Ништо не е извесено освен дека мандатар за состав на новата влада ќе биде Зоран Заев, изјави денеска пратеникот во Собранието и генерален секретар на СДСМ, Оливер Спасовски, одговарајќи на новинарско прашање дали преговорите за новата влада се водат помеѓу Али Ахмети и Заев и дали е извесна неговата позиција (на Спасовски, н.з.) во владата.
– Во однос на преговорите за влада, прво очекуваме Иванов да го додели мандатот, а понатаму ќе продолжат преговорите помеѓу политичките партии што го сочинуваат парламентарното мнозинство и дури потоа може да разговараме за позиции – рече Спасовски.
Во однос на тоа дали ќе има средба меѓу Заев и претседателот Ѓорге Иванов околу гаранциите за унитарниот карактер на државата, Спасовски рече дека очекуваат одлуката за избор на претседателот на Собранието, Талат Џафери, да излезе во „Службен весник“, а потоа и Заев и СДСМ се подготвени да разговарат со Иванов за доделувањето на мандатот.
Прашан дали одолжувањето на објавувањето на одлуката во „Службен весник“ е обид за опструкција од страна на ВМРО-ДПМНЕ, Спасовски истакна дека е „сигурен во тоа дека некои од директорите сè уште настојуваат да бидат слуги на режимот“ и повика дека одлуката за изборот на Џафери мора да биде објавена уште денеска.
Одговарајќи на прашањето дали очекува оставка од јавниот обвинител Марко Зврлевски во врска со насилствата во Собранието од 27 април, генералниот секретар на СДСМ изјави дека секој што учествувал директно или индиректно – на она што следуваше по насилствата, треба да се повлече од позицијата, да ги ослободи инстутуциите и да овозможи вистинска истрага.
Спасовски истакна дека новата влада ќе спроведе нова истрага, за расчистување на сите дилеми околу настаните во Диво Насеље, Куманово од 9 и 10 мај 2015 година.
– На неколку дена пред годишнината од случувањата во Куманово, сакам да изразам сочувство и вистинско жалење за загубите што ги имаше Министерството за внатрешни работи и Република Македонија. Овој крвав четврток ги покажа сите слабости на системот, пред сè на безбедноста на Македонија, на безбедносните служби, на Министерството за внатрешни работи и ако добро ја гледате програмата на идната влада на Социјалдемократскиот сојуз, таму стои и тоа дека мора да има нова детална истрага што ќе укаже на сите апекти од настаните во Куманово. Тоа мора да биде на еден транспарентен начин, да се расчистат сите можни дилеми – рече Спасовски.
