Азески – Мицкоски: ВМРО-ДПМНЕ да не ги кочи законите кои се за подобрување на економијата


Скопје, 1 март, 2018 - 13:26 (META) 

Раководството на ВМРО-ДПМНЕ предводено од претседателот на партијата Христијан Мицкоски, денеска се сретнаа со претседателот на Стопанска комора на Македонија, Бранко Азески.

Целта, како што рече Мицкоски, е како опозициска партија да изготват поконкурентна и посоодветна економска програма, за да ги освојат симпатиите на бизнис-заедницата.

– Како ново раководство, ги презентиравме нашите заложби и планови како економски ќе делуваме во иднина и кои ќе бидат економските политики кои што нашата партија планира да ги презентира пред македонската јавноста. Финалната верзија на тие политики ќе биде донесена во соработка и на барање на бизнис-заедницата. За нас како ВМРО-ДПМНЕ е значајно да добиваме правилна навигација, за да видиме какви се нивните потреби и да најдеме решенија, а понатаму кога ќе ја формираме следната македонска влада тоа да го примениме – рече Мицкоски.

Претседателот на Стопанска комора на Македонија, Бранко Азески рече дека од нив е побарано да не ги кочат законите во Собранието кои се однесуваат на економијата во државата и подобрување на стандардот на граѓаните и дека комуникацијата ќе продолжи и во наредниот период.

-Ги замоливме во името на најголемата и најзначајната бизнис-заедница во државата, економските закони во Собрание и законите кои влијаат на квалитетот на живот на граѓаните да добијат поддршка и приоритет и покрај политичките превирања кои постојат и различните погледи во државата. Нашите предлози кои одат до Влада ќе ги испраќаме и до ВМРО-ДПМНЕ, да бидат во тек и да дадат свое мислење. Нивните предлози исто така ќе доаѓаат во Стопанската комора, што исто така е напредок. Добивме уверување од Мицкоски дека ова раководство на ВМРО-ДПМНЕ ќе биде бизнис определено – додаде Азески.


Заев со бизнисмени во Анкара: Трговијата да достигне милијарда евра


Анкара, 11 февруари, 2018 - 21:20 (META) 

Постојат можности за унапредување на економската соработка меѓу Република Македонија и Република Турција, констатирано е заеднички на вечерата на премиерот Зоран Заев со бизнисмени од Турција, организирана вечерва во Анкара, од ТОББ (TOBB) – Сојузот на стопански комори и берзи на Република Турција.

-Тука сме да пренесам отворена покана за инвестирање во Македонија. Свесен сум дека мојата земја ќе има напредок ако се развиваат приватниот сектор и инвестициите. Сакам да ви пренесам дека постои амбиент за инвестирање во Република Македонија. Со околу 35 инвеститори сме во пред договор, со 10 имаме потпишано договори, а има 100-ци заинтересирани – рече премиерот Заев пред бизнисмените од Турција.

Тој посочи дека Турција е 6. земја по големина на инвестиции во Македонија, дека 456 милиони евра е трговската размена и порача дека со перспективите за поголема соработка, може да има и поголем профит за компаниите и нови работни места за граѓаните на Македонија.

-Нашата цел е за неколку години трговијата со Турција да биде една милијарда евра – рече премиерот Заев.

Како области за продлабочување на соработката ги наведе земјоделството, енергетиката, градежништвото. Премиерот Заев рече дека правна регулатива за соработка меѓу двете  држави има, но дека ќе има унапредување на постојните договори, како тој за слободна трговија.

Потпретседателот на ХОББ, Фаик Јавуз, порача дека Турција и Македонија се големи пријатели и дека тие, како граѓани и како бизнис заедница ја поддржуваат Македонија во нејзиниот развој.

-Има околу 100 турски инвестиции во Македонија, но има уште многу што да се направи. Македонија се наоѓа во срцето на Југоисточна Европа, цели кон ЕУ, работи на тој пат, тоа значи отворен пазар и од 650 милиони луѓе – рече потпретседателот на ХОББ, Јавуз, охрабрувајки ги бизнисмените за инвестиции во нашата држава.

Претседателот на Владата на Република Македонија, Зоран Заев од вечерва е во официјална посета на Република Турција придружуван од министерот без ресор задолжен за странски инвестиции, Аднан Ќахил, пратениците во Собранието на Република Македонија, Енес Ибраими и Јусуф Хасан и државниот секретар во МНР, Виктор Димовски. Премиерот Заев, за време на посетата на Анкара ќе има средби на највисоко владино и државно ниво.


Заев предлага заеднички компании со Косово за струјата, железницата и авиосообраќајот


Приштина, 12 декември, 2017 - 17:01 (META) 

Македонскиот премиер Зоран Заев на денешната средба во Приштина со бизнисмените од Косово, потсетил дека Македонија и Косово покренале иницијатива за формирање на заедничка економска зона, царинска унија и олеснување на граничните процедури и порачал дека двете земји имаат заеднички интерес за формирање заеднички компании и оператори за менаџирање на енергетската мрежа, железничкиот и авио-сообраќајот, се вели во официјалното соопштение од македонската влада.

Заев рекол и дека двете влади треба да изградат заеднички царински терминал со кој царинската постапка би се поедноставила и повикал на зголемување на трговската размена.

– Искрено ги повикуваме сите да го инвестираат својот капитал во Македонија,  за што ќе добијат еднакви шанси и можности од државата.  Косово е еден од најзначајните трговски партнери на Македонија, трговската размена се одвива слободно, без царини и во истата Македонија остварува суфицит – рекол Заев.

Заев рекол дека се настојува да се следи динамиката на работите од косовска страна за автопатот Скопје – Приштина, кој беше предложен пред повеќе од една деценија, а чиј прв дел, од Приштина до Урошевац беше пуштен во употреба на самиот крај на минатата година, а на македонска страна не е направено ништо.

– Се надеваме наскоро да го завршиме автопатот Скопје – Приштина. Настојуваме делницата Скопје – Блаце, во должина од 12,5 км, да ја следи динамиката на работите на делницата од Приштина до границата. Новиот автопат ќе ја олесни комуникацијата меѓу Скопје и Приштина, ќе го зголеми транспортот и трговијата, и ќе ја унапреди економската соработка – рекол Заев.


„Самит 100“ ќе почне утре, ќе учествуваат бизнисмени и премиери на држави од регионот


Скопје, 15 октомври, 2017 - 18:01 (META) 

Шестиот годишен „Самит 100“ за бизнис-лидери од Југоисточна Европа ќе се одржи утре и задутре (16 и 17 октомври) во хотел „Мериот“ во Скопје.

На овој настан ќе учествуваат 100 реномирани бизнис-лидери, но и премиерите на Албанија, Еди Рама, на Црна Гора, Душко Марковиќ, претседавачот со советот на министри на Босна и Херцеговина, Денис Звиздиќ, како и македонскиот премиер, Зоран Заев.

Посебно обраќање на овој исклучително значаен регионален настан ќе има и еврокомесарката за транспорт, Виолета Булц.

„Самит 100“ на бизнис-лидерите на Југоисточна Европа првпат се одржува во Скопје. Централната тема оваа година е „Поврзаност“, која ќе се разгледува низ настапи, презентации, работилници и низ панел-дебати во сферите како што се транспортот и слободната трговија, зелен Балкан, инфраструктура, брендирање и промоција на регионот, мобилност на луѓе и на идеи, енергија и дигитализација.


Пет премиери од регионот и 100 бизнисмени на „Самитот 100“ во Скопје


Скопје, 9 октомври, 2017 - 14:17 (META) 

Шестиот годишен „Самит 100“ за бизнис-лидери од Југоисточна Европа ќе се одржи во Скопје на 16 и 17 октомври. На овој настан ќе учествуваат 100 реномирани бизнис-лидери, пет премиери на држави во регионот – Албанија, Црна Гора, Косово и Хрватска, Македонија – како и претставници од Европската комисија.

Претседателот на управниот одбор на „Самит 100“ и генерален директор на „Алкалоид“, Живко Мукаетов, на прес-конференција рече дека овој настан е уникатен затоа што отвора можности за поврзаност и за искористување на заедничкиот потенцијал на земјите од регионот.

– Гледано во светски рамки, нашите пазари се мали, но обединувајќи ги интересите и капцитетите во заеднички настап, можеме да бидеме сериозно меѓународно конкурентни и истовремено да го свртиме вниманието на глобалниот бизнис кон инвестицискиот потенцијал на земјите од Западен Балкан, Хрватска и од Словенија – изјави Мукаетов.

Проектот „Едисон“ е една од главните теми за која ќе се разговара на овој настан, а истиот предвидува електрификација на регионот, односно поставување на полначи за електрични автомобили во сите земји во регионот.

Мукатов додаде дека од досегашната организација на овој „Самит 100“, произлегол проектот „Феникс“, со кој градежните компании од регионот се здружиле за учество на трети пазари и на просторот на поранешниот СССР.

Програмскиот директор на „Самит 100“, Јелена Радуловиќ, информираше за содржината на панел-дискусиите што ќе се одржат, но како што кажа, целта е да се искористат предностите на заедничкиот настап на регионот во светски рамки за да се забрзаат порастот и развојот на економијата.

Една од целите е намалување и унифицирање на царинските процедури на земјите од регионот кои можат да бидат препознатливи по добрата храна и по туризмот.

– Учесниците ќе имаат можност да дискутираат за важноста на поврзувањето на регионот, слободното движење на стоките и на услугите и за тоа како локалните идеи можат да достигнат глобален успех. Работилниците ќе бидат посветени на енергетиката, економијата базирана на знаење, брендирање на производите од секторот храна, како и на дигитална економија и туризам – изјави Радуловиќ.

На премиерите од регионот ќе им бидат претставени заклучоците, а тие ќе го дадат својот осврт на „Новиот договор за новата доба“, кој воедно е и слоган на овој самит.

Еден од главните говорници е еврокомесарката за транспорт, Виолета Бул, претставници на водечките компании како „Горење“, „Бе-Ем-Ве“, „Подравка“, „Филип Морис“, „Убер“, „Бамби“, но и претставници на Европската банка за обнова и развој, Светска банка и др.


Немало прислушување политичари и бизнисмени во Хрватска, вели министер од БИХ


Сараево, 26 септември, 2017 - 18:48 (META) 

Директорот на Безбедносно-разузнавачката агенција на Хрватска, Даниел Маркиќ, денеска се сретнал со својот колега од БИХ, Осман Мехмедагиќ, откако хрватските медиуми објавија дека Разузнавачко-безбедносната агенција на БИХ (ОСА) прислушувала хрватски бизнисмени и политичари од Хрватска и од БИХ.

По средбата, министерот за безбедност на Босна и Херцеговина, Драган Мектиќ, рече оти челниците на разузнавачките агенции на БИХ и на Хрватска заклучиле дека немало незаконско прислушување на хрватски политичари и бизнисмени.

– Нема никаква разузнавачка афера и сите служби работат во рамките на законот. Констатирано е дека соработката меѓу двете служби е многу добра и ќе продолжи и во иднина. Исто така е констатирано дека на некој начин треба да се „спушти“ медиумски испровоцираната анкета – вели Мектиќ.

Хрватскиот неделник „Национал“ неодамна објави документи кои наводно потекнуваат од ОСА, за прислушување на хрватски бизнисмени и политичари. „Национал“ наведе дека ОСА веќе подолго време илегално спроведувала мерки за следење и за прислушување. Весникот тврди дека врз основа на увидот во повеќе тајни извештаи на ОСА, имаат докази дека таа служба „води специјална војна против Хрватска, хрватскиот премиер Андреј Пленковиќ и надворешната политика на хрватската Влада, но и хрватскиот народ во БИХ“.


Бизнисмените од дијаспората ќе помогнат во економскиот развој на Македонија


Њујорк, 19 септември, 2017 - 11:44 (META) 

Премиерот Зоран Заев, придружуван од шефот на македонската дипломатија, Никола Димитров, и од министерот без ресор задолжен за дијаспората, Едмонд Адеми, во Њујорк се сретна со претседателот на групата „Македонија 2025“, Роберт Арсов, познатиот бизнисмен од дијаспората, Џон Битов, како и со повеќемина други претставници на оваа група, соопшти владината прес-служба.

– Владата на Република Македонија се отвори кон сите кои можат да придонесат за економски напредок на државата. Дијаспората и конкретно активирањето на претставниците на групата „МК 2025“ во Македонија, ќе значи силен импулс за нови инвестиции во државата, особено зашто станува збор за почитувани и успешни бизнисмени на светско ниво – рекол Заев на средбата.

Претставниците на групата „МК 2025“, како што информираат од Владата, изразиле поддршка на реформските политики во кои гледаат реална можност за вклучување и за придонес на дијаспората за развој на економијата во Македонија.

Инаку, за денеска попладне предвидени се првите конкретни активности поврзани со 72. Генерално собрание на Обединетите нации во Њујорк, на кои ќе учествува и македонската делегација предводена од премиерот Заев.


УЈП објави нова листа на должници


Скопје, 11 август, 2017 - 12:16 (META) 

Управата за јавни приходи (УЈП) објави нова листа на должници за долгови доспеани до 31 април и неплатени до 31 јули, на основа на данок на додадена вредност, данок на добивка, персонален данок на доход, придонеси од задолжително социјално осигурување, акцизи и царини, за кои вкупниот износ е повисок од 120.000 денари за физичките лица и за самостојни вршители на дејност и повисок од 300.000 денари за правните лица.

На листата има повеќе од 4.000 должници, меѓу кои има државни компании, но и познати бизнисмени и приватни компании.


Мерко во прва официјална посета на Албанија, ќе ги претстави можностите за инвестирање


Тирана, 2 август, 2017 - 16:56 (META) 

Министерот без ресор задолжен за странски инвестиции, Рамиз Мерко, од денеска е во прва официјална посета на Албанија, каде што ќе престојува до 4 август.

Мерко ќе се сретне со претседателот на Албанија, Илир Мета, со претставници на стопанските комори и со бизнисмени на кои ќе им го претстави моделот за привлекување странски инвестиции.

Во делегацијата што ја предводи Мерко се и заменик-директорот на технолошко-индустриски развојни зони, Асип Усеини, како и директорот на меѓународната канцеларија „ФМ Консалтинг“, Фатос Мустафа.

Пред потенцијалните инвеститори ќе бидат презентирани субвенциите за компаниите што инвестираат во технолошко-индустриските развојни зони и надвор од нив.


Арсовска: Бизнис-мерките што ги испорачавме се приоритетни, ги баравме и претходно


Скопје, 28 јули, 2017 - 10:20 (META) 

Владиниот економски тим предводен од премиерот Зоран Заев изминатиот период оствари средби со претставниците на стопанските комори во државата, за да се запознае со барањата на бизнисмените и да се увиди потребата од носење итни мерки за подобро функционирање на бизнисот.

Вчера тие одржаа средба со Стопанска комора на Северозападна Македонија, а претходно имаа деловен појадок со Сојузот на стопански комори (ССК), на кој до Владата беа испорачани 75 мерки. Претседателката на ССК, Данела Арсовска, подателно ги објасни барањата на бизнис-заедницата и пречките со кои досега се соочувале.

На неoдамнешниот појадок со владините претставници, Сојузот на стопански комори испорача 75 мерки. Дали тие мерки сте ги барале и порано, но не бил слушнат гласот на бизнис-заедницата?

–  Економските мерки во најголем дел се во насока на хармонизација со препораките на ЕУ, спроведување на структурните реформи за подобрување на инвестициската клима во специфичните сектори, регионална економска интеграција и на приближување кон единствениот пазар на ЕУ. Треба да напоменеме дека за дел од мерките, можеби и најважните, сме апелирале и претходно. Тие се: поголемо вклучувањето на деловната заедница со свои предлози и мислења во измените и во носењето на законските решенија, воспоставување систем на работа на инспекциските служби за да се знае која документација е потребно да ја поседуваат компаниите, за да се овозможи простор за саморегулација и за да се превенираат репресивни мерки и казнувања. Најважно е регулирање на сивата економија, која не придонесува во буџетот, а во исто време е нелојална конкуренција на легално регистрираните субјекти. За важноста од имплементација на овие мерки зборувавме интензивно последните речиси пет години. Во услови на политичка криза изминатите три години, во која бизнисот многу тешко опстојуваше, особено последните шест месеци, немаше можност за воспоставување на јавно-приватен дијалог на стабилно тло.

Какви се очекувањата на бизнисмените од новата влада и дали реализацијата на мерките е со одредени рокови?

– Сакам да напоменам дека овие 75 мерки се приоритетни, но како резултат на отвореноста за соработка со Владата компаниите сè уште испраќаат свои предлози кои се доставени како дополнителни мерки од ССК, a кои произлегоа како заклучоци од заедничкиот состанок и тие се вредни за разгледување и за понатамошна можна имплементација. Роковите, во зависност од комплицираноста на материјата која е потребно да се регулира, се различни за секоја мерка. Но, тоа што е поважно е позитивниот пристап и расположеноста за нивно прифаќање и за имплементација.

Со кои предизвици се соочува бизнис-заедницата во моментов и дали политичката клима е во насока на развој на економијата?

– За справување со предизвиците со кои се соочува приватниот сектор, потребен е континуитет, долгорочни планови и стратегии, преку комуникација и отвореност на институциите во насока на заедничко креирање на идни политики за развој. Повеќе од 23.000 компании, кои се успешни во својата дејност, организирани во Сојузот со конструктивни предлози, придонесуваат за подобрување на деловната клима во земјата. Мерките кои премиерот Зоран Заев ги најави пред стопанствениците за унапредување на приватниот сектор даваат мотив да веруваме дека политиката е во насока на развој на економијата.