fbpx

Што сè содржи договорот со Бугарија

-

Владата синоќа го усвои текстот од договорот со Бугарија, а премиерот Зоран Заев денеска на прес-конференција го презентираше и образоложуваше договорот, кој како што рече ќе биде поставен на сајтот на Владата и достапен за сите да направат увид во договореното.

Договорот е составен од 14 члена со кои се уредуваат економските и билатерланите односи на двете земји, врз база на меѓународното право и добрососедство.

Со член 1 и член 2 се предвидува развивање на сестрана соработка меѓу двете земји, како и соработка во рамки на Обединетите нации, ОБСЕ, Советот на Европа и во други меѓународни организации, но и во областа на европската и евроатлантската интеграција на Македонија.

Со договорот се предвидува развој и соработка со државите од Југоисточна Европа, зајакнување на мирот и стабилноста на регионот и реализацијата на регионални проекти како дел од создавање единствена Европа. Двете влади исто така се обврзуваат за одржување контакти и средби на претставниците на државната и на локалната власт.

Властите на двете држави се обврзуваат да создаваат неопходни правни, економски, финансиски и трговски услови за обезбедување на најшироко можно движење на стоки, услуги и капитал, како и да ја зголемат туристичката соработка, да ги подобрат транспортните врски и комуникациите меѓу нив, вклучително во рамките на регионалните инфраструктурни проекти.

Во делот на соработката во област на културата, образованието, здравството, социјалната грижа и спортот, се предвидува во рок од три месеци од стапувањето на договорот на сила да се формира заедничка мултидисциплинарна експертска комисија за историски и образовни прашања, која врз база на историски докази ќе работи на подготвување на образовните содржини. Двете држави исто така во делот на културното наследство се обрзуваат со заемна согласност заеднички да чествуваат историски настани и личности.

Член 11 од договорот предвидува и двете држави да не преземаат, поттикнуваат и да не поддржуваат дејства насочени против другата земја, кои имаат непријателски карактер, но и да не дозволат нивната територија да биде искористена од организации и групи за загрозување на мирот и безбедноста на другата држава. Исто така, двете земји гарантираат дека немаат територијални претензии една кон друга, но имаат право да ги заштитуваат правата и интересите на своите државјани на територијата на другата дражва, во согласност со меѓународното право.

Со овој член Македонија исто така се обврзува дека нема да се меша во внатрешните работи на Бугарија заради заштита на статусот и правата на Македонците во Бугарија, кои не се државјани на Република Македонија.

Во овој член се предвидува и заедничка борба против говорот на омраза и национализмот, но, како што соопшти премиерот Заев, не се предвидуваат казни, туку оградување на Владата од вакви ставови.

За спроведувањето и за почитувањето на договорот ќе биде формирана заедничка меѓувладина комисија, која ќе одржува редовни седници еднаш годишно.

На крајот се наведува дека договорот стапува на сила откако ќе биде ратификуван од двете држави, но и дека може да биде изменет со писмена согласност од двете страни или раскинат со писмено известување на другата договорна страна. Важноста на договорот во токов случај престанува една година од приемот на известувањето.

Договорот за добрососедство со Бугарија, како што соопшти премиерот Заев, ќе биде потпишан на 1 август во Владата на Република Македонија.

Нашите вести во вашето сандаче

Секој ден во 17 ч. добивајте ги вестите од Новинската агенција Мета директно на вашата електронска адреса.

Ве молиме одберете на кој начин сакате да добивате информации од нас:
Можете да се отпишете од оваа листа преку линкот на крајот од нашите пораки.

Млади иноватори изработија мобилна апликација за помош на дијабетичари

Ѓорѓина Ристовска и Марио Мијатовиќ се млади иноватори кои ја креираа апликацијата ДИА, како асистент на лицата со дијабетес за менаџирање на оваа состојба. Инспирирани од желбата да помогнат...