Собранието едногласно ја донесе Декларацијата за членство во НАТО


       
Скопје, 19 јули, 2018 - 12:36 (META) 

Собранието на денешното продолжение на 53. седница ја донесе Декларацијата за поддршка на пристапниот процес за членство на Република Македонија во НАТО, со 76 гласа „за“, без „воздржани“ и „против“.

Пратеникот на ВМРО-ДПМНЕ, Драган Данев, истакна дека неговата партија ќе ја поддржи Декларацијата и ќе даде силен придонес на патот на Македонија за полноправно членство во НАТО.

– Навистина е придобивка да се биде член на овој Сојуз, но истовремено е сериозна одговорност. Членството во НАТО не значи дека веднаш од исток и од југ, од запад и од север ќе се отворат славините и во Македонија ќе тече мед и млеко – рече Данев и додаде дека тоа значи многу работа и обврски за сите граѓани во Македонија, владеење на правото, независно судство, развиен образовен и здравствен систем.

Данев потсети дека ВМРО-ДПМНЕ била онаа политичка опција која во 1990 година се формирала врз три постулата за независна Македонија, влез во европската заедница и во НАТО.

Пратеникот од СДСМ, Хари Локвенец рече дека влезот во НАТО директно носи безбедност и стабилност, но сепак, како што посочи, најголемите индиректни влијанија што ги носи членството не се воени, туку економски бенефиции.