Ahmeti takohet me Shvajcer Blum dhe Samuel Zhbogar për formimin e Qeveris së re


Shkup, 19 Maj, 2017 - 23:34 (META) 

Në Ambasadën amerikane në Shkup, lideri i Bashkimit Demokratik për Integrim (BDI), Ali Ahmeti ka zhvilluar takim të përbashkët pune me zëvendësambasadoren e SHBA­së në vend Mikaela Shvajzar Blum dhe ambasadorin e Bashkimit Evropian në Maqedoni Samuel Zhbogar.

Ahmeti, siç thuhet në kumtesën e BDI-­së, me bashkëbiseduesit ka biseduar rreth zhvillimeve në lidhje me formimin e qeverisë së re reformuese me ç’rast ka përsëritur që BDI është e përkushtuar tërësisht për t’i zbatuar reformat e kërkuara nga komuniteti ndërkombëtar, integrimin në NATO dhe në Bashkimin Evropian, marrëdhënie të mira ndëretnike, por edhe zhvillim ekonomik dhe hapje të vendeve të reja të punës.

“Hapat e parë që do t’i ndërmerr shumica e re parlamentare janë zgjidhja e ngërçit me pushtetin lokal, si dhe shfuqizimi i testimit ekstern si dy çështje urgjente”, ka theksuar Ahmeti në takim.

Ai më tutje ka thënë se 16 vitet e fundit, sa është aktiv në suazat e BDI-së, “asnjëherë nuk ka pasur dëshpërim në qëndrimet miqësore dhe qëllimmira të komunitetit ndërkombëtarë” dhe në këtë kontekst ka kërkuar nga SHBA-ja dhe BE-ja që të ndihmojnë në integrimin sa më të shpejtë të Maqedonisë në NATO dhe BE.

Ndryshe, sot në selinë e LSDM-së, është mbajtur takimi i parë mes liderit të partisë dhe mandatarit Zoran Zaev me kreun e BDI-së, Ali Ahmeti, në suazat e bisedimeve për formimin e Qeverisë së re.

 


Kocijançiq: Durim, deri më 24 maj do të mësoni kush do të darkoj me Mogerinin


Bruksel, 19 Maj, 2017 - 15:03 (META) 

Komisioni Evropian tani për tani nuk zbulon kush do të udhëtoj në Bruksel për takim me përfaqësuesen e lartë të BE-së për politikë të jashtme, Federike Mogerini, a do të jetë kryeministri teknik Emil Dimitriev ose Zoran Zaev.

“Për momentin mund të them se ftesat janë dërguar deri tek kryeministrat ndërsa emrat e pjesëmarrësve do të konfirmohen pak para vizitës. Do ju lutja për durim, por deri më 24 maj do të mësoni kush do të vij” ka thënë zëdhënësja e Mogerinit, Maja Kocijançiq, duke u përgjigjur në pyetjen kush do të jetë në takim dhe nëse Zaev do të fitoj ftesë të posaçme nëse nuk arrin deri atëherë zyrtarisht ta formojë Qeverinë.

Lidhur me zgjidhjen e papritur të shpejtë të situatës në Maqedoni dhe Shqipëri, Kocijançiq, megjithatë nuk deshi të saktësoj nëse presioni i fundit efektiv në të dy shtetet është bërë nga BE-ja apo SHBA-ja.

“Nuk besoj se bëhet fjalë për çudi, por se kjo është rezultat i punës së palodhshme të vullnetit politik. Kur flasim për Ballkanin Perëndimor, është rajon me perspektivë evropiane ku BE është e angazhuar. Kjo ka të bëjë me Ish Republikën Jugosllave të Maqedonisë. Siç patë, ne reaguam ndaj këtij zhvillimi të ngjarjeve dhe do të vazhdojmë t’i mbështesim të dy vendet, por edhe mbarë rajonin. E dini se përfaqësuesja e lartë për politikë të jashtme menjëherë ftoi gjashtë kryeministrat të vendeve të Ballkanit Perëndimor në darkë joformale javën e ardhshme në Bruksel, më 24 maj, ku do të diskutohet për të gjitha ngjarjet në Ballkanin Perëndimor dhe si të vazhdohet më tej. Për ne rajoni është prioritet dhe do të jemi fuqishëm të angazhuar dhe të përkushtuar”, ka thënë Kocijançiq, duke u përgjigjur në pyetjen e gazetarëve se si për kohë kaq të shkurtër është arritur të rregullohet situata në Maqedoni dhe Shqipëri.


Dankan: U bëjmë thirrje liderëve politikan të punojnë në interes të qytetarëve


London, 17 Maj, 2017 - 22:41 (META) 

Ministri britanik për Evropë, sir Alan Dankan, ka përshëndetur vendimin e presidentit Gjorge Ivanov që t’i mundësoj shumicës së re parlamentare në krye me kryetarin e LSDM-së, Zoran Zaev që të formojë Qeveri.

“E përshëndes vendimin e Kryetarit Ivanov që mundëson shumicën parlamentare të udhëhequr nga Zoran Zaev të formojë qeveri. Ky është një hap i rëndësishëm për të ecur para. Mbretëria e Bashkuar u bën thirrje të gjithë liderëve politik të punojnë në mënyrë konstruktive dhe në interes të Maqedonisë dhe të tërë popullatës. Ne qëndrojmë të gatshëm t’i mbështesim këto përpjekje dhe ta mbështesim Maqedoninë në ambiciet e saja për NATO-në dhe BE-në”, thuhet në deklaratën e shkruar të Dankan.

 


Beogradi këmbëngul në BE për zgjidhje të qetë të krizës në Maqedoni


Beograd, 5 Maj, 2017 - 12:53 (META) 

Diskursi publik i cili thërret në dhunë, në mungesë të dialogut esencial mes Beogradit dhe Prishtinës dhe mos- stabiliteti në Maqedoni, paraqesin kërcënim serioz dhe të hapur për qetësi në Evropën Juglindore- është porosia kryesore e dokumentit jozyrtar që ministrja serbe për integrime evropiane, Jadranka Joksimoviq dhe drejtori i Zyrës për Kosovë, Marko Gjuriq, ia kanë dorëzuar ambasadorëve të vendeve- anëtare të BE-së në Beograd.

Në dokumentin i cili është dorëzuar në takimin e Qeverisë së Serbisë, Beogradi këmbëngul në kërkesën për zgjidhje të baraspeshuar dhe të qetë politike për krizën e Maqedonisë si dhe për respektim të pakusht të normave ndërkombëtare lidhur me respektimin e integriteti territorial dhe sovranitetit të shteteve të pranuara ndërkombëtare dhe “refuzimin e dhunës si mjet për realizimin e synimeve politike”.

Gjithashtu Serbia apelon të gjithë aktorët relevant ndërkombëtar “të dënojnë retorikën agresive e cila e fut rajonin e Ballkanit Perëndimor në përplasje dhe ndasi të reja” dhe apelon “për vazhdim urgjent të dialogut mes Beogradit dhe Prishtinës për normalizimin e marrëdhënieve” nën patronazhin e BE-së.

Në dokument përmenden shembujt e ri të “deklaratave jopërgjegjëse dhe provokuese dhe retorikës agresive” të liderëve politik në Shqipëri, Kosovë, në jug të Serbisë, me vlerësim se bëhet fjalë për lëvizje të koordinuara për promovimin e idesë për “Shqipëri të Madhe”.


Mogerini- Xhaferi: Roli i kryetarit të Kuvendit duhet të jetë mbi interesat partiake dhe etnike


Bruksel, 4 Maj, 2017 - 22:55 (META) 

Përfaqësuesja e lartë për politikë të jashtme dhe siguri pranë BE-së, Federike Mogerini, sot pasdite është takuar me kryetarin e porsazgjedhur të Kuvendit të RM-së, Talat Xhaferi, në suazat e vizitës së tij zyrtare në Bruksel.

Mogerini, siç njoftojnë nga kabineti i saj, ka përshëndetur zgjedhjen e Xhaferi për kryetari kuvendi dhe ka theksuar se është rol që duhet të jetë mbi politikat partiake dhe etnike dhe në interes të të gjithë qytetarëve dhe komuniteteve.

“Gjatë bisedave, Mogerini ka përsëriti dënimin e ashpër të BE-së ndaj dhunën e javës së kaluar në Kuvend ndaj deputetëve dhe gazetarëve. Ajo ka përshëndetur emërimin e Talat Xhaferit për kryetar kuvendi nga shumica parlamentare, duke theksuar se ky rol duhet të jetë mbi politikat partiake dhe etnike. BE është e gatshme të punojë me të, me Kuvendin dhe gjithë institucionet e tjera për të avancuar Reformat Urgjente Prioritare si dhe implementimin e Marrëveshjes së Përzhinës. BE pret që të gjitha partitë politike të angazhohen në mënyrë konstruktive në procesin politik, përfshirë formimin e Qeverisë “ ka thënë Mogerini.

Ajo më tej ka thënë se BE pret të gjitha partitë politike në mënyrë konstruktive të përfshihen në procesin politik, në formimin e qeverisë si dhe në punën e Kuvendit të ri.


Zhbogar për “Meta”: Është humbur shumë kohë, të vazhdohet me formimin e institucioneve


Shkup, 3 Maj, 2017 - 13:00 (META) 

Shefi i delegacionit të BE-së në Shkup, ambasadori Samuel Zhbogar, sot në Kuvend është takuar me kryetari e sapozgjedhur, Talat Xhaferi, të cilit ia ka shprehur gatishmërinë e BE-së për bashkëpunim me të dhe me këtë institucion.

Në deklaratë për “Meta”, pas mbarimit të takimit, Zhbogar ka thënë se deri më tani është humbur shumë kohë dhe duhet të vazhdohet procesi i formimit të institucioneve, përfshirë edhe qeverinë.

“Sot erdha në Kuvend për t’u takuar me kryetarin Talat Xhaferi dhe për t’ia shprehur gatishmërinë tonë për bashkëpunim me Kuvendin dhe me të për reformat e nevojshme, që vendi të ec përpara. Është humbur shumë kohë dhe tani duhet vazhduar përpara, është koha të vazhdohet me procesin e formimit të institucioneve, përfshirë këtu edhe Qeverinë, që të mund të punojmë në çështjet e rëndësishme për shtetin, siç janë reformat dhe ringjallja e ekonomisë. Me Xhaferin kemi biseduar për punën e tij në të ardhmen. Diç që konsiderojmë se është shumë e rëndësishme të arrijë deri tek të gjithë në shoqëri, në kuvend dhe të gjithë të pajtohen rreth prioriteteve të shtetit, që janë edhe prioritete të BE-së që vendi të lëviz drejt rrugës euro- atlantike”, ka thënë Zhbogar për “Meta”.

Kryetari i sapoemëruar i Kuvendit, Talat Xhaferi, sot në mëngjes pa probleme është futur në institucionin ligjvënës dhe në hapësirat e punës gjegjësisht në kabinetin të cilin dje e okupuan deputetët e VMRO DPMNE-së dhe Koalicionit për Maqedoni më të mirë.

Talat Dzaferi i Samuel Zbogar


Plomp: Hapi i ardhshëm është formimi sa më shpejtë i Qeverisë


Shkup, 3 Maj, 2017 - 0:11 (META) 

“Vlerësoj se është pozitiv fakti që Kuvendi arriti të konstituohet si dhe të zgjidhet kryeparlamentari i pranuar qartazi nga BE-ja dhe SHBA-të. Hapi i radhës do të duhej të jetë formimi i Qeverisë së re, sa më shpejtë, aq më mirë, që vendi të mund të lëvizë para”, ka deklaruar ambasadori i Holandës në Maqedoni, Vaulter Plomp për televizionin Alsat –M”.

Ai konsideron se çfarëdo skenari tjetër nuk do të jetë i dobishëm për Maqedoninë dhe qytetarët.

“Vërtet shpresoj që interesat kombëtare të Maqedonisë do të mbizotërojnë mbi ato personale dhe partiake. Në fund vlerësoj se Kuvendi është vendi i vetëm ku mendimet e ndryshme duhet të ballafaqohen dhe të krijojnë debat të shëndoshë që do ta çojë vendin para”, ka shtuar Plomp.

Ambasadori holandez gjithashtu ka thënë se ka qenë i tronditur kur ka dëgjuar se ç’ka ndodhur të enjten në Kuvend.

Ai shton se hapi i ardhshëm do të ishte “hetimi i plotë dhe ndjekja e autorëve të veprave serioze penale si dhe eventualisht ndaj atyre që kanë lehtësuar apo nuk kanë bërë çmos që të pengojnë diç të tillë.

“Mendoj se ky është zhvillim normal i aktiviteteve pa dallim nëse bëhet fjalë për një vend anëtar të BE-së ose për një vend jashtë BE-së. Por do të them: përfundimisht është e rëndësishme për vendin që pretendon të bëhet anëtar i BE-së”, ka thënë Plomp.


Ministria e Jashtme e Rusisë: Protestuesit kundërshtuan “dhunuesit”


Moskë, 28 Prill, 2017 - 16:57 (META) 

Ministria e jashtme ruse sot ka shprehur shqetësim për ngjarjet e djeshme në Kuvend ndërsa shkakun e drejtoi tek opozita e cila duke shkelur procedurat ka zgjedhur kryetari kuvendi. Si rezultat i kësaj, thonë nga Ministria, ka ndodhur “rrëmujë ku janë përfshirë protestuesit që kanë kundërshtuar “dhunuesit”, prej të cilëve një pjesë është hospitalizuar.

MPJ-ja ruse vlerëson se “incidenti ka qenë i planifikuar paraprakisht” dhe se është edhe një tregues më shumë për involvim nga jashtë në çështjet e brendshme të Maqedonisë.

“Përfaqësues zyrtarë të BE-së, ambasadorë të disa vendeve evropiane dhe SHBA-ve, menjëherë përshëndetën “kryetarin e ri” të Parlamentit i cili është ish komandant i UÇK-së pro- shqiptare. Kjo përgjigje e koordinuar është tregues se incidenti ka qenë i planifikuar prej më herët me pajtueshmëri të heshtur nga “kuratorë të jashtëm” të opozitës në Maqedoni. Kjo edhe njëherë konfirmon tezën se shkaku kryesor për krizën aktuale politike në Maqedoni është involvimi i jashtëm në punët e brendshme të vendit”, thonë nga MPJ-ja ruse.

Prej atje shtojnë se “zhvillimi i mëtutjeshëm i skenarit për ridefinim të vendit në bazë të Platformës së Tiranës mund të sjell nxitje të mëtutjeshme të tensioneve, që çojnë drejt konfliktit, përfshirë edhe në bazë etnike.


Mogerini: Atë që e pamë në Shkup është shumë e dhimbshme


Bruksel, 28 Prill, 2017 - 12:44 (META) 

Atë çfarë pamë dje në Shkup është veçanërisht shqetësuese dhe shumë trishtuese për të gjithë ne, ka deklaruar sot në Valetë të Maltës, përfaqësuesja e lartë për politikë të jashtme dhe për siguri të BE-së, Federika Mogerini.

Ngjarjet e mbrëmshme në Kuvendin maqedonas ishte tema kryesore që para gazetarëve e hapi Mogerini, pak para fillimit të takimit joformal të ministrave të jashtëm të vendeve- anëtare të BE-së dhe kandidatëve për anëtarësi në BE, Maqedonia, Shqipëria, Mali i Zi, Serbia dhe Turqia.

“Ajo që pamë dje në Shkup është veçanërisht shqetësuese dhe shumë e trishtuar për të gjithë ne. Dhunën gjithmonë e vlerësojmë papranueshme, aq më tepër kur kjo ndodh në një shtëpi të demokracisë – në Parlament. Ne besojmë se të gjithë në Shkup duhet të ndjekin parimet e Kushtetutës, demokracisë dhe të përpiqen për të nxjerrë vendin nga kjo krizë e rëndë, e cila mund të jetë e rrezikshme’, tha Mogerini.

 

Në takim, siç njoftuan sot nga MPJ, me ftesë të Mogerinit merr pjesë edhe shefi në largim i diplomacisë së Maqedonisë, Nikola Poposki.

 


Mogerini dhe Han: Dhuna në Kuvend është e papranueshme, apelojmë për maturi


Bruksel, 27 Prill, 2017 - 23:59 (META) 

“Në mënyrën më të ashpër dënojmë sulmet e sotme ndaj anëtarëve të Parlamentit në Shkup. Dhuna në Parlament është tërësisht e papranuar dhe bëjmë thirrje për qetësim dhe maturi”, thuhet në deklaratën e përbashkët të përfaqësueses së lartë për politikë të jashtme dhe siguri në BE, Federika Mogerini dhe euro- komisarit për zgjerim, Johanes Han.

Ata i bëjnë thirrje MPB-së dhe policisë që të krijojnë kushte për siguri në Kuvend dhe për deputetët.

“Demokracia duhet të vazhdojë në rrugën e saj. Ne mirëpresim pozitivisht në zgjedhjen e Talat Xhaferi, si kryetar i Parlamentit. Bashkimi Evropian është i bindur se dialogu politik në institucione është e vetmja rrugë për të shkuar përpara dhe nxisim të gjithë aktorët politikë të respektojnë Kushtetutën e vendit dhe të veprojë në frymën e parimeve demokratike, dinjitetin dhe arsyen e shëndoshë. Ish Republika Jugosllave e Maqedonisë është një vend kandidat për në BE dhe BE-ja është e gatshme të punojë me Parlamentin në reformat e nevojshme që do të ndihmojë pranimin e saj në union”, thuhet në deklaratën e Mogerinit dhe Hanit.