Денешното рочиште од судскиот процес за случајот „Труст“, во кој првообвинет е бизнисменот Сеад Кочан се одложи, бидејќи во Кривичниот суд не се појави адвокатката Сања Алексиќ, која го брани второобвинетиот Василије Авировиќ.
Причина за денешното отсуство е тоа што адвокатката се разболела, а за тоа ја известила и судијката, која следното рочиште го закажа за 20 февруари.
Инаку, судењето за случајот „Труст“ на Специјалното јавно обвинителство е во завршна фаза, односно одбраната треба да ги презентира своите докази, по што се очекуваат завршните зборови и пресдудата.
Во овој предмет покрај Кочан, Авировиќ и Сафет Ватиќ обвинети се и фирмите „Трансмет“, „Силекс“ и „Вато“ ДООЕЛ. Тие се товарат дека со фалсификувани документи добиле тендер на Електрани на Македонија (ЕЛЕМ) вреден 17 милиони евра.
Денеска во Кривичниот суд е закажано рочиште и од судскиот процес за случајот „Тарифа“, каде обвинет е поранешниот директор на ЕЛЕМ, Дејан Бошковски и уште две лица, кои се товарат за незаконска набавка на софтверски систем за потребите на ЕЛЕМ, вреден околу четири милиони евра.
