На 27 април извршен е атентат на политичките барања и политичките потреби на Албанците во Македонија, изјави денеска лидерот на Алијансата за Албанците, Зијадин Села за време на неговото прво излегување во јавност откако беше повреден при нападот во Собрание на 27 април.
-До некаде успеаја да не повредат, меѓутоа ние се вративме, се реинкарниравме уште посилни и пообединети на политичката сцена. Тие што ме нападнаа не ги ни познавам. Тоа беше политички напад и со правните работи други ќе се занимаваат – рече Села.
На новинарско прашање како се одвиваат преговорите со СДСМ за формирање на новата влада, Села рече дека се во постојан контакт и дека за нив најважно е да има „ново владеење“.
– Не се работи за нова власт туку за ново владеење во интерес на граѓаните, владеење кое ќе биде праведно без поделби по никаква етничка верска или каква било основа. Ние ќе го поддржуваме ова владеење без разлика дали ќе бидеме физички присутни во владата. Ние е најважно сега да зборуваме за тематски прашања, прашања кои се важни за граѓаните на Македонија, а не за ресори и поделба на функции – додаде Села.
Генералниот секретар на Движењето за реформи на ДПА, Арбен Таравари рече дека информациите дека тој ќе биде новиот министер за здравство се шпекулации.
Села додаде дека Алијансата нема потпишано никаква гаранција за Зоран Заев да го добие мандатот за формирање влада од претседател Иванов и рече дека унитарноста се брани во Собрание, а не улици и преку протести и дека нема потреба од никакви гаранции затоа што унитарноста се брани со двотретинско мнозинство, а дека ВМРО-ДПМНЕ има 51 пратеник.
Инаку Села во 15 часот ќе се сретне со лидерот на СДСМ, Зоран Заев.
