Информациите за промена на расположението кај граѓаните кои од ден на ден сè повеќе се противат на погубните политики на обвинетиот Никола Груевски, допираат и до ВМРО-ДПМНЕ, одговараат од опозицискиот СДСМ на реакцијата на ВМРО-ДПМНЕ за писмото што Зоран Заев го испрати до амбасадорите.
„Токму затоа паниката кај ВМРО-ДПМНЕ и кај Груевски од соочување со граѓаните станува сè поочигледна. Токму затоа прават сè за да не се дојде до избори и до понесување одговорност. Токму затоа сите дејства на ВМРО-ДПМНЕ се во насока на минирање на изборите закажани за 11 декември. И токму затоа претседателот на СДСМ, Зоран Заев, упати писмо до амбасадорите во кое укажува на намерите на ВМРО-ДПМНЕ за саботирање на претстојните избори“, велат од СДСМ.
Во соопштението се наведува дека СДСМ е решен изборите да се случат на 11 декември и од тоа не отстапува.
„Изборите се неопходен исчекор кон надминување на политичката криза и кон градење демократски капацитет во државата, вредност која е во интерес и на СДСМ и на граѓаните на Македонија“, велат од СДСМ.
