Основното јавно обвинителство Скопје е во постојана комуникација со Министерството за внатрешни работи во врска со идентификација на учесниците во нередите што се случија во Собранието на Република Македонија, а дежурните јавни обвинители ѝ даваат насоки на полицијата за понатамошното постапување, велат од ОЈО преку соопштение.
„Поради обемноста во постапувањето на обвинителството, до овој момент се вклучени шест јавни обвинители, но во согласност со потребите, бројката на вклучени јавни обвинители се очекува да се зголеми, а сè во насока на брзо и ефикасно расветлување на овие кривично-правни настани. До овој момент не е поставена правна квалификација на извршените кривични дела“, велат од Обвинителството.
Оттаму појаснуваат дека за секое лице за кое ќе се утврди дека сторило кривично дело, ќе се постави конкретната правна квалификација откако ќе се собере потребниот доказен материјал и ќе се утврдат фактите одделно за секое лице.
„Бројот на лицата лишени од слобода, конкретните дејства на истражните органи, како и понатамошните дејства што ќе бидат преземени, јавното обвинителство ќе ѝ ги соопшти на јавноста кога ќе се создадат услови за тоа и откако надлежните јавни обвинители ќе завршат со првично утврдување на фактите“, додаваат од ОЈО.
