Me shuarjen e Prokurorisë Speciale, në Maqedoni do të shuhet edhe shpresa për shtet ligjor


Shkup, 1 Shkurt, 2019 - 11:03 (META) 

Gjykata Supreme e Maqedonisë, si instanca më e lartë gjyqësore në vend, me mendimin e fundit juridik kontrovers me sa duket i ka shuar të gjitha shkënditë e shpresës se udhëheqësit e regjimit të ish-kryeministrit të arratisur Nikolla Gruevski do të përballen me drejtësinë. Pas këtij vendimi mijëra njerëz të cilët brohorisnin “s’ka drejtësi – s’ka paqe” duke marshuar në “Revolucionin e Larmishëm” për mbështetje të Prokurorisë Publike Speciale (PPS) e kanë të qartë se paqja dhe drejtësia këtu jetojnë në adresa të ndryshme.

Në bazë të nismës nga dy ish-avokatë, të të arratisurit Gruevski, Elenko Millanov dhe Boro TasevskiGjykata Supreme e Maqedonisë miratoi opinion ligjor në të cilin thuhet se Prokuroria publike speciale e kryesuar nga Katica Janeva s’ka kurrfarë kompetenca pas kalimit të 18 muajve nga fillimi i punës së kësaj prokurorie.

Afati prej 18 muajsh ka skaduar në mesin e vitit 2017. Me këtë opinion ligjor, ndonëse nuk është obligativ, kontestohet ligjshmëria e të gjitha hetimeve të ndërmarra dhe aktakuzave të parashtruara nga PPS-ja prej asaj date e tutje. Këtu përfshihen lëndë të cilat krahas Nikolla Gruevskit i përfshijnë edhe: kushëririn e Gruevskit dhe ish-shefin e policisë sekrete Sasho Mijallkov, liderin e BDI-së Ali Ahmeti, zëvendëskryeministrin përgjegjës për Integrime Evropiane dhe nënkryetar i BDI-së, Bujar Osmani, biznesmenin Orce Kamçev dhe pothuajse komplet udhëheqësinë e mëparshme, të opozitës së tashme VMRO-DPMNE. Me këtë opinion ligjor, lëkundet edhe aktakuza në lëndën “Talir”, për financim të paligjshëm të partisë konservatore VMRO-DPMNE dhe ndërtimin e selisë së tyre impozante në qendër të Shkupit.

Reagimet e  publikut dhe deklaratat e aktorëve kryesorë sugjerojnë se PPS-ja këto lëndë do t’ia dorëzojë Prokurorisë së përgjithshme dhe Prokurorit publik republikan Ljubomir Joveski. Me këtë, Prokuroria publike speciale – simbol i luftës për sundimin e ligjit dhe shtetit ligjor, si dhe i luftës kundër regjimit represiv autoritar, institucioni që kishte mundësi të mburret për besim në mesin e qytetarëve, që është më i lartë se besimi i çdo politikani apo partie politike në historinë e Maqedonisë së pavarur – do të pushojë së ekzistuari.

Pyetjet kryesore që parashtrohen janë: Kush në fakt ka nevojë që PPS-ja të ekzistojë? Cili pushtet ekzekutiv dëshiron Prokurori speciale, të formuar enkas dhe me autorizime të mëdha? Kush ka propozuar e kush ka pranuar që afati për parashtrim të aktakuzave nga PPS-ja të jetë vetëm 18 muaj?

Përgjigjet e këtyre pyetjeve pjesërisht mund të gjenden në intervistën e ndërmjetësit, për dalje nga kriza politike në Maqedoni në vitin 2016, Peter Vanhojte, për “Vërtetmates”

Në intervistë ai thekson se propozimi fillestar i ekspertëve, të cilët kanë punuar në Ligjin për formimin e PPS-së, ka qenë që afati për parashtrim të aktakuzave të jetë 5 vite, me mundësi për t’u vazhduar. Pas negociatave të gjata, ekipi i kryeministrit aktual, Zoran Zaev i Lidhjes Social Demokratike, sipas Vanhojte, ka propozuar ky afat të jetë dy vite, ndërsa Gruevski dhe VMRO-DPMNE kishin propozuar që afati të jetë vetëm 18 muaj.

“Pas disa diskutimeve mes Gruevskit dhe Zaevit, pavarësisht vërejtjeve të mia ashpra se afati është tepër i shkurtër, ata ranë dakord. Në fakt, nuk kishte negociata mes tyre për këtë çështje. Gruevski tha 18 muaj, Zaev pranoi – ka shpjeguar Vanhojte.

Në fund të intervistës, eksperti holandez thekson se “për sa kohë që liderët e partive politike nuk e pranojnë sistemin e përgjegjësisë, që është vendimtar për një vend demokratik” Maqedonia nuk e ka vendin në BE.


Sërish zgjedhje në Maqedoni, këtë herë presidenciale


Shkup, 21 Janar, 2019 - 15:06 (META) 

Në Republikën e Maqedonisë në prill të këtij viti, do të mbahen zgjedhjet e gjashta presidenciale. Zgjedhjet presidenciale, siç parasheh Kushtetuta, duhet të shpallen 60 ditë para skadimit të mandatit të kreut aktual të shtetit. Mandati i dytë pesëvjeçar i presidentit aktual Gjorge Ivanov skadon më 12 maj.

Edhe pse deri tani asnjë parti politike s’ka dalë me kandidat për president të Republikës, disa politikanë po shfaqin interes për t’u përfshirë në garën për “baba të shtetit”, duke u paraqitur shpesh në publik dhe në media.

Kryeministri Zoran Zaev në deklaratën e fundit theksoi se në lojë janë një duzinë emrash, si kandidatë për zgjedhjet presidenciale nga partia e tij LSDM, dhe paralajmëroi se organet më të larta partiake këtë fundjavë do të diskutojnë dhe do ta përmbyllin këtë çështje.

Deri më tani si kandidatë të mundshëm të LSDM-së, në publik, përmenden kandidati i fundit për president Stevo Pendarovski, ministrja e mbrojtjes, Radmilla Shekerinska, ministri Oliver Spasovski.

Partneri qeveritar, partia BDI, mbetet në qëndrimin se Maqedonia ka nevojë për kandidat konsensual për president, i cili do të jetë i pranueshëm për të gjithë qytetarët e çdo etnie, me interesa strategjike identike me shumicën e qytetarëve të Maqedonisë. Nga kjo parti kanë thënë se kandidat i tillë është profesori Denko Malevski, i cili është i pranueshëm edhe për LSDM-në.

Partia opozitare, VMRO-DPMNE, ka publikuar thirrje publike për aplikime të kandidaturave për president të shtetit, që do të jetë e hapur deri më 31 janar. Kandidati presidencial do ta zgjedhet nga 550 delegatë në Konventën e VMRO-DPMNE-së me votim të fshehtë. Kandidati i cili do të merr më së shumti vota nga të gjithë kandidatët, por jo më pak se 1/3 e numrit të përgjithshëm të delegatëve, do të konsiderohet i zgjedhur.

Deputeti nga VMRO-DPMNE, Vllatko Gjorçev i pari publikoi se kandidohet në thirrjen e partisë së tij, për zgjedhje të kandidatit për president të shtetit. Si kandidatë të mundshëm të VMRO-DPMNE-së, përveç Gjorçevit, përmenden edhe disa ish-deputetë dhe ish-ministra të kësaj partie.

Mandati presidencial zgjat pesë vjet. Për President të Republikës, i njëjti person mund të zgjidhet më së shumti dy herë.

Presidenti duhet të jetë nënshtetas i Republikës së Maqedonisë, gjatë zgjedhjeve të jetë të paktën 40 vjeç. Kushtetuta përcakton se kandidat për President të Republikës të mund të propozojnë të paktën 10.000 votues ose të paktën 30 deputetë.

Fushata zgjedhore e kandidatëve për president të Republikës së Maqedonisë fillon 20 ditë para ditës së zgjedhjeve.


Ibrahimi: Qeveria nuk është reformuese, por me kriminelë të ricikluar, nuk votoj për të


Shkup, 30 Maj, 2017 - 16:42 (META) 

“A e dini i nderuari Zaev se cili është dallimi mes reformës dhe riciklimit? Nëse me reformë nënkuptoni se keni zgjedhur çfarë është mirë dhe sot është në taborin tuaj, kjo nuk është e mirë, por se keni bërë riciklim”, e ka porositur mandatarin Zoran Zaev, zv/ koordinatori i grupit të deputetëve të Besës, Zeqirija Ibrahimi.

Ibrahimi në fillim uroi Zaevin, por tha se nuk ka ndërmend të votoj për kabinetin e propozuar qeveritar.

“Ju vetë e thatë së PSP e ka gati padinë për ish ministrin e shëndetësisë nga koha e Gruevskit, andaj sot ju pyes: A e ka refuzuar ajo padinë ose ju e keni falur, z. Zaev. Më tregoni çfarë është ajo që e lidh fjalën reformë me këtë kuadër të BDI-së”, pyeti Ibrahimi.

Sipas deputetit të Besës, me emërimin e disa ministrave shqiptarë, Zaevi sikur t’i ketë dëgjuar Gruevskin dhe Mijalkovin dhe shqiptarëve të rinj u ka porositur: “Mund të vidhni, unë në fund do t’ju bëj zyrtarë dhe do t’ju fal”.


VMRO DPMNE nuk tregon nëse nesër do të merr pjesë në seancën parlamentare


Shkup, 29 Maj, 2017 - 12:15 (META) 

VMRO DPMNE ende nuk ka njoftuar nëse deputetët e tyre do të marrin pjesë në seancën e nesërme parlamentare ku duhet të debatohet lidhur me propozimin e Zoran Zaevit për qeverinë e re.

Seanca e nesërme është e para pas emërimit të Talat Xhaferi për kryetar kuvendi.

Përzgjedhjen e tij, VMRO DPMNE e quajti “jolegjitim, jokushtetues dhe në kundërshtim me Rregullore”.

Nga partia thonë se qëndrimin rreth seancës së nesërme do ta njoftojnë së shpejti, por janë të befasuar nga afati i shkurtë që u është dhënë deputetëve për t’u njoftuar me programin dhe përbërjen e Qeverisë.

Nga 27 prilli, Talat Xhaferi kishte takime kryesisht me ambasadorë

Ndryshe, Xhaferi dje nga mandatari Zaev pranoi propozimin për përbërjen e Qeverisë dhe programit për mandatin e saj. Deri tek kryetari i Kuvendit janë dorëzuar  15 minuta para mesnatës ndërsa Xhaferi menjëherë të dy dokumentet i ka dorëzuar deri tek deputetët ndërsa seancën për zgjedhjen e Qeverisë e ka thirrur për nesër në ora 11.

 


BDI propozon Likën, Osmanin, Saliun, Bektashin, Merkon dhe Durakun për ministra në qeverinë e re


Shkup, 28 Maj, 2017 - 14:48 (META) 

Kryesia e BDI-së në orët e vonshme dje ka marrë vendim që t’i propozoj Hazbi Likën, Bujar Osmanin, Bylent Saliun, Kreshnik Bektashin, Ramiz Merkon dhe Sadulla Duraku për ministra në qeverinë e re.

Hazbi Lika do të jetë kryeministër për sistem politik dhe marrëdhënie mes komuniteteve. Ai në vitet 2005-2009 ishte kryetari i komunës së Tetovës.

Zëdhënësi i BDI-së, Bujar Osmani do të jetë kryeministër për euro- integrime. Ai në vitet 2008-2011 ishte ministër i shëndetësisë.

Sadulla Duraku është propozimi për ministër i ambientit jetësor, për momentin është kryetar i komunës së Likovës ndërsa në Qeverinë e LSDM-së dhe BDI-së ishte ministër i bujqësisë.

Kreshnik Bektashi i cili deri më tani ishte promotor ekonomik në Bruksel do të jetë ministri i ri i ekonomisë, Bylent Saliu është propozuar për ministër i drejtësisë ndërsa Ramiz Merko ministër pa resor.

Lideri i BDI-së, Ali Ahmeti pas mbarimit të takimit deklaroi se është i kënaqur nga propozimet për ministrat e ri. Ai shtoi se mandati i ministrave do të jetë katër vite, pa marrë parasysh a i pëlqen kjo dikujt apo jo.

Në pyetjen e gazetarëve nëse pret Besa të jetë pjesë e Qeverisë së re, Ahmeti tha se këtë nuk mund ta dijë sepse ata bisedojnë me LSDM-në dhe Aleancës për Shqiptarë.

Zëdhënësja e BDI-së, Teuta Arifi tha se këto do të jenë ministrat e ri reformues që do t’i zbatojnë reformat e nevojshme. Ajo konfirmoi se nuk do të jetë pjesë e qeverisë së re dhe se sërish do të kandidohet për kryetare të Tetovës, sepse siç tha, dëshiron t’i zgjidh problemet e tetovarëve.


Zaevi dhe Ahmeti janë dakorduar që të merren vesh në mënyrë më intensive


Shkup, 19 Maj, 2017 - 17:02 (META) 

Lideri i LSDM-së dhe mandatari Zoran Zaev dhe kreu i BDI-së, Ali Ahmeti sot nuk kanë biseduar për zgjidhjet kadrovike të ministrive resor dhe kjo temë është lënë për takimet e radhës, thuhet në njoftimin e shkurtë të LSDM-së pas takimit të dy liderëve.

Temat e takimit të sotëm, që është e para në suazat e bisedimeve mes LSDM-së dhe BDI-së për formimin e qeverisë së re, kanë qenë parimet e bashkëpunimit, qeveria reformuese dhe integrimet në NATO.

“Në periudhën e ardhshme do të intensifikohen dinamika dhe bisedimet mes dy partive, përfshirë edhe partitë që kanë dhënë mbështetjen për përbërjen e qeverisë së re të RM-së, pas çka do të kalohet në zgjidhje konkrete për ministritë resorë”, thuhet në kumtesën e LSDM-së për takimin.


Ahmeti largohet nga LSDM pa dhënë deklaratë, thotë se do të ketë njoftim


Shkup, 19 Maj, 2017 - 16:39 (META) 

Më shumë se dy orë ka zgjatur takimi i sotëm mes liderit të LSDM-së, Zoran Zaev dhe kreut të BDI-së, Ali Ahmeti, në selinë e LSDM-së në kuadër të bisedimeve mes partive për përbërjen e qeverisë së re.

Ahmeti në selinë e LSDM-së ka arritur në 12 e 30 minuta ndërsa është larguar më 14 e 45 minuta. Kreu i BDI-së edhe gjatë largimit nuk u prononcua për mediat dhe vetëm shkurtë deklaroi se partia do të del me kumtesë për rrjedhën e bisedimeve të sotme për përbërjen e Qeverisë.

Pas takimit me Ahmetin, duhet të vijojnë edhe bisedime me përfaqësues të partive tjera nga shumica e re formuar gjegjësisht me Aleancës për Shqiptarë dhe Besën.

Pritet bisedimet të vazhdojnë edhe gjatë fundjavës.


BDI ndjen keqardhje për vrasjen e Idrizit dhe kërkon zbardhjen e rastit


Tetovë, 6 Maj, 2017 - 15:56 (META) 

Bashkimi Demokratik për Integrim kërkon institucionet përgjegjëse të zbardhin motivet për vrasjen e kryetarit të komunës Bogovinjë, Hazbi Idrizi, që sipas asaj që thuhet në njoftim, një asnjë rast nuk është provokuar.

“BDI është tronditur sot thellë nga lajmi për vrasjen e anëtarit të familjes sonë dhe Kryetarit të Komunës së Bogovinës Hazbi Idrizi gjatë kryerjes së punës së tij zyrtare në shërbim të qytetarëve”, thuhet ne letrën e ngushëllimit të BDI-së”, thuhet në kumtesën e BDI-së.


Ambasadorët Ahmetit ia kanë konfirmuar mbështetjen për formimin e qeverisë së re


Tetovë, 3 Maj, 2017 - 23:06 (META) 

Lideri i Bashkimit Demokratike për Integrim, Ali Ahmeti sot në selinë e partisë në Reçicë të Vogël të Tetovës ka realizuar takim me ambasadorin e Britanisë së Madhe Çarls Garet, të Holandës Vauter Plomp, Suedisë Mats Stefanson dhe me Marko Akvatiçi nga ambasada e Gjermanisë, njoftojnë nga partia.

“Në takim mysafirët përshëndetën zgjedhjen e Kryeparlamentarit nga mazhoranca e re në Kuvendin e Maqedonisë si dhe rikonfirmuan mbeshtetjen e plotë të BE­së, për sa i përket formimit sa më të shpejtë të institucioneve ekzekutive, që vendi përmes qeverisë së re reformuese të vazhdojë sa më shpejtë rrugën e proceseve integruese drejt BE-së dhe NATO-s”, njoftojnë nga BDI.

 


Talat Xhaferi emërohet për kryetari kuvendi, protestuesit futen në institucionin ligjvënës


Shkup, 27 Prill, 2017 - 20:17 (META) 

Shumica parlamentare sot pasdite ka zgjedhur deputetin e BDI-së, Talat Xhaferi për kryetar të ri të Kuvendit të RM-së.

Kryesues i seancës konstituive ishte deputeti Ferid Muhiq, si deputeti më në moshë në Kuvend sepse më i moshuari Branko Manojlovski, nuk ishte prezent. Muhiq për zëvendës të tij zgjodhi Goran Misovskin dhe Xhevat Ademin ndërsa zgjedhjen e Xhaferit për kryesues e udhëhoqi Misovski ndërsa në prapavijë në sallën plenare, deputetët e VMRO DPMNE-së brohoritnin “kjo është puç” dhe “turp” duke kënduar himnin e Maqedonisë.

Pasi i emëruar me 61 vota “për”, Xhaferi dha deklaratë solemne dhe firmosi, pas çka u drejtua në gjuhën shqipe. Për zgjedhjen e Xhaferit nuk votuan deputetët e Besës dhe PDSH-së.

Pas emërimit të tij, qytetarët që protestonin nën patronazhin e nismës “Për Maqedoni të Përbashkët” dhe që ishin para hyrjeve kryesore të Kuvendit, u futën brenda.

Policia rreth godinës së Kuvendit tash për tash është në numër të vogël, por sipas të dhënave jozyrtare, njësitet speciale me autoblinda janë drejtuar drejt Parlamentit.