Претседателот на Социјалдемократската партија на Србија, Борис Тадиќ, денеска оцени дека Македонија треба да се остави сама да ги регулира своите односи и дека во овој момент треба „да се спушти топката“ затоа што во спротивно последиците би можеле да бидат катастрофални.
– Постојат тензии помеѓу поединечни политичари од Македонија и од Србија – размена на крошеа, боксерски речник. Мислам дека тоа е многу погрешно и спротивно на нашите заеднички интереси. Треба да се спушти топката и да се остави Македонија сама да ги регулира своите односи. Секое мешање и секој негативен или погрешен гест на соседните држави би можел да биде катастрофален, имајќи ја предвид запаливоста на моменталната ситуација – вели Тадиќ.
Поранешниот претседател на Србија оцени дека ситуацијата во регионот е опасна и дека особено внимание предизвикува тоа што ЕУ веќе не е толку силна и што нејзините институции се доведени во прашање.
