Përfaqësuesit e partive politike shqiptare në Maqedoni, BDI, Besa dhe Aleanca për shqiptarët, sot promovuan “Platformën e përbashkët të partive parlamentare shqiptare në Maqedoni” për, siç thuhet, “realizimin e mandatit e ardhshëm qeveritar dhe/ ose në çdo mandat të mëtutjeshëm”.
Platforma përbëhet nga shtatë pika kryesore ku, mes tjerash, qëndrojnë këto:
- Shqiptarët të konsiderohen si komb shtetformues
- Përdorimi i gjuhës shqipe në të gjitha nivelet e pushtetit
- Kushtetuta e RM të vërtetoj se “gjuha maqedonas dhe shkrimi i saj cirilik dhe gjuha shqipe me shkrimin e saj janë gjuhë zyrtare në RM”.
- Debat gjithëpërfshirës për flamurin, himnin dhe stemën e shtetit me qëllim që “simbolet shtetërore të reflektojnë multietnicitetin shoqërorë dhe barazinë etnike”.
- Miratimi i rezolutës në Kuvendin e RM-së me të cilën do të dënohet gjenocidi ndaj popullit shqiptar në Maqedoni në periudhën 1912-1956
- Formim të një komisioni shtetëror për financim të komunave, për marrjen e vendimeve me të drejtë për grante qeveritare në favor të komunave.
- Përfaqësim të drejtë në organet për siguri, ushtri, kundërzbulim dhe drejtësi
- Përfaqësim të drejtë në të gjithë nivelet e pushtetit qendror si dhe në shërbimet publike apo ndërmarrjet me aksione publike
- Zbardhjen e plotë të çështjeve dhe procedurave gjyqësore si “Sopoti”, “Brodeci”, “Monstra” dhe “Kumanova” përmes një komisionit anketues ose organit të pavarur ndërkombëtarë
- Zgjidhjen e kontestit të emrit, në përputhje me vlerat evropiane dhe parimet e të së drejtës ndërkombëtare.
- Miratim të një rezolute të përbashkët dhe obliguese në Kuvendin e RM me të cilën Qeveria e RM-së obligohet në mënyrë aktive të përfshihet në zgjidhjen e kontestit të emrit
- Përfshirja e shqiptarëve në grupin e punës për bisedimet direkte me Greqinë
- Përfshirja e shqiptarëve në grupin e punës për bisedimet direkte me Bullgarinë
- Bashkëpunim me Kosovën dhe Shqipërinë për menaxhim të integruar kufitar
- Hapjen e kalimeve të reja kufitare
Përmbushja e këtyre qëllimeve do të ndiqet përmes tryezës së rrumbullakët të partive parlamentare shqiptare në përputhje me parimin e rrotacionit, që do të shërbej si platformë për harmonizimin e veprimit politik dhe komunikimit transparent me partnerët ndërkombëtarë të Maqedonisë.
