!Во периодот што претстои работиме на воведување систем за пристап и за претплата. За начинот на пристап и за претплатата ќе информираме дополнително. Содржините на „Мета“ до тогаш се слободни за преземање со задолжително цитирање и атрибуирање.

Акција на турската полиција за апсење на 70 војници поради поврзаност со Ѓулен


Анкара, 10 октомври, 2017 - 12:00 (META) 

Турската полиција денеска почнала акција за апсење на 70 војници обвинети за поврзаност со имамот Фетулах Ѓулен, кој живее во САД, а кого властите во Анката го обвинуваат дека го организирал минатогодишниот обид за воен удар, јавуваат турските агенции.

Акции против приврзаници на Ѓулен во Турција се спроведуваат речиси секој ден, веќе 15 месеци, а само минатата седмица беа приведени околу 800 лица.

Ѓулен досега ги демантираше сите обвинување дека стои зад обидот за воен удар, кој се случи во јули минатата година.

Цел на денешната полициска акција, која, според агенциите, се спроведува во градот Конија, во централниор дел на Анадолија, и во уште седум провинции, се и двајца полковници, седум капетани и 36 поручници.

Шеесет и двајца од осомничените се припадници на турското воздухопловство, а некои од нив се и пилоти. Полицијата врши претреси во нивните домови и на работните места.

Повеќе од 50.000 лица во притвор го чекаат судењето против нив поради повразност со Ѓулен, а 150.000 лица се отпуштени или суспендирани од работните места во јавниот и во приватниот сектор.

Обидот за воен удар во Турција се случи на 15 јули минатата година, а во судирите загинаа 250 лица.


Бочварски: Имаме обврска да го чуваме Штип за идните генерации


Штип, 10 септември, 2017 - 17:04 (META) 

Благој Бочварски, кандидатот на СДСМ за градоначалник на Штип, со неколку сопартијци денеска се вклучи во еколошка акција, чистејќи го локалитетот Мирјанина Црква.

– Имаме одговорност пред самите нас и пред идините генерации, да направиме добри дела за овој град, да работиме во интерес на граѓаните, да ја заштитиме животната средина и здравјето на нашите граѓани – рече Бочварски и вети дека ако победи, во Штип повеќе нема да има диви депонии.


Уапсени албански државјанки во ноќен клуб во Тетово


Тетово, 2 септември, 2017 - 11:14 (META) 

Синоќа полицијата привела четири албански и пет македонски државјани при акција спроведена во угостителскиот објект „Баци“ во Боговиње.

МВР информира дека во објектот имало три албански државјанки на возраст од 26 до 41 година, кои биле вработени како пејачки и танчерки, како и еден маж од Албанија.

Тие биле приведени и задржани во полициската станица во Тетово, по што биле предадени за понатамошна постапка на Отсекот за прекуграничен криминал, миграции, странци и реадмисија.

Во полиција биле приведени и сопственикот на објектот, Н.Ш.(33) од Боговиње, како и четирите македонски државјанки кои, исто така, биле ангажирани како пејачки, танчарки и забавувачки на гостите.


Во поплавите на југот на Азија настрадаа 600 лица


Њу Делхи, 20 август, 2017 - 16:02 (META) 

Околу 600 лица настрадаа во поплавите на југот на Азија каде што акцијата за спасување се уште трае. Во поплавите и свлечиштата предизвикани од нив, биле погодени повеќе од еден милион луѓе.

Властите на Индија побарале помош од војската во две области кои се најгусто населени, а во кои загинаа 55 лица. Во индиската држава Утар Прадеш речиси 100.000 луѓе, од своите домови биле префрлени во засолништа.Индиската држава Бихар е најтешко погодена, каде што бројот на жртвите се зголеми на 153.

Најмалку 20 од 28 милиони жители на Непал се погодени од поплавите, а се проценува дека настрадале 123 лица.

Неколку милиони луѓе во Непал, Бангладеш и Индија се соочуваат со недостаток на храна и постои опасност од заразни болести поради загадената вода. Меѓународниот комитет на Црвениот крст повика на итна акција поради хуманитарната криза на југот на Азија.


ЛП: Дивите продавачи ја загрозуваат безбедноста во сообраќајот


Скопје, 28 јули, 2017 - 12:05 (META) 

Либералната партија го поздрави барањето на Групацијата на пазари при Стопанската комора на Македонија за решавање на проблемот со дивите пазарџии, кои на улица, од камиони, продаваат сезонско овошје и зеленчук.

„Овие диви продавачи не само што нелегално тргуваат и создаваат нелојална конкуренција, туку и ја загрозуваат безбедноста во сообраќајот и дополнително ја загадуваат околината, создавајќи отпад од кој се шират разни болести. Финансиската загуба поради нивното неконтролирано и неконкурентно дејствување изнесува 20 отсто од вкупниот приход на организаторите на пазарите“, велат од Либералната партија.

Оттаму додаваат дека за да се стави крај на овој 25-годишен проблем со нелојалната конкуренција, потребна е континуирана акција на Министерството за внатрешни работи, пазарната и на комуналната инспекција, преку конфискација на стока, заплена на моторни возила и парични казни на дивите продавачи во скопските општини и во градот Скопје, како и во другите градови.


Во Охрид акција на „Супер радио“: Помалку автомобили, помалку метеж


Охрид, 16 јули, 2017 - 9:15 (META) 

Охридското „Супер радио“ ја почна акцијата „Помалку автомобили, помалку метеж“, со која ги повикува охриѓани колку што е можно помалку да ги користат автомобилите во текот на шпицот на сезоната, особено во центарот на градот.

– Идејата е да се обидеме сите заедно да го намалиме бројот на автомобили во центарот на градот. Ќе признаеме дека сите ние ги користиме автомобилите и кога треба и кога не треба и дека често седнуваме зад воланот и за минимални растојанија, со што се создава метеж, особено во централното градско подрачје. Да ги оставиме паркинг-местата за туристите и за оние кои навистина имаат потреба од тоа, особено во шпицот на сезоната, во текот на месеците јули и август. Фамозните катни гаражи се толку пати најавувани, но сепак остануваат само ветување за охриѓани – велат од „Супер радио“.

Додаваат дека ако веќе Охрид се декларира како туристички град, тогаш треба, барем во шпицот на сезоната, охриѓани да се откажат од минимум удобности за да може градот полесно да функционира.

Од „Супер радио“ најавија дека во текот на следната недела ќе испечатат и летоци кои ќе се делат во централното градско подрачје во знак на поддршка на акцијата и за подигнување на свеста кај граѓаните.

Акцијата ја поддржа и Советот за безбедност на сообраќајот во Општина Охрид.

„Зголемениот број на туристи и зголемен број на патнички и други моторни возила во Охрид, деновиве предизвикува исклучително интензивна сообраќајна фрекфенција, особено во централното градско подрачје. Поради тоа, до граѓаните на Охрид апелираме на исклучива нужност во користењето на сопствените патнички автомобили. Како општински Совет за безбедност во сообраќајот, ги замолуваме нашите сограѓани, своите патнички моторни возила да ги користат при крајни и неодложни потреби и крајно рестриктивно да ги користат возилата, пред сè во централното градско подрачје“, порача Советот.


Обвинителство: Разбиена досега најголема организирана група за криумчарење мигранти


Скопје, 11 јули, 2017 - 13:50 (META) 

Основното јавно обвинителство за гонење организиран криминал и корупција извести дека во текот на вчерашниот ден била спроведена координирана акција со МВР против организирана група за криумчарење мигранти, на подрачјето на повеќе населени места.

Притоа, по поднесената кривична пријава од МВР за 23 лица, од кои еден малолетник, а четворица државјани на Албанија, Обвинителството за 22 лица донело наредба за спроведување истражна постапка и до судијата за претходна постапка при Основниот суд Скопје 1 поднело барања за притвор. За малолетникот е поднесено барање за поведување подготвителна постапка и исто така е побаран притвор.

Тие 12 лица што се вчера приведени добиле 30-дневен притвор, а едно лице куќен притвор. Другите 10 лица се во бегство.


Град Скопје го исклучи осветлувањето како дел од акцијата „Часот на планетата Земја“


Скопје, 26 март, 2017 - 13:04 (META) 

Градот Скопје синоќа беше дел од глобалната акција „Часот на планетата Земја 2017“ и во времетраење од еден час го исклучи осветлувањето на неколку објекти и локации во центарот на градот.

Во периодот од 20.30 до 21.30 часот, Градот Скопје го исклучи осветлувањето на плоштадот Македонија и околу спомениците, Камениот мост, Скопската тврдина Кале, мостот Око и на Мостот на уметноста.

Вчеравечер, поддржувачите на акцијата „Часот на планетата Земја 2017“ во светот со симболично исклучување на светилките во времетраење од еден час испратија силна порака за спас на планетата и за намалување на климатските промени.

Оваа светска манифестација се спроведува во 170 држави во светот.


МВР открило организирана група за трговија со дрога


Скопје, 18 февруари, 2017 - 20:06 (META) 

МВР во вчерашна акција за сузбивање на уличното дилерство на дрога, открило криминална група составена од пет лица С.Р. (51), З.М.(29), М.Д. (26), М.М.(36) и З.С. (34) која набавувала и продавала наркотична дрога на нарко зависници.

„Според документираните сознанија во текот на минатата и оваа година криминалната група организирана од С.Р продавала кокаин за цена од 3.000 до 4.500 денари за едно пакување. Кокаинот бил набавуван од непознато лице од Србија во помали количини, со цел полесен и побезбеден транспорт на наркотичната дрога. С.Р ги ангажирал МД. и М.З. кои го продавале кокаинот на нарко зависници, а по продажбата редовно го известувале С.Р. за паричните средства кои биле добиени“, информира МВР.

Од судија на претходна постапка извршени се претреси на пет локации при што во домот на С.Р пронајдени биле едно пакување со бела прашкаста материја, 50 куршуми калибар 9 милиметри, автомобил марка „Голф“ 5 и три мобилни телефони. Во домот на З.М. одземени се четири пакувања со непозната бела прашкаста материја, 22 куршуми 5,56 милиметри, реденик со 12 патрони со различен калибар, 43 патрони со калибар 16 милиметри, куршум 7,65 милиметри, најлон кеса со непозната растителна материја, чинија со бела прашкаста материја и мобилен телефон. Во домот на М.М. одземени се седум банкноти од по 1.000 денари, две банкноти од по 500 денари и еден мобилен телефон.

МВР до надлежното Јавно обвинителство поднело кривична пријава за сторени кривични дела „неовластено производство и пуштање во промет на наркотични дроги, психотропни супстанции и прекурсори“ и „недозволено изработување, држење и тргување со оружје или распрскувачки материи“, а осомничените беа спроведени пред судија за претходна постапка.


ОЈО води постапка против организирана група за трговија со дрога


Скопје, 18 февруари, 2017 - 11:43 (META) 

Основното јавно обвинителство за гонење на организиран криминал и корупција соопшти дека во текот на вчерашниот ден во координација со Министерството за внатрешни работи – Оддел за организиран криминал е спроведена акција за откривање на организирана група што извршува нелегална трговија со дрога при што приведени се три лица.

„Работејќи на континуирано откривање и гонење на организираниот криминал, Основното јавно обвинителство за гонење на организиран криминал и корупција раководи со предистражната постапка за откривање на организирана група што извршува кривични дела на нелегална трговија со дрога. Акцијата е спроведена против криминална група на повеќе локации и во повеќе населени места при што се откриени наркотици и лишени се од слобода повеќе од три лица“, соопштија од ОЈО.

Од Обвинителството информираат дека во тек е целосното документирање на случајот по што јавноста ќе биде информирана за понатамошниот тек на постапката и преземените дејствија.