Министерот за внатрешни работи Оливер Спасовски на денешната работна средба со амбасадорот на Европската унија во Република Македонија, Самуел Жбогар како приоритети на министерството под неговото раководство ги посочил „декриминализацијата и департизацијата на министерството, реформата на безбедносните служби, имплементацијата на Стратегијата за развој на полицијата, како и зајакнување на капацитетите на министерството за борбата против тероризмот и насилниот екстремизам“, се вели во соопштението од МВР.
Евроамбасадорот му го честитал изборот на Спасовски за министер за внатрешни работи и му посакал во текот на мандатот да бидат спроведени реформите во министерството кои ќе значат унапредување на капацитетите на министерството, но и исполнување на превземените обврски кои произлегуваат од Итните реформски приоритети.
„Спасовски ја поздрави најавената посета на Рајнхарт Прибе и групата на искусни експерти и истакна дека тоа се случува во период кога во министерството се прави анализа на досегашното имплементирање на Итните реформски приоритети, при што оцени дека забелешките кои ќе бидат дадени ќе бидат сфатени како корисни насоки за подобрување на состојбите и побрзо спроведување на превземените обврски“, се вели во соопштението од МВР.
