Независната меѓународна комисија за истрага во Сирија верува дека владините сили минатата година намерно бомбардирале школски комплекс на северот на земјата, при што загинаа 21 дете.
Комисијата наведува дека нападот на школскиот комплекс во покраината Идлиб под контрола на бунтовниците, претставува воено злосторство, додавајќи дека сириската војска тогаш била единствена која дејствувала со авиони во таа област.
Во извештајот, исто така, се заклучува дека владините сили свесно ја бомбардирале водоводната инфраструктура во сирискиот главен град Дамаск, што го загрозило водоснабдувањето за 5,5 милиони лица.
Владата во Дамаск и нејзините сојузници целосно ги занемариле животите на цивилите и меѓународното право, користејќи касетни бомби и хемиско оружје за време на судирите во Сирија, заклучуваат од ОН.