Премиерот Зоран Заев денеска се сретнал со амбасадорката на Швајцарија во Република Македонија, Сибил Сутер Тејада, која му ја врачила долгорочната стратегија за соработка помеѓу двете земји, со која Швајцарија планира значително да ѝ помогне на Македонија во понатамошниот напредок и развој.
Поддршката се однесува на програми за унапредување на работата на Собранието, програми за унапредување на изборниот процес, како и поддршка за развој на стручното образование во приватниот сектор.
„За новата владина програма амбасадорката истакна дека содржи проекти кои се од значаен интерес за граѓаните и ја изрази подготвеноста на Швајцарија да ги поддржи ваквите проекти за да се унапреди економскиот развој, демократскиот капацитет на водење на земјата на локално и на централно ниво“, информираат од владиниот прес-центар.
Заев ја информирал амбасадорката за реформските процеси од планот „3-6-9“, како и за проектот „Гаранција за млади“ со кој државата на младите ќе им овозможи вработување, практична работа или тренинг.
