!На 1 февруари 2017 година, заврши промотивниот период на слободно користење на содржините на „Мета“. Во периодот што претстои го воведуваме новиот систем за пристап и за претплата. За начинот на пристап и за претплатата ќе информираме дополнително

Во Турција пронајден пилотот на урнатиот сириски борбен авион


Анкара, 5 март, 2017 - 10:00 (META) 

Турските власти денеска соопштија дека по девет часа спасувачка потрага, пронајден е пилотот на сирискиот борбен авион „миг-23“, кој вчера се урнал во близина на турско-сириската граница.

Авионот се урнал на сириската страна на границата, но пилотот, кој се катапултирал, успеал да се спушти во Турција.

Како што јавуваат турските медиуми, пилотот веднаш бил пренесен во болница, но засега не се откриваат детали за неговата здравствена состојба.

Исламистичката група „Ахрар аш Шам“ тврди дека го соборила авионот, кој изведувал бомбардирања во провинцијата Идлиб.


Денеска ќе се одбележат 13 години од смртта на поранешниот претседател Борис Трајковски


Скопје, 26 февруари, 2017 - 10:54 (META) 

Со повеќе настани денеска ќе се одбележат 13 години од смртта на поранешниот претседател Борис Трајковски, кој загина во авионска несреќа во близина на Мостар.

Цвеќе на гробот на Трајковски ќе положат членови од семејството на претседателот, повеќе делегации и граѓани.

Годишнината од смртта на претседателот Трајковски ќе биде одбележана и пред платото на Спортскиот центар „Борис Трајковски“ во Скопје.

Во авионска несреќа што се случи на 26 февруари 2004 година, освен претседателот, загинаа и осум члена на македонската делегација што патуваше на меѓународна конференција во Мостар.


Авион се урна во трговски центар во Мелбурн, пет лица загинаа


Мелбурн, 21 февруари, 2017 - 10:29 (META) 

Мал авион „бичкрафт“, во кој имало пет лица, се урна во трговски центар во близина на аеродромот „Есендон“ во Мелбурн.

Агенцијата АФП пренесе дека од местото каде што се урнал авионот се издигнува густ црн чад. Трговскиот центар не бил отворен кога се случила несреќата.

Австралиските власти не го соопштуваат точниот број на загинати, но потврдија дека во леталото што полетало од „Есендон“ кон островот Кинг имало пет лица.


Авион удри во елен на аеродром во Северна Каролина


Шарлот, 16 февруари, 2017 - 13:16 (META) 

Патнички авион на компанијата „Американ Игл“ удрил во елен при обидот да полета од аеродромот во Шарлот, во Северна Каролина.

Пилотот после судирот прогласил тревога, го откажал летот и го вратил авионот пред зградата на аеродромот, соопшти американската Федерална управа за авијација.

– Од леталото протекло гориво поради оштетување на резервоарот на крилото, предизвикано од ударот во елен, рече портпаролката на авиокомпанијата – Кејти Коди.

На снимките кои ги објавија локалните телевизии се гледа оштетување на десното крило, како пожарникари кои превентивно го прскале авионот со пена.

Ниту еден од 44 патници и четворицата членови на екипажот не се повредени.


Пронајдена и втората црна кутија од паднатиот руски авион


Москва, 28 декември, 2016 - 12:30 (META) 

Втората црна кутија од рускиот патнички авион „ту-154“, кој во неделата се урна во Црно Море, е пронајдена и извлечена од морето, соопшти руското министерство за одбрана.

Министерството наведе дека досега се пронајде телата на 17 жртви.

Во потрагата учествуваат 45 бродови, 15 подводни дронови, 192 нуркачи, 12 авиони и пет хеликоптери. Вчера од морето беше извлечена една црна кутија од паднатиот авион, чија содржина во моментов се анализира во Москва.

Дешифрирањето на црните кутии со податоци од авионот, кој со 92 патника се урна во Црно Море по полетувањето од Сочи, би можело да трае неколку недели.

Досега се пронајдени повеќе од 1.500 делови од авионот, а третина од нив веќе се извлечени на површина.


Авион во Индија излетал од пистата, повредени 15 лица


Њу Делхи, 27 декември, 2016 - 10:11 (META) 

Авион на индиската авиокомпанија  „Џет ервејз“ се излизга од пистата на аеродромот во Гоа, на западот на Индија, а во инцидентот потешко се повредени 15 лица, соопштија индиските власти.

Сите патници биле евакуирани, јавуваат индиските медиуми.

Причината за несреќата сè уште не е позната, а во авионот кој во моментот на инцидентот се подготвувал да полета за Мумбај, се наоѓале 161 патник и членови на екипажот.

Авионот подоцна успешно полетал.

Гоа е позната по големите песочни плажи и секоја година за време на божиќните празници ја посетуваат неколку илјади туристи.


Пронајдена црната кутија на рускиот авион што се урна во Црно Море


Москва, 27 декември, 2016 - 9:22 (META) 

Истражните тимови ја пронашле црната кутија од рускиот воен авион кој завчера се урна во водите на Црно Море, при што загинаа 92 патници и членови на екипажот, јавуваат светските медиуми, повикувајќи се на информации од лица вклучени во истрагата.

Полициски извори за агенциите соопштиле дека црната кутија е извлечена на површина и наскоро треба да биде однесена од Сочи во Москва, каде податоците треба да бидат дешифрирани од стручен тим на министерството за одбрана на Русија.

Во меѓувреме, дел од агенциите, повикувајќи се на неименувани извори, пренесуваат дека Русија ги приземјила сите авиони од типот „тупољев 154“, кои потекнуваат од времето на Советскиот Сојуз, додека истрага не ги утврди причините за падот на леталото од истиот тип.

Авионот на руското министерство за одбрана се урна кратко по полетувањето од аеродромот во Сочи.

Меѓу настраданите во несреќата се 64 члена на познатиот ансамбл „Александров“, како и девет новинари.


Почина стјуардесата што го преживеа падот на авионот на ЈАТ


Белград, 24 декември, 2016 - 13:16 (META) 

Стјуардесата на некогашната авиокомпанија ЈАТ, Весна Вуловиќ, позната по тоа што беше единствената што го преживеа падот на авионот над тогашната Шехословачка, почина во Белград на 67-годишна возраст.

Како што пренесоа локалните медиуми, таа починала пред неколку дена, но нејзините пријатели го пронашле телото вчера, во нејзиниот стан во Белград.

Весна Вуловиќ е запишана во Гинисовата книга на рекорди како единствена личност што преживеала пад без падобран од 10.160 метри.

Несреќата се случи во 1972 година, а Вуловиќ ја преживеа експлозијата затоа што била врзана за седиште на опашката на авионот ДС-9, која заедно со тоалетите паднала на снег.

По целосното закрепнување на фрактурата на черепот, скршениците на двете нозе и на три пршлени, таа продолжи да работи во ЈАТ.


Киднаперите на либискиот авион бараат азил во Европа


Валета, 24 декември, 2016 - 10:32 (META) 

Двајца Либијци кои киднапираа авион на домашна авиокомпанија и во петокот принудно го слетаа на Малта, бараат азил во Европа.

Тие бараат и основање на нова политичка партија во чест на покојниот диктатор Моамер ел Гадафи, соопштија властите од Малта.

Полицијата соопшти дека против нив ќе биде поднесено обвинение.

Стручњаци за безбедност сè уште проверуваат дали во авионот има експлозив или некое друго оружје, а сè уште трае и испрашувањето на патниците и нивната проверка за да се утврди дека меѓу нив нема други киднапери.

Еден од патниците за локална телевизија изјава дека патниците се „заробени“ во автобуси на аеродромот во Малта и дека не им е дозволено да ги напуштат.

Либиската авиокомпанија соопшти дека испратила чартер-лет на Малта за да се вратат патниците во Либија.

Меѓународниот аеродром на Малта соопшти дека поради инцидентот, откажани се 44 летови.


Киднаперите на авионот на либиската компанија ги ослободиле патниците


Валета, 23 декември, 2016 - 16:03 (META) 

Киднаперите на авионот на либиската компанија „Африка ервејз“, кој летал од Себа до Триполи, но беше пренасочен кон Малта, ги ослободиле сите 111 патници од авионот, пренесува „Тајмс оф Малта“.

Сите патници, меѓу кои имало и жени и деца, успешно биле евакуирани од авионот.

Премиерот на Малта, Џозеф Мискат, на „Твитер“ напишал дека сите членови на екипажот се ослободени, но дека во авионот најверојатно се наоѓаат уште двајца киднапери и можеби уште неколку членови на екипажот.

Според пишувањата на светските медиуми, киднаперите барале од затвор да се ослободи синот на убиениот либиски лидер, Муамер ел Гадафи.