Со традиционалната „Прошетка за Зоран“ и со полагање венци и цвеќе на гробот и на местото на неговото убиство, денеска во Белград е одбележана 14-годишнината од убиството на премиерот на Србија и претседател на Демократската партија, Зоран Ѓинѓиќ.
Членовите на владата на првиот премиер на Србија по падот на режимот на Слободан Милошевиќ и денеска, како секој 12 март, положија цвеќе во дворот на Владата на Србија, на местото каде што е убиен Ѓинѓиќ. Зоран Живковиќ, кој ја презеде должноста по атентатот врз Ѓинѓиќ, на новинарите им кажа, посочувајќи на претседателските избори во Србија кои ќе се одржат во април, дека барем тројца од кандидатите за нов водач на државата се радувале кога Зоран Ѓинѓиќ бил убиен.
„Прошетката за Зоран“ од центарот на градот до гробот на Ѓинѓиќ ја предводеа Чедомир Јовановиќ, претседател на Либерално-демократската партија, како и Ненад Чанак, претседател на Лигата на социјалдемократите на Војводина.
Јовановиќ, некогашен висок функционер на Демократската партија и близок соработник на Ѓинѓиќ, рече дека граѓаните со прошетката покажуваат готовност да се борат за своите животи „онака како што тоа би го правел Зоран Ѓинѓиќ“, кога би бил со нив.
Чанак рече оти фактот дека досега не се откриени и казнети поттикнувачите на атентатот врз Зоран Ѓинѓиќ покажува дека „тоа не беше истрел во човек, туку во идеја“ и дека „додека не се соочиме со минатото, иднината нема да биде поинаква“.
Зоран Ѓинѓиќ, кој како премиер го почна процесот на демократизација на српското општество и коренити економски и социјални реформи, е убиен на 12 март 2003 година во дворот на Владата на Србија, а за неговото убиство на 40 години затвор осудени се офицерот на Единицата за специјални операции (ЈСО) на Државната безбедност, Звездан Јовановиќ, и командантот на ЈСО, Милорад Улемек – Легија. Политичките нарачатели, пак, досега не се откриени.
