Управата за безбедност и контраразузнавање (УБК) нема преземено никакви активности што се против која било држава или која било амбасада во Македонија. Ова денеска го изјави министерот за внатрешни работи, Оливер Спасовски, одговарајќи на новинарско прашање во врска со неодамнешното повлекување на целиот персонал на Амбасадата на Србија во Скопје и обвинувањата од Белград за „многу офанзивни разузнавачки активности против Србија во Македонија“.
Спасовски, во тој контекст, рече дека немаат апсолутно никакви активности што можат да ги компромитираат УБК или Министерството за внатрешни работи.
Во врска со насилствата во Собранието од 27 април, министерот за внатрешни работи рече дека важно е да се спроведе целосна истрага за настаните за да се врати кредибилитетот и довербата во институциите.
– Се водат и внатрешни и дисциплински постапки против повеќе припадници на МВР и на УБК и тоа е од исклучителна важност и врвен приоритет за нас, за да се справиме со оваа состојба. Очекувам дека и Јавното обвинителство, особено одделот за организиран криминал, ќе бидат одлучни во однос на постапките против лицата што извршија упад на 27 април во Собранието за да убијат дел од пратениците – рече Спасовски за време на денешната посета на Секторот за внатрешни работи Скопје.
Во врска со посетата на СВР Скопје, Спасовски истакна дека „безбедносната состојба во градот е стабилна и има тенденција на намалување на криминалитетот“. Тој најави дека во наредниот период ќе бидат направени повеќе реформи и активности на терен, затоа што присуството на полицијата на улиците гарантира и поголема безбедност.
