Генералниот секретар на НАТО, Јенс Столтенберг, денеска, по состанокот на Советот НАТО – Русија, изјави дека двете страни одржале „искрен и сериозен разговор“, без разлика на „длабоките несогласувања“.
По состанокот, кој се одржува по двегодишна пауза, Столтенберг рече дека се потврдени разликите во ставовите и одговорноста во и околу украинската криза.
– Русија ги опишува случувањата во Украина како граѓанска војна, а заборава дека, всушност, таа го дестабилизираше истокот на таа земја, поддржувајќи ги сепаратистите и снабдувајќи ги со оружје и со опрема, па и со финансии – рече Столтенберг.
Амбасадорите на НАТО изразија загриженост поради двата инцидента од минатиот викенд, кога руски авиони изведоа маневри во близина на американски авион кој летал во меѓународен воздушен простор.
НАТО ја суспендираше соработката со Москва во април 2014 година, по руската анексија на Крим во март 2014 година.
Столтенберг и шефот на руската дипломатија оттогаш имаа неколку средби, по кои беа разменети остри коментари.
