Никола Груевски се обиде да сокрие дека тој се согласил да има анализа за спроведувањето на Рамковниот договор, обвини денеска Петре Шилегов, портпарол на СДСМ, на прес-конференција која се одржа пред Владата на Република Македонија.
– Груевски сака да сокрие дека Владата стои зад конференцијата за анализа на спроведувањето на Рамковниот договор што треба да се одржува од 1 декември во Скопје. Затоа Груевски измислува приказни за федерализација, за да го покрие овој владин документ. Во договорот со архивски печат во Владата, јасно е наведено дека документот е потпишан помеѓу Владата и Европскиот институт за мир. Сега Груевски ќе мора да излезе и да им објасни на граѓаните која е причината за оваа конференција за анализа на спроведувањето на Рамковниот договор. Очигледно е дека неодговорниот Груевски работи нешто зад грбот на граѓаните – рече Шилегов.
Тој праша дали целта на Груевски е да разгори меѓуетнички тензии во Македонија само за да се спаси себеси. Шилегов вели дека граѓаните знаат дека СДСМ гради единствена Македонија, едно општество за сите граѓани.
– Никола Груевски не сака единствена Македонија, а таа му порачува на Груевски „доста е“. Збогум Никола – рече Шилегов.
