНЕ.
  • На 23 декември на партискиот конгрес во Валандово, Христијан Мицкоски е избран за нов претседател на ВМРО-ДПМНЕ.

Почна судењето за „Космос“, Груевски и Јанакиески велат дека не се виновни


Скопје, 24 јануари, 2018 - 11:28 (META) 

Во Основниот суд Скопје 1 претпладнево почна судењето за случајот ТНТ покренат од Специјалното јавно обвинителство (СЈО), во кое главни обвинети се поранешниот премиер и поранешен претседател на ВМРО-ДПМНЕ, Никола Груевски, поранешниот министер за траснпорт и врски Миле Јанакиески и поранешниот градоначалник на општина Гази Баба Тони Трајковски. Покрај нив, обвинети се уште четири лица за уривањето на комплексот „Космос“ на Фијат Цаноски, кој исто така дојде во судот.

Во своите искази, и Груевски и Јанакиески и Трајковски, но и останатите четиримина обвинети, рекоа дека не се виновни по ниту една точка од обвинението. Цаноски, пак, рече дека ќе бара отштета од обвинетите.

На почетокот, адвокатот Димитар Дангов даде приговор дека двете камери со коишто ќе се снима судењето се „свадбарски“ и дека не се дел од АКМИС-системот, односно она што го снимаат, не може директно да се внесе во записникот.

– Поради ова, судот не може да ги спроведе одредбите од Законот за кривична постапка и нема услови за водење на постапката – рече Дангов.

Судијата Огнен Ставрев рече дека приговорот е неоснован и дека камерите се в ред, па се што снимаат ќе биде внесено во записникот.

Забелешка имаше и адвокатот Боро Тасевски, кој побара од судот првин да ја расчисти ситуацијата дали снимките од прислушуваните разговори се доказ или не. Тој рече оти одбраната смета дека „бомбите“ со правосилна одлука на Кривичниот суд се издвоени од доказниот материјал.

Обвинителот од СЈО, Бурим Рустеми, пак, посочи дека со одлука на Апелацискиот суд, „бомбите“ може да се користат како доказ.

Оваа одлука беше донесена на 4 ноември лани.

Судијата Ставрев потоа истакна дека одбраната ќе ги добие сите материјали вклучително и „бомбите“.

Поранешниот министер за транспорт и врски, Миле Јанакиески, при читањето на генералиите на обвинетите, даде забелешка дека повеќе не е вработен во партијата ВМРО-ДПМНЕ, туку во компанијата „Пелистерка“.

Обвинителот на СЈО, Рустеми, во воведните зборови нагласи дека Груевски, како тогашен премиер и лидер на ВМРО-ДПМНЕ, и Јанакиески, како министер и висок функционер на партијата, незаконски го срушиле комплексот „Космос“ на Цаноски, само затоа што тој, како претседател на Партијата за европска иднина, одлучил да ја напушти коалицијата на ВМРО-ДПМНЕ и склучил коалиција со СДСМ за изборите во јуни 2011 година.

– Груевски и Јанакиески одмаздата ја сториле преку институциите на централната и локалната власт и со тоа го оштетиле Цаноски за 16 милиони евра. Ова ќе го докажеме преку исказите на Цаноски и на другите сведоци, аудио записите од телефонските разговори меѓу Груевски и Јанакиески, СМС пораките испратени до Јанакиески од сега покојниот Фиданчо Илиевски, преку стручните мислења од Архитектонскиот факултет и преку урбанистичките и екомско-финанските вештачења на документацијата – рече обвинителот на СЈО во обемниот говор.


Апелација дозволи „бомбите“ да се користат како докази во „Тортура“


Скопје, 29 ноември, 2017 - 13:07 (META) 

Апелацискиот суд денеска на јавна седница донесе одлука дека прислушуваните материјали во предметот „Тортура“ на Специјалното јавно обвинителство, можат да се користат како докази.

„Тортура“ се однесува на случајот со апсењето на претседателот на Обединети за Македонија, Љубе Бошкоски, во кој првообвинет е поранешниот директор на УБК, Сашо Мијалков, а второобвинет е поранешниот командант на „Алфите“, Ивица Антевски-Пуки.

Обвинетите се товарат за мачење и за друго сурово, нечовечко постапување и казнување.


Апелација одлучи две „бомби“ да бидат доказ за случајот „Титаник 2“


Скопје, 22 ноември, 2017 - 11:50 (META) 

Апелацискиот суд денеска соопшти дека две снимки од преслушуваните разговори кои беа јавно објавени ќе бидат доказ за предметот „Титаник 2“, во кој обвинети се лидерот на ДПА, Мендух Тачи, и поранешниот директор на УБК, Сашо Мијалков, поранечните членови на ДИК, Бедредин Ибраими, Анета Стефановска и Влатко Сајковски, актуелниот член на ДИК, Сашо Срцев, како и петте судии на Управниот суд: Билјана Никодиновска-Петровска, Лидија Ивановска, Благородна Аранѓелова, Газмент Фејзули и Анета Џигерова.

Судиите од Апелацискиот суд по вчерашната седница одлучија да бидат прифатени како доказ двете снимки, од кои на едната се слуша како Мијалков и Тачи се договараат за гласање по однос на приговори на изборите во ДИК.

На вчерашната седница на Апелацискиот суд присуствуваа специјалните обвинители Фатиме Фетаи и Гаврил Бубевски, но не и одбраната на обвинетите, која не се појави на јавната седница.

Следната недела Апелацискиот суд ќе одлучува дали бомбите ќе бидат доказен материјал за случаите „Титаник“ и „Тортура“.


Апелација ја одложи седницата на која ќе решава дали „бомбите“ се докази за „Тендери“


Скопје, 31 октомври, 2017 - 15:18 (META) 

Поради службени обврски на претседателката на Апелацискиот суд, Лилјана Ивановска-Шопова, одложена e денешната јавна седница на која требаше да се расправа за тоа дали „бомбите“, што Основниот суд Скопје 1 ги отфрли како неважечки, може да се користат како доказ во предметот „Тендери“.

Седницата е одложена за утре во 9.30 часот.

Од тројцата судии кои треба да одлучуваат за овој предмет, на јавната седница присуствуваа судиите Јани Нича и Африм Фидани, како и четворицата адвокати што ги застапуваат обвинетите.

Ексминистерката е обвинета во предметот „Тендери“ за малверзации со тендерот за извршување градежни работи во Музејот на ВМРО, од проектот „Скопје 2014“, со што буџетот, според СЈО, бил оштетен за речиси 54 милиони денари.

Освен Канческа-Милевска, во „Тендери“ обвинети се и Лидија Лазарова-Цветковска и Јулијана Угриновска.


Никола Груевски останува без пасош, „бомбите“ отфрлени како докази во три случаи


Скопје, 27 септември, 2017 - 12:00 (META) 

Кривичниот совет на одделението за организиран криминал и корупција при Основниот суд Скопје 1, не го прифатил барањето на Никола Груевски да му биде вратен пасошот, објави судот на својaта веб-страница. Истовремено, прислушуваните разговори се отстранети од доказниот материјал во три случаи, со образложение дека се незаконски прибавени.

Освен Груевски, пасошите си ги бараа и поранешниот шеф на тајната полиција, Сашо Мијалков, и неговиот шеф на кабинет, Тони Јакимовски. СЈО бараше притвор за Груевски за случајот „Титаник“, но судот му одреди мерки за претпазливост.

Во одлуката се вели дека обвинетиот Груевски, односно неговите адвокати, кои го поднеле барањето за враќање на пасошот, имаат право на жалба до Апелацискиот суд во рок од три дена.

Истовремено, Советот за оценка на обвинителен акт на Основниот суд Скопје 1 решил да ги издвои „бомбите“ од случајот „Тендери“, по обвинението од СЈО. Советот проценил дека телефонските разговори се доказ прибавен на незаконит начин и со кршење на правата и слободите утврдени со Уставот на Република Македонија. Идентична одлука е донесена и за случаите „Топлик“ и „Тортура“.

Случајот „Тендери“ е за малверзации со тендерот за извршување градежни работи во Музејот на ВМРО, од проектот „Скопје 2014“, „Топлик“ – за елитната населба „Сончев град“, а „Тортура“ се однесува на апсењето на Љубе Бошкоски.

Деталната одлука ќе биде деновиве објавена на веб-страницата на судот, но без податоци за идентитетот на судиите што ги донеле одлуките.


Илјадници луѓе евакуирани во Москва поради дојави за подметнати бомби


Москва, 13 септември, 2017 - 18:26 (META) 

Повеќе од 20.000 лица денеска биле евакуирани од трговските центри, железничките станици, театри и од универзитети во Москва поради речиси симултани дојави дека на повеќе места во градот е поставен експлозив, јавуваат светските агенции.

Иако се претпоставува дека станува збор за лажни дојави, полициски специјалци со кучиња трагачи ги пребаруваат местата. Според информациите на агенциите, досега биле пребарани пет локации, но не бил најден експлозив.

Слични дојави за поставен експлозив изминатите денови имаше и во неколку други градови во Русија.

Првата дојава и евакуација се случи на 10 септември, во канцеларијата на градоначалникот на Омск, кога непознато лице се јавило на телефон и пријавило дека во зградата има бомба.

Зградата беше евакуирана и пребарана, но не беше најден никаков експлозив.

Вчера повеќе од 5.700 ученици и наставен кадар во седум училишта во уралскиот град Перм во Русија беа евакуирани поради дојава и закана со подметната бомба.


Полицијата го приведе Љупчо Палевски – Палчо по барање на СЈО


Скопје, 15 август, 2017 - 22:53 (META) 

Скопскиот бизнисмен Љупчо Палевски- Палчо вечерва е приведен по барање на Специјалното јавно обвинителство, објави „Телевизија 24“, повикувајќи се на извори од СЈО.

Телевизијата јавува дека СЈО веќе води предистражна постапка против Палевски, а се шпекулира дека е приведен поради тоа што ја „Јутуб“ објави прислушувани приватни разговори на јавни личности, меѓу кои новинари и бизнисмени.

Уредникот на телевизија „Сител“, Драган Павловиќ-Латас во СЈО пријави вакви злоупотреби, а на профилот Палевски се појавија и снимки од бизнисменот Јордан Камчев.