Доколку новинарските здруженија не бидат вклучени во разговорите за медиумите на политичките партии и на белгискиот олеснувач Питер Ванхауте, новинарите ќе протестираат пред Клубот на пратеници, изјави претседателот на Здружението на новинари, Насер Селмани.
Тој реагираше на последните измени на Изборниот законик во кој се вклучени и интернет-порталите и предвидени се глоби од 8.000 евра.
– Најновите измени во Изборниот законик, кои се донесени во нетранспарентна постапка, се скандалозни. Големите казни, пак, ќе го зголемат притисокот врз медиумите, а може да предизвикаат и нивно згаснување. Ова што се случува е недозволиво и бараме Ванхауте итно да нè стави во преговарачкиот процес – изјави Селмани.
За Тамара Чаусидис, претседателка на Самостојниот синдикат на новинари и медиумски работници, ова денеска е предупредувачка прес-конференција до тие што оваа професија ја направија најниско платена.
– Нема да дозволиме зад затворени врати да ни носат решенија. Нема да дозволиме да ни воведат цензура. ССНМ е згрозен од овој чин и од инсистирањето на мала врата да се внесе цензурата во медиумите – изјави Чаусидис.
Илија Димовски, член на работната група на ВМРО-ДПМНЕ, изјави дека владејачката партија е на линија со новинарските здруженија.
– Ние се залагаме за саморегулација на медиумите и за почитување на етичките стандарди. Зголемените казни не се идеја на ВМРО-ДПМНЕ туку на некоја друга политичка партија. Нашиот став е казните да бидат правопропорционални со големината на медиумот. Оние медиуми што се поголеми и што имаат поголем број вработени, треба да имаат поголеми казни и обратно. Сепак, новинарите не треба да се грижат бидејќи тоа ќе биде регулирано во Законот за прекршоци – изјави Димовски.
Пред почетокот на денешната средба на работните групи за медиуми пред Клубот на пратеници, белгискиот олеснувач Питер Ванхауте рече дека преговорите се пролонгирани до петок, кога очекува законите да бидат изгласани во Собранието.
– Не се решени кадровските промени во „Македонската радио-телевизија“ и во Македонската информативна агенција. Треба да се изнајдат долгорочни решенија. Промената на луѓето нема да промени ништо во медиумската сфера. Исто така, комерцијалните медиуми не смееме да ги ограничиме со забрана за реклами затоа што тоа е така во целиот свет. Сепак, очекуваме идната недела да ги разгледаме сите понудени решенија и се надевам дека ќе најдеме конечно решение за да ја заокружеме оваа тема – изјави Ванхауте.
