Me shuarjen e Prokurorisë Speciale, në Maqedoni do të shuhet edhe shpresa për shtet ligjor


Shkup, 1 Shkurt, 2019 - 11:03 (META) 

Gjykata Supreme e Maqedonisë, si instanca më e lartë gjyqësore në vend, me mendimin e fundit juridik kontrovers me sa duket i ka shuar të gjitha shkënditë e shpresës se udhëheqësit e regjimit të ish-kryeministrit të arratisur Nikolla Gruevski do të përballen me drejtësinë. Pas këtij vendimi mijëra njerëz të cilët brohorisnin “s’ka drejtësi – s’ka paqe” duke marshuar në “Revolucionin e Larmishëm” për mbështetje të Prokurorisë Publike Speciale (PPS) e kanë të qartë se paqja dhe drejtësia këtu jetojnë në adresa të ndryshme.

Në bazë të nismës nga dy ish-avokatë, të të arratisurit Gruevski, Elenko Millanov dhe Boro TasevskiGjykata Supreme e Maqedonisë miratoi opinion ligjor në të cilin thuhet se Prokuroria publike speciale e kryesuar nga Katica Janeva s’ka kurrfarë kompetenca pas kalimit të 18 muajve nga fillimi i punës së kësaj prokurorie.

Afati prej 18 muajsh ka skaduar në mesin e vitit 2017. Me këtë opinion ligjor, ndonëse nuk është obligativ, kontestohet ligjshmëria e të gjitha hetimeve të ndërmarra dhe aktakuzave të parashtruara nga PPS-ja prej asaj date e tutje. Këtu përfshihen lëndë të cilat krahas Nikolla Gruevskit i përfshijnë edhe: kushëririn e Gruevskit dhe ish-shefin e policisë sekrete Sasho Mijallkov, liderin e BDI-së Ali Ahmeti, zëvendëskryeministrin përgjegjës për Integrime Evropiane dhe nënkryetar i BDI-së, Bujar Osmani, biznesmenin Orce Kamçev dhe pothuajse komplet udhëheqësinë e mëparshme, të opozitës së tashme VMRO-DPMNE. Me këtë opinion ligjor, lëkundet edhe aktakuza në lëndën “Talir”, për financim të paligjshëm të partisë konservatore VMRO-DPMNE dhe ndërtimin e selisë së tyre impozante në qendër të Shkupit.

Reagimet e  publikut dhe deklaratat e aktorëve kryesorë sugjerojnë se PPS-ja këto lëndë do t’ia dorëzojë Prokurorisë së përgjithshme dhe Prokurorit publik republikan Ljubomir Joveski. Me këtë, Prokuroria publike speciale – simbol i luftës për sundimin e ligjit dhe shtetit ligjor, si dhe i luftës kundër regjimit represiv autoritar, institucioni që kishte mundësi të mburret për besim në mesin e qytetarëve, që është më i lartë se besimi i çdo politikani apo partie politike në historinë e Maqedonisë së pavarur – do të pushojë së ekzistuari.

Pyetjet kryesore që parashtrohen janë: Kush në fakt ka nevojë që PPS-ja të ekzistojë? Cili pushtet ekzekutiv dëshiron Prokurori speciale, të formuar enkas dhe me autorizime të mëdha? Kush ka propozuar e kush ka pranuar që afati për parashtrim të aktakuzave nga PPS-ja të jetë vetëm 18 muaj?

Përgjigjet e këtyre pyetjeve pjesërisht mund të gjenden në intervistën e ndërmjetësit, për dalje nga kriza politike në Maqedoni në vitin 2016, Peter Vanhojte, për “Vërtetmates”

Në intervistë ai thekson se propozimi fillestar i ekspertëve, të cilët kanë punuar në Ligjin për formimin e PPS-së, ka qenë që afati për parashtrim të aktakuzave të jetë 5 vite, me mundësi për t’u vazhduar. Pas negociatave të gjata, ekipi i kryeministrit aktual, Zoran Zaev i Lidhjes Social Demokratike, sipas Vanhojte, ka propozuar ky afat të jetë dy vite, ndërsa Gruevski dhe VMRO-DPMNE kishin propozuar që afati të jetë vetëm 18 muaj.

“Pas disa diskutimeve mes Gruevskit dhe Zaevit, pavarësisht vërejtjeve të mia ashpra se afati është tepër i shkurtër, ata ranë dakord. Në fakt, nuk kishte negociata mes tyre për këtë çështje. Gruevski tha 18 muaj, Zaev pranoi – ka shpjeguar Vanhojte.

Në fund të intervistës, eksperti holandez thekson se “për sa kohë që liderët e partive politike nuk e pranojnë sistemin e përgjegjësisë, që është vendimtar për një vend demokratik” Maqedonia nuk e ka vendin në BE.


Skandal i ri përgjimi në Maqedoni


Shkup, 10 Dhjetor, 2018 - 15:17 (META) 

S’kanë të ndaluar skandalet në Maqedoni. Pas arratisjes së paradokohshme të ish-kryeministrit Nikolla Gruevski në Hungari, që nuk është sqaruar ende, skandali më i ri është ai të cilin e zbardhi vetë prokurori publik Ljubomir Joveski – se në dy vitet e fundit janë ndjekur dhe incizuar telefonat fiks të të gjithë prokurorëve, për çka menjëherë është ngritur procedurë hetimore paraprake.

Para tre vitesh kryeministrit aktual, asokohe lider i opozitës, Zoran Zaev, filloi transmetimin e të ashtuquajturave “Bomba”, gjegjësisht një sërë bisedash të përgjuara të përfaqësuesve më të lartë të qeverisë së atëhershme të kryesuar nga Gruevski – tani një i arratisur nga drejtësia dhe azilant politik në Hungari.

Për të ndjekur krimet që rezultojnë nga bisedat e përgjuara në Maqedoni u formua Prokurori publike speciale, e cila nisi një sërë procesesh gjyqësore, në të cilat u akuzuan numër i madh i ish zyrtarëve. Konsiderohet se kjo kontribuoi edhe për rënien e pushtetit të Gruevskit.

Pajisja që ishte përdorur atëherë është shkatërruar (PPS-ja pohon se është bërë në mënyrë të paligjshme), ndërsa ndërkohë u formua një agjenci e re e quajtur Agjencia operative-teknike (AOT), e cila duhet të mbikëqyrë nëse dikush përgjon në mënyrë të paligjshme.

Mediat shkruanin se në Maqedoni ka disa pajisje të sofistikuara për përgjim, duke theksuar në mënyrë diskrete se ka mundësi që këto pajisje t’i posedojnë dhe përdorin partitë e mëdha politike.

Aktualisht nuk është qartë nëse, në rastin e fundit, centrali ka pasur mundësi vetëm për të incizuar telefonat fiks të prokurorëve, nëse dikush i ka kopjuar dhe i ka përdorur ato dhe nëse bisedat janë përdorur për shantazh ose detyrim.

Zaev dhe Ministri i Punëve të Brendshme Oliver Spasovski premtonin hetim të plotë, por duket se dëmi është bërë – publiku tashmë vështirë i gëlltitë deklaratat e llojit “askush nuk e përgjon askënd më”, dhe ngritjen e supeve për arratisjen skandaloze përmes tre shteteve dhe katër kufijtë të Gruevskit, për çka, gjithashtu, po zhvillohet hetim.


Kuvendi sot me tre seanca, deri në mesnatë duhet të zgjidhet Qeveria


Shkup, 31 Maj, 2017 - 12:21 (META) 

Krahas seancës së dytë parlamentare, ku pika e vetme është zgjedhja e Qeverisë, në Kuvendin e RM-së sot do të mbahet edhe vazhdimi 21 i seancës konstituive, ku do të debatohet për zgjedhjen kryetarit, zv- kryetarit, anëtarëve dhe zëvendësve të tyre në Komisionit për zgjedhje dhe emërime.

Vazhdimi është i pari në orar ndërsa fillin në orën 10. Në orën 11 do të filloj seanca e tretë ku do të debatohet për propozim- vendimin për themelimin e trupave të përhershëm të punës në Kuvendin e RM, që e dorëzuan deputetët Goran Misovski, Ejup Halimi dhe Ilija Dimovski.

Më pas, në orën 12 do të vazhdoj seanca e dytë që u fillua dje, ku deri në mesnatë duhet të zgjidhet qeveria e propozuar nga mandatari Zoran Zaev.

Seanca filloi dje ndërsa pas shpalosjes së programit nga ana e Zaev, vijuan sulme nga deputetët e Besës dhe BDI-së dhe kandidatët e tyre për ministra si dhe mes LSDM-së dhe VMRO DPMNE-së. Megjithatë, seanca kaloi në shenjë të përplasjes mes kryetarit të Kuvendit, Talat Xhaferi dhe deputetët e VMRO DPMNE-së, Ilija Dimovski, Antonio Miloshoski dhe Vladimir Gjorçev. Xhaferi në moment të caktuar nuk i lejoi Gjorçevit të jep vërejtje procedurale nga foltorja.

Kryetari i Kuvendit deputetëve të VMRO-së iu drejtohej kryesisht në shqip sepse siç tha në fillim Miloshoski, ata nuk e pranojnë për kryetar legjitim, por vetëm i deputet i zgjedhur legjitim dhe kishin vërejtje se nuk guxon si kryetar i Kuvendit të flet në shqip.

Në fjalimin e deputetëve të LSDM-së, krahas urimeve për qeverinë e re dhe paralajmërimet se edhe ata me kujdes do të vëzhgojnë, një prej pikave kryesore ishte respekti i treguar ndaj Vladimir Gjorçev për shkak të mbrojtjes së tij që ua bëri deputetëve në natën e dhunshme të 27 prillit.


Ibrahimi: Qeveria nuk është reformuese, por me kriminelë të ricikluar, nuk votoj për të


Shkup, 30 Maj, 2017 - 16:42 (META) 

“A e dini i nderuari Zaev se cili është dallimi mes reformës dhe riciklimit? Nëse me reformë nënkuptoni se keni zgjedhur çfarë është mirë dhe sot është në taborin tuaj, kjo nuk është e mirë, por se keni bërë riciklim”, e ka porositur mandatarin Zoran Zaev, zv/ koordinatori i grupit të deputetëve të Besës, Zeqirija Ibrahimi.

Ibrahimi në fillim uroi Zaevin, por tha se nuk ka ndërmend të votoj për kabinetin e propozuar qeveritar.

“Ju vetë e thatë së PSP e ka gati padinë për ish ministrin e shëndetësisë nga koha e Gruevskit, andaj sot ju pyes: A e ka refuzuar ajo padinë ose ju e keni falur, z. Zaev. Më tregoni çfarë është ajo që e lidh fjalën reformë me këtë kuadër të BDI-së”, pyeti Ibrahimi.

Sipas deputetit të Besës, me emërimin e disa ministrave shqiptarë, Zaevi sikur t’i ketë dëgjuar Gruevskin dhe Mijalkovin dhe shqiptarëve të rinj u ka porositur: “Mund të vidhni, unë në fund do t’ju bëj zyrtarë dhe do t’ju fal”.


Ka filluar seanca e Kuvendit për zgjedhjen e qeverisë së re


Shkup, 30 Maj, 2017 - 14:07 (META) 

Me vonesë prej gjysmë ore, me debat dhe përplasje rreth përdorimit të gjuhës shqipe mes kryetarit të Kuvendit, Talat Xhaferi dhe deputetëve të VMRO DPMNE-së, filloi seanca e Kuvendit të RM për zgjedhjen e qeverisë së re, ku mandatar është lideri i LSDM-së, Zoran Zaev.

Xhaferi seancën e hapi në gjuhën shqipe, duke i falënderuar të gjithë që e kanë mbështetur, por edhe ata që kanë qenë kundër zgjedhjes së tij për kryetar kuvendi ndërsa më pas vazhdoi në gjuhën maqedonase, duke theksuar se ky gjest është shprehje e shpresës se Kuvendi dhe deputetët me rrugë demokratike  mund t’i realizojnë pritjet e qytetarëve.

Ndaj kësaj reaguan deputetët e VMRO DPMNE-së, Antonio Miloshoski dhe Ilija Dimovski, të cilët Xhaferit nuk iu drejtuan me “kryetar”, por me “deputet Xhaferi”.

Pas përplasjes së shkurtër rreth përdorimit të gjuhëve, Xhaferi vazhdoi të udhëheq seancën në maqedonisht.

Deputeti i VMRO DPMNE-së, Ilija Dimovski kërkoi Kuvendi menjëherë, me procedurë të shkurtër t’i miratojë ndryshimet e Kodit zgjedhor, me të cilat do t’u vazhdohet mandati kryetarëve dhe këshillave të komuna ndërsa si datë për mbajtjen e zgjedhjeve lokale do të jetë 15 tetori.

Xhaferi propozimin e Dimovskit e vendosi në votim, por nuk u mbështet nga shumica.

Ndryshe, në seancë janë thuajse të gjithë deputetët, mes të cilëve edhe kryetari i VMRO DPMNE-së, Nikola Gruevski.

Para godinës së Kuvendit vërehet forca të shtuara të sigurimit policor.


Xhaferi dhe Zaevi hapin premierën e sezonit të ri politik në Kuvend


Shkup, 30 Maj, 2017 - 12:18 (META) 

Në Kuvendin e R. së Maqedonisë, sot në orën 11, fillon procedura për emërimin e Qeverisë së re, që sipas nenit 112 nga Rregullorja, mund të zgjat maksimum dy ditë.

Kjo është seanca e parë me të cilën do të udhëheq Talat Xhaferi dhe e para ku Zoran Zaev do të ketë fjalim në cilësinë e mandatarit.

Pas krizës më të gjatë politike, ku edhe VMRO DPMNE edhe presidenti Gjorge Ivanov akuzonin për tentim të prishjes së karakterit unitar të shtetit, Zaev mori mandatin për formimin e qeverisë së re më 17 maj të këtij viti.

Debati i vetëm për përbërjen dhe programin e qeverisë së re do të duhet të përfundoj me votim deri nesër pas mesnate. Sipas deklaratave të liderëve të partive politike, nga shumica e re parlamentare, nuk pritet të ketë problem sepse mbështetje për Qeverinë e Zaevit premtuan edhe BDI edhe Aleanca për Shqiptarët të cilët janë pjesë e saj, por edhe nga Besa edhe pse nuk do të jetë pjesë e Qeverisë. Me 49 deputetë të LSDM, 10 të BDI, 5 të Besës dhe tre të Aleancës, Qeveria do të ketë mbështetje nga 67 deputetë gjegjësisht pritet të arrihet paragrafi 4 i Rregullores së Kuvendit sipas të cilit, qeveria zgjidhet me shumicë deputetësh nga 120 anëtarë.

VMRO DPMNE pas heshtjes njëditore, dje konfirmoi se deputetët e saj do të marrin pjesë në seancë pasi gjatë ditës disa herë akuzoi se afati që u është dhënë deputetët për shqyrtimin e përbërjes dhe programit të Qeverisë, është shumë i shkurtër.


Nesër në ora 11 seancë parlamentare për zgjedhjen e Qeverisë


Shkup, 29 Maj, 2017 - 12:02 (META) 

Kryetari i Kuvendit të RM-së, Talat Xhaferi dje nga mandatari për formimin e Qeverisë, Zoran Zaev ka pranuar propozimin për përbërjen e Qeverisë dhe programin për mandatin e saj.

Xhaferi menjëherë të dy dokumentet i ka dorëzuar deri tek deputetët ndërsa seancën për zgjedhjen e Qeverisë e ka thirrur për nesër në ora 11, thuhet në kumtesën nga kabineti i tij.

 


Zaev: Me gjithë fuqinë time do të luftoj kundër ndasive që dobësuan shoqërinë


Shkup, 27 Maj, 2017 - 17:39 (META) 

Jetë në Maqedoni për të gjithë. Prej sot ky është obligimi jonë i përbashkët. Kjo nuk është fundi i betejës për jetën që e zgjodhëm. Ky është vetëm fillimi, ka thënë lideri i LSDM-së, Zoran Zaev në fillim të kongresit të 22-të të partisë që është mbajtur sot në hotelin “Aleksandar Palace”.

“Prej sot, para nesh hapet një fushë e madh për ripërtëritjen e shoqërisë dhe jetëve tona. Patjetër duhet të fokusohemi në atë që na bashkon e jo në atë që na ndan. Dallimet janë forca jonë dhe me gjithë fuqinë time do të luftoj kundër ndasive që e dobësuan shoqërinë. Së bashku mundemi”, ka deklaruar Zaev.

Lideri i LSDM-së nga delegatët e pranishëm kërkoi që të jenë të përgjegjshëm sepse, siç tha, sfida është historike.

“Së bashku me shkatërruar regjim me stilograf dhe fjalë. Besoj që ndërgjegjja jonë për partinë dhe qytetarët është në nivel të lartë. Të mos lejojmë të udhëhiqemi nga pasionet e ulëta politike pa marrë parasysh mes nesh apo mes kundërshtarëve tanë politike”, ka shtuar Zaev.

Në mesin e të pranishmëve ishte edhe ish presidenti dhe kryeministri i shtetit, Branko Cërvenovski i cili mori një duartrokitje të fuqishme nga të pranishmit.


LSDM sot në kongres do ta rizgjedh Zaevin


Shkup, 27 Maj, 2017 - 11:24 (META) 

Në hotelin “Aleksandar Palace” në Shkup do të mbahet kongresi i 22-të i rregullt i LSDM, ku krahas pikave tjera, do të bëhet rizgjedhja e Zoran Zaevit për kryetar i partisë si dhe do të zgjidhet përbërja e re e Këshillit Qendror.

LSDM në fillim të muajit shpalli konkurs për vet- kandidim të personave të interesuar për postin e kryetarit të partisë dhe anëtarëve të Këshillit Qendror ndërsa siç njoftuan nga LSDM, Zaev është kandidati i vetëm për funksionin më të lartë.

LSDM paralajmëroi pjesëmarrjen e rreth 700 delegatëve në Kongres. Nuk dihet nëse ata krahas pikave tjera, do të informohen për përbërjen e qeverisë së re, të cilën do ta udhëheq Zaevi sepse bisedimet me partitë nga blloku shqiptar me BDI-në, Besën dhe Aleancës për shqiptarët nuk janë shterur.

Zaev dje për pamjen e qeverisë së re dhe zgjidhjet kadrovike bisedoi me Ali Ahmetin, Zijadin Selën dhe Bilall Kasamin ndërsa paralajmëroi se bisedimet do të vazhdojnë edhe sot, nëse ngel kohë pas kongresit ndoshta edhe nesër.

Nga Besa pas bisedimeve theksuan se partia nuk do të heq dorë nga parimet e saja dhe se nuk do të bëj kompromise lidhur me kërkesat e partisë të adresuara për LSDM-në.

Kreu i LSDM-së shprehi shpresë se deri nesër do të përmbyllen bisedimet, që gjatë javës së ardhme Maqedoni të ketë qeveri të re reformuese.


Zaev: Vështirë që sonte do ta dorëzoj përbërjen e Qeverisë në Kuvend


Shkup, 26 Maj, 2017 - 18:01 (META) 

Lideri i LSDM-së dhe mandatari për përbërjen e Qeverisë së re, Zoran Zaev sot para takimit me kreun e Lëvizjes Besa, Bilall Kasami në Kuvendin e Maqedonisë, ka deklaruar se thuajse s’ka gjasa që sot ta dorëzoj në Kuvend përbërjen e Qeverisë së re.

“Nuk besoj që sot do të arrijmë. Bëjmë përpjekje. Kjo varet nga të gjitha partitë politike. Para pak kohe u pamë me dy partitë tjera ndërsa tani do të takohemi me Besën. Di të bisedojmë deri vonë, por vështirë se sot do të dorëzoj propozim me emrat e ministrave për përbërjen e re të Qeverisë”, ka thënë Zaev.